我的新擺設

我很滿意呢個新擺設，可以存放晒我所有嘅耳環。呢個earings stand 最多可以放72對耳環架!! 雖然宜家我嘅耳環唔算多，疏疏地咁擺，都只係用左一半咋!!

不過我有信心，終有一日會用得盡佢嘅，因為有左呢個stand ，我第二日就買左對新耳環喇，就係隔離哩個音符同小提琴呀，佢地亦係我買嘅第一對鴛鴦耳環。 我開心有新stand 同埋有新耳環 ^.^

靜音器

上次上完堂，知道有靜音器之後，當晚連瞓覺都掛住要買佢返屋企，所以第二日，我就急不及待，襯住lunch time 走去銅鑼灣通利琴行買靜音器。

買完個靜音器，又要趕返中環同積奇蓮食lunch。搭地鐵期間，唸起再無時間限制，幾夜練琴都唔怕嘈親其他人，真係好興奮，興奮到由個心到笑左出嚟。

由於又有飯局嘅關係，返到屋企梳洗完，都巳經11點幾，12 點.... 買左新玩意，冇理由唔試吓喎，所以我又試拉，真係細聲左好多喎，又無人發現... 拉到攰攰地，先發現原來都差唔多1點半，見第二日仲要返工，所以都立即收好啲野去瞓覺 lu 。

今晚又繼續拉新歌，不過真係好難拉.... 今次拉到啲手指頭好痛喇，啲"枕"仲有擴大嘅跡象添，惟有勤啲搽hand cream，希望佢地唔好咁硬啦... 我真係好想係下一堂之前拉好哩首歌呀!

鬆弛熊

上次Senior G送左隻鬆弛熊俾我，咁得意嘅野，我梗係第一時間Show俾我屋企人睇啦，個個見到佢自己行路都覺得佢好得意，而我侄仔見到佢郁都好開心。

所以我阿嫂早排去日本，都突登去拑公仔嘅地方睇下仲有冇鬆弛熊拑喎，點知又俾佢搵到，仲係戴皇冠添架，不過嫂嫂話呢仔熊係「價值不非」，因為佢用左好多個1000 Yen先拑到。 雖然價值不非，但我姪仔一見佢呢隻態，就會好開心咁飛撲埋去，証明佢個仔真係好鍾意隻公仔吖，都物有所值啦。

第十三堂 - 强差人意

今堂一開始都係拉下scale ，然後就拉上次學嘅歌仔俾老師聽。Scale 如常係拉兩，三次，第一首歌「The First Noel」拉左三，四次到，老師竟然話拉得幾好，可以表演喎。 (其實我知老師只係想鼓勵下學生啫)

但係呢，一到拉「Silent Night」就真係强差人意。因為過去果個星期，我focus拉「The First Noel」，無乜練過「Silent Night」。我唔熟個譜，拉到斷斷續續，轉線時又多雜音，真係好恐怖。拉到老師都頂唔順:「你要練下先得架播!」 見到老師咁失望，我個心都好唔舒服，因為今個星期我又多左飯局，小左時間練琴嘅....

拉左好耐都拉唔好，老師都唔堅持落去，因為佢點都要教啲新野俾我。係屋企明明做唔好拉跳躍拍子嘅技架，咁我咪請教老師囉，老師叫我拉俾佢聽，又唔知做乜喎， 今次破天荒係老師面前又ok喎...(不過事後返到屋企又點拉都拉唔好... 激死我喇~)

由於今堂表現好差，進度好慢，老師只夠時間教一首新歌，所以揀左首好有旋律嘅歌仔。 不過呢，有旋律嘅歌真係有難度囉，我連啲音都未搵啱呀，何來旋律可言吖... 好唔容易先搵晒啲音出嚟... 終於可以落堂lu....

老師發現我無得日日練琴，就介紹左個靜音器俾我。 哈，好神奇架!!! 加左靜音器之後，真係細聲好多架，老師話佢半夜三更先練琴都係靠哩個靜音器喎... 睇嚟我好要需要買番一個靜音器，同埋要多加練習喇...

打敗仗

呢排身子真係弱，成日病... 啱啱個皮膚病先叫做好番晒，但係而家又輪到傷風咳，真係唔係好掂擋。

今次係因為早前媽媽病左，佢就將佢啲病傳染俾我姪仔，而我成日抱我姪仔喎，咁我抱親佢，佢唔係向住我打噴嚏，就係向住我咳。我都心知遲早輪到我架喇... 結果我真係好快就打敗仗。 以前傷風咳，我都唔會即刻睇醫生，不過見屋企有BB，唔想又將啲病傳嚟傳去，所以我都係去左睇醫生，食左藥，個人就呆呆滯滯... 雖然叫做收左鼻水，無喉嚨痛喇，但係就變左咳。

個人病左就無乜心機做野添，成日都想瞓覺，但係瞓又唔瞓得咁好，啲藥都就嚟食晒喇，唔知幾時先好呢?!

第十二堂

話咁快又一個月喇，雖然老師話我進步左好多，但我又越來越覺得自己無天份。 我都好努力練習，但係呢，個基礎始終都打唔好咁..... 兩隻手，十隻手指真係好難控制... 而家仲開始加入跳躍輕快感，大細聲呀等等，唔係咁易handle囉 (我覺得)....

跳躍得嚟又要分短跳躍，同長跳躍，真係唔顧到咁多囉... 短跳躍都仲可以，但係長跳躍就唔係好掂... 而家跳跳吓，又要顧埋大細聲添，真係「不知點算好」...

大細聲呀，跳躍嘅長短呀，全部都係靠拉弓嘅長短去控制喎，技巧當然係有待改進啦。大細聲嘅改變，我都叫做知道點做 (雖然做唔足，做唔準)。但係跳躍真係唔係幾得，勉強做到短的，但我真係唔知點樣可以keep住短跳躍之餘，而再做到有漸慢嘅效果囉...

雖則如此，我都仲好有興趣學落去，我都好想拉好佢。但唔知點解，拉完個"零"鐘兩個鐘，個人就會好攰，好眼瞓。唔知係啲藥，定係真係我太用神睇琴譜呢?!