重生

初信栽培班時，導師講過浸禮是公開承認耶穌為我嘅救主和生命之主。 而且落水時象徵和基督一同埋葬，而上水一刻亦象徵和基督一同復活，所以浸禮另一個義意係重生。

今晚係我受浸，加入敎會嘅大日子呀... 好開心我爸媽，老細，好朋友們都出席為我做見証!!! 自己本身都好期待今日嘅來臨... 不過估唔到，準備受浸嘅時候，成個人變得好緊張!!!

直至牧師為我施浸，我個人入左水之後，就變得好輕鬆LU.. 及後我嘅朋友們，主內兄弟姊妹們一一為我送上祝福，又逐一影相，我真係好開心，開心到個咀係合不上，無論影相與否，我都係四萬咁口... 那從神而來嘅喜悅真係好豐富.. 我嘅興奮好耐都未完，結果成晚都瞓唔著 =D

因為我真係好感恩未信主嘅爸媽，Doris & Bruce, Annie 都願意出席, 我真係超感動，超開心呀... 而且我自己都估唔到團契有咁多兄弟姊妹出席.. 我無唸過會有咁多人同自己影相，我忽然間覺得自己好似名星一般.. 原來真係會無時間招呼朋友架... 但我好感謝Victor 咁抵得唸，成晚托拄部相機，幫我影咁多靚相呀..

http://www.facebook.com/album.php?aid=236169&id=643747049&l=12ca878f6e

輕快新歌仔

呢首新歌仔，老師試拉俾我聽時，我一聽就好鍾意喇... 我覺得好得意，好輕快，好中東feel.. 不過佢入面有好多地方要拉雙音 (同時拉兩條弦)，對於我嚟講係好有難度...

我真係覺得首歌好得意，拉兩拉就好心急咁錄低左佢.. 我知道仲有好多改進嘅空間嘅，等下堂老師指導之後，有時間再拍過一段好啲嘅片啦.. =)

懇親之旅

終於都等到懇親之旅哩日喇~ 好感恩有個好天氣.. 之前幾日因為颱風關係，天氣好差，但係今日天氣尚算唔錯喎... 多雲得嚟都算有陽光喎，只係落左幾滴雨粉咋。 不過雖然好似"馬後炮"，我事前都預料今日會有好天氣，因為始終都係一個懇親嘅活動，我相信神會看顧大家嘅..

眼見爸，媽都好enjoy是次活動，我自己都好開心。雖然爸，媽還是未有信主嘅意慾，但起碼佢地唔抗拒聽福音，所以都算係一個好開始。

http://www.facebook.com/album.php?aid=234408&id=643747049&l=1974fde8cd

violin study 又嚟喇~

哩首German dance又係玩換把位，今次係由一把位同三把位轉嚟轉去，嘻嘻，練左都有唔少時間，但係都係好"滕雞"，中後段尤其名顯，轉完三把位之後，支弓"撻"落啲弦兩次，搞到個粒音又震又Sharp左，不過最後嗰part都算拉得幾順嘅..

哩首study聽落好似有乜野，但我覺得佢一啲都唔容易。雖然個頭開得算ok，不過到後段又開始失控，多左唔少雜音... 真係可惜...

好鬼驚呀~

今晚同Doris 係IFC食完飯，傾完偈，Doris見我好攰咁，就suggest 埋單走人。埋完單，Doris話想去埋洗手間先返屋企... 入去時都係好地地... 去完行去洗手嘅途中，有一位阿太同我迎面而來，就係我地相遇嘅廁格，因為個廁格門係打開左，我眼尾見到有位白色衫人企係廁格入面，同時我開始聽到水聲... 我望真啲... 原來係個男人係女廁如廁而又唔刪門!!!!!!!!! 而迎面而嚟嘅阿太同一時間望到個男人之後， 變得好迷茫，阿太再望望我，之後佢又當無時發生。

我即刻去洗手嗰邊，同Doris洗完手，我講俾Doris聽我好似見到有男人... Doris 即時反應: "唔係嘛，咁驚???" 點知，就係哩一瞬間，個男人出嚟洗手呀!!!!!! Doris 同我二話不說，立即離開個女廁.. Doris 話佢出洗手嚟嘅時候，都好見到有廁格開左門 (正常嘅廁格，啲門都會掩埋嘅..)，佢眼尾都係見到有白色衫嘅人係入面，Doris以為係清潔阿姐洗緊廁所，所以無埋到佢...

個男人出嚟洗手時，同Doris有一吓子嘅對望，Doris話可以肯定佢係個男人，因為佢有鬚根架!! 不過見到個男人滿臉通紅，應該係飲醉酒喎... 嘩，真係點都估唔到係IFC 嘅女廁入面見到男人架，真係俾佢嚇親...

我忍....

好朋友Victor同太太結婚十週年，我有幸獲邀飲宴，當然要賞面出席啦.. 不過今次都係小妹第一次出席同類場合... 禮物方面都幾頭痛... 雖然Victor講明唔駛買禮物，又唔駛封禮。但係我又點可以白食呢?　十週年喎，真係好難得，又好有紀念價值喎，所以我決定點都要送份禮物嘅.. 好彩俾我終於唸到送乜喇... 一於去訂造人像公仔賀一賀佢地啦...

我去到舖頭時，有三個人落緊order，我惟有係舖頭出面睇佢啲display啦.. 發現佢九成都係結婚公仔，我好努力咁望都唔見有小朋友嘅figure喎.. 見等左好耐，班人都未走，我咪去第二度行下先啦。行行企企一輪之後，再返去舖頭時，又被一位阿嬸捷足先登喎... 我見佢同老闆都confirm緊details 啦，咪唸住攞本catolog睇下先啦，點知老闆竟然好唔客氣咁同我講:「要排隊先!」

我回答: 「哦你用緊架，唔好意思呀...」 跟住咪坐埋一邊等... 好可惜，阿嬸嬸係一位每事問，但又唔精明嘅嬸嬸，問完又唔聽人講，所以佢問完又問，問完又問，問完再問... 唉，見之前行過其他地方，都唔見有佢哩類型嘅figure賣，我惟有忍佢地...

先前我想話掂下本catolog都唔得，等我仲以為阿嬸嬸未用完本catalog 啦。點知，我等左成半個，阿嬸嬸由頭到尾都冇用過本catalog...　係眼尾都無望過本野呀，你話激氣唔激氣吖!!!! 鬼叫我要幫襯佢咩，惟有繼續坐埋一二面呆等.....

好不容易，終於等到佢confirm晒所有details，到最後落單喇... 老闆話佢地兩，三日後就會send個做好左嘅模send 去客人嘅email 到，客人睇完覺得邊到唔似樣，可以留言代改。 但係只會based on 落單時所交低嘅相片去改，唔可以中途換相片。同埋個樣confirm左，先會做頭髮。其實老闆都講得好清楚，但係阿嬸嬸都仲係有好多問題... 再過大約十分鐘，終於到我喇!!!!!! 老闆終於肯俾本catalog 我睇 lu..

不過呢... 我一心唸住訂造一家三口嘅公仔架... 雖然本catalog 好厚，但係九成九都係結婚公仔嚟架咋.. 同老闆講完我心目中嘅idea，老闆就話其實佢地得一款model有小朋友figure。但係呢，個小朋友造型好唔掂喎。 再加上阿老闆極力反對做BB figure喎，佢話一定唔似喎，所以我最後都係揀左做兩個大人嘅figure囉。

估唔到佢地真係兩日後就有個初稿email俾我喇，而且我認為個五官像真度都頗高，所以我都唔駛佢地改就accept 左個初稿，等佢地加埋髮型俾我final confirm。

***********************************************************************************

等左兩個幾禮拜，終於有得攞貨喇... 嘩，原來實物俾我想像中大呀，個盒仲好大盒。真係無唸過一個相架可以咁大盒，而且可以咁重添呀!!!!! 今日仲要著左對較高嘅高踭鞋... 由鬧市中帶佢返屋企，要經過重重障礙，又要超越好多行得好慢嘅人.. 左穿右插，終於拎到搭車嘅地點，安全地送番屋企。 不過呢，坐抵食飯嘅時候，雙手巳經震晒... >~<

由去訂哩份禮物，到確認個型，取貨，都差不多一個月時間... 今日終於忍唔住送出左份禮物lu... 個人輕鬆晒 =p

IQ題

今日fellowship嘅組員問左幾條IQ題，我覺得好得意，想係度分享下... 所有答案都係係茶餐廳/ 酒樓有得食嘅...

題目1. 紅豆同綠豆打仗，紅豆嘅軍隊叫乜?
.....
....
...
..
.
答案係: 紅豆冰 (紅豆兵)


題目2. 紅豆將軍發司號令，所有紅豆兵都出發進攻，咁佢講左乜?
.....
....
...
..
.
答案係: 紅豆糕 (紅豆 "GO")


題目3. 咁哩位將軍又係邊個?
.....
....
...
..
.

答案係: 雪糕紅豆冰 (說"GO"紅豆兵)


題目4: 後來紅豆被攻打，點解啲紅豆唔郁?
.....
....
...
..
.

答案係: 紅豆味雪糕 (紅豆未說"GO")



同場加插左一個similar logic嘅IQ題，不過今次係估一首歌名...
題目 : 有乜野係唔可以擺係雪櫃入面?
.....
....
...
..
.

答案: 不能說的秘密 (不能"雪"的秘密)

************************************************************************************

雖然有啲無聊，但係我覺得好得意喎 =p

Another new toy

唔好誤會我學埋鋼琴，nononono.... 只不過係我太愛拉小提，但無奈小妹對音樂嘅認知有限，節拍同音準都唔掂。老師成日叫我拉之前，要先唸吓個音，唸完先拉出嚟喎.... 但問題係，我跟本對啲音無idea 喎... G, D, A, E 就話無問題，就咁係嗰四條上拉空弦就OK。但係如果你話叫我唸吓個F音，我我真係唸唔出囉... 老師話要記得個音喎，所以咪唸住買番個電子琴，得閒又記吓啲音囉，希望咁樣會對我嘅音準有啲幫助嘛。 上網見到哩款電子琴，嘅慳位，又ok價錢喎，所以就買左佢lu。

買到喇...

返左哩個團契大半年，但遲遲到未買到哩件團褸... 多得有交帶嘅組長Stephanie幫手，今日終於買到哩件有團訓嘅團褸喇~

最近嘅歌仔..

哩排都好忙，無乜時間去update個blog，又無乜時間錄歌仔.. 今次哩三首歌仔都比較短，所以可以一口氣錄晒，不過quality都係一般啦=p

我比較喜歡第1 同3首。第一首歌仔節奏輕快啲，我覺得中段部份幾得意... 至於第二首歌仔，中後部份要徘徊係第一把位同第三把位，比較難handle，始終都係未處理得好好。 而第三首歌仔係首慢歌，我覺得三首中比較好嘅一首，你見我拉到郁嚟郁去，就知我有俾感情落去拉啦~

後知後覺

仲以為自己可以抵得住Hello Kitty 嘅誘惑，唔再去換McDonald o果啲公仔啦... 到最後都係要買番隻kitty先安落，個事緣係...

近排又病，又工作超忙，做到悶悶地，每晚放工時落到地鐵站，總會經過McDonald 嘅hello kitty poster.. 每一次都都俾隻隻「御林軍kitty」attract住我嘅視線，次次睇完都覺得佢好鬼得意。 所以最後都係忍唔住，決定要買番隻「御林軍kitty」俾自己。

好可惜，當我有哩個決定嘅時候，其實隻kitty都巳經賣左好耐，因為自己屋企附近嘅McDonald 巳經無得換，自己又懶得去睇邊度仲有得賣，所以就去左yahoo auction 到bid。見到有1個post，個賣家request $45，其實見到時都唸住買架啦，因為我志在必得嘛。 不過好彩好又手痕再search過，點知今次俾我search到另一個賣家出價$35，所以我就幫襯呢個賣家lu..

經過今次，個事實証明，poster廣告係真係有一定嘅效用o架!! 如果唔係晚晚見到張poster，我唸我都唔會決定買隻kitty架喎...


**********************************************************************************
P.S. 當我話左件事俾Senior G 聽之後，佢深信我係買得貴左，佢話佢見到邊度平啲再話俾我知。我強調過叫佢唔駛咁做，就算俾佢見到，我都叫佢唔好話俾我知，因為既然我巳經買左喇，我唔想知道邊度仲有得買喇。

但我估唔到嘅係.. 佢真係走去搵，又俾佢搵到有McDonald仲有得換「御林軍kitty」。佢仲特登打電話話俾我知佢用$12買左.. 仲話佢幫我溝淡左... 不過佢指嘅係.. 佢溝淡左我個心，令我心淡啲咋!!!!! 真係俾佢激壞呀 >~<

白飯魚

日前秘書姐姐拎住對有水墨畫的白飯魚返公司，佢話係佢朋友去完大陸旅行送俾佢嘅。 我一睇到就覺得對白飯魚幾特別。

兩日後，秘書姐姐問我啲鞋嘅size喎... 原來佢朋友覺得啲白飯魚好靚，所以每個size 都買左一啲，而且仲係每對都有唔到theme，有又唔同鞋款。(有就咁穿上去的，亦有綁繩的)

秘書姐姐開頭拎左對"懶佬鞋"款，個theme係中國水墨畫feel 嘅俾我試，可惜我大腳八，唔啱著。秘書姐姐就話佢仲有另一對大啲嘅size，不過就係要綁繩，而個theme 係埃及。

當時我好疑惑，仲以為埃及feel會好怪。點知到對鞋攞到手時，我覺得佢好靚呀，我反而鍾意哩對埃及feel嘅多過山水畫添呀... 好happy，無啦啦多左對靚鞋著! ^^

黑仔..

今日好黑仔呀，一個人去雲吞麵舖食晏 ... 食完晒準備俾錢時，先發現個銀包冇錢冇身份証，連常用嘅信用咭(連AMT function)都冇帶呀!!!!!!!! (因為我漏晒佢地係屋企個舊銀包入面...) 個銀包淨係得其他credit cards 同埋一將bank a/c card(不過平時我唔係用哩將card 去ATM機提款，所以我唔知道密碼... ) 點算好呢?　我只好打電話搵人救命... 我第一個唸想counsellor.. 不過我亦都記得佢約左一位resign左嘅同事食飯.. 一定有好多野傾，所以唔想打擾佢他... 惟有再唸吓有邊個朋會係附近出現啦... 好快我又唸起舊同事朋友A，因為佢平時多數都會係附近食飯。 但係打俾佢竟然係: 「你所打嘅電話號碼暫時未能接通，請遲啲再打過嚟啦....」 打左三次都係咁樣... 真係唔知點算好...

唸左一陣，我決定打俾秘書姐姐，好可惜秘書姐姐又聽唔到電話響... 霎時間覺得自己冇乜朋友.. 係最無助嘅時候，又搵唔到人幫... 同一時間，雲吞麵老闆都行到我個位問: 「妹妹呀，你都食完好耐喎，你走未架? 」我惟有同老闆講我唔記得帶錢... 老闆立即話: 「哦~ 唔緊要，好少事啫，唔駛驚!!　我掛張單係出面counter，你去"禁"完錢再返嚟俾啦。」

老闆真係好，冇叫我交低啲乜野，就咁就放我出去.. 冇錯，我應該立即離開，讓番個位俾下一個顧客嘅，之不過我心裡唔知點算好啫.. 究竟我係咪返office 班錢再出過嚟還錢?????

我出左舖頭，正在猶豫之際，我先想起其實我可以拎住張Bank a/c card去銀行teller到排隊提款架... 雖然話係preferred banking.. 其實同normal a/c 無分別，條隊一樣係好長龍，排左好耐先排到我。 攞完錢，又要趕返去麵舖。點知去到麵舖，老闆巳經唔記認得我，仲問我要幾多個位... 俾完錢，個人先可以定番啲... 原先唸住快啲食完，有時間去做私人野... 點知搞完一大輪，返到公司都差唔多兩點，夠鐘開工lu..

唉，哩個故事都真係一個大教訓... 第日放假都係唔好換銀包，一係就要緊記放番好啲card 同錢!!!!

挑戰極限

今日去學人跳funky dance.. 對於我哩個一向手腳唔協調嘅人，去學咁富有節奏感嘅舞，真係挑戰緊自己嘅個人極限.... 嘻嘻，今次都係我第一次學跳舞，所以我覺得好鬼難。 我一開始梗係就巳經跟唔上人啦，咪就係人地個個都向左邊跳緊，但我先向右邊跳囉。

Funky dance 係mixture of jazz，aerobics 再加hip hop 嘅舞步，可以有好多變化... 其實又有啲似纖型22 果啲舞，運動量都好大... 我巳經係上beginner 嘅班，但係我都真係跟唔上，我真係唔識"un"身"un"勢，又唔識扭pat pat，最唔知點樣又擴又縮個chest.. 仲有泰國feel嘅"fing"身"fing"勢.. 雖然唔識跳，但都覺得好好玩，成堂舞都叫做enjoy嘅... 不過到最後休息嘅舒筋動作，個啲坐低後，個背脊要登到直一直，然後提起雙腳上半空嘅post.. 就係我最唔得嘅動作，因為我唔夠力hold住... 做做吓，真係做唔到，個人去左發夢... 老師係塊鏡到提示我要提起雙腳，但我真係提唔起，自我放棄左.. =p

我哩啲一係好日都唔做運動，一嚟就玩啲咁激嘅運動，恐怕聽日一定會好難捱，一定周身骨痛.. 我瞓上格床架，我好驚聽日痛到落唔到床呀...

新歌仔再度登場

最近學緊二把位.. 以下新歌仔有部份需要又一把位轉去二把位，然後再去一把位.. 哩啲一，二把位交叉嘅技巧真係好難掌握。 顧得手勢，又唔顧得落點，顧住落點，拇指又用力過度，影響到其他嘅音準，所以轉親把位唔係flat 左就係sharp左，好少拉得準... 就算係一把位去二把位落得準，返去一把位時又會flat左.. =p 不過見自己都係初學轉把位，就當自己過關先lu...

My new toy

好開心呀... 多謝Doris introduce 哩個小玩意俾我，仲陪埋我去買添。 哩個小玩意係用nanoblock 砌出嚟，即mini 版嘅Legos。成個小提琴都係約11cm高咋，都好別緻喎...

你咪睇佢咁細個呀，都要成$88架!! 小妹都係用左半個鐘就砌好喇，計番條數，其實哩個小玩意都唔平，不過勝在砌出嚟個像真度都算高嘛 ^.^

Reconnect

" I'm Jaerok and I'm still alive!!!!"...

好開心呀... 今日終於等到佢嘅回覆喇.... 其實我真係以為我地巳經失去聯絡o架... Jaerok 係我係2001年AA年代係Penang trainig 時認識嘅韓國同事。 當時我地交換左personal email，training 完畢後大家都有keep 住 email，雖然唔係好頻密，但係都叫做keep住兩，三個月一個email。 後來02年Enron事件，AA 要被迫同其他big 4 合併， 當年AA Seoul office 係同Deliotte Seoul office 合併嘅。 合併之後，Jaerok 講係公司check 唔到hotmail，所以佢轉用deliotte email 同我聯絡。

07年Jaerok 更second 到美國office，但佢都係keep 住用deliotte email。之後我地各有各忙，email 次數開始少lu.. 差唔多半年先一次，而對上一次收到Jaerok嘅email，巳經係08年12月。直到09年9月，我見大家好耐沒contact，咪send 個email 俾佢，點知我收到delivery failure 嘅notice，相信佢離開左deliotte。我跟手send email 去佢personal email，但係一直都冇回音。

十個月後嘅今日，我終於收到佢嘅email，真係好開心呀，足足相隔19個月，我地再次connect番，失而復得嘅感覺真叫我感恩。

Bouree

今次首歌仔比較長，拉完又拉，都係唔可以一氣呵成，總係中段會有甩漏，所以我惟有刪剪吓... 雙音部份都算OK，cord 係新學嘅，要好快咁連續拉兩個唔同嘅雙音... 初初拉cord時，拉弓角度控制得唔好，又或都過大力嘅話，啲廝殺聲可以好恐怖。 雖然我仲未可以一次過拉好哩首歌，但係都巳經俾自己pass lu... ^.^

Gabby

今日同Gabby過左一個好開心嘅下午.. 講起都有嘅唔好意思... 今次都只係我第二次探Gabby 同 Ada.. 唔經唔覺，Gabby都巳經成歲半人仔喇。個樣得意唔駛多講啦，佢同好乖巧。 睇唔出佢哩個人仔，可以咁好駛好用!!! Ada 媽媽叫佢攞乜野玩具，佢又識去攞出嚟同我玩。叫佢攞故事書，佢又知道邊本打邊本。玩完玩具，叫佢收好啲玩具，佢又識擺番好啲玩具，仲要擺得好整齊添。我好睇得出Ada 哩個全職媽咪，係擺左好多心機去教Gabby，真係好impressive，亦戳Ada 高興呀 ^.^

絲襪婆婆

今日賣絲襪俾我嘅婆婆係個開心快活人.. 好active咁介紹啲絲襪俾我.. 所以我都好快就決定同佢成交..

J: 哩啲幾錢一對呀?
婆婆: 18蚊
J: 咁我就要晒哩三對啦...
婆婆: 你三對夠唔夠架?
J: 買住三對試吓好唔好著先
婆婆: 好吖，你買三對先，我收你50蚊啦.. 試左好著，再返嚟買過!!

我俾左將100蚊婆婆.. 婆婆竟然拎住三張20蚊找俾我

J: 咁係咪收得我40蚊囉???
婆婆: 唔係.. 我收你50呀!!
J: 但你手上面係60蚊喎..
婆婆: 唔係.. 嗱, 哩到40 (佢指住兩張滙豐20蚊)，哩張青色嘅係10蚊嘛 (佢指住張渣打20蚊)
J: 但佢係20蚊喎....
婆婆: 唔係喎...
J: 佢寫住係20蚊架!!

婆婆再睇多兩眼先信係20蚊.. 跟住係佢個錢袋搵到另一張50蚊找俾我...

婆婆: 係喎，真係老眼昏花.. 嘻嘻.. 真係唔該晒你呀!!

哩位婆婆傻更更咁，但係笑容滿面，好可愛~

父親節快樂!!

今日一早起身呀，因為父親大人今日係伊館耍太極!! 其實爸爸學左唔係好耐架咋，不過因為今次係籌款活動，團隊捐夠某amount 就可以出場表演。

媽咪今日都好開心呀.. 佢仲好沾沾自喜咁讚自己叫阿爸去學太極係做得好啱，因為咁樣可以幫阿爸培養一個健康嘅興趣同埋運動，最重要嘅係幫佢建立個networking 喎..

媽咪的確係精明。阿爸而家多左一班"極友"，可以一耍太極，有時仲一齊去參加某某一日遊，不知幾咁happy ^.^

支持

今日同媽媽報告明日返教會嘅schedule.. 因為聽日係初信栽培班嘅畢業禮，所以會晏啲先返到屋企.. 我同媽咪提及我會係七月會參加浸禮班.. 媽咪第一個反應係.. :「咁你受浸時，記得叫埋我去睇喎。」 我話:「但係會係夜晚舉行喎... 你得閒去咩?」 媽咪竟然好爽快咁話:「咪照去囉，到時叫亞哥佢地自己出街食飯，我當晚唔煮飯咪得囉!!!」 我真係估唔到媽咪會咁支持架.. 好開心呀!!!

Cooking with cellmates

今日同班cellmate一齊整餅，玩得好開心呀... 多謝阿影嘅老闆借出佢公司嘅小廚房俾我地玩.. 又感謝Terence大佬犠牲佢溫習嘅時間嚟教(幫)我地整cookies，朱古力rocky road，同埋banana muffin。

哈，我地上到個廚房先發現啲用具唔夠同埋我地又買漏左食材，要分兩隊人去買.. 因為我同康怡去左買用具，miss 左做 rocky road 嘅示範...





<------
雖然無份整，但都有得食，嘻嘻 =p
哩個rocky road有麥提莎朱古力，有cheery，又有棉花糖架... 不過呢，啲男仕就嫌佢甜得滯喎，但我就覺得好好食喎 ^.^




個個都有份出力磋麵粉架... 之前仲有個step就係要揼碎啲nuts 同 almonds.. 大家都唸起王祖男o果句:「我有小小想摏佢!」

磋左好一陣子，終於可以去mould cookies 喇，大家都好努力設計自己嘅cookies...

















*************************************************************
以下就係我做嘅音符cookies 同 心心cookies，仲有一個又靚，又好味嘅banana muffin...

身在Mumbai (下)

Day 3

今早返office 前巳經做埋庮店check out，又將行埋寄存係front desk.. 唸住去我地去開嘅餐廳食早餐。一出lift，就有酒店職員截住我地。原來今日有全新嘅餐廳開將，以後嘅早餐都係係o果度serve.. 其實啲早餐都係差唔多，不過環境再好啲啦，啲生果放晒係雪櫃，再冇flies 飛嚟飛去。

食過早餐就返office lu.. 但係同事仍然未好番，無返工，電話又唔通.... 惟有同另一個同事做 wrap up.. 直到下晏三點幾，抱病在身嘅同事終於返嚟喇... 老細終可以同佢傾issues.. 今日係我地嘅 last stay，都搞到成七點半先放工.. 同事就車我同老細去佢屋企探佢個b女。

同bb玩完，我地又睇吓同事新婚video，好長呀，九成嘅片都係影住啲新友跳舞，得好少部份嘅儀式。睇睇吓我都開始覺得攰... 因為睇到差唔多成十點(即香港時間零晨十二點半喇...)，同事又好好客地留我地係佢屋企食飯... 之後就送我地返酒店。

趕到返酒店都十一點半.. 我同老細都用飛快嘅速度領回行李，然後再衝去將會係十二點close 嘅gym room 沖涼... 梳洗完，我地十一點五十二分離開gym room... =p 之後同老細去左個bar飲杯野，坐到十二點半就出發去機場。

去到機場個lounge 好多人，成個canteen 咁，好唔容易先搵到兩個位坐.. 等到兩點半先有得上機。但因為天氣關係，班機delay左二十幾分鐘先開得。 Delay嘅期間，我巳經睡著lu.. 返到香港都巳經係下晏嘅一點幾lu。

身在Mumbai..

終於一嘗business trip 嘅滋味喇.. 原來都唔係好特別咋喎... 唯一好嘅係可以免費搭下buisness class 同埋用下人地嘅lounge... 原來飛長途搭business class 真係好好架.. 獨立坐位自成一閣，又可以打橫瞓覺，對腳唔駛屈住屈住。 唯一唔好嘅就係太近啲空姐，佢地好多野偈，講個不停...

落機嘅時候巳經係當地零晨二點幾，周圍都黑晒。 沿路都幾荒蕪，地方好大，周圍都起緊新building，但係規劃好散落... 靚嘅building 多數都係酒店或商業大樓。 其餘嘅係一大排兩層高，但又好殘舊嘅房子。

Day 1

除左係第一次搭business class，第一次踏足印度。今次亦係第一次自己一個人住酒店。今次住GRAND HYATT，間房好大，張床都算舒服。 酒店入面環境唔錯架，好大好靚。 我地食早餐嘅餐廳有露天嘅area，所以不時有啲flies 飛嚟飛去，大殺風景。 我地Mumbai office 正正係我住嘅酒店對面，只要過一條馬路就到，都好方便。 不過因為我地唔近city，所以除左酒店同我地橦office之外，其實附近係乜都無..

Lunch time嘅時候，同事帶左我地去一間位於較近city嘅酒店 (TRIDENT)，唔駛講，梗係食印度咖哩啦.. 我同老細share 左咖哩雞同咖哩魚 (recommended by waiter, as they are less spicy) ，兩款咖哩都好唔同味，兩款味道都好ok 喎!!! 不過我唔記得試吓佢地嘅"簿餅"，叫左白飯。佢地嘅白飯係一粒粒架，硬硬地，唔似得我地食開o果啲咁軟，咁有黏性架..

食完晏返公司途中，見到唔少好破舊嘅鐵皮屋，似係地舖，但又似係民居，因為我見到屋外吊起好多衣服晒涼.. 周圍嘅環境好差，好多垃圾，好污穢.. 見到佢地居住嘅環境，真係覺得自己好幸福。 同時記起以前舊公司個manager 都曾經到過 Mumbai 工幹，佢話去完之後個人好心嗡.. 佢話遇到一大群小朋友向佢乞錢，知道佢地好窮，但又唔可以俾錢佢地，因為佢唔俾得幾多個.. 我而家想像到佢有幾心嗡...

因為四周比較荒蕪，所以放工後，我同老細都係直接過對面馬路返酒店.. 本來都想食吓中餐，但係睇完個menu之後，發現佢實在太overcharge.. 一個點心要成Rs550 (差唔多HKD 110)，一碟子菜又要差唔多HKD 2-300.. 係印度食咁貴，真係好唔值.. 同埋，啲chinese food 一定唔會特別好味... 最後我地都係食西餐，因為價錢"比較"reasonable..


Day 2

照舊係酒店食完早餐就過對面馬路返工... 今日行程比較緊密，要去兩個site 開會。 雖然兩個site 離我地個office 唔算遠，但又可以話係walking distance.. 不過一般嘅cap 都嫌路程短而拒載.. 所以我地要坐auto .. 啲auto 都幾兒嬉，似係有摩打嘅人力車，有上蓋但無window，司機嘅driving manner 好以忙命小巴咁.. 好彩唔係成日要搭佢地，同埋都算係短途，所以都尚可以接受 =p

今日lunch 係staff cantee 食，個staff canteen 只servce vegetarian.. 今日又試左三味咖哩.. 印度咖哩真係無樣睇.. 個樣紅卜卜，似係好spicy的，食落又唔係真係好辣咋喎.. 但係個樣正正常常，好似tomato soup咁，佢又竟然係辣辣地喎.. 同事好細心，怕我地食唔慣啲咖哩餐，別外order左cheese sandwiches 俾我地.. 個cheese sandwiches 其實似係toast.. 又估唔到佢出奇地好味喎!!!

原定今晚放工後去同事屋企探吓佢個new born baby.. 好可惜，同事噚晚開始發燒，今日都無返工.. 希望佢今日好好休息，聽日身體好番啲，我地可以去打搞佢啦..

變了..

話咁快，仲有唔夠一個禮拜，我就向印度出發喇... 之前都有期待過嘅，但而家又好以無乜感覺咁... 直到而家，我乜都未執，又未買野，連有咩要帶過去，我都無唸過，亦未有打算開始... 而且我係下星期一夜機出發，我心中只顧住放工後耍返屋企沖涼之後就去機場.. 但我無去思考過返屋企後再出機場會有幾趕...

小出門經驗嘅我，平時去親旅行都好大陣象，一定係"一早"就開始預備同執篋架... "一早"即係個幾禮拜前... 估唔到今次我竟然變得咁懶懶閒.. 不過我打算點都會係星期五開始執野嘅.. 如果真係有野要買，我都仲可以有個weekend 去買嘛..

心情大靚~

因為忍左成年，終於忍唔住，買左個新violin case.. 個case 係就係貴左啲，差唔多三千大元，但係真係好靚，好輕身，同埋好好揹呀!!! Doris 同老師都話個case好好用，防潮袋都可以用少啲喎！！　　

其實我好耐之前係睇中左個紫紅色，不過今日巳經無得買lu。 唔.. 失望係有少少嘅，不過只係好輕微咋喎，因為我都好鍾意呢個棕色，夠grand 嘛，越睇越鍾意佢呀...

除左新case，我仲換埋個chin rest.. 部琴本身個chin rest 唔fit 我，搞到我夾到個下巴損晒。其實一早就應該換左佢，唔駛搞到個下巴花晒嘛... 今日換左個新嘅，真係好夾好多喎，希望以後唔駛夾到個下巴損晒啦。

仲有兩個禮拜..

唔經唔覺，仲有兩個禮拜就去印度喇... 因為之前cancel 左好多次，三月老細話六月去印度時，

雖然秘書都有幫我地訂機票同book 酒店，個心都仲係半信半疑，覺得都係得個講字。不過今次連visa都出埋lu... 仲有呀，大老闆訪港嘅時，老細都有同佢提及六月去印度。 我諗今次都幾firm架喇...

朋友們知道我去印度出trip 嘅時候，多數係好興奮咁，第一時間問我會唔會stay behind 玩... 個個都話好想去印度玩... 其實我今次去印度，純粹for business，只會係office同酒店出沒架咋!!! 最多會去其中一個同事屋企探吓佢個new born baby。 不過搞笑嘅係，所有朋友都俾左同一個advice 我，就係"只可以飲bottled water!!!" 多謝您地嘅提點呀，我會記住架喇~

小可愛~

之前幾次探bb Chris，佢都係熟睡當中，今次好好把握好時機，係佢好精神嘅時候去探佢。好開心呀，終於可以同bb玩喇!~ 佢真係好得意呀, 又好留心咁望住我架.. 但係呢，同係玩玩吓，傾傾吓偈嘅時候，佢對圓碌碌，又精靈嘅眼仔，慢慢地變成得番一條線，跟住就瞓著左lu... 佢瞓著左都好可愛架，個咀仔"郁郁"吓。 bb Chris，你咁得意，我好快又嚟同你玩呀吓~

宅女

之前我嘅schedule排得太密喇，個人真係好攰。學日文又冇時間去溫習，做功課，所以都係要停一停先。留番啲時間去練琴，去church返栽培班，返團契同崇拜。又因為正在睇脊醫，所以我又連yoga都停埋。所以除外返工，學琴同返church，其他時間都係係屋企練琴同睇碟。其實我都係少出街，少睇電視啫，某某朋友竟然話我嘅生活同宅女一樣.. "宅女"哩個名稱好負面，唔係好啱我喎，最多咪係深居簡出...

新舊歌仔..

剛學成首Simple gift ，好叻呀，老師有讚我拉得幾好架.. 佢話真係幾好喎.. 同埋今次係好罕有，我拉完佢無話要執吓邊到架.. ^.^



不過呢，至於首學到我好moody嘅嘉禾舞曲呢... 學左都成個月喇，但係拉俾老師聽完之後，老師沉默左一吓，先再俾comment.. 都係因為我真係拉唔出輕快嘅，跳躍嘅神緒囉.. 聽到老師好灰... 哈哈... 我都唔想架，係屋企練左好耐喇，真係拉嚟拉去都拉唔到老師嘅要求..

拉得悶悶地，我又搵番一首以前拉過嘅歌仔拉吓，(又係嘉禾舞曲) ，雖然未係拉到好好聽，但比係以前，都叫做有好大進步喎..

好番好多喇

自上年十一月三十號夾親嘅手指尾，一直都瘀左，足足有五個幾月。其間有唔少人見到都想問我做乜油指甲只油隻尾指??

早幾日瞓醒覺，覺得隻手指尾有少少痛，無特別為意佢.. 後嚟先發現原來佢想脫甲，剪左啲廢甲後，望落去好番好多lu，真係好喇~

Old Study

哩首study 其實係一年多前學架喇，當時剛剛學拉小提無耐，拉得好差，拉到打晒結，又有好多撕殺聲。就算而家拉都唔係拉得好好，但係比一年多前，真係進步唔少，起碼唔再打結，有番啲音聲，又叫做有番啲節奏。

又係嘉禾舞曲

哩排學緊嘅兩首歌仔，一首係Aria，另一首係Gavotte..

首Aria 係一首比較簡短嘅慢歌仔.. 不過老師略嫌我嘅節拍唔夠準喎..

至於以下哩首嘉禾舞曲呢.. 我之前都講過係我比較喜歡嘅一類歌仔... 其實哩首歌仔我較早期學過架喇... 咪就係搞到我好moody，學到喊出嚟嗰首囉... 不過原來我之前學嘅係簡單嘅version，今次學番個full version，有埋2nd movement... 哈，學左咁耐，我仍然未可以好好handle呢首歌仔添.. 好似初學簡單個version時拉得好少少..

得寸進尺

今晚搭地鐡嘅時候，明明好地地得我一捉住條扶手，跟住就有位師奶行埋嚟，先扶住同一條扶手，跟住就打側"埃"住扶手... "埃"埋嚟嘅時候，佢巳經擲住我隻手，我惟有將我隻手往下移，扶底啲啦。 無幾耐，佢又轉post，成個身"埃"晒個扶手，又好大力壓住我隻手.. 我當時好唔鍾意，所以立即推開佢同埋用一把好firm嘅聲同佢講: 「睇住吖，唔該!!」 佢毫無歉意(其實預左)，只係好唔順氣咁企番好啲，用佢隻手去捉住扶手。

我真實好討厭啲人搭公共交通工具時，十分自私嘅行徑.. 扶手係俾人扶，唔係俾人"埃"架。 架車好空嘅時候，你鍾意點"埃"都得，有其他人用緊嘅時候，就要有公德先得甘嘛。

又夾手喇~

今日lunch time 去左上seminar，人地個office 嘅lift掣係lift lobby 出面，要拑左你要去嘅層數，佢assign你去搭部 lift... 咁我咪去assigned 嘅 lift 等囉.. lift 門一開，入面兩位美女十分滋油，遲遲到唔出嚟，等佢地出晒，我一開始入lift，lift 門就開始關... 出面又無掣可以拑.. 就係咁，我又夾到手喇...

上完seminar，返到公司話畀秘書姐姐聽，秘書姐姐問我點解我成日夾手? 其實我都唔想夾到架喎... U_U

G Minor

以下係近期學左嘅新歌仔同練習... 雖然拉得唔算好好，但係老師都話我音色上有好大進步喎。 而我自己都覺得拉得叫唔錯，因為拉弓比初學嘅時候，叫做拉直左好多架喇.. 我會繼續努力!!!

大豐收(二)

真係無諗過會收到咁多禮物架.. 份份都好靚，份份都好鍾意。我嘅家人，朋友實在太錫我喇... 我知道我好幸福哦 ^.^

BB Chris (again~)

BB Chris 真係得意呀... 啱啱先得個零月人仔，就巳經有九磅幾，勁!! Keep it up 呀!!!

不過次次探佢都撞正小寶寶嘅sleeping time，未有機會同佢玩，不過今次可以親手抱吓佢，都好開心呀... 其實唔係好捨得放低佢，不過因為仲有其他朋友仔一齊探佢，要輪住抱吓.. 嘻嘻..

BB Chris，姐姐會再嚟抱你架，你到時醒神啲呀吓!!!

大豐收

估唔到未到生日週就巳經收到唔少生日禮物喎... 先有不同品牌嘅化粧品公司寄出嘅生日greetings同coupons，跟住就有各好友送上祝福同禮物，今年嘅生日可謂我嘅大豐收日。

噚日就收到好友積奇蓮嘅禮物呀.. 真係好意外咁早收到佢份禮。 份禮物主要係隻好得意嘅大象書鎮。但係我更鍾意搭單嘅維他奶呀!!! 因為佢係印住happy birthday架.. 好搞鬼，好啱駛呀。 原先積奇蓮都無寫到 To 邊個同埋 From 邊個嘅... 但我見到哩盒啱晒主題嘅維他奶，我就堅持要佢寫俾我留念。不過我未唸好點樣收藏佢，究竟原封不動好吖，定還是飲左佢先，洗好先收藏好... 好彩有排未到期，仲有好多時間去唸清楚 =p

今日同counsellor食lunch，我竟然收到哩條項鍊... 其實早前自己都想買個十字架項鍊，不過只係得個"諗"字，一直都未有選購嘅行動，哩份禮物都算得係及時雨。

我真係好鍾意哩條項鍊架... 佢嘅design好特別，好靚唔在講，但最重要嘅係個十字架對於我有另一個更特別嘅意義 -- the love of Jesus。

同一晚，約左Amanda ，Wincy，阿Wing 同Daphne 食飯。我一心唸住gathering 架咋，我冇唸過佢地個個都帶份禮物送俾我。我知道份份禮物都各具心思，我好感受到大家對我嘅心意，所以好感恩。