最後倒數

因為要去四川做探訪，近排成日去買預寒衣物同旅行用品，買完又買，買完再買，買極都好似唔夠咁…

噚晚終於面對現實，開始將啲野執落個蚊型篋。一如所料，個篋話咁快就full左lu ，要用埋另一個大旅行袋先夠！！唉呀，仲要帶英文書俾當地小朋友，雖然數量唔多，但都夾夾埋埋都好重呀。

好彩今早收到好消息，小提琴老師話佢有個23寸篋可以借比我用呀！真係奇妙嘅供應，實在太好喇！聽晚放工攞埋個篋，最後衝刺換篋執野！！希望老師個篋夠用，唔駛又行李，又旅行袋，又背包就好喇!

踏入最後倒數階段，仲有一日就出發喇..  開始緊張喇...  過到去都仲有野要準備..   希望一切順利啦!!

*******************************************

團契嘅弟兄Jackson 真係好才華，贈左一首詩鼓勵我..  真係勁!!!

珍妮去短宣，帶著寒衣捐。

緊帶隨身藥，唔怕身子弱。

萬事要小心，代禱連眾親。

宣教路漫長，有主自會強！

仲有幾日咋...

 

話咁快，今個星期六就要出發去四川，探訪當地幼兒，中小學生，老人院及當地教會。

由十月份第一次開會，分組構思program，開始準備到而家，仍然仲有好多野要預備。日日都收到隔離team嘅email，要prepare什麼什麼，聽熟什麼什麼...   今日都仲有新email...  之前信心好大，但今日開始識得驚lu，覺得未ready添。今日收到個天氣預告話會落雨，有幾日仲得零度添咋。唔...  有啲擔心，唸緊駛唔駛多帶幾件衫去！不過呢...  今次大會限制我地用24寸之內嘅篋，因為我只有20寸同26寸篋，焗住用個20寸蚊型篋...  唉...  九日冬天衫加其他物資... 真係好太挑戰!!!

放左兩條厚褲之後，只剩半個篋..  好灰... 一直唔想去執因為知點執...  不過我都係係時候執下野先得喇，因為唔執過，又唔知仲有無野要買去...  希望唔會執漏野啦！

P.S. - 趣事一則 -- 「被」請食檸檬!!
今日同朋友V同朋友R食lunch，朋友R"煽"手令到個碗蓋跌左係個碟上，繼而撞到碟上嘅檸檬碌到去我面前...    
朋友V好快咁話:「嘩!你做乜請人食檸檬?」 
我又搭咀:「我都未問你，你咁快就請我食檸檬?!!」
朋友R都唔知點反應，一臉又尷尬又怕羞嘅表情，快快地執番碌左係我面前嘅檸檬，真係好好笑 =P

心傷

上次上堂叫老師得閒再幫我練吓考試歌啦...   點知換嚟老師一句:「邊個話你下年可以考試架?」 雖然老師係半講笑咁講，但係佢哩番無心說話真係好傷我個心囉... 

難得人家立志下年再考琴試，老師哩杯冷水會唔會太凍呢?  

Memorable experience~

開場前最後綵排

String B 合照

NPAC Orchestra 大合照

經過數月的練習，終於完成左教會六十周年堂慶嘅感恩崇拜演奏喇....   難得一嘗加入管弦樂團嘅滋味，同咁多位弟兄姐妹一齊以音樂讚美上主，真係好好好好好開心呀... 

今次崇拜，仲要係移施到機場博覽館添...   係咁大嘅舞台上獻奏，真係千載難逢的...   好在有咁大班人一齊，不至憺場。  不過台瘟仍然發左的...  我竟然係自己最純熟嘅樂曲拉錯弓法呀!! 仲要係一開始o果下就落錯弓法呀 (全世界向上拉弓嘅時候，我就向下拉弓!!!!!)  到第三個bar先修正番 U_U

我深知哩個機會同經驗並非偶然，而全是恩典。所以我好感恩有機會參與其中，雖然要花好多時間練習 (無論係返教會跟樂團和詩班一同練習，定係屋企自行練習)，但係我好enjoy每一次嘅練習時間，因為當中真係有好多學習機會。 

雖然今次嘅獻奏巳經完滿結束，我地獻奏嘅每一首係詩歌同序樂都仍然不停咁係我個腦 loop緊...  今次哩個奏樂機會，真係好難忘!   


P.S.
原來係個舞台上被射燈射住，真係會被抽乾架...   我地都無講野，但係個喉嚨變得極乾，好似火燒咁架...   所以，如果大家要上台表演嘅時候，真係要預先多飲水同食潤喉嘅野呀!!

終於有相喇..

今日終於Dick 起心肝執一執啲相... 因為我知道如果再唔執的話，好大機會無限期拖下去...

睇番個相機，原來都影左過千張相喎... 因為其中好多都係博物館同美術館嘅展品，所以都唔post咁多， 好唔容易先揀出啲相，但揀吓揀吓都有揀左過百張相喎..   =p      

http://www.facebook.com/media/set/?set=a.10151107290292050.438968.643747049&type=1&l=aa24c55a74

密密織

我見老師鍾意種花花草草，知佢都喜歡薰衣草，去旅行見到哩個薰衣草香包，就知道哩個係佢嘅手信...   其實我自己都好鍾意哩個香包架 (obviously 因係佢係紫色)，不過我只買左一個咋... 

開頭織嘅時候，覺得好搵自己笨...  買左之後，仲要用好多時間，精神去織...  睇佢細細個，範圍細，但係都要織好耐架...   我又唔想隔太長時間先送俾老師，所以每晚都趕工...   每晚織個零兩個鐘，但係都只係織到少少野...   足足織左我個幾禮拜先完功...     好在，整起又真係好靚好香，好有成功感，而老師又好鍾意咋...   都不迋我一番心機嘅  =D



忙碌

友人話我好耐無update 過我個blog，叫我快post 歐遊嘅相片...   其實我都知我有一排無寫blog了...   因為我近排生活好忙碌，返工好多野要catch up，放工又有好多野要做...   星期六日都有教會野忙...   我其實都有好多私人事想做，但都未有時間去處理.. 

另一個原因係...  其實我唔係太過enjoy我個trip..   無錯個trip係我期待以久的，但去到個邊有好幾日個partner唔知做乜成日板起口面唔出聲喎，結果個trip無癮指數係頗高...  所以我都唔係好想去執相同post相 =p

相反，教會六十週年堂慶將至，樂團嘅練習又密羅緊鼓練習當中... 加上又要為到聖誕四川採訪做準備功夫，所以真係好唔得閒...     相，我一定會post 的...  不過都要忙完六十周年堂慶先會開功搞。

新歌仔

臨出發之前，趕工錄左佢先...  今次首歌仔都幾輕快，老師都幾滿意咁..  不過因為趕住錄，又有啲緊張，今次拉得唔係好好，有少少甩漏嘅...  音聲依然有待改進，但老師都覺得我拉得唔錯架 (以我有限嘅資質...) 

我知道我會好掛住我個小提琴架...  返嚟我會拉番夠本..  因為我將會miss左兩次練習，所以要追番樂團嘅進度添...  >~<

  

小手作

嗚嗚嗚...  行完山返到屋企發現陪伴左我四年嘅生日Kitty唔見左呀!!!   唔知係邊度整唔見左佢呀...    

今日俾我見到哩隻羊仔平平地，就買佢番屋企，做下手作仔啦...  不過要自己畫過紙樣，畫完再慢慢剪，剪完再密密縫，真係過足手癮...   唉... 唔見左隻kitty，唯有整番隻小綿羊補數啦... 

練習花絮

原來有教友拍低我地練習嘅片段，不過我唔係面書嘅朋友，無access download 佢嘅post..  因為common friend "like" 佢個post，先知道有哩兩個post..  唔知其他人睇唔睇到哩兩段片喇..    

大型練習

終於等到喇...  真係好興奮呀.. 

今日係為到教會六十周年堂慶嘅首次大型練習..   約六十人嘅樂團加三百人詩班一同練習，真係陣容鼎盛呀...   我地眾樂手係前面奏樂，而詩班員係後面唱詩，真係好震撼架..  有幽美動人嘅歌聲伴住嚟奏樂，真係好好feel呀..   

好感恩好感恩有幸參與其中，願大家一同努力練習，互相有更好嘅配搭，務求將最好的獻奏奉上!!

   

上岸派對N周年

真係好多謝魚今年為我地搞番個上岸派對，仲要畀埋個surprise 之前咁多年嘅搞手Clement。因為上年Clement唔係香港又無人發起，我地終於miss左哩個 Annual gathering..    好在今年又有番啫。Clement 仲好開心咁答應下年佢一定會再搞哩個上岸派對添... 

今年嘅gathering，大部分人都巳身為人母喇，今日仲要有三個大肚婆添..    坐低無耐就講媽咪經生仔經...  明顯大家都去左第二個stage.. 

傾傾吓，家明就撩Clement，Fian 地去上海搵我地嘅酒店大亨Kenny 食大閘蟹..  所以Clement 就打電話畀Kenny 約時間去打搞佢...      唔知點解會pass左個電話畀Fian...   Fian就好興奮咁同Kenny講我地當中有三個大肚婆，仲叫 Kenny 估吓係邊三個...    Kenny好勁，一估就估中左兩個...   但Fian 要 Kenny估埋第三個...   

Fian: 「Kenny 你再估吓第三個係邊個吖... 我畀提示你..  呢...  好靚女果個呀...」
無耐就聽到Fian講 :「係呀好靚女架呢......  哎吔，唔係Janet呀...  你再估仲有邊個.. 」
跟住Kenny就話估唔到，唔肯再估喇...  Fian唯有開估.. 

真係好好笑呀..  原來我係Kenny心目中係個靚女嚟喎..   今日除左Clement有surprise之外，我自己都有surprise喎..   真係有啲飄飄然嘅感覺添...  哈哈...

奇怪

從未踏足歐洲，個心一直好"恨"去的...    而家就快去喇，但我並唔係好興奮，真係好奇怪哦!

唔知係因為籌備旅程時，有所阻滯嘅關係呢??   是緣係今年三月巳經和朋友定好一起去歐遊。我想用飛行里數換機票，所以要一早去book機票。但又剛遇上國泰system upgrade 問題，熱線電話打極都唔通...   好不容易打到電話，個同事叫我留電話，佢再搵專人覆我。  結果，個「專人」係我生日當天回覆我電話，幫我辦好手續換機票。 我當日真係好開心架，當係收到生日禮物架!!

可惜朋友一直未定好redeem ticket 定係買機票...  之前朋友一直話佢會買機票，又話會有大把機位，叫我唔駛擔心...  但我四月頭巳出了機票，朋友到六月先同我講佢想換機票，但因國泰個system upgrade issue 未解決...  朋友未能係internet 自行redeem tickets，但又係打唔通個熱線電話...   一直都pend 住左...  

我一直都擔心最終朋友redeem 唔到機票，得我自己一個..  我好惆悵..  成日問住朋友將機票有未...   我嘅興奮指數開始下滑。   直至六月尾，朋友message我佢最終唔redeem ticket，改為買飛票了..     好了...  機票一part 終於confirm了。 但朋友一直都好忙，唔得閒同我傾行程...   只能係七月中先傾第一次坐低傾吓個plan..  到八月先定好個行程同訂埋酒店...  等左咁耐，終於叫做搞好..  但其實仲有少少細節未傾好，雖然快要衝出歐洲，但我並唔係預期咁興奮，真係奇怪!    希望到收拾行李嘅時候，我會有番好期待同興奮嘅心情啦。  

New song

都有一排都無錄新歌仔...  一嚟因為忙於練習教會管弦樂團將要獻奏嘅曲目，二嚟係因為之前學緊嘅歌仔太難，學左好耐都拉唔好，所以好耐都無新出品...    上次終於勉勉強強咁叫做拉左首又難又長嘅歌仔...   而家學番啲短啲嘅歌仔，雖然唔係handle 得好俐落，但都還可以拉聽得出個melody嘅..  不過其實仲有兩part variations 我未學晒架...  唔知今次要學幾耐呢?   

  

我的天 (七)

嘩...  今次畫左兩個鐘都唔夠，老師竟然話我畫完幅畫喇...    我仲以為有排執，有排畫啦..  點佑老師巳經叫我簽名lu...    成幅畫用左大約二十個鐘，終於完成喇... 真係唔係好敢相信添...   不過因為要等埋個畫框.，有排都未帶得佢返屋企... 

今次幅畫係送比爸爸媽咪嘅..  希望佢地鍾意啦 n_n"

新歌仔..

好耐無製作新歌仔lu...  並唔係我放棄左，只不過近期太忙，又返學，又要夾樂團..   所以得番好少時間練新歌仔... 加上新歌仔又好長好難..  我學左成個月都未拉得好.. 所以無得錄啫。

不過今次都錄得好勉強...  因為份譜好長好長，有成五頁紙..  我真係無本事記晒...  所以要錄吓又要cut吓，揭過份譜再錄吓，所以都幾多接駁位 =p

學左咁耐，又練左咁耐，都係拉得好甩甩咳咳...  唔知遲啲拉番哩首歌仔嘅時候，可唔可以拉番順啲呢?

String B

今早要第一、二堂獻奏，要七點幾返到教會準備，所以要好早起身。一早起身，發現落緊好大雨..  心諗:「唔好啦..  上次奏獻又係落雨...  今次又落雨？　仲要咁大雨？」　所以好快咁祈禱其望唔好咁大雨，如果唔係，又要揹住個琴去搭車，又要担遮，又會好狼狽架。　結果，我出門時，只有小雨點咋！真係好感恩天父嘅看顧呀。

唔知係因為聖樂部要定出特刊哩，今次獻奏時，我地絃樂Ｂ組竟然要影番張相。所以好難得咁有以上兩張相留念。 　

今日獻奏我又有小許甩漏，不但都係好minor..   整體表現都尚算可以啦，真係好感恩有機會用哩種方式作事奉。

我的天(六)

今日去畫畫，但係一攞番幅畫發現棵樹又裂左...  係又裂左呀... 上次先補完棵樹，今次去又有好多裂紋，唯有先加油，後再補畫棵樹...   畫完樹就畫吓啲草披..   跟住再畫個海...    畫畫吓個海老師先發現...  原來我個草披未complete 架...   原來仲有草叢仔要加上去..      啲草叢真係好難畫架呢...   我巳經好努力咁畫得隨意啲..  但老師依然覺得我畫得太規舉，太同一個方向喎...   下次仲要加番啲漏左嘅草叢仔添..  希望handle到啦....

今次個海比我想像中難畫...  之前幾幅畫嘅海我都好快畫好... 但今次畫極都唔好..   加極頻色到未夠...  同埋啲黃色真係好難上色...   太薄又唔夠色，太厚又硬得濟..    今次一畫又用左三個半鐘，不過今堂嘅滿足度麻麻，因為大部份都要老師幫手執...     U_U

聯合練習

終於到左第二次管絃樂團練習喇...  一心唸住今次會比上次好啲架.. 但因為工作忙做晏左，結果要好趕咁飛返教會練習...  去到仲要發現我個拍擋被調走左呀..  因為指揮安排她坐前排。 無左拍擋得番自己一個，又無得跟住拉..   好慘!!   仲要無譜架用??  更慘!!!   好以樣樣都不利咁..   感恩今次信服嘅心大過一切，我無變得急躁，反而好平靜咁接受。 好在最後都唔係得我自己一個.. 都仲有絃樂B組嘅成員係附近...  而且仲安排到譜架\添。

今次拉番上次o嗰三份樂譜時，其中兩首明顯係好少少嘅...  不過另外一首嘅全首嘅節奏都好快，點拉都跟唔上..  好在前面個姊妹好好，特登坐近我地一啲，等我地聽到啲音，甩左都可以盡量跟住入番。  今日又派新譜，同樣唔比時間大家望下份譜，又係一嚟就要拉喇...   雖然都係跟唔上，有某部份係甚至呆掉... 不過都有小部份都知道做緊乜喎..  又唔係想像中咁差啫...   話雖如此，今日又睇到太多不足之處呀...  真係要加好多好多倍嘅努力練習先得呀... 

我的天(五)

今日都係畫左三個鐘，頭嗰兩個鐘又係一遍迷茫心渡過，因為我 handle 唔到啲細草坡呀!!畫草坡時，啲油彩成日融埋一齊，變成得一個顏色，無晒層次感，畫極都差唔多，所以用左好多時間去修改。後來當然又要老師加幾筆，加強啲層次啦。

跟住我就開始＂了＂啲草叢喇。今次我好放膽畫，而且我覺得自己已經好隨意去畫架喇。不過老師仍然覺得我畫得好「規矩」，唔夠「自由」喎！我唯有盡力去再隨意啲去"了"吓啲草叢啦。話咁快又"了"左成個鐘喇，因為要趕返團契帶查經，今日只可以畫住咁多先，下次再繼續！

雖然老師話我就快望到家鄉，但我估我都仲要畫多數個鐘頭草叢草坡，先至有望可以去畫吓個海 lu。

第一次聯合練習

終於等到管弦樂團嘅練習喇... 樂團真係唔同啲，節奏真係都緊湊多多聲。一埋位接過樂譜就開始拉喇...  指揮唔會開口數拍子，又唔會慢小小比大家warm up..   又一read就read到尾... 而啲譜又成日轉key...   真係太有挑戰性喇...  但係跟唔切架呢~~   雖然今日大部份時間都好迷茫，入唔切譜，轉唔切key呀等等..  睇見自己有好多好多不足，雖然挫敗感好強，但今日真係大開眼界呀...   今後真係要好好練習同學習....   最重要係求主大大加力，讓我和各團友都練習得宜，大家好好配搭呀!!


P.S
今日開始練習時，當我打開個琴盒，見到個小提琴有異樣，以為斷左弦...  睇真啲發現只係上面嘅弦線全部鬆開左，虛驚一場!!!!   不過就要臨急tune過部琴囉...   我嘅技術只限於平時fine tune部琴咋... 時間咁急，又要由零tune起，真係考起我喇...  個人急就唔OK...  所以我 tune 左一陣都未得嘅時間，只好請槍搵高手幫我 tune喇。  其實哩個驚嚇場面唔係第一次...   上次我第一次加入絃樂組上台獻奏當日都係咁...   但係我個小提琴好少會鬆弦線架... 我印象中只鬆過三次，但其中兩次都係係教會發生，兩次都related to 我嘅「第一次」..  真係好邪呀!!! 

立約日

今日係聖樂部嘅立約日暨頒獎禮。好高興有幸做代表上台領證書呀!!  原來教會詩班咁多人架...  真係人才仔仔..  部份詩班都身兼數職，有唱得 (詩班)，有彈得 (鋼琴/ 管風琴)，有拉得(絃樂)，有吹得(管樂)，仲有啲玩埋手鈴添...  真係多才多藝!!  真係為到佢地嘅音樂恩賜感恩呀。 今日仲有機會同絃樂B組嘅團員合照，真係好難得!!  

哩張合照影左三次先影得成，因為之前有部份團員行開左，每次都加入一個人，唯一美中不足係仲未齊人..   唔知六十週年聯合練習嘅時候，會唔會再拍合照留念呢?!

A treat for myself

隻錶係我上年出trip係飛機睇雜誌時見到架！ 上次其實睇中左，不過無買到。今次出trip又俾我見番佢， 返嚟香港時再睇多佢一次， 都仲好鍾意， 所以買左佢Lu =)

我的天(四)

今日又用左三個鐘去畫畫。今日啲時間過得好鬼快，話咁快就三個鐘喇。三個鐘只係畫左啲樹同埋一條路仔。嘩...  啲灌木好難畫呢!!畫嚟畫去，啲深淺色都融埋一"劈"。畫完又剷走啲油再畫，畫完再剷走啲油再畫。結果都係要老師幫我起個頭，我再係上面加加減減先ok咋！真係慘呀，仲有咁大部份未畫添，forsee到真係有排我畫呀！！

期待

今年適逢教會六十週年，堂慶會隆重其事。 身為絃樂組成員，有幸參加聯合獻奏，可以同其他器樂手一同獻奏、學習，真係好難得。所以一直好期待一齊練習嘅時候，可惜遲遲都未有通知...  今日終於收到練習嘅time table 喇...   嘩! 要有八成出席練習先可以參與獻奏架...  我check過我有兩次練習都去唔到，好在都仲緊緊meet 到八成出席率啫。 

真係好期待第一次練習，不過我又開始緊張起嚟..   因為我仍然缺乏技巧，節拍又唔好。 同咁大班人一齊練習，一定有壓力..  我又怕我拖慢大家嘅進度..  真係好希望到時可以配合到其他人就好喇~

之前都無諗過可以加入聖樂部嘅事奉嘅.. 因為我覺得要有良好嘅技巧先可以加入..   後來有機會加入絃樂組時，巳經開心都不得了。今次仲可以參與聯合獻奏，同其他樂手切磋，我知道全都係恩典，所以我會好好珍惜今個學習機會，好用心咁練習嘅 =)

駛大左

心思思左好耐，好唔好買個纖維造，胡盧形的小提琴case。咁樣每次落大雨學習或練琴時好似會方便啲。不過我本身個方形case 都頗貴，而個纖維case都唔係平！所以一直都係考慮階段。見今日休息得閒，就走左去琴行睇下啲case，可惜沒我之前睇中果啲纖維case喎。本來可以慳番嘅，但我又見自己之前整斷唔少弓毛，支弓唔係好聽駛喎，咁一場嚟到琴行，咪睇下啲弓囉。就係咁買，買左一支好貴好貴嘅弓 (成六千蚊呀!!)，夠買兩個case呀.. 

返到屋企就急不及待用支就弓練習...  雖然佢係貴，但真係物有所值嘅...   比起舊個支弓，佢輕新啲靈敏啲，所以易掌握啲..  雖然out 晒budget，但我都好滿意嘅。  至多唔買新case 住囉...   

P.S
今日俾老師見試過支新弓，雖然老師覺得我買得貴左，但佢都讚支弓唔錯，夠聽話呀!!  =)

慘不忍睹

日前想起我個有「復活印記」銀包，想拎出嚟用吓啦... 


到記得拎個盒出嚟嘅時候，見到個盒有少少「毛毛」..  以為只因間房太潮濕，所以個盒有「毛毛」...   我無唸過除左個盒外發霉之外..   盒入面嘅「復活銀包」都發霉呀，我更無唸過佢發霉嘅程度可以咁嚴重架!!!!    一打開個盒，見個原本係桃紅色嘅銀包，變成了一撻撻白色，更甚嘅係..  係白色嘅地方上面仲發緊一咋灰色「毛毛」，真係慘不忍睹呀！！！


見到咁嘅情況，我呆左數秒...   跟住關好個盒...   唸左數秒就忍痛將盒野扔左落個袋...   想要扔左佢，不過又唔係好捨得！雖然之前比粒復活蛋整污糟左，多左個記號，但我仲好鍾意個銀包嘅！  我有唸過好唔好買番個一樣嘅銀包補數...  但又怕未必買得番..  二來又好嘥錢...    唸唸吓，都係試吓清潔一吓，消吓毒，睇吓救唔救得番先啦...


跟住我就用左好多消毒火酒去清理個銀包...   曾過一輪搶救，又有啲氣息喎...   啲灰色「毛毛」同白色一撻撻都無晒呀...  連個「復活印記」都淺色左好多，  不過我都唔係好放心，用火酒抺左N咁多次...  再比太陽伯伯晒足幾日..  今次，個銀包真真正正復活喇!!!    =)

Back home safe!

一連四日係印度密集式工作之後，今日終於返到屋企喇...  真係太好喇!!

一如以往..  每日都係酒店，公司，出外晚餐，塞一大輪車之後，再返返酒店，每日早出晚歸。 我好叻呀，除外lunch同dinner之外，三年都係零消費架!!  

今年終於試到個"nan bread"，都幾好食，不過其實佢好熱氣架，不能多吃...   至於印度咖哩，我仍然食唔慣..  

之前兩晚，印度同事晚晚車我地出去食，去到好遠，又塞好耐車，到最尾一日老細堅持要返酒店食，因為唔想再travel咁遠，唔想好趕好趕咁衝去機場..   同事多番游說要帶我地出去食其他野，不過老細堅持返酒店...    就係咁，我同老細返酒店食我地嘅Annual dinner...  (三年都係去同一間餐廰，order同一個dish..  哈哈)..   食完飯，就去gym room 沖涼，之後就去機場...   我地以為預"鬆"好多時間啦 (兩個半鐘)，點知塞吓車，去到機場排吓哩，排吓嘮，又等一輪檢查後，時間都係啱啱好咋!!

上到機巳經係香港時間零晨四點喇..  好眼睏呀..   但附近個鬼佬好衰呀..  佢唔瞓唔緊要，成大聲order wine (因為佢塞住headset) 都還可以...  但佢食幾餐都好大力嘅收埋佢張檯，哩吓真係唔要得呀...  瞓著都被佢"boom" 醒幾次...   今次係飛機到瞓得唔好，所以落機時我都仲好想瞓..  不過返到香港，個感覺實在太好喇!!

落機後同秘書姐姐請左半日假，一心唸住返到屋企，可以大覺瞓，抖番吓.....  點知我鄰居竟然裝潢鑽牆....   真係晴天霹靂呀!!!  好在佢唔係鑽好耐...  而且我實在太眼睏喇...  不知不覺間我都瞓著咗lu....  =p

   

我的天（三）

今日話咁快又畫左三個鐘喇！不過哩三個鐘畫左好多棵樹，又舖左少許草坡，進度好ok呀！原本以為棵大樹好難先畫得靚，原來唔係想像中咁難咋。反而啲草坡先難搞呀！老師示範嘅時就輕如易舉，但一到我畫就畫嚟畫去都畫唔到，用左好多時間先畫到小小草坡。今次畫遠境嘅草suppose 無咁仔細，應該係較易畫的，我仲有好多近境嘅草坡未畫...  可想而之，我幅畫仲有排畫呀！

包容

今年答應左個Camp嘅籌委，所以過往兩個月內用左好多時間開會..   開會真係唔容易架... 


由於個個籌委各有各忙，好難come up到週未嘅時間開會，所以次次開會都係weekday放工後。但係開會嘅人每次都遲到... 明明約七點，次次都八點幾先齊人...   返工嘅遲係尚可理解，但其他人呢?  如果大家明明七點係唔得嘅，點解唔約八點呢?  咁我可以留係公司做多陣野先出嚟吖...   

雖然大家都係自願性質..  但係嘅然agree 左個分工，就要做自己o果part啦..  但係有人俾我嘅感覺係，返到屋企無做準備..  每次係開會問到佢o果part時先即場唸.. (至少開左三次會喇...)  唸完一輪又講唔出好實質嘅action point..  所以大家一齊brian storming， 個個人嘅suggestion 方向/內容都好唔同..   而個個人嘅提議佢都話: 「都得...」 但佢嘅語氣俾我嘅感覺係唔ok..   樣樣都猶豫不決，好浪費時間...  所以我忍唔住:「大家係哩個item拖左好耐，花得太多時間喇 ..  個個人提議嘅方向都好唔一樣，樣樣你都話得，其實你原本個idea係想點架? 」

營歌，營訓又係每次開會都話要傾，不過一直都未有人做功課..   但我想早啲finalise 本camp book...  所以好著緊咁去唸.. 好在佢地同傳道傾今次個camp主題時，傳道醒左三篇經文俾我地做預備..   感恩俾我搵到句大家都同意嘅營訓...

不過營歌就係另一棘手item... 大家各自做 research提議啲歌出，然後再開會決定。最後sort list 左三首俾大家投票...    但其實原來有人唔滿意其中一首歌，原因係佢唔係詩歌。   結果多數人揀了哩首非詩歌做營歌!!!    當事人先同大家講明，哩首歌缺少左係信仰上造就人或引起反思的元素，唔啱做營歌。　其實如果有哩個元素係咁core嘅話，點解唔一早同大家講？　點解佢又將首唔合乎標準的放入個list俾大投票呢?   你話係咪嘥時間呢?　　

我非常認同佢背後嘅考慮，不過我個人認為營歌要輕快啲先帶動到氣氛..  其餘兩首詩歌又太沉重...    但係我都search左好多首詩歌，歌名/歌詞到題的，大多數都係比輕嚴肅或沉重，一啲都唔輕快.. 難得搵到一首好有意思，又合題的，又係唔輕快..  而大家又略嫌佢太舊，有啲老土...   真係好難搞!!!   好在..   最後有人搵到首新啲又輕快啲嘅詩歌，最重要係大家都同意用嚟做營歌...  幾經辛苦，總算KO左兩個重要items。 

另外，人家一心唸住我會畫公仔...   其實因為人家唔明白畫油畫唔同畫漫畫公仔，所以好旨意晒我會畫:「Janet，你係負責整camp book 的..  咁你成日畫油畫嘛，硬係要畫埋本camp book啦...」，  但我又好直接咁回答: 「我唔會畫囉!」(因為一來camp book係黑白影印架，我畫完都印唔出嚟啦... 二來我著重嘅個camp嘅肉容... 三來我個人認為camp完左之後，無乜人會keep 住本camp book)  不過開完會之後，我又覺得自己認真得過份嘅...   人家問得咁輕鬆，我又何必拒絕得咁硬呢??   唔畫咪唔畫，點解又要加個「囉」字呢????   所以今次自我檢討得以下嘅提醒...


我"覺得"自己好包容人地嘅同時，其實人家都包容緊我嘅認真同直接嘅...  要記住多欣賞別人嘅好處，唔可以自視過高...      唉...  我開始明白點解啲人話覺得我好"cool"，好惡喇...  

我的天(二)

今日用左三個半鐘，都只係夠我畫吓啲雲同埋個山海。 啲雲唔易畫架..   用左好多時間去加details..   好在有老師幫吓手，如果唔係，啲雲唔會咁自然。

開頭畫個山海時，都唔係好知點畫，但畫畫吓，都幾順眼喎..  真係好呀!   今日叫做完成左個天個一part，下次可以畫個海，草皮同埋啲樹喇....   好期待再畫.. 但又好驚畫得唔好...  因為上次畫「天鵝湖」時，領教過刻畫啲草同樹嘅難度...  今次幅畫仲要咁大幅..  真係有排"舖"草皮呀!!

多謝媽咪

日前媽咪送左哩個十字架鏈鐩俾我...  媽咪話佢拎左隻介子去金鋪，叫人將戒子嘅鑽石折左，再砌成哩個十字架俾我架..  

雖然媽咪話係因為佢睇厭左隻介子，又嫌啲石太細，所以將佢變成鏈鐩喎..    但我知道媽咪都係錫我先咁講嘅... 點都好啦，我多謝媽咪嘅心意..  哩個十字架對我好有意思。   

   

我的天

今日畫左兩個半鐘，比自己預期用得小時間...  仍然曾經一度迷茫，因為用色太死，筆法太實。但經老師神手一揮，我的天空竟然變得好有光芒，成幅畫靚左好多。雖然老師讚我畫得比佢想像中快，但其實如果唔係佢出手，我又點會咁快有個"譜"呢？嘻嘻！

P.S.
今早獻奏，我嘅partner無出席，變得緊張，所以有小小甩漏。加上第三堂會眾詩歌時，主席明明話先唱首兩節，但會眾又唱晒三節。我地拉完兩次就停左，唸住俾主席講吓野先...  但主席見佢地唱左，就示意繼續，我地惟有執生拉埋佢，不過中途入，我都唔知入得啱唔啱，拉到就算喇..  好在第四堂無同樣事件發生咋。

搭車返家途中，正在想起友人，就收到友人致電約食飯..  雖然我巳經返緊屋企，無得一齊食飯，但收到佢電話，聽出佢心情ok，我都好開心 =D

挑戰難度

上次幅畫送俾朋友當做house warming gift...  點知原來阿爸同阿媽一直期待我拎幅畫返屋企架喎，阿爸仲唸住掛幅畫係廳添！阿媽知道我會送幅畫俾人後就好失望咁。所以我又要去畫番幅畫俾佢地掛係廳。

難得阿爸阿爸咁欣賞我嘅畫，今次實行畫幅勁嘅俾佢地，畫幅大大嘅先得！今次幅畫其實睇中左好耐喇，由第二、三堂學painting見到人地畫緊時，已經好鍾意幅畫。不過每次去上堂都見到人地仲畫緊，我都畫起幾幅畫作品，但佢畫極都未畫完，就知道幅畫唔簡單！！！

雖然知道幅畫要畫好耐，今次都好想試一試，挑戰吓自己嘅耐性嘛。咁大幅草皮，要一條一條慢慢畫，真係有排刻劃呀！老師都話要預起碼畫三、四十個鐘，但我保守估計要幾個月後先可以完成。嘻嘻，希望我真係有耐性慢慢畫，又畫到我想要嘅效果啦！

我的新電話

公司啱啱為我地換上新電話...  係有鏡頭的電話...   個個第一反應都好一致:「嘥錢!!!!」

對住新電話，大家都要摸索一下...   又要重新set過啲password..  又要試吓啲transfer，forward，conference，handfree，voicemail 等等嘅setting...  

同事最concern係有左鏡頭之後，同人講電話要小心自己嘅表情，又唔可以一路食野一路開con call等等...   有部份人撰擇釣住隻公仔對住個鏡頭...   而大部份人選擇close左個鏡頭，真係好無謂....      

難過

友人的爸爸不在了..   個消息嚟得太突然了..  之前還在寄望手術後uncle可以好快康復，誰知手術後情況急轉直下..  

眼見友人落晒型，我個心都好痛...  知道佢唔開心，但又幫唔到啲乜...  見佢無心機，又唔知點安慰佢..   真係好擔心佢..   除了痛失親人，變成一家之主，撐住頭家..  遇著工作還境又不太好，加上之前上緊嘅課程又要交功課，又有考試..  可以想像到佢嘅壓力有幾大..      友人最擔心他的媽媽...  每提到媽媽時就雙眼發紅，但每次都強忍著...    友人直言自己唔OK..  但只可以撐下去...    友人眼前一遍迷霧，灰氣沉沉..   我好希望佢哩遍迷霧盡快散去呀..   我唔想佢咁唔開心，咁無心機呀.. 

導師嘅鼓勵真係好啱架, "May God touch your heart and let your emotion and feeling be free to express to Him. Peace be with you and your family" .希望佢可以舒發出心中嘅憂傷，重拾幹勁，早日搵到更適合嘅工作，也願主嘅平安常與佢同佢家人同在。

小意外

噚晚臨瞓前發生小意外呀！我上緊上格床時，因為多心想攞其他野上床，所以就叉錯腳，由上格床跌左落嚟！不幸中之大幸，我右邊八月十五降落係書枱上，不至於跌落地。個八月十五當然好痛啦，隻「叉錯腳」叉左落地都好痛。好在今日瞓醒仲行得走得，不過個八月十五仲有痛同埋瘀左lu。感恩今次有驚有險，但尚算安全著陸！

Task completed

經過一共十二個半小時嘅努力，終於畫起哩幅畫喇... 其實有啲部份可以再仔細啲，再加工畫靚啲嘅.. 不過我巳經好攰，唔想再畫lu... 所以決定放棄唔fine tune 佢地喇... 一直我都好擔心啲花花畫出嚟可唔好睇，會破壞幅畫.. 不過好在啲花花畫起都ok吖，唔太差啫.. 成幅畫望落去都ok啦.. ^^

兩首歌仔

哩首拉丁歌仔都學左好一陣子.. 不過練極都練唔到... 老師教嘅手指我真係未夠班拉.. 拉唔到呀!! 所以我偷雞為左唔少指法.. 盡量keep住一把位先.. 雖然自行減低指法嘅難度，但拉哩首咁著重節拍嘅歌仔仍然好吃力.. 始終都係拉到「裙甩褲甩」咁... 真係好難搞!! 希望遲啲可以拉得可啲啦....

而下面哩首歌仔，我又係一聽就鍾意嘅歌仔.. 一直都想學，上兩個星期老師終於教喇.. 老師問我點解咁鍾意首歌仔.. 但我又講唔出點解.. 我估覺得個melody好聽掛... 不過佢都唔少野，而家叫做拉出成首歌，不過仲有好多技巧未做.. 但係同首拉丁歌比就感覺好好多...

missed

唔制呀.. 食左藥，好眼瞓，瞓著左.. missed左個空中對話機會.. 可惜!!可惜!!

喔噢

仲以為公司cut cost，今年唔駛飛添... 點知今日老細問我今年有無興趣去印度... 老實講，興趣一定無囉.. 但老細叫到就點都要去架啦.. 不過我都好衰咁望住老細答: 「你哩個問題好難答... 乜我地有budget飛咩??」 老細同媽媽check完，媽媽approve我地六月飛去印度喎.. 因為我地要去educate吓佢地.. 等佢地align番個testing standard之餘.. 仲要幫佢地執吓啲reports 同works.. 老細問我六月飛ok唔ok... 我話ok之後，佢就好開心喎 (成個小朋友咁，真係搞笑..) 好彩今次都唔係去好耐，應該都係頭尾四日..

Surprise

今晚食飯食到dessert 時，兩位waitress 一路唱happy birthday，一路送上點左蠟燭嘅dessert, 個碟上面寫左"Happy Birthday to Janet".. 真係好surprise呀.. 因為第一次發生係自己身上囉... 友人話佢都估唔到佢地會唱埋歌.. 我地講笑話個"歌唱費用"可能會係張單到反應番..

食完dessert仲有禮物收添.. 係一位五色水晶頸鏈.. 好靚好閃.. 又有我喜愛嘅紫色，真係好喇!!

難得友人咁忙都抽空同我食飯慶祝，我真係開心架.. 不過我都feel都友人有點擔心工作.. 因為有tight deadline.. 希望佢可以順利趕起佢嘅工作.. 唔係通頂就好喇..

弦樂練習

近排學緊考試歌.. 明明用一把位可以拉到晒嘅歌仔，老師又偏愛用較難嘅指法同埋要成日轉把位，一把位，三把位走嚟走去，搞到好難handle.. 練習嘅時候，真係打晒交咁.. 啲音唔準唔在講，仲有好多不必要嘅雜音添.. 因為首歌仔係拉丁舞style，老師都好生鬼咁話:「跳舞唔好成日踩住人地裙腳咁咧hea 先得喎.. (即係叫我要拉乾淨啲!!!!!) 」因為我真係拉嚟拉去都未掌握到.. 老師又好似巳經講晒佢可以教的，我好似去到樽頸位咁，想做嘅技巧又表達唔到，無進步又拉得唔好聽，所以心底裡曾一度低落...

直至今日嘅弦樂練習，心境終於好番好多lu.. 嚟緊五月嘅獻奏，指揮揀左一首好輕快嘅古典音樂。指揮話首歌係作嚟氹皇帝開心嘅，所以係好輕快咁拉... 經過今日好投入咁同其他樂手練習時候，又不自覺被首歌仔感染，我重拾拉小提琴嘅樂趣... 個composer真係好得呀，唔止氹得皇帝開心，仲氹埋我開心添呀，勁!!! 真係好期待下一次弦樂練習呀~

Progress today..

今日又用左兩個半鐘去畫.. 進度一般啦.. 今日老師唔知做乜，成日行開行埋，唔得閒理我.. 但我就趁佢唔係度，愉愉地將啲牆改淺色啲，同埋近白色啲... 因為之前老師敎我用較藍嘅tone去油啲牆，我個人認為太過藍唔好睇... 所以今日趁機再調過啲顏色... 雖然唔可以改到佢白雪雪，但望落去順眼啲 (我個人認為)... 睇嚟哩幅畫仲有排畫呀.. 希望之後畫嘅花花唔會搞"禍"幅畫啦..

第二次獻奏

好開心，終於完成第二次獻奏。今次獻奏，因為啲小朋友唔得閒出席，所以我要坐第一排，心情比較緊張，但感恩今日較少出錯，可謂比較順暢。另外，今日亦有幸聽到溫偉耀博士生鬼的講道，希望對於大家傳福音都有所幫助。

嘻嘻，今日仲另一件開心事呀... 就係我地絃樂B組獲邀參加教會六十週年感恩崇拜，有機會和管絃樂團一同獻奏！雖然欒曲又會較難，大家又要抽更多時間練習，又要有commitment可以恆常出席練習，但我深信今次會係一個好難得嘅機會，亦會係一個滿有恩典的體驗，所以我而家巳開始期待第一次練習喇！！ =D

Draw Something

噚日友人推介左個app叫 Draw Something.. 真係好好玩.. 似pictionary咁玩.. 記得第一次玩pictionary 嘅時候，我巳經好鐘意哩個game，只不過平時好小機會有咁多人同我一齊玩，所以都係玩過一，兩次咋…

哩個game好好架… 最少兩個人就可以玩喇，而且唔一定要二人同時間一齊玩添，只係須要是但一方先出題，等對方有時間開個app玩，就可以睇番出題者地點樣畫，跟住去估... 估完再出題俾對方... 而對方又可以睇番人地點樣估個答案，真係好好玩funny架.. 不過呢，我發現好難用iphone畫得好囉.. 而且畫得好鬼肉酸添.. 自己畫完都好想笑呀…

不過我好佩服我啲朋友，佢地畫得好神似，表逹能力又高… 一睇就意會地佢地畫乜.. 之但係我又發現自己嘅vocab好有限.. 有時知道對方畫乜，不過就唔識個英文囉.. 有時都要查吓字典先玩得... 變相仲學埋生字.. 真係好好玩!!! 即晚推介左俾二哥同阿嫂，仲一齊玩左兩個game先瞓.. 哈哈!!!

爛Gag

難得崇拜時遇到幾個cellmates，完左崇拜之後，佢地又有空約埋一齊食晏.. 真係好呀，今次有人倍我食lunch，之後先再繼續我嘅絃樂練習。

唔講唔知，原來組員Thomas 細細個都學過吓小提琴.. Thomas好會搞氣氛.. 吹水話"覺得"自己有都天份，不過而家埋没左喎.. 佢仲話自己都可以做首席 (violinist).. 正當大家好留心等佢講威水史時.. 佢就做埋動作咁話.. 係「手直」... 隻手直晒 (疆硬唔屈得o果隻)... 大家即時捧腹大笑... Emily都頂佢唔住:「你可唔可以唔咁爛呀?」

新歌仔

近期學嘅練習好鬼長，又好鬼難... 真係拉到哎救命.. 拉左好多個星期，唔係有好大進步... 今日頂唔住，同老師求情.. 老師惟有只係執下我手指嘅擺位，讓我搵啱個音就放過我喇.. 好嘢... 可以放低個咁難嘅練習一排... 過一排先再接再厲 =)

但我更意想不到嘅係... 以下哩首新歌仔，我第一次拉俾老師聽咋，佢就收貨喎.. 可能老師treat哩首歌仔係過度性質.. 等我輕鬆下啫，所以無好嚴謹嘅要求卦... 不過哩.. 我上次拉嘅考試歌就未算pass囉.. 我仲有好多地方要修改同練習...

紙公仔

哈，早排返教會練習詩歌時，見到鋼琴上面放左好多”公仔紙”.. 仲要係齊晒三款，貪心嘅我問準cellmate，就扲晒三款返屋企玩lu… 開頭cellmate估計每款都要花一至兩個鐘去砌起.. 自大嘅我以為cellmate預多了時間… 點知當我落手去砌時，就發覺真係要用咁多時間去砌.. 因為淨係剪佢地出嚟都用唔少時間.. 結果每個都用我個半鐘先得砌起.. 好彩砌出嚟又幾得意^.^

Go painting again

因為要清假，所以自制左一個long weekend俾自己.. 原先plan放假，唸住可以瞓晏啲，點知撞正美國training... 要九點鐘dial in 聽個training.. 所以只係可以瞓晏小小.. 不過我上完個training都仲可以再瞓番.. 點樣都俾返工瞓多啲啲嘅..

今日晏晝去左畫室... 今次幅畫都幾難畫.. 好多detail野.. 我花左四十分鐘去起稿呀.. 雖然用多左時間起稿，但我都幾滿意今日個進度都... 望落去都填左好多part... 今次個海要用幼筆去油.. 又係好花時間.. 老師笑著叫我"慢慢"填海.. 但我一口氣"密密油"... 填得俾老師預期快.. 老師話佢本身好油怕咁大個海，佢話填到一半應該會停下，去做第二啲野喎.. 嘻嘻.. 其實我反而比較鍾意油海多過其他野... =p

我鍾意嘅海就完成左... 剩下嘅部份都好難搞.. 有我最怕畫嘅細緻部份.. 窗呀，欄杆呀，花呀.. 睇嚟呢幅畫仲有排畫呀.. 希望畫得好啦..

大個仔

話咁快，BB Chris 巳經由係手抱BB長大為little boy喇.. 今次見佢時，佢大個仔好多lu，會走會唱，又會講好多野，而且好有邏輯，一件一件事咁講出嚟架...

不過太耐無見面，Chris 唔認得我lu，所以開頭唔肯俾我抱佢.. 經過一輪warm up，佢先肯同我玩.. 之後哩，佢又不時走嚟啪啪我喎，唔知係咪示意同我friend呢?!

今次唔係影左好多相，但係我張張都鍾意。影第一幅相時，其實Chris係玩緊個ipod，不過俾爸爸叫住佢，我覺得佢哩個表情好得意呀，影得佢小小傻氣!!

至於下面幅相係我最鐘意嘅一張相.. 其實Chris本來玩緊ipod唔望鏡頭，佢俾人收左個ipod，用嚟引佢影相.. 不過Chris當然覺得ipod吸引啲， 想快啲要番部ipod.. 正當佢開始扭計時，就被影相... 咁啱又被capture到好以擺緊"米奇"pose 咁喎，真係好呀彩呀~

新歌仔

練左一排嘅新歌仔，終於似樣喇... 不過部份拍子仍有待改善，雙音部份又交待得唔係好清楚。要繼續練習，希望遲下可以拉得好啲啦。

哈佛小子

城中熱話的林書豪(Jeremy Lin)是史上第一位打入NBA的台裔球員，亦係第一位打進NBA的哈佛大學畢業生。

Jeremy出生自一個基督家庭，高中時開始信主。我好欣賞佢謙卑嘅態度，愛主嘅熱誠，敏感天父對他嘅帶領，有志從事作社福工作，與人分享他的信仰。我真係感受到佢將一切榮耀都歸於主。 我亦好喜歡林媽媽，她除了管教有方，仲好有心機栽培孩子。重要的是林媽媽也是一位愛主的人，很會感恩和順服主。以上嘅訪問係一個好好嘅見證，真係值得一看~

多謝老師

之前老師答應同我一齊去佢師兄間舖頭check琴同買弓.. 不過今日開餐前，老師改口話唔陪我去，叫我自己去check喎.. 聽完之後我有小小失望... 因為一心唸住有老師係度，老闆check琴會check得上心啲.. 又唸住老師會幫吓手揀弓嘛.. 而家我嘅如意算盤打唔响lu...

跟住開餐時，我忡發現老師買錯飯盒添!! 唔知係咪老師feel到我唔開心 (佢變卦唔同我去check琴)，定還是佢覺得唔好意思呢 (佢買錯飯盒)? 佢送左盆花補數...

嘻嘻，其實買錯飯盒好小事啫.. 難得我有個咁nice嘅老師會幫我買埋飯喎，我又點會介意呢.. 反而我在意老師無故甩底囉.. 不過既然老師有心送盆花俾我，貪心嘅我又好樂意去收嘅 =p

其實早排老師開始種花.. 除外風信子，紫羅蘭，同埋其他不知名嘅盆栽。 而老師最早種嘅係鬱金香.. 當時我巳經"認購"左一盆鬱金香.. 不過種左好耐都未發到芽.. 等種出花就可以帶佢番屋企喇.. 而家就等我種住哩盆風信子先啦，不過唔知哩盆風信子"襟唔襟"呢?

Lovely Ball Pen

有日秘書姐姐好興奮咁拎住幾支七彩嘅波波筆問我靚唔靚.. 當時我覺得一般架咋... 但過左幾日，我醒起小提琴老師都"好"毛毛球.. 因為之前見佢添置幾個大毛毛球係佢個琴盒上，所以問左秘書姐姐邊度有得買波波筆。

我見老師掛嘅毛毛球都係杏色，啡色，所以揀左支杏色豹紋比佢.. 俾錢時見到哩支紫色波波，所以買埋俾自己.. 見到老師時，到我好興奮咁拎住支筆送俾佢.. 一心以為老師都 "好"哩款波波筆喇.. 點知佢反應一般.. 無意欲會用支筆咁喎...仲將支筆插左係個小花樽上...

近日老師仲將個花樽放左係高高的書架上.. 支筆都唔例外，亦順理成章成為攞設.. 我而家每次上堂都見支豹紋筆孤拎拎咁.. 真係可憐喇~

派糖

今晚開始學小提琴之前，老師送左盒糖俾我。佢話每個學生都有份，當係新年禮物，只係初三當日唔記得俾我咋。適逢今日財爺出財政預算案，吸收上年教訓，今年財爺唔敢亂派糖。所以老師就好豪氣咁話：「財爺唔派糖，我娟姐有糖派!」 老師真係搞鬼呀~

撞車

今日年初三唔駛返工(本來好大機會要返工，好彩後來搞平了唔駛返)... 因為老師好勤力，今日都開市，所以可以去學琴。 不過搭車途中發生交通意外呀.. 有架的士撞落我地架van仔呀.. 好彩無人受傷，只係兩架車有事

我坐左手面睇唔清楚事發經過... 開頭唔知發生咩車，只係聽到有車"hi"住我地架van仔走過嘅聲音.. 之後坐右面啲乘客好好奇咁望出窗: 「嘩.. 嘩....」 但跟住就係「嘩嘩...嘩嘩.. 嘩嘩!!!!!」 有位女乘客好快咁跳起身離開坐位..

原來的士先被人抽頭時"hi"到，失去平衡，先撞去欄杆，再撞落我地架小巴... 架的士撞凹欄杆後，bumper都甩晒，所以佢地睇到「嘩嘩」聲... 後來架的士因為撞到轉方向，再向小巴方向衝埋嚟，所以乘客緊張到嘩嘩聲..

小巴司機好好.. 問左我地有無人受傷，又問的士司機有無事.. 因為咁啱有另一架van仔等客，我地好快就安排到o果架van仔。留低小巴司機同的士司機係現場... 其實我地出事嘅時候，有架警車泊係我地後面.. 不過個警察(司機) 無過嚟幫手囉..

今次係人生嘅第一次交通意外，但好感恩無人受傷.. 真係天雨路滑，易生意外，架車人仕真係要份外小心路面情況..

Spring song

終於可以一口氣拉到哩首歌仔喇.. 唔係拉得好好，但又唔係好差啫... melody都好接近架喇，希望下堂老師會收貨啦~

係FB見到人地POST左對搞鬼嘅揮春，係度同大家分享吓
咩生果最出奇? 咩生果最安靜?

對揮春咪就係: 「新奇是橙」「沉默是柑」

心情

久病初癒，本應心情唔錯，不過呢，近排工作上頭頭碰著黑.. 真係唔係幾開心... 今日去學小提琴，應該係開心的.. 不過工作真係太唔順利，又有小小冤屈，雖然放工前好似有小小轉機，但始終未可以confirm 問題係咪可以解決，所以個人都唔係好放鬆...

上堂前，照舊同老師邊飯盒。 老師心水清feel我好無乜心機喎... 其實我都知自己神不守舍，不過無唸過自己去到咁嚴重嘅地步... 平時一打開個琴箱，拎起個小提琴之後就會扣番個shoulder rest上個琴上.. 一個好簡單而我又日日都會做嘅step.. 但我今日拎住個shoulder rest，竟然唔記得點樣加落個小提琴上面!!!!!!!!!!!! 老師都不禁一問: 「喂! 你唔係呀????!!!!!」

拉scale時，又拉得亂七八糟.. melodic 同 harmonic 混埋一齊拉.. 今日老師真係無我符 =p 直到拉歌仔時，我開始正常番，不過都係拉得唔好.. 今日首歌仔未pass，要繼續努力練習... 之後老師搞搞新意思，考我sight reading... 佢即場揀左首較簡單嘅duet同我夾，老師就住我拉慢啲，叫做夾得成功，等我有番小小滿足感~

*********************
不過今日都有意外收穫.. 就係"回收"左哩個咁靚嘅咭片座呀... 估唔到會係小提琴呀.. 朋友多謝我支持環保收留佢喎.. 應該係我講多謝至啱 ^^

我的狀態

近排反反覆覆咁喉嚨痛，跟住鼻塞，初起唔理佢，一直都未好，做body check 時順便睇醫生，食晒藥，好左唔夠兩日又病過... 以為只係小兒科，自己會好番.. 點知病左成個幾禮拜，食左唔小成藥，好吓又差吓，拖左三個禮拜都冇好轉，而家仲加埋咳添。所以今日的起心肝再睇醫生，希望食晒今次藥後，可以完完全全好番晒就好喇！

新歌仔

哩首新歌仔又係好難呀.. 今次佢又玩變奏，一個original 加兩個variations。 個koriginal其實唔係好難，不過我又係數唔足啲拍子囉... 第一個variaion要快，又要跳，中間又加一串音符。我啲手指開始唔聽駛，走得唔夠快，所以拉到好多雜音出嚟。 第二個variation嘅前部份都仲ok，但近最後一段真係唔係好ok (有啲恐怖添)，因為我轉唔切把位，有時手指要同時按雙絯，但我又未掌握得好，所以音唔準.. 不過首歌仔都做拉得七七八八，算係咁啦~

Countdown Party Gallery

終於收集到當晚其他嘅精華相片喇.. 真係睇極都唔厭... 仍然回味緊當晚嘅歡欣呀~