驚嚇之旅? 有幾驚嚇呢? 總之可謂一日一驚嚇啦...DAY 1 (12月22日)
到烏來我地住嘅溫泉酒店，櫃台姐姐帶左我地上三樓一間房，一開門，我地就見到有一條好長而又繞埋一堆嘅蛇係間房中間地上。真係無唸過會係自己間房入面見到蛇囉!!! 櫃台姐姐立即把門關上，仲打算安排我地入住正正隔離嘅房間。櫃台姐姐再三強調佢都係第一次見到房入面有蛇，大家唔需耍驚。但我地梗係唔要啦，兩間房咁近喎，點知會唔都有蛇架?!!! 好在哩間酒店係又兩幢三層高嘅building組成，所以後來佢畀我地住另一幢building。為安心起見，我地要求佢地派一個男生為我地間房詳細檢查一下，將所有抽屜都打開check 下。 Check 過唔見到有蛇，我地先安心要哩間房。 Check in 完，又巳經差唔多係食晚飯嘅時候。因為我地間溫泉酒店算係係山上高，但係條老街 (唯一可以逛，類似市集咁，又有小商舖同埋好多檔串燒擺設嘅地方) 則位於山腳。好彩酒店有專車接送大家住返老街。當我地食完埋所謂當地特產後 ( 山豬，山雞，山姑，山菜等...) ，我地就食埋幾串串燒就打算返酒店，返酒店就要打電話返櫃台，等佢安排專車嚟接我地。我地四個搵唔到電話，就去左警察局，其中一個團友(D)唔係太懂普通話，胆粗粗咁同警察(P)講出我地嘅要求...
D: 我們是旅遊都這裡，現在要回酒店，我們想打電話回酒店叫他們車我們 (然後將酒店咭片遞畀警察睇)
P: 哦，你是要他們載你們，不是要他們「車」你們呀!! 給他們車倒就不得了唷!!!!
D: 是... 我們要他們載.... (本來唸住問警察借電話打，點知警察叔叔好熱心咁幫我地打電話返酒店
P: 是不是卡莎米亞? 這裡是警察局，你們有四個客人在我們這裡，你快把車送到這裡接走他們吧。
(其實大家都好想知道頭先櫃台姐姐接到警察局電話時嘅第一反應!!)
返酒店沖洗後，我地終於可以一嘗泡湯嘅滋味。浸過溫泉之後，又幾舒服，真係特別好瞓。
*************************************************************************************
DAY 2 (12月23日)
一早食過早餐，我地又去埋烏來瀑布風景區，坐過空中纜車，到一個叫雲仙樂園嘅地方。沿途都係園林風光，晨早行山，呼吸下清新而又高含量嘅負離子空氣，真係份外醒神。睇完瀑布風景區，我地再返老街，再睇清楚日光日白嘅環境，同埋再品嘗多次好冶味嘅串燒。然後再返酒店check out，完成我地烏來嘅行程，向嘉義出發。
我地先坐的士到火車站，乘搭火車到台北站，然後再轉乘高鐵(High Speed Train) 由台北去嘉義。 去到酒店settle down 後，都巳經是下晝四點多，我地係附近一間餐廳食過我地遲來嘅午餐後，又去搵另一個火車站，睇下上亞里山嘅小火車班次。好可惜，去到售票處時，巳經過左辦工時間。而且仲見到窗口貼上"售罄"字條 。惟有明天請早，八點再黎買過啦。點知有位阿嬸話佢係的士司機，問我地係咪要火車票。 佢話有兩張火車票，但我地有四個人，梗係唔要佢個兩張啦，咁佢又offer我地租佢車上山，然後佢幫我地arrange 落山坐火車。但係因為每日得一班火車，返黎嘅時間唔match 我地到飛場嘅時間。之後阿嬸又話佢聽一早幫我地湊夠四張火車票，但係我地回程一定要坐佢架的士，佢仲offer 阿里山睇日出嘅local tour畀我地，我地當然ok la.. 不過佢竟然要我地畀晒所以火車票錢同埋一半的士車費作訂金，但係我地又驚啲車票係假，又驚佢收左我地訂後唔會去接我地.... 結果，我地只係攞左佢嘅咭片返酒店再商量商量。 (其實我地唸住聽朝一早打電話問售票處有無車票，無先call 番阿嬸。)
係火車站"繞嚷"一倫之後，我地又向夜市場出發，其實個夜市場同旺角花園街無乜分別，只係條街比花園街長好多，同埋畀花園街多食野嘅地方。逛過夜市場，食過唔少當地街頭小食，我地又要返酒店。但返酒店途中，我地經過一個地方，面積有足球場咁大，正正有好大嘅火化儀式，真係好大型，唔係大戶人家，就一定好有地位同份量。團友D不禁講左句: 「唔係吔... XYZ.. 咁斜? 今日又一驚嚇喎!!!」不過沿途又見到有啲當地人影相，所以我地又懷疑係拍戲，黑社會大阿哥嗰隻呢。
***********************************************************************************************
DAY 3 (12月24日)
一起身梳洗完，我地又打電話去火車站問，話啲車飛賣晒喎，咪惟有打電話畀阿嬸，約時間叫佢到酒店lobby搵我地。開頭團友D comprise 唔到，因為佢唔願意畀的士按金，所以我地決定唔要阿嬸啲車票，自己坐的士上山，但原來團友D又好想坐小火車上阿里山，最終我地又死死地氣call 番阿嬸，同佢買車票同埋交的士按金畀佢。 佢仲好好咁問我地要唔要join 佢個local tour。我地始終對佢個local tour 有小小保留，所以同佢講，如果我要join，就再打電話畀佢。
攞到車票後，我地再周圍走走，又係一間coffee shop 坐坐，夠鐘再去火車站。去到火車站，我地就好遊客咁係又影，唔係又影一大餐，小火車一到站又趕住同火車頭影相。影飽相就乖乖上車。上車後，又好小學生去旅行咁，一味望住窗外風景，不過架小火車好"櫈"架，同埋成日微微左右搖晃，令人好有睡意，所以後來我都係半睡半醒狀態。架火車一直前行，但係行行下又向後行。我以為前面有另一架火車迎面而來，所以要後行讓路。後行一大段路，火車又向前駛。行左好耐，佢又向後行，我心不停抱怨:「咁樣向前走三步，又向後走一步，幾時先到阿里山架!!」，如事者，火車向前走走，又向後走走，向後走完竟然係到逹阿里山站。後來先得知原來係因為阿里山個山形問題(可能太斜卦)，火車軌唔可以環繞著個山，要用 "支字" 路軌喎。所以架火車會向前向後走。
到逹阿里山開始入黑，返酒店後check 過local tour 後，我地決定call 阿嬸，傾好晒時間後，佢又同我地講，原來唔係包的士，係van 仔，最多會有十個人喎，團友D又唔太歡喜。我地去山上市集食過晚飯，又發現其他local tour，唔知點解，團友D對佢地好有信心，一定要join 佢地，仲立即畀按金佢地。 我地一返酒店再call 阿嬸，呃佢我地有人唔舒服，所以要cancel 聽上山睇日出嘅行程。 點知我地call 唔到阿嬸，佢條線飛左去voice mail。惟有留言畀佢，好快就有人打番畀我地，問我地點解要cancel，我地繼續話有人拉肚子唔舒服，要留係酒店休息，佢就話一個唔舒服，其他三個都可以跟佢車上山玩。我地唔肯，佢又話送藥畀我地，食過藥就會好番，可以一齊上山喎。我地真係好多謝佢份心意，無奈我地join左另一tour嘛... 正當我地開開心心咁傾偈時，有人拍我地房門話送藥畀我地。雖然送藥黎嘅係一個女人，但我地都未見過佢，又巳經夜喇，梗係唔開門畀佢啦，但我地叫極佢都唔走，一味叫我地開門畀佢入嚟。我地惟有打電話去總機，叫櫃檯派人趕走她。 哩個都算係第三個驚嚇喇!!!
************************************************************************************************
DAY4 (12月25日)
因為要睇日出，所以好早就要起身。 落到lobby，local tour 嘅車都到左，我地去台灣最高嘅山 (玉山) 睇日出。一直都好興奮，架車一路上山，越上越高，個人就越來越凍。沿途都有兩，三個地方停低畀大家影相，由天黑影到天亮。明明話睇日出架喎，點解個天都開始光，但我地仲未到山頂?? 所謂睇日出，只不過係睇個太陽由山頂走出嚟，都幾搵笨喎。
睇完日出，我地再遊覽其他境點，我地加錢requet 去埋另一個地方叫"奮起湖"睇蒸汽火車，途經市集畀其他人落車時，與我地素未謀面，那個送藥嘅女人竟然identify到我地四個，佢走到我地架車駡我地。又話我地昨晚唔開門畀佢係好沒禮貌的，坐別人車上山睇日出而唔坐佢車係無信用的行為。佢嘈左好耐，團友w好聲好氣同佢理論好耐都無效，忍不住變得好惡咁問她 : 「你是不是在駡我???」 我地個local tour 司機也忍唔住把那個送藥的趕開，幫我地關上車門。叫我地唔駛怕，原來她出名霸道，佢見到邊個客人先，就會當係佢嘅。
去完奮起湖，再返酒店都只不過係下午兩，三點。因為Amanda唔係好舒服，佢決定返上房瞓覺，團友D想小睡後自己行下，所以團友W 就同我結伴遊覽個阿里山，沿途都係啲園林風境。大家你幫我，我幫你影相。走到一個蘭林園，竟然有民族服裝免費提供畀大家影相。我地見唔駛錢，咪走埋去囉，影完相先發現，原來所有服裝係由法輪功提供架。佢地幫我地除衫時，不停要我地參加佢地，要我地退黨，又要我地簽名支持佢地，當時先知驚，梗係乜都唔做，走人為上策啦。唸翻都真係幾恐怖喎... 唉，仲唔係一日一驚嚇?!
晚上返酒店打電畀阿嬸confirm聽接我地嘅時間，點知佢又飛線去voicemail。 我地留左言，但等唔到佢回覆，大家又開始擔心因為送藥事件，佢唔嚟接我地! 不過好彩後來，佢終於call back，同我地約實時間。之後我地再點算我地公家嘅盤川，發現所剩無幾，緊緊足夠畀車費。不過團友D仲好想自己去埋某個藝術館，所以我地仲要分多一點錢畀佢旁身。
***********************************************************************************************
DAY5 (12月26日)
由於團友D堅持要去藝術館，我地要求阿嬸順道在藝術館入口放低團友D，然後再送我地去嘉義高鐵站。點知，阿嬸話要加一千。大家即時滴晒汘，擺明坐地起價喎，我地真係無晒盤川喇喎，你仲要加咁多?? 原來阿嬸係話"繞一圈子" (不過帶有好重鄉音) ，唔係要加一千。 大家緊張嘅心情終於平伏下來。就係咁，我地先坐高鐵從嘉義返台北桃園火車站，然後再搭巴土去桃園機場搭飛機返香港。 其實我地來回台灣都係乖搭華航架，安全降落時，團友w好開心咁畀左個五我!!! 完滿咁完成我地五日四夜嘅台灣之旅。
************************************************************************************************
以下係相係拍自我部相機: 大部份相係拍自團友w 部相機，我仲等梗佢地upload...
http://community.webshots.com/album/561905464dMQbkR?vhost=community
後記:
原來我讀中學時有個外號叫「冰山美人」，人人都話我cool，Amanda，你好呀，你知道咁耐都唔同我講!!!
