身在Mumbai (下)

Day 3

今早返office 前巳經做埋庮店check out，又將行埋寄存係front desk.. 唸住去我地去開嘅餐廳食早餐。一出lift，就有酒店職員截住我地。原來今日有全新嘅餐廳開將，以後嘅早餐都係係o果度serve.. 其實啲早餐都係差唔多，不過環境再好啲啦，啲生果放晒係雪櫃，再冇flies 飛嚟飛去。

食過早餐就返office lu.. 但係同事仍然未好番，無返工，電話又唔通.... 惟有同另一個同事做 wrap up.. 直到下晏三點幾，抱病在身嘅同事終於返嚟喇... 老細終可以同佢傾issues.. 今日係我地嘅 last stay，都搞到成七點半先放工.. 同事就車我同老細去佢屋企探佢個b女。

同bb玩完，我地又睇吓同事新婚video，好長呀，九成嘅片都係影住啲新友跳舞，得好少部份嘅儀式。睇睇吓我都開始覺得攰... 因為睇到差唔多成十點(即香港時間零晨十二點半喇...)，同事又好好客地留我地係佢屋企食飯... 之後就送我地返酒店。

趕到返酒店都十一點半.. 我同老細都用飛快嘅速度領回行李，然後再衝去將會係十二點close 嘅gym room 沖涼... 梳洗完，我地十一點五十二分離開gym room... =p 之後同老細去左個bar飲杯野，坐到十二點半就出發去機場。

去到機場個lounge 好多人，成個canteen 咁，好唔容易先搵到兩個位坐.. 等到兩點半先有得上機。但因為天氣關係，班機delay左二十幾分鐘先開得。 Delay嘅期間，我巳經睡著lu.. 返到香港都巳經係下晏嘅一點幾lu。

身在Mumbai..

終於一嘗business trip 嘅滋味喇.. 原來都唔係好特別咋喎... 唯一好嘅係可以免費搭下buisness class 同埋用下人地嘅lounge... 原來飛長途搭business class 真係好好架.. 獨立坐位自成一閣，又可以打橫瞓覺，對腳唔駛屈住屈住。 唯一唔好嘅就係太近啲空姐，佢地好多野偈，講個不停...

落機嘅時候巳經係當地零晨二點幾，周圍都黑晒。 沿路都幾荒蕪，地方好大，周圍都起緊新building，但係規劃好散落... 靚嘅building 多數都係酒店或商業大樓。 其餘嘅係一大排兩層高，但又好殘舊嘅房子。

Day 1

除左係第一次搭business class，第一次踏足印度。今次亦係第一次自己一個人住酒店。今次住GRAND HYATT，間房好大，張床都算舒服。 酒店入面環境唔錯架，好大好靚。 我地食早餐嘅餐廳有露天嘅area，所以不時有啲flies 飛嚟飛去，大殺風景。 我地Mumbai office 正正係我住嘅酒店對面，只要過一條馬路就到，都好方便。 不過因為我地唔近city，所以除左酒店同我地橦office之外，其實附近係乜都無..

Lunch time嘅時候，同事帶左我地去一間位於較近city嘅酒店 (TRIDENT)，唔駛講，梗係食印度咖哩啦.. 我同老細share 左咖哩雞同咖哩魚 (recommended by waiter, as they are less spicy) ，兩款咖哩都好唔同味，兩款味道都好ok 喎!!! 不過我唔記得試吓佢地嘅"簿餅"，叫左白飯。佢地嘅白飯係一粒粒架，硬硬地，唔似得我地食開o果啲咁軟，咁有黏性架..

食完晏返公司途中，見到唔少好破舊嘅鐵皮屋，似係地舖，但又似係民居，因為我見到屋外吊起好多衣服晒涼.. 周圍嘅環境好差，好多垃圾，好污穢.. 見到佢地居住嘅環境，真係覺得自己好幸福。 同時記起以前舊公司個manager 都曾經到過 Mumbai 工幹，佢話去完之後個人好心嗡.. 佢話遇到一大群小朋友向佢乞錢，知道佢地好窮，但又唔可以俾錢佢地，因為佢唔俾得幾多個.. 我而家想像到佢有幾心嗡...

因為四周比較荒蕪，所以放工後，我同老細都係直接過對面馬路返酒店.. 本來都想食吓中餐，但係睇完個menu之後，發現佢實在太overcharge.. 一個點心要成Rs550 (差唔多HKD 110)，一碟子菜又要差唔多HKD 2-300.. 係印度食咁貴，真係好唔值.. 同埋，啲chinese food 一定唔會特別好味... 最後我地都係食西餐，因為價錢"比較"reasonable..


Day 2

照舊係酒店食完早餐就過對面馬路返工... 今日行程比較緊密，要去兩個site 開會。 雖然兩個site 離我地個office 唔算遠，但又可以話係walking distance.. 不過一般嘅cap 都嫌路程短而拒載.. 所以我地要坐auto .. 啲auto 都幾兒嬉，似係有摩打嘅人力車，有上蓋但無window，司機嘅driving manner 好以忙命小巴咁.. 好彩唔係成日要搭佢地，同埋都算係短途，所以都尚可以接受 =p

今日lunch 係staff cantee 食，個staff canteen 只servce vegetarian.. 今日又試左三味咖哩.. 印度咖哩真係無樣睇.. 個樣紅卜卜，似係好spicy的，食落又唔係真係好辣咋喎.. 但係個樣正正常常，好似tomato soup咁，佢又竟然係辣辣地喎.. 同事好細心，怕我地食唔慣啲咖哩餐，別外order左cheese sandwiches 俾我地.. 個cheese sandwiches 其實似係toast.. 又估唔到佢出奇地好味喎!!!

原定今晚放工後去同事屋企探吓佢個new born baby.. 好可惜，同事噚晚開始發燒，今日都無返工.. 希望佢今日好好休息，聽日身體好番啲，我地可以去打搞佢啦..

變了..

話咁快，仲有唔夠一個禮拜，我就向印度出發喇... 之前都有期待過嘅，但而家又好以無乜感覺咁... 直到而家，我乜都未執，又未買野，連有咩要帶過去，我都無唸過，亦未有打算開始... 而且我係下星期一夜機出發，我心中只顧住放工後耍返屋企沖涼之後就去機場.. 但我無去思考過返屋企後再出機場會有幾趕...

小出門經驗嘅我，平時去親旅行都好大陣象，一定係"一早"就開始預備同執篋架... "一早"即係個幾禮拜前... 估唔到今次我竟然變得咁懶懶閒.. 不過我打算點都會係星期五開始執野嘅.. 如果真係有野要買，我都仲可以有個weekend 去買嘛..

心情大靚~

因為忍左成年，終於忍唔住，買左個新violin case.. 個case 係就係貴左啲，差唔多三千大元，但係真係好靚，好輕身，同埋好好揹呀!!! Doris 同老師都話個case好好用，防潮袋都可以用少啲喎！！　　

其實我好耐之前係睇中左個紫紅色，不過今日巳經無得買lu。 唔.. 失望係有少少嘅，不過只係好輕微咋喎，因為我都好鍾意呢個棕色，夠grand 嘛，越睇越鍾意佢呀...

除左新case，我仲換埋個chin rest.. 部琴本身個chin rest 唔fit 我，搞到我夾到個下巴損晒。其實一早就應該換左佢，唔駛搞到個下巴花晒嘛... 今日換左個新嘅，真係好夾好多喎，希望以後唔駛夾到個下巴損晒啦。

仲有兩個禮拜..

唔經唔覺，仲有兩個禮拜就去印度喇... 因為之前cancel 左好多次，三月老細話六月去印度時，

雖然秘書都有幫我地訂機票同book 酒店，個心都仲係半信半疑，覺得都係得個講字。不過今次連visa都出埋lu... 仲有呀，大老闆訪港嘅時，老細都有同佢提及六月去印度。 我諗今次都幾firm架喇...

朋友們知道我去印度出trip 嘅時候，多數係好興奮咁，第一時間問我會唔會stay behind 玩... 個個都話好想去印度玩... 其實我今次去印度，純粹for business，只會係office同酒店出沒架咋!!! 最多會去其中一個同事屋企探吓佢個new born baby。 不過搞笑嘅係，所有朋友都俾左同一個advice 我，就係"只可以飲bottled water!!!" 多謝您地嘅提點呀，我會記住架喇~

小可愛~

之前幾次探bb Chris，佢都係熟睡當中，今次好好把握好時機，係佢好精神嘅時候去探佢。好開心呀，終於可以同bb玩喇!~ 佢真係好得意呀, 又好留心咁望住我架.. 但係呢，同係玩玩吓，傾傾吓偈嘅時候，佢對圓碌碌，又精靈嘅眼仔，慢慢地變成得番一條線，跟住就瞓著左lu... 佢瞓著左都好可愛架，個咀仔"郁郁"吓。 bb Chris，你咁得意，我好快又嚟同你玩呀吓~

宅女

之前我嘅schedule排得太密喇，個人真係好攰。學日文又冇時間去溫習，做功課，所以都係要停一停先。留番啲時間去練琴，去church返栽培班，返團契同崇拜。又因為正在睇脊醫，所以我又連yoga都停埋。所以除外返工，學琴同返church，其他時間都係係屋企練琴同睇碟。其實我都係少出街，少睇電視啫，某某朋友竟然話我嘅生活同宅女一樣.. "宅女"哩個名稱好負面，唔係好啱我喎，最多咪係深居簡出...

新舊歌仔..

剛學成首Simple gift ，好叻呀，老師有讚我拉得幾好架.. 佢話真係幾好喎.. 同埋今次係好罕有，我拉完佢無話要執吓邊到架.. ^.^



不過呢，至於首學到我好moody嘅嘉禾舞曲呢... 學左都成個月喇，但係拉俾老師聽完之後，老師沉默左一吓，先再俾comment.. 都係因為我真係拉唔出輕快嘅，跳躍嘅神緒囉.. 聽到老師好灰... 哈哈... 我都唔想架，係屋企練左好耐喇，真係拉嚟拉去都拉唔到老師嘅要求..

拉得悶悶地，我又搵番一首以前拉過嘅歌仔拉吓，(又係嘉禾舞曲) ，雖然未係拉到好好聽，但比係以前，都叫做有好大進步喎..

好番好多喇

自上年十一月三十號夾親嘅手指尾，一直都瘀左，足足有五個幾月。其間有唔少人見到都想問我做乜油指甲只油隻尾指??

早幾日瞓醒覺，覺得隻手指尾有少少痛，無特別為意佢.. 後嚟先發現原來佢想脫甲，剪左啲廢甲後，望落去好番好多lu，真係好喇~

Old Study

哩首study 其實係一年多前學架喇，當時剛剛學拉小提無耐，拉得好差，拉到打晒結，又有好多撕殺聲。就算而家拉都唔係拉得好好，但係比一年多前，真係進步唔少，起碼唔再打結，有番啲音聲，又叫做有番啲節奏。

又係嘉禾舞曲

哩排學緊嘅兩首歌仔，一首係Aria，另一首係Gavotte..

首Aria 係一首比較簡短嘅慢歌仔.. 不過老師略嫌我嘅節拍唔夠準喎..

至於以下哩首嘉禾舞曲呢.. 我之前都講過係我比較喜歡嘅一類歌仔... 其實哩首歌仔我較早期學過架喇... 咪就係搞到我好moody，學到喊出嚟嗰首囉... 不過原來我之前學嘅係簡單嘅version，今次學番個full version，有埋2nd movement... 哈，學左咁耐，我仍然未可以好好handle呢首歌仔添.. 好似初學簡單個version時拉得好少少..

得寸進尺

今晚搭地鐡嘅時候，明明好地地得我一捉住條扶手，跟住就有位師奶行埋嚟，先扶住同一條扶手，跟住就打側"埃"住扶手... "埃"埋嚟嘅時候，佢巳經擲住我隻手，我惟有將我隻手往下移，扶底啲啦。 無幾耐，佢又轉post，成個身"埃"晒個扶手，又好大力壓住我隻手.. 我當時好唔鍾意，所以立即推開佢同埋用一把好firm嘅聲同佢講: 「睇住吖，唔該!!」 佢毫無歉意(其實預左)，只係好唔順氣咁企番好啲，用佢隻手去捉住扶手。

我真實好討厭啲人搭公共交通工具時，十分自私嘅行徑.. 扶手係俾人扶，唔係俾人"埃"架。 架車好空嘅時候，你鍾意點"埃"都得，有其他人用緊嘅時候，就要有公德先得甘嘛。

又夾手喇~

今日lunch time 去左上seminar，人地個office 嘅lift掣係lift lobby 出面，要拑左你要去嘅層數，佢assign你去搭部 lift... 咁我咪去assigned 嘅 lift 等囉.. lift 門一開，入面兩位美女十分滋油，遲遲到唔出嚟，等佢地出晒，我一開始入lift，lift 門就開始關... 出面又無掣可以拑.. 就係咁，我又夾到手喇...

上完seminar，返到公司話畀秘書姐姐聽，秘書姐姐問我點解我成日夾手? 其實我都唔想夾到架喎... U_U

G Minor

以下係近期學左嘅新歌仔同練習... 雖然拉得唔算好好，但係老師都話我音色上有好大進步喎。 而我自己都覺得拉得叫唔錯，因為拉弓比初學嘅時候，叫做拉直左好多架喇.. 我會繼續努力!!!

大豐收(二)

真係無諗過會收到咁多禮物架.. 份份都好靚，份份都好鍾意。我嘅家人，朋友實在太錫我喇... 我知道我好幸福哦 ^.^

BB Chris (again~)

BB Chris 真係得意呀... 啱啱先得個零月人仔，就巳經有九磅幾，勁!! Keep it up 呀!!!

不過次次探佢都撞正小寶寶嘅sleeping time，未有機會同佢玩，不過今次可以親手抱吓佢，都好開心呀... 其實唔係好捨得放低佢，不過因為仲有其他朋友仔一齊探佢，要輪住抱吓.. 嘻嘻..

BB Chris，姐姐會再嚟抱你架，你到時醒神啲呀吓!!!

大豐收

估唔到未到生日週就巳經收到唔少生日禮物喎... 先有不同品牌嘅化粧品公司寄出嘅生日greetings同coupons，跟住就有各好友送上祝福同禮物，今年嘅生日可謂我嘅大豐收日。

噚日就收到好友積奇蓮嘅禮物呀.. 真係好意外咁早收到佢份禮。 份禮物主要係隻好得意嘅大象書鎮。但係我更鍾意搭單嘅維他奶呀!!! 因為佢係印住happy birthday架.. 好搞鬼，好啱駛呀。 原先積奇蓮都無寫到 To 邊個同埋 From 邊個嘅... 但我見到哩盒啱晒主題嘅維他奶，我就堅持要佢寫俾我留念。不過我未唸好點樣收藏佢，究竟原封不動好吖，定還是飲左佢先，洗好先收藏好... 好彩有排未到期，仲有好多時間去唸清楚 =p

今日同counsellor食lunch，我竟然收到哩條項鍊... 其實早前自己都想買個十字架項鍊，不過只係得個"諗"字，一直都未有選購嘅行動，哩份禮物都算得係及時雨。

我真係好鍾意哩條項鍊架... 佢嘅design好特別，好靚唔在講，但最重要嘅係個十字架對於我有另一個更特別嘅意義 -- the love of Jesus。

同一晚，約左Amanda ，Wincy，阿Wing 同Daphne 食飯。我一心唸住gathering 架咋，我冇唸過佢地個個都帶份禮物送俾我。我知道份份禮物都各具心思，我好感受到大家對我嘅心意，所以好感恩。

又一首歌仔..

其實首歌仔嘅1st movement 較早期學過嘅，今次有埋2nd movement.. 比較難，尤其係2nd movement 尾部，我點拉都拉唔得好，慢慢拉到係好勉強咁拉到，快親都拉到一塌糊塗。 今期老師俾多左好多練習手指嘅study我去練習，嘩，雖然好basic，但係好難拉呀.. 我啲手指唔聽駛喎，拉極都拉唔到喎，點算好??

夢

呢排唔知做乜呢，每當我我臨瞓前睇Album，瞓覺時都會發番同啲相有關嘅夢，真係好神奇.... 為左得到較好嘅睡眠質數，唔好成日發夢，臨瞓前都要避免睇相。

"忙"不了

工作一直都好忙，workload有加無減，做極都仲有好多outstanding 嘅work.. 一返到公司就無停過手，真係唔會有多餘嘅時間.. 但我慶幸我嘅收工時間尚算早，又無幾何要帶野返屋企做.... 應該可以有一個balance 嘅Life...

但係工作以外，我都好忙呀。因為我嘅工餘節目實在太多喇... 一星期一晚yoga ，一堂violin，一堂日文，一堂初信哉培班，一次團契聚會，一次崇拜... 平日嘅練琴時間，加上偶爾嘅gathering 飯局等等... 我覺得時間好唔夠用，我真係應付唔嚟，又唔夠時間休息，所以個人都好攰。

我好想騰出多一點時間停落嚟，休息吓。我唔想自己工餘時間都咁忙... 所以我決定暫停我嘅日文學習喇... 並唔係我無興趣去學，只不過我實在無時間去溫習同備課喇。我要等我上完一連串嘅哉培班，浸禮班之後，先再考慮繼續學日文。

除外暫停學習日文，我都考慮緊停埋yoga... 以前之所以做 yoga，係唸住叫做吓運動，健康啲。 而且自己又好enjoy 每一堂yoga class。 不過近日發現做完yoga之後，肩膀嘅肌肉好梗，放鬆唔到，好影響我拉小提琴。 我實在太鍾意拉小提琴，我好想拉好佢，所以而家我考慮緊放棄學yoga...

唉... 我嘅能力真係好有限，都係要focus 啲...

又一首嘉禾舞曲

上一堂學左首新歌仔，覺得幾好聽，又係嘉禾舞曲嚟架.. 我發現自己其實都幾鍾意呢類歌仔架喎.. 因為都錄得頗倉猝，小小甩漏都在所難免嘅，以我嘅程度及水準，都算係咁先啦..

一改再改

自上次盛傳有恐怖襲擊之後，我個印度business trip一直無下文.. 不過，早幾日老細走嚟話我地個印度trip改為五月第一個禮拜.. 原先老細想四月底過去，但係印度同事又話有inspection做緊，最好唔好四月去佢地office，所以改做五月去。咁好啦，秘書姐姐又如常幫我地入system book機票，訂酒店，出itinerary。 由於個system啱啱做左upgrade，秘書姐姐用左好多時間去摸索... 足足用左兩個幾鐘嚟幫我地定好晒機票同酒店...


好可惜.. 訂完晒所有野，又係出好itinerary嘅時候，當老細通知印度同事時，印度同事先至話五月唔得閒喎!!!! 冇計啦，惟有將呢個壞消息講俾秘書姐姐知，又要佢cancel啲booking....

今日老細又話六月七號去發喎.. 唉.... 都唔知今次又係咪真嘅... 都係聽住先好喇...

勁走音

今次斷弓嘅弓法都尚算做得乾淨，不過中段高音就走音走得幾勁，但係我都當唔怕醜post 出嚟lu... 上堂拉俾老師聽時，老師都好appreciate咁話佢睇得出我有下過苦功o架!!! 都好開心架，起碼有人認同你嘅勤力嘛。

上堂老師又拉左首新歌仔，都幾多音符，又有啲我未見過嘅音符，拉嚟拉去都拉唔到，下一堂要老師多多指教喇....

BB Chris

朋友V個仔仔終於出世喇... 恭喜晒!!! BB Chris真係好得意呀.. 熟睡中都不忙舉手同埋做出唔同嘅表情。見到佢就好想抱住佢呀!!!!

BB Chris，您咁得意，一定好多人錫您，個個都會當您係寶貝，但希望您唔會被竉壞啦...

港樂，交響，情人夢

上星期同Doris聽左個concert，名為"What Love Tells Me"... 係由艾度迪華特指揮加香港管弦樂團表演嘅。是次concert全個program 都係D小調第三交響曲 (by Mahler)。好可惜，我係第一部份小睡左... 通常交響樂嘅開頭都係好剛強一類嘅曲目，其實我唔係咁鍾意哩一類好以星球大戰，打杖嘅曲目，因為我覺得好嘈.. 就係因為我唔鍾意，唔識欣賞嘅關係，就特別覺得佢特別長，特別悶.. 再加上剛放工，個人好攰，所以係咁嘈嘅環境下，都可以小睡片刻.... 我强調，其實只係閉目一會兒，真係一會兒罷.... 成個concert大部份時間我都係清醒架!! 我係有好用心嘅欣賞個concet 架。 尤其是進入第二部份，因為有我喜愛嘅曲目 -- 小步舞曲。

今晚我又同Doris聽埋哩個HKPO. Nodame (港樂，交響，情人夢)。 個concert 好好睇(聽) 呀!!! 今次基本上都係原班底表演， 但我比較喜歡同埋enjoy哩一個concert。 一來今次比較多曲目(total有六部份)，二來種類又比較多元化，除外管弦樂團之外，仲有鋼琴協奏，及獨奏。三來啲交響曲唔係過份剛強一類。而且，最重要嘅係..今次坐得好近啲小提琴手呀!!!! ^.^ 可以好清楚咁欣賞佢地細膩嘅弓法.. 真係好吸引，好佩服佢地呀..

心痛

近日我臉上嘅皮膚敏感(濕疹??)又開始發作，常常又紅又腫又痕.. 忍不住搲了兩、三下，佢就發大同脫皮。媽咪見狀就好擔心咁責罵我: 「點解唔好好打理好啲皮膚? 成日淨係掛住拉小提琴，啲無謂嘅琴，好心就唔好拉啦，一日淨係花晒啲時間拉無謂野，又唔理吓啲皮膚.....」

我明白身體髮膚受諸父母，媽咪都係太過錫我，唔忍心見到我啲皮膚變差而咁講，但係當我聽到佢話我拉小提琴係無謂嘅事時，真係好心痛，好唔開心囉。


***************************************************************************
好唔開心，臨瞓前喊咗一陣，今早起身雙眼又腫晒... 眼利嘅媽咪當然一望就睇得出.. 不過唔想佢又問我哩樣果樣，所以今日要回避同媽咪嘅目光交流... =P

感恩

真係好開心，今晚真係有一個唔錯嘅天氣，起碼放煙花嘅時候係一滴雨都無，媽媽可以好放心咁觀賞煙花。 直到睇完晒煙花，回家途中先開始落微雨，我知道一定係上天美好嘅安排，所以好感恩

P.S.
惟一有小小可惜嘅係，爸爸早前怕落雨返左屋企，無一齊睇煙花

嘉禾舞曲

學左好幾堂嘅嘉禾舞曲，經過我密集式嘅練習，終於可以交功課喇... 不過首原曲太長喇，我巳經無跟足原譜，某幾段要重複嘅譜我都無重複去拉... 但係都唔可以一氣呵氣，始終都要分開兩段先拉得好...

其實，都唔係拉得好好.. 中後部份拉得唔夠乾淨，比較嘈雜，但係巳經係我拉得叫好最好嘅一次喇.. U_U

愛的再思

近排開始返團契... 每次都要一起唱團歌。首歌之前未聽過，但一聽就很喜歡喇.. 節奏輕快，易上口，又令人好開心架... 可惜我係網上搵唔到佢嘅midi 同大家分享.. 第日有機會的話一定會post條link。

愛的再思

是我的完美主，賜下這奇妙恩賜。犠牲拯救寬恕，祂加給我愛心關注。
在愛的團契中，你共我同覓長進。悉心栽種初信分擔傷痛，盼將點點愛遞送。
你我在團契歡樂裡，得到寶貴真理，共學習耶穌的處世待人，勇敢謙卑。
為我的完美主，獻奉我勞力心志。於恩主這家裡專心施予，吃一點虧也樂意。

新歌仔x 2

老師最近聽我同一首歌仔聽得太多(嘉禾舞曲)，因為我拉極都拉唔好，老師開始悶lu.. 所以搵左兩首比較簡單而又短嘅歌仔俾我學吓，等我有啲滿足感，唔駛拉嚟拉去都拉唔好首歌仔...







其實我好想拉好首嘉禾舞曲架，不過實在太長喇，我拉左好幾十次，都未能一氣呵成。我要再俾心機練好佢先得。

喘不過氣來

踏入一月就開始忙過不停.. 真係好多好多野等住做，加上早前又請左成個星期假去日本玩，返嚟就有更多tasks 等住我去做番，真係有好多outstanding tasks 想清，但係真係有心無力，想清task嘅同時，總係有唔少ad hoc 野搵你。日日返到公司都好似入左時光隧道咁，時間過得超快... 稍有時間望吓鐘睇吓幾點時，原來又巳經差唔多十二點... 又得番半日時間..

因為啱啱過左year end，又係時候做 annual disclosure 嘅 reconciliations... 五百幾份，仲有唔少係交唔齊documents，又或者報漏野，真對到頭暈... 我太想早啲做晒哩個exercise，其實要好花時間去check.. 但中間總係有其他野要處理，成日multi-task.. 又要去追人交齊documents.. 所以個人好tense.. 成日有抖唔到氣嘅感覺，所以成日係個位到抖大氣... 不過今次實在抖得太頻密喇，坐係前面嘅秘書姐姐臨收工時，都忍唔住同我講話佢都聽到我嘆氣.. 真係多野做到喘不過氣來呀 @~@

注定

今日同積奇蓮去左魚米家食lunch，我地坐左張六人檯 ，分別由三pair人搭檯... 大家三個單位各自落order... 因為我同積奇蓮係最遲搭檯，所以坐最出，嚟乜食物，waiter們都係放落我地張檯就算。


坐低先同積奇蓮講開話哩個幾星期都好忙，無乜時間休息，所以唔係好精神，個人好攰，知道自己唔在狀態。但無唸過自己唔在狀態到一個好嚴重嘅地步... Waiter 放低左杯熱檸水，我竟然忘記係積奇蓮order 喎，淨係顧住問其他人係咪佢地order... 佢地個個都話唔係佢地喎... 原來呢... 積奇蓮一直不停同我講話杯熱檸水係佢架... 但係真係一句都入唔到我耳朵，唔知係咪叫耳閉塞呢?! 我仲想去叫伙記拎走杯野添... 跟住，我終於留意到積奇蓮好以招財貓咁向我揮手，我先意識到佢同我講杯野係佢咋... 真係好蝦碌呀...

因為太攰，食完都唔想走住，我地顧住傾偈，傾到其他兩個pair人都走晒，我地先走去埋單。平時去lunch俾錢時，一向有單都唔會check，收銀話幾錢就俾幾錢嘅.... 今日去俾錢時，竟然 out of budget 喎，我覺得唔妥，但積奇蓮一於少理照俾錢... 平時魚米家都唔會俾單我地架喎，唔知點解今日佢收完錢又俾番單我地喎... 我地一向都唔會要張單，但咁啱今次我又多手去拎張單嚟睇喎... 又咁啱俾我發現張單唔係我地，係另一pair人架喎... 收銀都好好人，立即問我地食過乜野，再計過張數俾我地，如果唔係，我地會多俾成20蚊架。

新歌仔嚟喇~

都有一排無新歌仔... 今日終於有時間練吓喇。我都幾鍾意呢首歌仔嘅，夠輕快，拉起嚟開心啲嘛。

加營素

今日終於"的"起心肝，跟據醫生嘅建議，買左加營素lu.. 今日沖左一杯嚟飲，我覺得個味道好似我姪仔啲奶粉咁，甜甜地，又同好立克差唔多，不過比好立克"傑"的啦，都尚算ok易入口嘅... 等我乖乖地keep住飲，希望可以增到磅啦~

2010 日本之旅

話咁快，一星期嘅日本之旅巳經完結... 今個trip雖然冇乜買過野，但又洗左好多錢... 不過都係一好難忘而又開心嘅trip...

其實今次係東京逗留嘅地方，大部我都係前年去過。原先唸住一月嘅sales季節，寄望可以執平貨，或都買吓福袋。點知去到都唔係有好多sales (又或者係.... 做緊sales嘅貨品並唔吸引)，而且又無晒福袋賣，加上我又要幫人買野，花左唔少時間去搵，無乜時間shopping。所以東京嘅行程對於我嚟講，並唔係咁吸引。 但我慶幸去左裏原宿 (之前未去過嘅)，買左個皮袋，50% off，係我買到嘅惟一一件減價品。呀!! 我地係裏原宿一帶遇上楊千嬅，我個friend 買野俾錢時，佢都係隔離counter等簽card，我個friend跌左錢係楊千嬅附近，佢好nice 咁執番啲錢俾我個friend。之後我地三度遇上楊千嬅，佢竟然同我地say hello 同 bye bye!!


京都，大阪，神戶嘅行程都係由Amanda一手包辦。本人非常滿意Amanda嘅安排。酒店又近車站，行程又好organise，又有安排大家浸溫泉，個環境真係一流，又靚又舒服。大家最開心嘅就係著住和服去行清水寺!! 我地著足成日，過足癮。 最得意嘅係，有好多遊客截住我地，要求同我地影相!!! 其實當日都好凍架，又有落雨，不過大家都顧住貪靚，寧願挨住凍都唔願意加披肩! =p

係神戶嘅行程，雖然我地唔能夠100%跟住原定個plan，但係都去左好多地方喇! 惟一美中不足嘅係梅田逗留太耐，耽誤去北野嘅行程。搞到入夜先去到北野，無得參觀啲藝術館，又影唔到相。 不過，我地都試過間好特別嘅餐廳食dinner。

除左和服之外，對於我嚟講，親眼見到落雪都係一個好難忘嘅經歷。 根本去旅行時都無唸過會落雪，係嵐山等車返酒店嘅時候，開始有雪飄過，真係好開心，好興奮!!! 返到酒店嘅時間，仲係最大雪，好彩影切相咋，因為過左一陣就停左，無再落雪lu。 叧一個好彩，就係係我地著完和服之後先落雪。 如果落早一日雪，我地應該捱唔到凍喇!!!

感受完落雪，最後一日行程，又俾我地見到彩虹，大家都好興奮。雖然係香港都有機會見到，但係要是係旅行其間遇到彩虹，大家都會特別好開心，因為覺得自己好好彩。

2010 日本之旅album:
http://www.facebook.com/album.php?aid=152349&id=643747049&l=588eb69624

京、阪、神-我嚟喇~

唔覺唔覺，聽日就出發去旅行喇… 唔知點解呢，心情又唔係真係興奮… 小出門嘅我，平時要成個星期前開始執篋架，但今次呢... 我到出發前兩日都仲未開始執添。 嘩，天氣預測係零下兩度至十度咋，好凍咁播... 有啲擔心件褸唔夠厚，唔夠暖，所以買左暖包過去用。


雖然係唔係跟團，我地自己都開左會茶會，傾吓個行程架。哈! 今次隊長們plan左將會帶我地去行嘅地方，其實大部份上年柏柏都巳經帶過我去，不過今次一行六個人，應該會有另一番體驗嘅。 (希望唔係友情大考驗啦...)

P.S.
好彩我星期四晚開始左我嘅執篋行動，因為我發現我仲有唔少"臨審"野要買... 聽日出發喇，而家識得緊張喇...

Postpone

由於近排美國情報局頻頻收到消息印度將會有恐怖襲擊，所以我二月個business trip 雖然出晒 itinerary，都要postpone。 老細都講得啱，一來都擔心人身安全，二來，就算冇襲擊，機場嘅checking都會好嚴謹，一定要排好耐隊先過到關，加上個機場又唔係pleasant過人，一定唔好受，都係再過一排先去印度喇。

P.S.
原來約左聽日去打針，好彩今日趕得切cancel booking，等confirm下次去印度個schedule先再去打lu。 因為我都唔肯定幾時會再去。

聖母頌

自我夾瘀尾指之後，都好一排無錄歌仔喇。 一嚟要等手指康復，二嚟係我早排嘅schedule 好full，真係好充實，太多事要忙，加上老師又要臨時改上堂嘅時間，星期三上完，星期六又要上，跟住個星期三又上另一堂。(正常一星期上一堂咋!!!) 所以連練習嘅時間都無，無練習就無進度，所以無新歌仔。 隨著聖誕假嘅完結，Daphne嘅婚禮嘅順利舉行，我終於有時間練琴喇...

由於之前我真係抽唔到時間練習，所以哩首"聖母頌"都學左好幾堂，教到老師都話悶.... 嘻嘻... 哩首係一首比較慢嘅歌仔。 都幾講技巧架，因為有唔少notes都要hold 較長嘅時間，要用全弓去拉，所以要拉得好定先得，如果唔係，就會有好多廝殺聲出現。

新老師

由於我同積奇蓮報讀初班時，我地揀左日籍導師(木全小姐)任教。不過因為校方規定日籍導師只會任教首三個月，餘下嘅課程就會轉由華籍導師任教。 時間過得真快，轉吓眼又學左三個月日文喇，今日要轉新老師喇，真係好唔捨得木全小姐呀.... 今日除左轉老師，連班房都轉埋添。

記得上一堂木全小姐傳過張通告，話俾我地地知下一堂轉華籍導師，叫盧先生，曾在日本工作多年.. 好一句工作"多年"，令我以為盧先生都一把年紀...

等左好耐，老師終於出現喇... 盧先生並唔係一把年紀，反而好後生。不過佢個look好嚇人呀.. 真係估唔一個老師個造型可以咁yeah 囉... 束起大大把又乾又曲嘅頭髮，佢仲要唔係就咁束馬尾咁簡單，係有個髻添架囉... 腰間又吊出一個皮扣，去到邊個皮扣都"fing"嚟"fing"去... 真係無眼睇，佢同溫文意雅嘅木全小姐成一大對比... 真係好掛住木全小姐架呢...

一開始，佢逐個問人叫乜名，但係人地講完，佢又唔識咁或都記唔到.. (佢連Elizabeth都唔識，革硬要改人地個名做"Eli"，話易啲讀喎，BoBo佢又記左做PoPo.. 問你死未?!)　

開頭對佢印像真係麻麻... 最主要係佢個Look真係唔掂，一啲都唔似老師囉。 加上佢英文唔得，唔係話佢發音呀，連簡單嘅英文生字(e.g. then)都唔識呀。 佢仲問我地"乜阿木全小姐用英教大家架?" 我唔知佢expect日籍導師唔用英文用乜野嚟教大家囉... 救命呀!!!!!!!!!!!!!!

上左堂就好啲喇.. 見佢都真係有料到嘅，開始接受佢嘅教學方式。佢好鍾意抽叫人問問題或讀書（不過佢叫嚟叫去都係個幾個人名），雖然佢哩個行為令人好緊張，但係我好欣賞，因為佢幫到大家嘅發音。 佢其實都好生鬼嘅，會教啲特別嘅口號/方法教我地去記啲野。最impressive 係教大家點去記星期一至日。 佢講完，又真係容易記左... 不過我略嫌佢講得快，寫完White board 又俾時間人地抄。 教讀長句子時，又唔會將句句子分成幾part讀，我地好難跟... 死火啦，下星期會外遊，要skip一堂，好驚番嚟跟唔上，又被佢叫中問書添... 個興趣班變得好有壓力呀!!!

新嘅一年，健康嘅開始~

2009年終於過去喇，今日係2010年1月1日。一早就同Victor 同Joann去行山呀，真係好健康嘅活動呢~ 我地行嘅係
香港國家地質公園，位於馬屎洲三門仔。 可能係之前落過雨啦，上山時，小部份山路比較滑，其餘地方都幾好行。 行地質公園比較特別，除左一般園林景色之外，仲有唔同嘅岩石睇下。兩個零鐘就可以行完，沿途都係對住海景，入到地質公園範圍後，更一路行一路有海浪聲，真係好舒服架。

******************************************************************************************

P.S.

上次個health check report 指出唔少問題，其中一個係我underweight ，個health check report 係咁寫: "you are very underweight which increase your risk for osteoporosis" (骨質疏鬆)。所以，要食多d有營養嘅食物係理所當然啦，另外醫生建議我多做負重運動，或者做多啲stepping有關嘅運動，因為咁會幫助build up muscle 同埋有助吸收。我唸今日嘅行山活動對我好有幫助嘅，都係時候做多啲運動喇~

X'Mas holidays - full schedule

今個christmas，節目真係多籮籮.. 比返工仲要忙，所以放完個xmas holiday，個人仲要攰得很呢!!

********************************************************************************

24 Dec

放工後，同Doris同埋布魯士去食dinner，補祝布魯士生日。係中環食完dinner，去左Landmark同IFC影吓相，之後就搭船過尖沙咀。係中環竟然唔係太多人， 嘩!! 一去到海運就人山人海喇，仲要係未行到海運門口，就巳經有鐵馬圍住，又要排一輪隊先影到相，同埋入去海運。入完海運，唸住經廣東道行去舊水警總部影吓相。明明就係對面之嘛，點知又封路，又要兜路走。差唔多行晒條梳土巴利道，先可以去返舊水警總部。一心影吓1818嗰棵聖誕樹，點知影左兩，三張相佢又熄晒燈。我地望吓隻錶先知，原來巳經到左聖誕節正日喇，真係唔覺唔覺就過。 隔左一陣梱樹又再著番燈，我地又影多一輪相，然後食埋糖水返屋企，返到屋企都巳經差唔多兩點lu。

*********************************************************************************************

25 Dec

今日做乖乖女，十點零鐘就帶左老竇同媽咪出銅鑼灣去鼎泰豐食晏，然後就行工展會。 今次係我地第一次去鼎泰豐，都唔知點乜菜好架，所以我都係亂點，叫左我醉雞、蟹粉小籠包、清炒白菜仔同埋水晶肉。媽咪點左酢醬麵，老竇就點左紅燒牛肉麵同紅油抄手。 除左個水晶肉麻麻地之外，其他都好好。 我問老竇好唔好食，老竇就好開心咁話好食。我問阿媽好唔好食，阿媽話都OK啦，不過佢竟然再補充: 「我覺得佢同霸王山莊差唔多，不過哩到就貴啲囉!!!」哈哈，都係傳統父母心態。所以請佢地食野，要記住唔好俾佢地見到幾多錢呀!!

工展會都幾多人，不過好彩未至於人山人海到行唔到路。老竇，媽咪志在行吓街街，唔係想入平貨，所以行左唔係好耐就返屋企lu。 返到家一陣後，我又要出發去wincy屋企打邊爐lu。 主人家準備左好多海鮮美食，除左牛肉同蔬菜之外，其他全部都係海鮮。有蠔、鮮飽魚，魷魚、螺、珊瑚蚌、帶子等等，真係好豐!!!

打完邊爐食到個個都飽晒，我地就開始玩pictionary，玩輸左就罰打二round 邊爐，打完邊爐，仲要食聖誕蛋糕添。不過個蛋糕(天使蛋糕)幾好食架，唔會太濟!! 食完蛋糕，我地又準備玩第二輪pictionary。主人家wincy好勁呀，連贏兩round，犀利!!! 玩完返到屋企都接近三點鐘，俾媽咪話我夜返 u~u...

********************************************************************************

26 Dec

唔知咪係因為噚晚食得太多甲殼類食物，個人唔受得，定係其中有啲海鮮未熟透，一早就巳經因為肚痛而痛醒左。好彩晒到，因為隨即肚疴，疴完又嘔添。不過嘔得唔暢順，唔左少少就嘔唔出，但係自己feel未嘔完，但又嘔唔出，好鬼辛苦。

今日係假期，冇醫生睇喎，見唔舒服，咪唸住食下成藥，瞓番多啲休息吓就會好啦，點知瞓極都係唔舒服。老竇知我唔疴同嘔，所以臨出街前都買左碗白粥俾我。 瞓到三點幾，起身活動吓啦.. 食完碗粥，唸起自己無時間練琴，咪拎個小提出嚟打吓歌仔... 點知拉左一陣咋，就feel到唔對路。立即放好個小提琴，坐番去餐檯到。一坐到就要嘔喇.. 我都再無時間反應，惟有嘔番係個外賣碗到.. 今次真係嘔突囉，個碗唔夠我嘔，不個好彩個碗外有膠袋。

今次明顥係嘔得出，嘔完我又去瞓吓，in a hope that 瞓醒會好番。我巳經瞓到食晚飯，但係我比晏晝更加唔掂。好冇胃口食野，真係食兩粒米都食唔落。 唉..... 聽日仲要去飲做姊妹添... 個人咁唔舒服，又食唔到野，唔得架喎... 所以都係去醫院睇急症打止嘔針先得。 嘩!! 我之前有十六、七個人等緊睇醫生喇，而且大多數人都同我一樣，拎住個嘔吐袋架... 等左個零鐘，終於到我喇，打完針都仲係好唔舒服，惟有早啲瞓啦.. 希望第二日起身無事，可以去做姊妹啦。

********************************************************************************************

27 Dec

好彩今早瞓醒個人好番好多喇... 起碼feel 到肚餓，有胃口食野，食完又無作嘔嘅感覺。 所以立即化妝出發去Daphne娘家做準備。 原來由我家搭的士去青衣都唔駛二十分鐘，都好快喎!!

接新娘當然要玩遊戲啦，班兄弟都好真好夠兄弟喎，個個都好玩得，都幾爽快。最搞笑嘅係，佢地竟然嫌少，唔夠皮，不過吉時快到，我地姊妹們都唔留難咁多，收左開門利是就算。新郎哥好搞鬼，預備左一張好精美嘅支票(歡樂滿東華嘅啲呢) 做支票交收儀式同埋影相。 事後新郎話其實佢地預我地再還價，所以佢再補番一千俾我地做開門利是。唔係錢嘅問題， 但我地對新郎哥嘅心意都好impressed。

雖然噚日先病完，今日又要早起，又由朝做到晚，但係我真係好enjoy，同埋好戥Daphne高興架... 尤其係夜晚婚宴個主題係"懷舊晚會"，都有唔少賓客跟住個dress code 而 dress up，所以都幾得意架!!!

********************************************************************************

28 Dec

老土都係咁話，今日係帶住一個疲累嘅身軀上班... 真係攰到爆炸.. 剛剛放完假，但又巳經好渴望再放假休息吓呀~

向印度出發

噚日做 appraisal 時，老闆話想安排出年我同佢去印度... 因為都有一年多冇去 site visit。 唔知呢，我咁大個女都未試過出trip，本來應該好興奮先係.. 不過今次係去印度，對於我嚟講就唔係太吸引，因為我擔心衞生問題...

不過開心嘅係.. 叫做有得出吓trip，有啲使命感。 同埋今次係同老闆一齊去，應該唔會太差掛... (以前因為同事唔想去台灣，唸住叫我代勞，但後來因為金融海嘯，公司要行cost control，所以出trip嘅事，免得過就免，所以一直都冇出過trip)

不過呢，噚日老闆都仲係話想出年四月初出發，今早又改話想一月底出發lu... 嘩，成件事嚟得都好快呀... 有啲緊張添!!!

<-- 老闆送的X'Mas gift ，係magnet嚟嘅，佢話呢句啱我喎...

嘉道理農場一日遊

嘩... 好日都唔做運動嘅我.. 今日同Amanda去左嘉道理農場... 我地本以為係輕輕鬆鬆嘅遊玩團，點知原來唔係... 搞手阿wing臨出發先同大家講係hiking，仲要係幾辛苦，多斜路同埋多梯級行.. 結果我地就行左成四個鐘lu.. 不過行吓山，呼吸吓新鮮嘅空氣，又出完一身汗，個人真係精神啲喎...

http://www.facebook.com/album.php?aid=143469&id=643747049&l=200fbbe025

聽日又開始上新嘅yoga class，唔知我仲有無力去hold 嗰啲post 呢... 希望唔會太震啦.. =p

不過呢我最擔心唔係聽日堂yoga，而係呢.... 今個星期六上日文堂時老師先同我地講話下個星期有Mid term exam.. 唉! 今個星期仲有密麻麻嘅schedule 添架.. 咁啱日日放工之後都有事幹... 都冇乜時間剩喇，真係練得小提琴又唔夠溫日本... 個心真係好忐忑... 唔知點算好...

Check-up

今早去左做body check.. 詳細報告就要等個零星期先有，不過都有啲初步結果

平時係屋企久唔久都有量下血壓，每次都OK 正常架喎... 但今日係診所到量，個上壓頗高，有成148，都唔知點算好... 視力測驗唔係好好.. 醫生叫我讀出綠色線對上嘅字，我同醫生講話我睇唔清楚，但醫生叫我試吓... 結果... 嘻嘻~~ 我一路講啲乜字，醫生就一路話: "果然係估估吓喎

跟住就係睇一連串驗色盲嘅圖，一直都好快就睇到嘅乜數字，跟住其中有一幅我認唔出有乜數字添，不知點算好嘅時候，醫生就話呢幅睇唔出先係正常

跟住就到聽力測試，我有好多高音（高頻率）都聽唔到，醫生個樣有啲擔心咁... 又問我細個嘅時候係咪係好嘈雜嘅還境長大... 醫生話以我嘅年紀，應該可以聽到較高頻率，但我聽高頻嘅能力近乎四，五十歲嘅能力... 嗚嗚嗚... 不過醫生補充，只係聽高頻嘅能力較弱，我所聽到嘅range 都ok，日常生活係唔成問題嘅。

P.S
iphone 嘅應用真係廣泛，今日醫生都係用佢部 iphone 幫我做視力測試同嘅聽力測試... 真係利害!!

姊妹裙

好友Daphne嘅非一般緍禮將會係月底舉行，主題係懷舊舞會。準新娘唔駛我地姊妹們著什麼姊妹裙，但係呢，就希望我地著得切合主題喎... 今次真係難搞!! 姊妹裙我反而有，懷舊嘅服裝我就欠奉.. 所以要約埋Amanda佢地去買衫。

結果，我地去左女人街嘅二手地攤買衫... 其實開頭見到咁嘅環境，唔係好想去揀.. 因為真係好殘，好舊.. 不過呢，Wincy 好勁，摷到啲好騎呢嘅衫，好嬌艷嘅粉紅色大荷葉邊裙，或者黃底大波點裙加厚shoulder pad o果啲呢，個 look真係好懷舊 ，其實係好老土至啱!! 真係得啖笑，揀唔唔落手囉.... 好彩臨尾摷到件旗袍，雖然好殘舊，佢地個個都話啱我，而且又真係好合身喎。 最重要係個款我接受到嘛..

我呢啲製作認真甘嘛，買完裙，仲買埋個波浪流海添呀... 實行嚟個夜上海look!!

急進

星期一夾到手指之後，雖然改左日子學小提琴，但我日日都有練琴... 因為尾指(四手指)腫左同埋劇痛，我真係用唔到佢去按弦線... 如果係拉平音的話，我就拉空弦代替，如果唔係拉平音，而係拉sharp 或者flat音，我就梗著用第三手指垮遠啲去按個音... 老師當然唔欣賞我嘅款自創嘅按弦手法啦... 今日嘅然上得堂，而且隻尾指又去左腫喇，按弦都唔係太痛，所以都係用番晒所有手指啦... (當然會就住度力去按弦啦)

我好鍾意呢期學緊隻歌仔架，所以就急不及待去練習，練開就唔願停，越拉唔好，就越想快啲拉好佢... 不知不覺間我就無再"就住"度力，成日好用力用尾指按弦喎... 練完琴就真係知味道呀....而家隻手指又好痛喇，又痛到連keyboard都唔打得喇.. 今次弊喇 !!! 都係怪自己太過急進喇... 真係要緊記欲速則不逹哩一個道理 @~@

好瘀

今日好唔少心呀，自己關門時夾到自己嘅手指尾... 真係好痛.. 痛左好耐!!! 今次夾得好傷呀，手甲即時瘀左不特止，連指背都發紫同埋腫左... 嗚嗚嗚.....

本來諗住attend 完個2小時CPD course，返到屋企可以再練吓小提琴甘嘛，而家唔拉得喇... 好彩今日放假，下晝都練過吓琴啫... 如果唔係，我就連續三日冇拉過琴喇... 唉... 仲有好多study 未練，新歌仔又未拉好... 好想練琴呀.. 唔制呀!!

驚喜

上週小提琴老師因公事要到英國出差，所以停課一次... 不過老師係之前一課交低好多練習畀我架... 今個星期終於有堂上喇~ 老師上堂話過會掛住我嘅，我都以為佢講吓啫，點知佢真係好有心呀，有買手信畀我呀.. 我都好意外呀，亦係我咁大個女，第二次收到老師送畀我嘅手信!!

放縱

上一週秘書姐姐因為患感冒，請左一個星期病假，所以我要做埋佢啲admin野。本來好努力咁清緊自己嘅backlog﹐本來稍有進展，但經過左哩個好充實嘅一週，自己都病左，失左兩日聲.... 好彩而家巳經好番晒 lu... 病好之後個人好放縱，成日藉詞買野奬勵自己。其實自己無做過乜特別好事，無野值得去獎勵... 但我就買左唔少野畀自己lu..

最放縱嘅就係.. 睇報紙見到哩個廣告，見到Sumsung Jet 出左紫色，個人就迷左落去。問下Senior G 有冇聽聞哩部電話嘅comment.. 原來佢太太用緊，佢話上網快，影相得，大讚ok 喎... 跟住我就去豐澤試吓部機，一拎上手，手感唔錯(因為佢冇iphone 咁肥，slim 啲，好拎啲)，touch screen 感應都好快，手寫認字都ok喎... 見價錢都係三千頭，所以就扑鎚買機lu... 成個決定買機嘅過程都唔駛半日呀，係咪誇張先!!??

買左部new toy，又花唔少時間去set過晒啲野... 之前都係用開Sony Ericsson，而家要重新適應Samsung 嘅介面同function... 其實我ok geh.. 惟一最唔好嘅就係電話薄嘅資料由Sony Ericsson transfer 去Samsung後，啲人名format 唔同晒，之前係「Apple Chan」，而家變成「Chan; Apple/1」。我真係唔鍾意佢亂碼囉，所以要將接近二百個人名改一次... >~<

咁部新機有wifi 嘛，我梗係要試吓上網啦!! 開頭同屋企個wireline router set 好之後IP Address 同MAC address，接通左，但又上唔到網 喎，去問shop啲人，佢地又一口咬定我冇入password... 但我屋企個router 都冇set password，何來有password 去入呢? 真係求人不如求自己，惟有自己再研究吓啦，好彩最後都畀我研究到... 之前一connect wifi，佢就自動setup個瀏覽器，但佢個setting 係漏晒靜態IP同埋靜態DNS嘅資料.. 亦都冇得畀你入.... 惟有自己setup一個，入齊啲資料後，終於可以上網喇.. yeah~

不過呢兩日忙於玩呢個new toy 而冷落晒我嘅小提琴呀，係時候要練習喇~

真相

一個我從未想過嘅原因，一直沒有去追尋嘅真相.. 一個我一直信以為真嘅理由，原來只不過是給打發嘅藉口..

零碎嘅片段，經過細心嘅思考，分析同串連，證據一一出現，細節一一重組，真相終於揭開.... 曾經是難忘嘅回憶，深刻嘅印象，如今只變為蕪湖嘅交待及虛假嘅理由..

醜陋的真相如今一一揭示，令我一直懷念嘅童話都幻滅了... 原來自己一直相信的，和事實卻各走極端。 失望是有的，個心唔舒服亦在所難免，但慶幸好快我又平伏下來了。要是我是在當年得悉這個真相的話，或者我會好嬲，激動好耐... 但現在巳事隔多年，震撼嘅感覺並唔强烈，好容易就接受到哩個真相... 看清楚真面目後，更令我放下心頭大石...

現在的我，再沒有傷感，也沒有留戀，沒有生氣，亦無任何怨恨嘅感覺.. 只怪當初太過天真，頭腦太簡單，太過唔sensitive吧....

Minuet in G

最近又學埋日文，老師開始教文法句式喇，老師仲會俾小測我地，所以都要花時間去溫習，時間唔係好夠駛咁。不過，我都係鍾意小提琴多啲，同埋而家學嘅歌仔唔再簡單喇，要花時間去練架，所以大部份時間都係練習小提琴 =P

呢首Minuet in G，我都練左好長時間架，終於成形喇，雖然都仲未掌握得好好，又拉得唔夠優美，而中後段又係有多好Staccato (跳躍嘅弓法)，以我嘅水準，跳躍時點到隔離嘅弦線係一啲都唔奇，但係自己都收貨喇...

Nick Vujicic

今日聽左一個佈道會，覺得好震撼，好感動，好感恩

Nick Vujicic ，一個天生沒有雙手，沒有雙腳嘅人，竟然如此樂觀，如此有心，為了令更多人認識主，甘願奔波各地做見証，到處傳福音。

其實Nick 並非天生樂觀，佢亦都有過情緒低落嘅時候，八歲嘅時候也曾一念之差，想過自殺。幸好佢唔捨得愛佢嘅父母傷心，不想他們內疚一輩子，所以放棄左消極嘅尋死之路。後來，Nick 有機會認識主以後，信主後他更認定殘疾是「上天的禮物」，佢認為上帝要藉他來激勵別人，為眾人帶來福祉。所以到處演講，決意將希望帶給大家。

Nick 演講無數，真係有唔少令人感動嘅真言，我無法一一記載，惟有借用朋友V 嘅節錄

1. If you pray for the miracle to happen, you could be that miracle to others
2. If I can save one more soul and that means I have no hand/leg, it is worth it
3.When there is a storm around you, fly above the storm and you know the sun is always shining upon us

以下有兩個關於Nick 嘅演講 vedio clips ，希望大家都可以being motivated!!!

變奏曲

最近學左首變奏曲，一曲分三個Variations。 首歌個譯名叫"優美的變奏曲"，但我就拉極都唔優美。 原曲係首比較慢嘅歌仔，但進入第一個變奏，主要係原曲嘅note與note中間多插兩個notes ，但全首歌嘅節拍就巳經變得急速lu。多插嘅notes 全部都係要係隔離線上拉弓，所以呢個變奏主要練習轉線技巧。

第二個變奏就係原曲加入不規則嘅pattern，其實我幾鍾意哩個pattern。不過有啲地方要一隻手指同時按兩條弦，我手勢仲未係熟練，所以好多時按唔好，導致走音，又或者只顧按好弦，又顧唔到平衡嘅拉弓，所以出現唔少廝殺聲。 至於第三個變奏，我覺得佢其實係第一個變奏嘅延續，主要係原曲嘅note與note中間多插三個notes，拉到最後，個結尾好得意，好有結束停頓feel。

A，I，U，E，O

噚日開始上我人生裡頭嘅第一堂日語班喇... 我地嘅老師係日本人，佢用英文受課，老師個樣好後生，而且佢嘅英文出奇地標準，一啲都唔似日本人講英文架!!! 老師仲好以略懂國語添，真係好impressive 呀!!!

老師一嚟就開始教五十音， 每個音讀幾次後就抽咭仔問番我地係乜... 我即堂只可以記到幾個咋，但啲同學仔好犀利，個個字都記得... 佩服佩服!!!! 第一個學左二十五個讀音，一共五十個字母 (因為每個讀音都分平仮名，同埋片仮名) 。 我開始發覺自己嘅吸收能力好差添，一下子記晒呢五十個字，都幾吃力喎， 人大左先去開一個新Language 真係唔係咁易...

好彩當初積奇蓮拒絕上intensive class 咋，而家上normal class，每堂上兩個半鐘，如果上intensive class，都幾難頂... =p

輕快嘅歌仔

對於我呢啲缺乏節奏感嘅人嚟講，要拉旋律輕快同跳躍嘅歌仔，真係好有難度，好難handle囉.. 音準巳經唔係好好，而家又要顧埋節奏，忡要係跳躍o個隻添，真係向難度挑戰呀。

好在我都算係有恆心嘅人，失敗多次之後都未有放棄或氣餒，不過呢就開始對自己嘅要求降低，因為都唔想俾自己太大壓力...

拉左無數次之後，開始有起息喇... 雖然跳躍嘅弓法仍然欠奉，但節拍巳經盡我所能表現佢嘅輕快架喇。我知道對於老師嚟講，都仲未逹標，但我自己巳經收貨喇... ^.^

Violin Study 2

呢排學嘅歌仔同Study都好鬼難呀... (我個人認為!!!) 首歌仔節拍超輕快及跳躍，我拉極都拉唔到佢嘅神緒。我巳經放棄做跳躍嘅弓法架喇，但係呢.. 真係拉嚟拉去都唔夠輕快囉.. 唔知幾時先拉得好呢首歌仔呢?!!

至於首study，拉左無數次 ，但係次次拉到中間就會斷左... 失敗左都有過百次，今日終於可以一口氣拉完全首study，雖然都係有音準問題同埋間中"甩甩咳咳"，但總叫做漸漸有氣息啦，都有番少少安慰吧。

溫馨提示 - O九新概念

日前秘書姐姐同我分享左一段剪報，我睇後都覺都幾有意思，所以想同大家分享一下，希望大家都好好過日子吧...

O九新概念
一個中心: 一切以康為中心
兩個基本點: 遇事瀟灑一點，看世糊塗一點
三個忘記: 忘記年齡，忘記過去，忘記恩怨
四個擁有: 擁有真正愛你的人，擁有知心朋友，擁有向上的事業，擁有溫暖的住所
五個要: 要唱，要跳，要俏，要笑，要苗條
六個不能: 不能餓了才吃，不能渴了才喝，不能睏了才睡，不能累了才歇，不能病了才檢查，不能老了才後悔

Violin Study

初初學小提琴時，學嘅歌仔比較短，通常都係一，兩行樂譜。所以通常一堂入面，老師都盡量教一個 scale，一首歌仔同埋一個 study，令課堂充實啲。 歌仔係比較有旋律嘅，幽美啲，好聽啲嘅。 而 study呢，係不斷重覆節拍，重覆某個 scale，或者重覆某些指法。

初學時，我比較喜歡拉 study，因為佢比歌仔長啲，感覺完整啲。不過而家學嘅歌仔都同study差唔多長lu，我反而鍾意拉歌仔多啲，因為佢地有旋律啲，好 feel 啲。

上個post 同大家分享左兩首歌仔，以下係一首我較早期學，而我又好喜歡嘅 study。

聽落簡單...

呢首聽落簡簡單單嘅歌仔，知唔係令我好Moody，上緊堂都喊左出嚟嘅歌仔囉... 雖然都係有音準嘅問題，但係節拍巳經近番啲架喇...

而嘅首就係我近期學左最長嘅一首歌仔，亦都係本人較為喜歡嘅一首...

Addicted

唔知係咪心理作用，我覺得飲完咖啡係會精神一點。

呢排成日都好攰，朝朝返到公司都好想瞓，唔係好夠精神，好難concentrate... 尤其係食完晏，飯氣攻心嘅時候，真係好難頂。漸漸地，我開始依賴飲咖啡..

以前並無飲開咖啡嘅習慣，但近排變成每日至少一杯。早上捱到唔飲，食完晏又會好想瞓，所以都係飲番杯提吓神。其實每次去沖咖啡時，都有唸起中醫朋友叫我少啲飲，但係結果都係沖左嚟飲。

好一句溫馨提示"Drink slowly"... 我都係時候節制下，唔好再依賴飲咖啡先得。 我唸我之所以覺得攰，都係因為瞓唔夠啫。 我唸係時候tune番早些少瞓，有足夠嘅睡眠時間，我應該可以精神啲嘅....

Just Salad

中環近排開左兩間Just Salad，其中一間係環球大廈，好近我公司。唔知係真係咁好食，定還是啲人貪新鮮呢，日日lunch time 都大排長龍。我兩位同事食過都大力推介俾老細，老細立即好雀躍咁揀定食邊款salad

我一向都愛食蔬菜，salad我當然都愛食啦。有日食lunch同積奇蓮講開Just Salad，發現原來積奇蓮好抗拒食salad當正餐。 (我之前淨係知佢唔鍾意食sandwiches, burger 當正餐咋.. 哈哈!!) 所以決定等我無lunch appointment 時就自己試吓啦

今日就有機會試吓喇，我買嘅時候巳有小龍尾，所以都等左一陣先買到。點知買完又有一倏更長嘅龍尾出現，好彩咋，唔係就有排等。 唔，佢都係sell 健康同埋多選擇為主嘅，可以買set salad，又可以買custom salad，平均五，六十蚊一款啦。不過佢個碗都算大，食晒一碗都真係好鬼飽架。