八號風球

日日都密密做，個人其實好攰，終於等到星期五lu，同積奇蓮食過午飯，返公司沿途時先講起話做乜咁大風，吹到頭髮都亂晒。點知返到公司搭 lift 時，有同事講話三點半會掛八號風球，可以隨時走人。(唔怪之頭先出面咁大風啦，原來打緊風球....)

返埋位之後，就立即同同八下係咪真係打風，同埋如果打得成又可以點之際，大老細個秘書巳經走到我地隔離，同我地個大肚婆同事講話好快就會掛八號風球，叫大肚婆同事快啲走先.... 大肚婆同事走左無耐，秘書又宣佈巳經掛左八號風球，大家可以走先。秘書未話走得，巳經有好多同事話自己住得偏遠 (離島，赤柱等)，巳經走左，所以秘書一話走得無耐，我都 log-off 電腦走lu...

無端端多左半日假，本應高興，但明明約好R一起吃飯，怕且都係要cancel lu... 臨走我還email 積奇蓮，嘆惜今晚同R無緣見面。原本還以為要自己一個返屋企先，落到公司留下接到R來電，約我係金鐘等... 我去到金鐘時，金鐘站巳開始出現人潮，我坐係月台中間嘅長櫈等R，唸住打電話話畀R知我嘅位置，點知電話打極都唔通，唔係冇反應，就係話"Number busy，retry?"，但係當你retry時，佢又係冇反應。眼見人龍越來越勁，有點擔心R搵唔到我... 唯有send sms 啦，搏佢收到我個message，知道係邊度搵我啦... 好彩我都打到畀佢，講到畀佢知我個位置。

就係坐係到等R個不多於半個鐘，我遇到以下嘅事...
1. 不停見到一群群人係月台奔跑 (3 號月台嘅人走去年4號月台嘅同時，4號月台嘅人又湧住去3號月台)，月台越積越多人，最犀利時，成個月台都係人潮

2. 有位嬸嬸話佢電話接收唔好，要我借電話畀佢打，我幫佢打電話，但係電訉公司話線路繁忙，請遲啲再打嚟... 嬸嬸問話搵唔到朋友，唔知點算好，我話我幫佢試多幾次，佢話好，但我幫佢打電話時，佢又走左去第二度，都唔知佢想點?????

3. 跟住有位哥哥坐我隔離打機，打打下佢好疑或咁問我發生乜時....
哥仔: 唉! 係咪將會有風球??
J : 巳經掛左八號風球喇
哥仔: 係咩?! 唔怪之咁多人啦!!! 咁要快啲走先得喇... (跟住就閃走左，不過好快又見佢返嚟坐)
哥仔: 都係唔走住喇... 好多人呀，下一層逼滿人，行都行唔到，都係坐下先

4. 頭先位嬸嬸拎住部手機話打唔出，但係收到訊息... 我唔識點用呀，你可唔可幫我呀?? 冇所謂啦，咪幫佢send sms ，幫佢話畀佢朋友知佢係邊度等緊佢囉...

5. send 完無耐，有位失明人仕走到我面前，原來佢要上去地面。我又幫佢搵扶手電梯，然後再帶佢去... 不過我都係唔粗心大意，我一尾帶佢行，但我忘記畀instruction，行左一陣，我先記得要同佢講向前行定係向左行.... 之前毫無引述下，咁樣佢畀我拖住嚟行，唔知佢有冇啲驚呢??

6. 送完佢上電梯，正想返去等R嘅時候，我就係月台見到R喇... R問我做乜咁開心，梗係開心啦，時間真係啱啱好，幫完人之後就等到R，唔駛再擔心太多人搵我唔到...