鬆弛熊

上次Senior G送左隻鬆弛熊俾我，咁得意嘅野，我梗係第一時間Show俾我屋企人睇啦，個個見到佢自己行路都覺得佢好得意，而我侄仔見到佢郁都好開心。

所以我阿嫂早排去日本，都突登去拑公仔嘅地方睇下仲有冇鬆弛熊拑喎，點知又俾佢搵到，仲係戴皇冠添架，不過嫂嫂話呢仔熊係「價值不非」，因為佢用左好多個1000 Yen先拑到。 雖然價值不非，但我姪仔一見佢呢隻態，就會好開心咁飛撲埋去，証明佢個仔真係好鍾意隻公仔吖，都物有所值啦。

第十三堂 - 强差人意

今堂一開始都係拉下scale ，然後就拉上次學嘅歌仔俾老師聽。Scale 如常係拉兩，三次，第一首歌「The First Noel」拉左三，四次到，老師竟然話拉得幾好，可以表演喎。 (其實我知老師只係想鼓勵下學生啫)

但係呢，一到拉「Silent Night」就真係强差人意。因為過去果個星期，我focus拉「The First Noel」，無乜練過「Silent Night」。我唔熟個譜，拉到斷斷續續，轉線時又多雜音，真係好恐怖。拉到老師都頂唔順:「你要練下先得架播!」 見到老師咁失望，我個心都好唔舒服，因為今個星期我又多左飯局，小左時間練琴嘅....

拉左好耐都拉唔好，老師都唔堅持落去，因為佢點都要教啲新野俾我。係屋企明明做唔好拉跳躍拍子嘅技架，咁我咪請教老師囉，老師叫我拉俾佢聽，又唔知做乜喎， 今次破天荒係老師面前又ok喎...(不過事後返到屋企又點拉都拉唔好... 激死我喇~)

由於今堂表現好差，進度好慢，老師只夠時間教一首新歌，所以揀左首好有旋律嘅歌仔。 不過呢，有旋律嘅歌真係有難度囉，我連啲音都未搵啱呀，何來旋律可言吖... 好唔容易先搵晒啲音出嚟... 終於可以落堂lu....

老師發現我無得日日練琴，就介紹左個靜音器俾我。 哈，好神奇架!!! 加左靜音器之後，真係細聲好多架，老師話佢半夜三更先練琴都係靠哩個靜音器喎... 睇嚟我好要需要買番一個靜音器，同埋要多加練習喇...

打敗仗

呢排身子真係弱，成日病... 啱啱個皮膚病先叫做好番晒，但係而家又輪到傷風咳，真係唔係好掂擋。

今次係因為早前媽媽病左，佢就將佢啲病傳染俾我姪仔，而我成日抱我姪仔喎，咁我抱親佢，佢唔係向住我打噴嚏，就係向住我咳。我都心知遲早輪到我架喇... 結果我真係好快就打敗仗。 以前傷風咳，我都唔會即刻睇醫生，不過見屋企有BB，唔想又將啲病傳嚟傳去，所以我都係去左睇醫生，食左藥，個人就呆呆滯滯... 雖然叫做收左鼻水，無喉嚨痛喇，但係就變左咳。

個人病左就無乜心機做野添，成日都想瞓覺，但係瞓又唔瞓得咁好，啲藥都就嚟食晒喇，唔知幾時先好呢?!

第十二堂

話咁快又一個月喇，雖然老師話我進步左好多，但我又越來越覺得自己無天份。 我都好努力練習，但係呢，個基礎始終都打唔好咁..... 兩隻手，十隻手指真係好難控制... 而家仲開始加入跳躍輕快感，大細聲呀等等，唔係咁易handle囉 (我覺得)....

跳躍得嚟又要分短跳躍，同長跳躍，真係唔顧到咁多囉... 短跳躍都仲可以，但係長跳躍就唔係好掂... 而家跳跳吓，又要顧埋大細聲添，真係「不知點算好」...

大細聲呀，跳躍嘅長短呀，全部都係靠拉弓嘅長短去控制喎，技巧當然係有待改進啦。大細聲嘅改變，我都叫做知道點做 (雖然做唔足，做唔準)。但係跳躍真係唔係幾得，勉強做到短的，但我真係唔知點樣可以keep住短跳躍之餘，而再做到有漸慢嘅效果囉...

雖則如此，我都仲好有興趣學落去，我都好想拉好佢。但唔知點解，拉完個"零"鐘兩個鐘，個人就會好攰，好眼瞓。唔知係啲藥，定係真係我太用神睇琴譜呢?!

失而復得

一年前經秘書介紹，我學咗三堂Golf，每堂一個鐘。上完第一堂因為對手起"枕"，大家就帶我去ProShop買手套，俾錢時係counter見到哩個Hello Kitty marker就想買。但其實當時並唔知道佢係乜，同埋點用。咁秘書就立即話俾我聽啦，佢同教練一人一句，都叫我買，話我第日落場打golf就用得著

其實當時我真係睇唔到自己會落場打，因為我只係抱住學吓無防嘅心態... 落場打golf 對於我嚟講係一件遙不可及嘅事。雖則係咁，因為哩個Kitty marker 係我最鍾意嘅紫色喎，我唔埋三七廿一就買左佢先。

講真，學golf嘅興趣真係有嘅，不過學golf 嘅花費都幾大，所以最後，我學完三堂基礎班就停左無學lu... 之後，足足有成年冇再掂過golf。

最近因為有朋友都想學golf，發現可以二人share一個tutition fee，感覺上無咁貴，所以我又pick up 番學golf。 學番golf 之後，教練同秘書成日都話今年前一定會帶我落場打波喎... 咁我又自不然唸起我哩個靚靚marker可以大派用場啦。但係呢，我搵嚟搵去都搵唔到佢，記得明明放咗落個米色袋仔到，但係上次去日本旅行又攞咗個袋仔擺其他野... 搵極都搵唔到，又有印象自己"dum"左佢喎... 唔見左個靚marker，真係唔開心喇。

今日試吓上網睇下有冇得bid下其他Kitty marker 補數啦，但竟然無喎，搵咗好耐先搵到三個，不過當然無我哩個紫色嘅marker 咁靚啦。但係呢，我未試過係e-bay 到bid 野，而且又冇pay-pal，最終都係買唔到心頭好。 個心當然仲係好掛住自己唔見左嗰個marker啦，所以返到屋企，我又再一次大搜查，終於俾我搵返佢呀，原來上次去旅行，我將真係米色袋仔入面嘅野transfer左去另一個化妝袋入面，失而復得，真係好開心呀 ^.^

第十一堂 - 冷靜啲

唔知係咪真係因為由於上星期六，日，我一得閒就去練習嘅關係，今堂拉scale時，老師都話我拉得唔錯喎。 我知，雖則老師所謂嘅唔錯，實際上並唔係真係好好，只係因為我開始拉全弓，而又無拉出特別多嘅雜音囉。

老師都讚咗幾次唔錯架，可能就係咁，不知不覺間就對我造成壓力... 係屋企明明練歌仔時都拉得都算尚可 (以我嘅程度嚟講)，但係每當要係老師面前拉，就往往拉到好恐怖喇。轉線同做retake一向係我嘅弱項，今晚當然唔例外啦，當我轉線做得唔夠快，就拉出好多雜音，我越心急想拉好啲，就越係拉唔好，就連平時拉得好好嘅地方，都拉到一塌胡塗。到retake位時，就成枝弓"逹"落個小提琴上面，乜野音準都無晒啦... 老師見狀: 「冷靜啲先，唔好"騰雞"住...」 真係好好笑，唸番起都真係幾騰雞

老師話我揸弓啲重心唔啱，拉弓嘅角度太大，只准我用三隻手指去揸弓，要我注意番拉弓嘅手勢同幅度，同埋開始要我跟足節拍，所以返到屋企真係要勤加練習!! 之前我都發覺我用四手指拑弦線嘅手勢同老師硬係有分別，但係又唔知邊度唔同，今日老師搵到我邊度出問題喇，原來又係重心唔啱!!! 不過搵啱重心之後，四手指手勢同老師有所接近時，就發現好難要伸展隻手指，同埋好難用力去拑實啲弦線。 老師話係要下好多苦功喎，放心，我一定好俾心機去練嘅!!!

今堂學左好多野，三首歌仔同埋一啲練習弓法嘅scale，唔知可唔可以消化得嚟呢?

七七八八

經過一輪頻頻覆診，準時食藥，同埋晚晚早瞓，我啲皮膚都好得七七八八喇。雖然未係100%好番晒，但係都巳經好開心lu... 醫生叫我唔駛覆診lu，但係呢，啲皮膚仍然有少少痕喎，好彩我仲有藥膏搽，希望搽晒之前可以好得番晒啦。由於知道啲皮膚有好轉，個人就變得輕鬆咗，早瞓嘅習慣又開始改變.... 噚晚又掛住睇DVD，差啲唔記得醫吩咐要多啲休息。好彩最後都忍得住，未睇晒隻DVD都去瞓覺。唔知我早瞓嘅習慣可以維持幾耐呢?

我的芒菓千層酥

今日又去學人整餅lu.. 哩個芒菓千層酥，我同積奇蓮想學左好耐喇，不過次次唔係full左，就係俾人地包左堂，報嚟報去都報唔到。今之終於有機會報喇，但可惜積奇蓮又唔得閒學，所以今次只得我自己學。

雖然哩堂難度有4粒星，但又唔係我想像中咁難咋喎，只係工序上比較麻煩，要成日撈完面粉呀，搓圓拑扁之後，要將半成品放入雪櫃，等佢地定型後，又再搓圓拑扁及對摺幾次，之後入焗爐，焗完再砌靚靚就ok。 今次把握機會同左老闆娘一齊合照，yeah!!!

第十堂

唉，係屋企明明拉G線拉得唔响，好鬼難聽，上堂問老師何解啦，老師就叫我拉俾佢聽，又唔知做乜喎，係老師面前又拉得幾好喎，搞到老師唔知我邊度出錯... (但再返到屋企拉時，又係拉唔好.... U_U)，下次都係要再請教過老師先得。

今堂主要係執下Amazing grace，其中最高音嗰part (係E線要拉足五拍)，我拉極都拉唔好，哈，老師都好似冇我符咁，我重覆拉左好多次，都係麻麻地。下過好彩拉上次新學嘅兩首歌時，老師都話OK (不過我知道仲有好多地方要改善，但老師唔想一次過迫得我太緊啫)

今日老師都教埋我用第四手指去按弦喇，不過呢... 我四手指唔係好聽駛囉，成日起九十度角，好似抽筋咁，睇到老師都笑埋一份。 今日又學左兩首歌仔，一首係練轉線，一首係練四手指嘅，兩首都幾輕快，旋律都好好聽架 (我覺得)。

好瞓得

食左醫生嘅藥，個人變得好浮，返到公司個人都係暈暈地，行直線都有小小困難。好不容易先涯到放工，再去覆診。醫生竟然話進展良好，我就覺得啲皮膚好似發得勁左，但醫生話啲菌係要發出嚟先好喎，既然醫生都咁講，我就惟有聽醫生吩咐，準時食藥同埋多啲休息啦。

其實食左啲藥，真係唔到我唔去休息囉，哩幾晚，我都係十一點就上床瞓覺。但係啲藥真係好勁，上到床瞓時，個人都仲係好暈，覺得天旋地轉咁。今早一起身，個人仍然係好唔舒服，雖然明知今早要做training，但係個人好唔妥，掙扎左一陣，都係決定要攞sick leave。Send 完 message 俾秘書，就進入昏睡狀態，全日唔係瞓，就係食，食完又再昏睡過。 不過瞓完成日，啲皮膚病又好似真係有所進展喎，所以為左可以keep住有進展，哩排我要改改我啲生活習慣，要早啲入睡，希望真係可以快啲好番晒啦~~

Baking lesson~

今日睇完醫，因為有點點擔心而唔係太開心，不過之後同積奇蓮去完整餅，心情就好番少少。今堂整左兩款蛋糕 -- 朱古力海綿蛋糕，朱古力及綠茶鬆餅。

今次學嘅蛋糕真係好容易，冇乜難度可言。純粹得個「撈」字。勝在易整，成功率高，好有滿足感。兩款都做得唔錯吖，幾靚仔吖，所以個人都開心啲。

好擔心...

早幾日還以為係俾蚊針，所以痕痕地... 搲完紅紅地都好正常吖!!!! 點知過幾日唔再痕喇，但佢地唔單止冇退紅，反而仲嚴重咗，見到先知驚呀，因為佢地有擴散嘅跡象... 所以今日要趕去睇醫生，醫生診斷係「生蛇」。原來生蛇係只會沿住一條神經線生架，醫生話因為我免疫下降，令水痘菌有機會發大喎.. 食一個禮拜葯，同埋最重要要有多啲休息就應該會好番。

以前都試過皮膚敏感，但都只係生癬，唔知點解聽到話生蛇，就覺得好得人驚，真係幾擔心架!!!既然醫生咁強調要多休息，我就乖乖地，嚟緊早啲休息，瞓多啲啦... 希望真係下個禮拜可以完全好番晒啦...

Funny quote

早幾日係Facebook 見到有人post左個好 funny嘅 quote:

'The left side of the balance sheet has nothing right and the right side of the balance sheet has nothing left'.

原來係出自 AIG 嘅 Vice Chairman，唔怪之咁到肉啦!! 唉，呢排成日都有關於政府救市，收購呀，合併呀等消息，唔少公司無端端就冇左，真係叫人心慌慌呀，唔知呢個金融海潚幾時先會結束呢? 個經濟又幾時先會好轉呢?

第九堂

由於哩兩個星期個多左飯局，所以平日放工後就冇拉小提琴，當然上堂就拉得唔好啦... 拉得唔好，老師就梗係要我拉好為止先會再教新野啦。今堂一開始都係拉下Scale俾老師聽，結果都如我所料，當然就係差啲啦。 第三手指硬係放唔啱位，scale 就梗係拉唔準啦.... 拉完一輪scale，終於可以拉下歌仔，不過呢.. 因為疏於練習呢，加上首Amazing grace 有好多轉線位 ，而我又比較弱轉線，所以拉得唔好，三手指又放唔好，所以發出好多什音，同埋不時走音。


唔知係時間嘅關係，定還是我真係有所改進，老師終於收貨，又 assign 左啲新tricks (主要係練音準同埋練轉線技巧) 叫我返屋企練吓喎。我最鍾意老師佢點都教多兩首仔俾我練。我今個weekend 有好多其他野做呀，仲要學golf同埋練golf..... 但我點都要抽返啲時間好好練習至得喇，我真係好想拉好啲呀!!!

旅遊保險

上次去日本旅行因為颱風而delay左數小時，因為我同柏柏都有買旅遊保險，所以都可以claim錢。 柏柏買嘅係銀行網上保障，而我係經自己個保險agent買的。

柏柏只用左around 100 蚊，但就claim返250蚊。 但我就用左around 120 蚊，但只claim返200蚊。而且呀，柏柏只係submit boarding pass 同埋itinerary 就好快收到銀行寄俾佢嘅cheque 喇，但我呢，我都有submit boarding pass 同埋itinerary 架喎，但係保險公司仲要我向航空公司囉張confirmation先，囉完仲要等多成個禮拜先call我話會出張cheque俾我喎。所以呢，我都係sugguest大家幫銀行買網上旅遊保，因為好以陪多啲同埋有効率啲。

我要過100分

今晚又約左Senior G 玩保齡，好好玩~ 今次玩左三局，雖然Senior G 有指導吓我，但我都係打得唔好。

第一局叫做保持上次嘅水準，都有78分。但第二局就嚇死人喇，只有 55 分咋。55 分真係唔得囉，真係好差勁， 到第三局先叫做打得好少少，不過都係唔過100 分，只有95分。 但Senior G 局局都過150分架，睇嚟我都係要多啲向佢學習，因為我要向100分哩個目標進發。

第八堂

唔經唔覺，原來巳經學左兩個月小提琴喇。頭一，兩堂特別多野學。但係之後學嘅野就好似唔係太多，不過就有好多姿勢呀，手勢呀，同埋小動作要注意。

雖然學左兩個月，但係都仲未可以好好掌握，仲係有好多地方要改善。其實只有四條弘線，不過要好好控制拉弓嘅角度，並唔係想像中咁容易，唔係掂到隔離條弘，就係拑得唔啱位，拑得唔夠快，拑得準時，又可能拉錯角度，或者用錯力，搞到不時走音或發出廝殺聲。

今堂用左唔少時間去練G Major 1st & 2nd octave 同埋上次學左嘅歌仔，所以冇乜時間學拉新歌。不過好彩老師都好明白，知道要有新歌仔拉吓個人先至會有滿足感，所以都抽時間教左首Amazing grace。

之前係屋企練E線時，硬係拉得唔好，今日老師提點，原來係因為我部琴放得太低，所以好難拉得好。而練G線時，又太多廝殺聲，原來又因為我拉嘅角度唔啱，同埋手踭放得太低。真係可以好好記住自己邊度拉得唔好，下次唔好再犯先得。

新相

之前幫我影過兩次嘅攝影師早排又問我影唔影相，見拒左幾次，咁啱又得閒，咪又應承出嚟影吓相啦，今次啲相影得好好呀，我個人好鍾意囉。

http://www.kodakgallery.com/I.jsp?c=18kgu6op.bk7z9lph&x=0&y=qw5tza&localeid=en_US

第七堂

噚晚柏柏download左首生日歌俾珍妮，珍妮真係有練架，因為除左柏柏將會生日之外，咁啱珍妮媽咪又下星期二生日，所以我要盡快拉好佢。不過呢，我明明跟足個譜拉，但係有幾個音總係唔係好啱音。都係要問下老師架喇，但係星期三先上堂，咪趕唔切係媽咪生日拉俾佢聽?!!! 唸住惟有唔跟譜，按自己記得嘅do re me 拉住先啦。

點知老師又話佢下星期三有事唔得閒上堂喎，問我可以可以改今日上堂，我緊係好啦。 原來首歌嘅scale 係我未學架，我一直都用錯scale去拉，唔怪得我拉唔到啦... 雖然老師拉左俾我聽，但係都唔易拉架喎，老師勸拉俾媽咪聽之前，要好好咁practice 下喎。

今日仲學左另一個G Major 嘅scale，好難拉呀，返到屋企練左好耐都係拉得麻麻地，首Ode to Joy 明明好易咁，但用G major就變得好難拉。同埋呢，拉G major 個人會比較攰，我覺得囉!!

第六堂

前日巳經有傳香港會有颱風，噚日終於打到嚟，我幾擔心佢又係係星期三嚟打八號風球，又無得學小提琴呀。 正當個個希望個風可以捱到星期三，我就一正希望佢快啲打完。好彩佢真係好快打完，如果唔係，我又無得上堂喇。

唔知點解今晚上堂嘅時間過得好快咁，我都未夠喉，就巳經夠鐘落堂。今日又學左乜呢? 學埋G major 嘅 full scale，又學左用另一種弓法去拉「小星星」，試過拉新歌「Autumn」。 之前係屋企自己試拉「Old Oxford」，但最尾幾句總係拉得唔好，今日問老師，老師教左一個好簡單嘅方法，就可以拉好啲lu... 但我始終轉綫時都拉唔好，同埋音準都仲係有偏差，最慘嘅係我節拍未到位呀，睇嚟仲有下多啲苦功先得。

信任

我同積奇蓮咁老死，佢結婚咁大件事喎，我無理由唔會係度記底啫，但事實上，我又無做到喎... 點解呢?

其實當初我一心都以為自己會有好多野寫，我唸左好耐都唔知點解，唯一我唸到嘅可能係因為我被安排坐迎賓位卦，因為酒店嘅迎賓位同宴會主場係有好一段距離，一早就叫人地坐係嗰到，又冇得入去趁熱鬧，入面做緊乜，我跟本唔知到，又冇份同至friend 嘅新娘影相喎，其實都幾冇癮架。 要等到入晒席，食晒野喇，最尾先有機會同佢影番張相咋!!!

不過我知道積奇蓮有哩個安排，完全係因為佢信得過我，要我幫佢兩家人收「人情」。當晚我真係覺得原來得到別人嘅信賴都唔係好好，就好似對上兩次做姊妹咁，又係因為新娘子話我信得過，結果兩次都係我去keep住啲利是，人情同埋金器首飾，跟住對新鋃子去東去西，去換衫。

對於得到別人嘅信任，我其實都感到安慰，但係呢，人家有幾瘦，大家唔係唔知gum 嘛，要我拎住嘅錢同埋有份量嘅金器，都幾係重同埋攰架!!!

我的小手作(三)

上次係東京買番嚟嘅小手作，終於全部整晒喇，全部都好靚，全部都好鍾意!!　雖然今個小手作係有兩款耳環，但係兩款難度都係一般，一啲都唔難整。對吊吊耳環我都好有信心佢唔會好易爛，佰對花花耳環，我就有啲擔心，因為個耳環托係靠膠水黏貼住，我真係擔心佢會黏唔穩架!!

Another house warming activity

上次同Senior G 講起我去好友Amanda 個 club house 打保齡，佢話佢屋企個club house 都有得打，就話要叫埋Janice 一齊玩.... 結果就約埋Paula，Debbie，Cinzia一齊上佢新居聯誼。 Paula，Debbie，Cinzia，Senior G/佢女就負責起四方城，跟住Senior G就同Janice同我去玩保齡。Senior G同Janice 都有玩開保齡，有姿勢，亦都有實際，玩親都過百分。 我第一局就只有80分。到第二局時，好似玩順左，有望過一百分，Senior G好心叫我只要唔打落坑就會好好... 點知好似出口術咁，我真係入左坑，結果都係唔過一百分，得85分，鳴鳴鳴.... 真係激氣呀 :U_U: 不過有得玩吓保齡都巳經好滿足喇

上次同Senior G講開東京之旅，係拑公仔嘅地方見過有隻熊仔放係地方走嚟走去，好得意咁，但係一定好難拑.... 點知Senior G 就話佢拑過幾隻，不過唔知到有冇送晒俾人，如果仲有就可以俾我。哈，結果仲有喎，今日去開佢屋企就順便帶埋佢返嚟喇，佢真係好得意架!!! 唔信你地睇下個vedio喇~

起晒"枕"

經過三日努力練習之後，我三隻手指頭都起晒"枕"。鳴..鳴.... 鳴.... 真係無唸過，除左要將所有手指甲剪到好貼，手指頭會起"枕"，同埋有輕微麻痺。我問老師係咪我用錯力導致起"枕"，但老師話哩啲係勤力嘅表現，老師自己都有好多"枕"。

今晚上第五堂喇，老師開始有要求，唔再係任我拉過就算數，而係要拉到似樣先收貨。 今日終於學A Major 嘅 full scale。學左一啲練拉弓嘅基本功，同埋學左拉「一閃一閃小星星」。

唉，要拉得好真係好難，又要跟節拍，又要雙手協調，又要睇譜睇得快... 睇嚟我都係要再加把勁先得。

努力練習

今個中秋節有補假，計埋禮拜六，日，一共放三日假!!! 我好乖呀，三日都有抽時間去練習，不過表現依然好飄忽，少左廝殺聲，但又多左啲走音... 同埋雙手都唔係好協調，手指尾都係好硬，都係要再花多啲時間去練先得。

Gucci big fans...

我又買袋喇... 明明去完旅行用左唔少錢，但又學人買新袋，真係唔應該...

事緣係上次同Kini去澳門時，同Kini一齊係雜誌見到哩個袋，我巳經好鍾意佢喇，因為我鍾意佢係防水料，加上佢嘅紅色邊邊，睇落幾trendy，再睇埋個價錢，又好affortable... 再加上Kini都話好...

唉! 一有人和應就弊喇~~ 自澳門之旅就對個袋念念不忘，成日想買，叫左自己唔好咁大駛，但又忍唔住，終於某日放工，就上左去landmark 間Gucci睇吓。見到個實物，覺得個size 真係good fit喎，加埋sales 不停promote 佢係limited 顏色，紅色先有心心牌，就唔駛五分鐘就買左佢返屋企喇....

再度沉迷NDS

都有一排停左玩Nds嘅心癮，之前最多都係重玩Mario brothers，盡量攞番之前攞唔到嘅大星星。但係都仲係有幾關嘅星星唔知點攞，玩左好多次都係無進帳，咪試吓開第二個Game嚟玩。

其實隻Game阿哥一早抄左俾我，但我一直都無開嚟玩。直至北京奧運差唔多完晒，我先學人玩，一開嚟玩就不得了喇。又幾好玩喎，有好多款玩法，有單項賽事(田徑，游泳，跳水，跳遠.... 等)，又有mission mode，仲有不同程度嘅competition mode，真係好好玩，所以好快我又沉迷左... 又係會晚臨訓之前都會玩一玩先捨得訓。就係咁晚晚都玩吓，我用公主Peach完成左個mission mode 同埋唔同程度嘅competition mode。 下一個目標就係用埋其他characters去玩mission mode。

第四堂

今晚上第四堂小提琴，今次進度好似比上次慢左少少。唔知係咪老師開始執正嚟做，一見到我手勢稍有少少偏差就要我由頭嚟過。 今堂好多時間都係學點揸好支弓，同埋要練好按弦嘅位置，老師開始要求我留意音準。 所以得番好少時間去學新歌仔，結果，今晚只學到兩支好簡單嘅歌仔。上堂學左「有隻雀仔跌落水」，今堂學左「打開蚊帳」。老師仲話我揸弓揸得太緊，又學得鬆啲。所以我決定今個weekend要練好啲，要避免有廝殺聲!!!!

Full Schedule

剛剛的一週真係行程緊密，除左星期一，四有返屋企食晚飯之外，其他日子都係有飯局。

星期二

同Senior G有飯局，都有一陣子無同Senior見面，唔知係咪因為太耐冇見，大家竟然有溝通障礙，成日誤解對方嘅說話，真係好得人驚呀。以前同佢都老友鬼鬼gum ma，點可以搞成咁o架，所以我地話要keep 住溝通。

星期三

如期學我嘅小提琴，我依然覺得好新鮮，好好玩，雖然今堂我成日「擋雞」，但係又學多左兩小節歌仔，我會練好哩支歌!!

星期五

係我地一年一度嘅AA 上岸gathering，同舊年唔同嘅係，今年所有出席嘅，全部都係同一屆的，16 個out of 24 個人，出席率都算高。今年gathering，只得番clement 一個仲係pwc，其他個個都巳經上晒岸喇。

星期六

跟BNP舊同事Kini同阿May去左澳門.... 以前我明明話過冇興趣去澳門，但阿May新工公搞旅行，有得入住威尼斯人酒店，阿May邀請Kini「屈蛇」，Kini又問準阿May叫埋我，我見有得住下個新酒店，咪又去join下佢地囉，但係我第二日又要join另一個gathering，結果就嚟左一個極速一日澳門遊。

12點搭船去澳門，過到去，就同埋阿May啲同事食lunch，食完lunch仲走去試埋個「木糠布丁」同埋「芒果大菜糕」先返酒店check in。 Check in 後就係咁二行下個酒店，係條大運河到睇下人地一路撐船一路唱歌，個船夫仲突登撐到我地前面停底同我地傾下偈，say 下 "chao chao" ，介紹下佢自己，同埋向大家飛吻。之後我地就出去大三巴附近食魚翅，同埋食雙皮奶。食完又行下街，行兩行又夠鐘食晚飯。 我地去左「海灣餐廳」食左血鴨 (不過味道一般)，咖哩雞，雜菜沙律，炭燒魚，牛仔骨，忌廉焗馬加優 。食物整體都倘可以，不過價錢都比較貴。 食完晚飯，大家就去左睇賽狗，賽狗同賽馬大致相同，賽馬就有騎師，賽狗無騎師，但係就有一隻電子免仔俾啲狗去追住跑。

睇完賽狗，又去食糖水，之後就去左「永利賭場」觀摩下，我同Kini對於賭博一竅不通，一味得個企字，唔知人地點玩，我對老虎機有小小興趣，但係行到去都唔知點start，結果都係要問下啲職員先有得玩。因為我剛用晒啲20蚊，得番啲100蚊，又唔知佢會唔會找番俾我，所以遲疑左一陣，咁啱阿May個同事「小玉」在場，佢借左張20蚊紙俾我，我就同Kini玩，20蚊換到100 個credit，每局用大約5~10個credit，開頭嬴幾局又輸幾局咁，跟住就輸幾局先嬴1局，冇幾耐就用晒啲credit。玩到最後個credit，我又附附碌碌咁拉中個bonus喎，部機自己轉轉轉，轉左13局終於停，結果我得到310個credit，可以換番61蚊走人。小玉話收番我1蚊利息，我就淨袋港幣40大元!!!返到威尼斯人沖埋涼都成三，四點先有得訓。

星期日

今日九點到起身梳洗，食埋早餐又要起返香港lu。一上船就趕去搭機鐵錢入東涌會合Amanda，Daphne，阿wing同Wincy佢地。因為今日係Amanda搞嘅house warming。五個女仔上下Amanda新居參觀參觀，食下lunch，再去club house玩下。我地一開始就玩左一個鐘保齡，起初大家都只係入坑，但兩場之後就越戰越勇。玩完bowling就分兩group 人玩tennis 同table tennis。做完運動就返Amanda新居傾下偈，睇下相，搞到七，八點左右，我地又出發去食晚飯，今晚係好豐富嘅海鮮餐，有聖子皇，抄蜆，蒸飽魚，白焯蝦，豆豉鯪魚炒油蜜菜，揚洲抄飯等。今日真係好抵玩喎，由食lunch，打保齡同table tennis，到食埋晚飯，大家都係夾番177蚊，每人200蚊都唔駛


好彩之前同積奇蓮講過我個今個星期嘅schedule，令我靈機一動攞定星期一個annualleave，等自己可以好好re-charge下同埋有番啲時間練下小提琴嘛。再唔練下，下次上堂又擋雞就唔好啦。

零食

公司去年發起逄星期五派零食比大家。初頭嘅零食多數都係薯片，偶爾會係果汁。

事隔數月，公司突然委任某某同事做Chief of staff ，咁啱佢同我Department 嘅同事好鬼熟，同事就打電話恭喜完佢榮升為Chief of staff 之後，就順勢要求公司派零食要健康啲，唔好成日都係令人熱氣嘅薯片。哈! 同事又好認真的去幫我地爭取喎，之後，我地真係多咗其他零食食。

由於上星期放block leave，同埋再上一個星期五又打風，今日一返到公司就發現枱面多左兩樣零食同埋一個水果，雖然唔知好唔好味，但見到個賣相就好OK咁。呢啲小小嘅員工福利都唔錯吖，做到悶悶地又可以食下野，加上派親零食都係Friday，唸起聽日唔駛返工，心情會份外好o架!!

我的小手作 (二)

今日又忍唔住，開左另一個小手作嚟玩喇.... 今次哩個個難度其實都係二級，但係就比耳環多好多工序。 我整左五分一之後，又走左去練小提琴。拉完之後啲手指頭都好痛喇，但係今個小手作又要屈好多個小圈，所以手指頭痛上加痛，我唸佢地好快就會起"怎"lu.... 不過當我完成到哩個小手作，實在太開心，太滿足喇，覺得手痛極都唔算得乜野lu，覺得點痛都係值得嘅。

我的小手作 (一)

以上係出自日本貴和製作所嘅產品，我好鍾意玩架。好以去學整蛋糕一樣，佢地巳經為大家預備好材料，唔識日文都可以跟住圖畫估估下，真係幾好玩o架。可以消磨時間之餘，又可以親手做出小飾物，真係好有滿足感。

P.S.
雖然佢圠巳經有齊材料，但係都仲需要其他工具先得o架，好彩我屋企有齊晒佢地 (e.g. cut 鉗，尖頭鉗，扁頭鉗等等) ，如果唔係我今日就整到佢地出嚟喇!!!!

幸運的茶葉

記得小時候睇卡通片「Q太郎」，佢講過如果杯入面嘅茶葉係企係度唔跌就代表好運。 今日同媽咪飲茶時，我發現杯底有一枝茶葉，無論我加幾多次水，佢都係企係度唔跌o架 (見紅色圓圈) 。係咪代表我好運，去日本嘅黑氣巳過呢??

第二堂

今日上左第二堂violin 喇~ 上第一堂時因為未剪好手指甲，只係學左方邊條弦係E，A，D，G cord，學左點樣拎住支弓，同埋試過拉左空弦。

今日學左點樣按住弦線去拉一個majar D 嘅full scale，學識拉一隻超簡單嘅歌仔，真係好開心呀。 雖然唔係拉得好好，手指頭又有啲痛，但係真係好鍾意拉，好enjoy拉... 趁今哩幾日仲未駛返工，我都會努力practice ，努力學睇五線譜，希望可以按得準啲，同埋拉得穩定啲啦!

好友移城 - 向東京出發 之 黑仔篇

今次東京之旅令我好透徹咁感受到何謂黑仔。

黑仔事故一:

未出發就巳聽閒有週未將有颱風襲港，仲會係好強勁o果隻添。心中巳經有少少擔心，但都仍然抱有希望，佢唔會影響我同柏柏嘅計劃。點知佢真係吹到好應，搞到我地班機要取消，係取消航班喎，真係咩心情都無晒.... 但好彩得到貴人幫手，搞左好耐終於可以轉乘第二日下晝嘅航班，所以我地個四日full days 行程得番三日玩。最後，都係多得柏柏醒目，keep 住 closely monitor airline 個website，留意到有另一航班delay到比我地班機更早嘅時間，打左電話去問同埋改，所以我地最終可以改乘早上10點機，坐埋火車出city，就剛剛好趕得切睇煙火會。


黑仔事故二

改到坐早一班機，知道趕得切睇埋煙花，以為唔再黑啦.... 點知一落機，攞返個行李，就發現個handle壞左，拉唔到佢出嚟，但又要趕住搭火車去睇煙花，又落晒雨，人又多，真係好鬼狼狽。結果，我係靠拖住中間條帶咋.. 因為條帶本身唔係for我去拖個篋，所以個篋成日失去平衡撞落我隻腳到，就係咁，我就瘀住咁行街同埋返嚟。

黑仔事故三:

當晚返到柏柏姐姐屋企沖涼期間，發現自己戴緊條頸鍊個心心鍊咀一開為二，跌左係浴缸上面。


黑仔事故四:

去咁多日，就落足咁多日雨，基本上係由朝落到晚。只有好少時間停雨，但係我地唔行就好地地，我地一行就落晒雨咁囉，真係激死人喇~ 因為落得太多雨喇，我對鞋都濕晒，所以好啜腳，鞋邊同對腳成日都有磨擦，搞到腳踭損晒... 亦都因為成日落雨，所以唔係好有mood影相，自己唔係影左好多相，將memory card大部份memory都係spent係錄影「調布市煙火會」同埋「原宿表參道元氣祭」咋。


黑仔事故五:

參考完旅遊書介紹，難得有兩間店舖我係有興趣，我同柏柏咪跟住個map 同地址去行囉，點知行嚟行去都唔見，兜左兩，三轉都係搵唔到佢地，但係其他介紹嘅店舖又有係度播，惟獨是我mark左想睇嘅就冇左，白白行左好冤枉路，就連相影相嘅境點都搵唔到，你話喇，係咪真係個人一黑起上嚟，就會黑到咁o架?!


由於心情受到身上一股黑氣影響，以及未有集齊所有相片，故未有心機upload 相片，photo link 不日再補加~

一頭霧水

話說今日朋友G打電話問侯颱風對我出發嘅影响及順帶提我幫佢帶野其間產生以下對話......

(J正在抱怨航空公司晒柏柏)
J: 佢地幾衰呀，叫我個friend5點先好rearrange flight schedule... 不過好彩我另一個friend幫我地打電話去搞咋，如果唔係，聽日唔知幾點先可以飛呀...
(跟住我開大左部風扇，發出呼呼聲)
G: 咩聲嚟o架?
J: 風扇
(G一頭霧水咁)
G: 吓????　咩話？
(J用手掩住個口向電話慢慢講)
J: 風...扇...聲...
G: 哈.... 我唔係問你咩野聲呀... 我同你個乜野friend呀，係航空公司度做? 咁勁幫到你地arrange
J: 唔係，佢成日飛，有好多delay經驗啫...

"風扇friend" 又真係幾令人費解嘅.. 當我聽真佢問乜嘅時候真係笑死左...

超黑仔 - flight cancelled!

又係打風累事呀... 真係好黑仔呀.. 上次就因為打風累我無得學小提琴，今次又因為打風累我去東京嘅計劃大失預算，真係激死我喇。本來我地係坐零晨1點機，可以有4日full days玩 gum ma... 而家得番3日玩，仲會miss 左我地plan住要睇嘅煙火會添.... 心情真係差勁!!!

柏柏原來一早打過電話畀我，想通知我有關取消航班之消息，可惜我miss左好幾個calls... 到我見到柏柏miss call 巳經係下畫2點幾... 航空公司太差喇，佢地呃柏柏，叫柏柏下畫5點先再打去詢問re-schedule 嘅詳情... 好彩珍妮哩排預到貴人，有朋友好心幫我地打電話去問同埋confirm 要埋航班。雖然家吓要等到下畫2點出發，但如果唔係佢幫手，連哩班機都full 埋，我地就要等到夜晚先有機喇~

其實個貴人一早都打過畀珍妮，不過又係miss左個call 攞.. 如果我一早接左個電話，可能有望改早一班機。 不過就算可以上改早一班機都唔係好好多，因為佢地都要further delay，其實唔係早我地而家好多... 我同柏柏完美嘅四日盡興計劃受到颱風影響，心情真係好難平伏... 好彩柏柏EQ高，又Efficient，好快就幫珍妮改好個itinerary。

超好人Senior G 都有致電畀我，不過傾左一陣，我講野大聲左 (咁人地心情唔係咁好，佢仲一連問咁多人地唔知點答嘅問題...)，嚇到佢急忙收線，真係唔好意思喇，我一定記得幫你買野o架喇!!!

不過今次日本之旅又令我體會到我身邊嘅朋友對我好好!!
1) 好幾位朋友知道我要去日本旅行後畀我更熱心，主動offer 借旅遊書畀我
2)朋友G叫我幫佢及女友買東西之餘，都為我擔心颱風會影響我出發，又會提我做Exchange
3)朋友A問要唔要幫我去做exchange
4)更有朋友好落力咁幫我同柏柏搞flight 嘅reschedule
5)最重要係有柏柏願意陪我去旅行，同埋為我做planning添

我要努力啲~~

今日去左Doris 屋企練小提琴... 我地好勤力呀，一練就練左三個幾鐘。不過開頭我部琴有小問題，tune 左一陣先ok。 哈，因為Doris巳經學左一段時間，所以佢係練拉歌仔，但我只係個初哥，純粹練拉空弦。不過我仲未拉得好，拉唔到直線，成日拉拉下就拉到斜左，唔係就拉到有雜音... 真係要努力啲先得.. Doris 講因為我隻手未夠鬆喎，但係我真係好緊，鬆唔到，點算好呢?

雖然拉得唔好，而且有啲攰，但我覺得都好開心，好滿足喎。 我要努力，手呀手，你要乖乖地，你要放鬆啲呀!!!

等了再等~

期待巳久嘅小提琴班可算係撞正「好」日呀... 第一堂就打八號風球，所以被迫取消。真係一等再等呀... 哩一個星期好似過得好慢咁，真係等到頸都長埋，終於畀我等到喇，可以上我第一堂嘅小提琴班喇~~ 好開心呀!

因為朋友D係上堂前先借佢部琴俾我，所以我都係今日先至可以同部琴見面咋... 但我冇唸過第一堂就有機會拉下部琴，最衰我唔記得剪晒啲手指甲，好多手勢都做唔到，所以老師SKIP晒，要下一堂先可以學... 不過老師有私事要出埠一星期左右，所以我又要再等多一個禮拜先可以上第二堂喇!!!

第一堂感覺良好，我都好鍾意上，真係好期待上第二堂呀... ^.^

口不對心

明明個口話巳經換齊想要嘅Kitty，但其實個心都仲有幾隻想要.... 難得二哥以為我好想好想要哩隻紫色Kitty (其實我係講I'm sorry 嗰隻!!!)，而佢又開到口話幫我換，我緊係唔會阻止佢啦， 因為我都幾鍾意哩隻o架，不過見佢係喊樣，好似唔係幾好，但其實又幾想要佢....就係咁，咪又係要埋佢囉~~ 唔知佢係咪真係我嘅最後一隻呢?

才女的命運

林燕妮係公認嘅才女，本人對佢認識唔多，只知道佢係出名嘅女作家，人人都叫佢做才女。以前對佢嘅印象麻麻，覺得佢衣著太誇張，巳經一把年紀，但仲有著得咁"行"，真係有點反感。

哩兩晚睇左少少「向世界出發」，對佢有少少感慨... 無錯佢係才女，搵到好多錢，真係有名有利。佢廿幾歲女，就可以用一百零七萬買一件皮草。係107萬!!! 佢仲係廿幾歲咋喎，都算係一個天文數字... 但係佢一生都可算是難過，有名有利又如何? 佢嘅家人都相相早死，只剩下佢自己.. 頓時覺得佢好慘，名利算得上什麼呢? 原來人係好緲少，好多野都唔到你估計，唔到你控制.. 真係要學識及時行樂，珍惜自己嘅家人。

2 More Kitty~

Yeah.. 話咁快我就巳經買晒我想要嘅Kitty 喇... 隻"I love you" Kitty 係媽咪幫我買o架，又係last one 嚟o架，都唔知係真唔係，次次都係得番last 一隻畀我。 我覺得隻"I'm busy" 好得意，佢對眼好搞鬼，所以我都買左佢番屋企!! 真係好喇，想要的都買到，唔駛心掛掛lu !!

好高興~

記得Winne Fong 拎住份都市日報，問我會唔買晒佢地時，(當時我第一次見到佢地個廣告，覺得佢地好假，唔靚)，我仲同Winnie 講，佢地咁假，我一啲意慾都無......

就係當晚，我阿嫂剛買咗全套Kitty 返嚟，睇完實物之後，原來有啲Kitty 整得都幾靚o架播，搞到我又心思思想要幾隻。 於是星期日就走落樓下間McDonald買隻"i'm sorry" kitty，點知原來一早售罄。 真無癮... 但係我越唸就越想要，於是走去yahoo auction 睇，又畀我搵到，點知bid 嚟 bid 去都唔夠人bid，最後，我終於放棄再落bid，眼白白睇住個機會流走。

今日係最係一日玩"i'm sorry"，放工要去CWB做Facial，未夠鐘，又有少少餓，靈機一閃，就行左去McDonald，又即管問問有冇得換啦... 行到counter問仲有冇紫色隻hello kitty換...
counter 姐姐話: 「冇晒喇!!」 (雖然預左係咁，但係都好失望.. )
不過counter 姐姐又問問其他counter :「係咪冇晒"sorry" 喇? 」
隔離啲counters 好齊咁答: 「仲有last 一隻!」
我雙眼頓時發光咁問: 「即係仲有冇得買???」

最終我都係買到佢，真係好開心呀~~~ 我一路食個餐，一路由個心到笑出嚟...

Tiramisu

再一次多謝積奇蓮陪我整餅，原來Tiramisu真係唔難整，不過要provided that 屋企有齊所有工具。

我的家人就係當晚食晒整個Tiramisu，二哥仲要係食左1件半，大讚好味 (我都知一定好味，因為係cake 1 cake 幫我地調配好所有份量，我地只不過係processor，將所有材料攪均，我相信個個餅都係咁好味，惟一唔同就只係個賣相!! 我發現我有小小上癮，心目中巳經有好幾款餅想學喇~~

My friend stole my thunder!!!

大約一年多前，我曾經問及朋友D 閒時應該做啲乜，學啲乜好。 我當時同朋友D 講話我想學小提琴，話如果她有意的話，就可以一齊學。不過朋友D 話佢想學鋼琴多啲。 咁我又問佢我學小提琴好，定係好法文，佢就叫我學法文先... 我都記得我同佢講過我有去上YOGA 班，但佢又話YOGA 太悶，唔啱佢。

但時隔只不過大約一年，朋友D 竟然學緊子提琴同埋JOIN 埋YOGA CLASS... 但我就兩樣都冇做到。眼見自己個目標畀人地完成左，真係有點不是味兒。 不過我冇唔開心，反而被佢嘅行為推動自己搵番自己個目標，所以我都唔輸蝕，終於都為自己報番個小提琴班，八月開班，真係好期待八月嘅來臨呀!

一日睇兩場

人地就一腳踏兩船，我就一日睇兩場戲....

今日我破天荒睇左兩場戲... 原本只係約朋友睇三點場「魔幻王國2 - 卡斯柏王子」，朋友話想Element 睇，咁咪去睇囉。 不過套戲真係唔好睇，老套唔在講，又悶，好多時拖長嚟講，睇睇下都好想走o架，不過我點都睇埋先走，睇下有冇驚喜o麻，結果都係失望而回。

睇完戲行兩行個Element，就返屋企食飯。飯前和另一個朋友閒聊時，提及今日套悶戲，朋友又好即興咁話去睇 The sex and the city。其實我一早都想睇，既然佢都想睇，而我又得閒，咪去佢睇下買唔買到飛囉，本來大家都sugguest 去旺角睇，不過冇晒飛，最後都係要去Element睇。

一日睇兩套戲，仲要係同一個戲院，踭在唔係同一個House上映咋。 唔知點解，啲野成日overlap，對上兩次去朗豪酒店飲喜酒時，兩次都被編到同一張檯上，連坐嘅位都只係剛剛next to last time 咋，真係好斜!!

妤幸福呀... 真係恨死隔離!!!

今日下晝去完積奇蓮嘅Sisters gathering 之後，晚上又要attend Ada & Matthew 嘅Wedding banquet....

兩位新人真係好sweet，好幸福咁，真係羡慕死人喇!!!

時光真係飛逝，話咁快，原來兩位巳經拍左九年拖... 唸返起佢地點樣從認識到拍拖，都住係好近嘅事... 真係想唔認老都唔得喇!!

今個Wedding banquet同其他嘅都幾唔同，有唔少搞鬼野加插左係入面... 搞鬼得嚟係有少少冇厘頭，不過又有不少sweet sweet 嘅細節同大家分享，都幾特別... 真係唔講唔知，今日仲要係佢地拍拖九周年嘅大日子，揀正今日攞酒，都好有心思。 新郎哥仲同大家share左佢哩九年情人親手為新娘子束嘅鮮花，又同大家share 佢地每年anniversary 嘅傳統 -- 隔年摺疊365 個心心畀對方.... 真係好鬼sweet.. 大家睇完個video 好覺得好sweet.... 由於新郎哥係牙醫，佢地送畀大家嘅table gift 都係同牙齒有關，真係好得意，好特別，同埋好有心思!!!

日本潮

最近身邊嘅同事及朋友都紛紛去旅行，有的去渡蜜月，有的就要清假放block leave。 去渡蜜月的朋友，就多數揀去歐洲。為清假的，就多數去日本。 由於太多人去日本，個個都講到非常興奮同埋吸引，搞到我都好想去埋一份。 我個teammate 下個月會去北海渡玩呀，最衰我同teammate 唔可以一齊放假（因為大家係對方嘅backup)，如果唔係，我一定去埋一份!!

眼見身邊個個人都去旅行，搞到我都心郁郁好想去埋一份! 不過話時話，唔知係咪身邊嘅人多數都係去日本嘅關係，除左日本，目前我又唸第二個地方想去...

Friends updates

近日每每打開facebook 個home page，見親嘅friends updates 十居其九都係change profile picture，而且仲要係張張都係婚紗相。張張相都好鬼靚，個個都好開心同埋好幸福，見到佢地啲相，都真係叫人戳佢地開心，見佢地個個都鬼死咁靚，睇嚟人地話「女人穿上婚紗係最靚!」哩句話都係真o架!

喜慶月

今個五月真係一個喜慶月!! 同時亦代表我的大出血月，因為適逄....

1) 天下母親嘅大日子 - 母親節
2) 二哥新居入伙
3) 二嫂的誕生月
4) 好友積奇蓮的誕生月
5) 收到三個紅色炸彈

出血還出血，全部都係叫人高興嘅事，Cheers!!!

Blueberry Cheese Cake

自第一次做哩個焗藍莓芝士蛋糕後，就知道媽媽好鍾意食佢。其實都有唸過再整畀媽媽食，不過只係得個唸字，一直都冇行動。日前總於"的" 起心乾，同積奇蓮去左報名lu...

雖然好似好戇居咁學做同樣嘅蛋糕，不過老媽子鍾意都無計啦。 美中不足就係今次整得無上次咁靚，之不過積奇蓮嗰個又好鬼靚... 唔通要第一次學先會整得靚？

媽媽真係好捧場，第二日就用我嘅傑作做早餐。係將我個六吋芝士蛋糕一開四份... 其實都幾膩o架，不過媽媽竟然唔夠"皮"，仲嫌唔夠芝士喎... 我個六吋蛋糕用左成280g芝士做o架喇!!!!!　只怪話媽媽真係一個芝士狂吧。