復出

都有好一段時間無update 個blog喇...   唔係太忙無時間，就係太攰想早啲抖，一係就病左或無心情寫...  有唸過唔再update...   但寫左咁多年又唔係好捨得...    唔想寫就upload下我學緊嘅新歌仔先啦...   好過乜都唔post 嘛....  

 

我希望……

我嘅免疫系統快啲回復正常就好喇。我巳經食左成個月類固醇，醫生都減藥，以為好快唔駛睇醫生。點知減完藥就翻發，仲要散至全身紅疹，夜晚成日痕醒，要起身敷冰袋止痕。

而且我就快去旅行喇，我一定要快啲好番呀！

緊張

唔係錄嘅時候拉得穩陣啲架喎...  一到錄時，就變得好緊張，成日出錯添... 真係無計呀...   哩首歌仔都頗長，拉到手指頭都好痛喇...  所以算數喇...

江南小調

今次拉下中式啲嘅音樂..  感覺都幾得意....

 

鬆口氣

雖然上次個醫生係好貴，但佢真係有較地控制到我皮膚嘅情況...  食左六日藥，啲瘀色都泿左好多喇...  見個情況有所改善，個心都開番啲呀...   真係好多謝大家之前對我嘅問候同埋代禱啊!!!

今日睇埋報告，醫生話唔係系統性紅斑狼，最多都係較輕微嘅皮膚性紅斑。繼續食下類固醇，然後慢慢減濟量。預計至少食一個月藥...  但我好希望唔駛食咁耐... 因為個醫生真係好貴...  U_U

再o嚟 Sanota

今次係第三個movement..  節奏較輕快，拉下佢，個心情都靚啲....   雖然中間拉錯唔少，又走吓音... 後段又有啲迷惘，不過我唔打算再錄過喎..  >~<

I can't believe...

these are my legs and arm....  

睇左皮膚科，但未有好轉，仲越嚟越勁，越嚟越深色...   驗血報告話我Anti Nuclear Anitbody指數超高...  醫生懷疑係紅斑狼瘡，所以急急轉介我睇風濕專科...    雖然醫生提過會貴啲...  我都預左要俾多啲錢...  但估唔到一個consultation 加blood test 要收我三千大元.... 

不過慶幸食過哩個貴醫生啲藥後，啲深紫色開始變返紅色...   不過仲要等下星期先有個詳細血液報告，睇吓到時醫生點睇...  希望唔係紅斑狼瘡，而且可以快啲更治啦!!!

管弦樂團B組

好開心，今星期日完成了管弦樂團B組第一次獻奏。雖然第一次合作，仲有係早上第一，二堂崇拜獻奏，但係大家都幾好狀態喎..  真係非常感恩呀!!!   雖然要等到十二月管弦樂團先至再一次獻奏，但我巳經好期待下次嘅練習lu..  大家努力，加油呀，我地要將最好的獻上!!!  

家有惡虱

好慘呀，我俾佢地咬呀...  手手腳腳都有，粒粒都好大舊，又紅又腫又痕...  滅虱蛋都用埋，但都係日日有新患...  搽乜都痕...  一抓就出事... 因為抓完更痕，更腫更紅...      夠喇夠喇，可唔可以唔好再咬我呀??

Sonata

新歌仔又嚟喇...  而家學嘅study或歌仔都難左好多...   study非常棘手，難到我都唔想拉...  所以我只係focus拉歌仔...  首歌都係靠上網聽好多似，聽熟個旋律先識得點拉咋...  =p 

 

Retail therapy

近排工作忙，壓力大，做極都唔完。加上同事有事要放假，工作量仲多左....  好似身在大海， 好努力游近岸，但未游到岸又被大浪沖回大海中央。一味得個做字!!! 所以開始無乜心機。本來無mood，拉下琴會心情靚啲。不過近期阿媽唔鍾意我成日得小提琴， 所以又有啲顧忌， 唔可以成日拉琴。所以又開始用retail therapy...

 

其實我睇中左個袋都一排, 之前問完價錢就忍手唔買，但最後都係買左。不過今次問價又貴左..  多口問sales姐姐搭訕，話佢知我之前問平啲..  其實我唔expect 佢會有回應... 但佢竟然話如果我想買，左幫我問下老闆可唔可以平啲賣比我...   佢打電話問完一輪，又真係可以平啲喎..  而且仲要係平過我之前問過嘅價... 所以我就買左佢喇...  買完野，心情尚算靚番啲啦..  =)   

1. 
   

轉口風

年頭老師明明講過: "邊個話你今年考得試架?"
今個星期上堂，老師竟然話唔知點解唔問我今年考唔考試....  
到我話出年先考Grade 5 時，老師又想說服我今年先考樂理，出年考Grade 6.. 
老師話我今年考得Grade 5, 而家等出年先考，好似唔抵喎...  

但我覺得個Grade 5 都有啲吃力...  點去考Grade 6 呢?   而且我對樂理好有保留...  我真係唔相信我攪得佢掂...  還是target 出年考Grade 5..  考到之後先再唸樂理啦... 

所以都係尊心練下而家學緊嘅歌仔先...   學左兩堂，拉成咁都算係咁啦...  =p

不過呢... 雖然決定唔考Grade 6 住，但我又去左search 下Grade 6 嘅考試歌嚟聽...  比我發現上次買琴盒時，個小朋友拉得好勁果首歌仔原來就係Grade 6 嘅考試歌嚟架...  哈哈..我都算做拉過下佢喎!!!

先生

今日獻奏完畢， 同弦B成員嘆過靚茶，下晝返教會繼續管弦B練習。 等緊其他成員到時，發生以下對話。

B: Janet, 你個先生叫乜名話?
(因為頭先飲茶時我同阿波講開學琴的事...)
當我正想答嘅時候
M 立即放低所有東西，捉住我並好驚訝咁...
M:吓，乜原來你有先生架嗱?
(其實佢應該知我有學開琴格...   好明顯佢會錯意....)
J:哈哈.. "老師"呀!!!
M:哦..係囉，無理由..你咁後生

睇嚟佢覺得我同佢一樣大，所以應該未結婚...
其實我大佢好多了..MayMay 真係好搞笑!

未練好..

第一次聽哩首歌仔時，我覺得它唔係太好聽。不過越學就越喜歡，越嚟越覺得好聽喎。 所以我都好俾心機學佢，不過下半部份就難左啲囉 (對於我)...  拉得唔係太順暢，雙音又做得唔太好...  事關我太心急想錄起佢，拉得唔好都唔take2 喇 >~<

如果學有所成，等遲啲有心機再錄過啦...

新歌仔again

上次去買新琴盒時，正正遇到一個小朋友揀新琴...  家長叫果個小朋友自己拉下個琴，試真啲，睇下買邊個...   小朋友就馬上拉左哩首歌仔...  當時我唔知哩首歌仔叫乜名，只知個小朋友好鬼勁，又有晒震音...   似表演多過試琴...    真係好鬼佩服果位小朋友..  好犀利。

跟住上堂我都立即話俾老師聽哩件事...  我啍番哩首歌俾老師聽，老師都笑了...  可知果位小朋友係真係"有料到"。不過老師都話:「唉，你遲啲都會學啦」  我以為老師氹我開心，誰不知我好快就學喎...

當然我同個小朋友嘅演出仲有好大段距離，我拉唔好震音，又拉得唔夠快.. 而且仲"滕滕雞雞"咁..  但係好開心學以拉下哩首歌..  希望遲啲可以拉得好佢啦!! 

新歌仔

學左都有成個月，不過因為好忙，唔係好多時間練習..   一如以往，音準同節拍都有待改善，中間又有少少甩甩咳咳，不過成5分幾6分鍾一take過喎，粗粗地收住貨先啦...  因為心急想練另一首歌仔喇... 

Angel

Wa ka ka... today I got 2 angel cakes within 3 hours!!

先是在final rehersal完左, 當我把握最後時間，正聚精會神地細讀琴譜時，詩歌敬拜組竟送上angel cake... 當時我真係好surprise!!  急忙收埋份譜，點知都係個file先試左個cake... 

 
食完蛋糕，間房終於ready。即刻入房再練琴...   練嘅時候都ok，不過到正式開始時，又再緊張起來，甩左少少，又走下音咁啦...     不過感恩成個敬拜rundown都好smooth...  算是過左去啦...

完左成個敬拜，到小組分享時間，我小組成員又好體貼咁送上另一個Angel cake..   組長話:  「佢咁嘅樣，你只會揀哩個蛋糕俾佢!!」  團長見到又係Angel cake就講笑話: 「正明你係我地心目中係天使囉!!!」

小小爆光，其實個天使蛋糕係枱角的... 

緊張

因為今個星期團契要幫手做司琴，我真係好緊張呀...   佢地叫我當平時弦B獻奏咪得曪...  但係真係唔同哩...  一來弦B我只係2nd Violin，多數拉拌奏，二來弦B係一班人一齊拉的...  今次係要我做1st violin，仲要係獨奏，真係好大壓力呀...

大家都知我節拍弱，又欠音準，另一姊妹會彈琴拌住我，不過佢好嚴緊，要我跟足份譜。開頭練習時，第一次見份譜 (仲要份譜好鬼檬查查)，姊妹成日stop我，因為我唔係個音唔準，就係節拍唔啱。  我當時真係好驚，好驚我當日拉唔嚟...   不過呀姊妹又好好，肯留底教我，又幫我練習左好耐。   如果唔係，我真係唔知點算呀!!

不過哩..  份譜始終係鋼琴譜，唔係小提琴譜，對我真係好難..    好在今個星期三我帶埋份譜學琴，又同老師講我有幾緊張..  老師好有心機幫我寫番啲弓法俾我..   又陪我練習，咁先似番首歌咋...   之前無弓法，真係拉得好鬼肉酸架!!!!

所以番到屋企，我都自行幫另一首要拉嘅歌仔加左啲弓法，拉起嚟有連貫性，好啲啲啦...   我而家要最後衝刺，努力練習..   聽日要拉好佢喇!!!

how do you know that...

I will have a wonderful birthday?? 

係呀，我相信我今年生日應該會好wonderful...  因為團契職員地邀請我幫手呀...  係下個週會"在黑暗中的敬拜"中幫手做司琴拉小提琴呀...   雖然佢地唔知係我生日，但我都好高興可以幫手，事關哩個週會好有意思。  

其實我都好驚我做唔嚟架...  我真係唔識拉架，又好擔心同埋好緊張架，不過見人地要幫手，咪膽粗粗答應囉...  希望快啲有樂譜俾我預備吓啦!!

New toy

因為電話約滿，可以轉台兼出機。今次學人join corporate plan，出左部Samsung Galaxy Note2。其實下個月先正式轉新台，但早兩日已經收到部新玩具喇。

有新機又要忙transfer contact list，歌仔呀，相呀等，仲要download 番啲 apps。跟住又忙personalize 啲settings，桌面，主題，字題，shortcut等，好多花款。不過由Apple 轉Samsung 始終要從新適應。開頭唔知點轉啲setting，要成日請教二哥。最後發現，好多時都係唔識搵個"home" button，哈哈!

而家set得七七八八，仲開始用新機添。開頭係有小小唔慣嘅，但用落都ok啦，同埋真係快啲架!  個screen夠大，打機時都爽啲呀 =D

發瘟@~@

今早要一早返教會為崇拜獻奏..   噚晚仲提組員要早啲休息，養好精神... 可惜自己過度緊張，成晚瞓唔著..  碌嚟碌去都瞓唔到...  結果今早唔知醒起身..   要用9秒9時間出門及飛返教會。 上左的士，開左車一陣，的士司機先同我講佢只係"渣九龍"，唔熟對面海喎，叫我帶路...   我話我唔識路，佢就話車我去到隧道口後，我自己轉車喎...   我聽唔明佢講乜，叫佢講清楚，佢就寸寸的話:「你一陣轉搭"香港的"呀...  你未試過咩? 」  我答: 「未試過喎..」  佢就話: 「未試咪而家試吓囉!!」  我唔liky 佢回應嘅態度，所以我影底左佢張license。佢就舞龍咁飛車..  車到我去紅磡嘅的士站..   我之前再轉的士...    雖然車費貴左，不過我可以早啲返到教會作最後練習。

不過指揮話個rundown有小小變動，大家急急地練個新flow..  所以大家都好緊張..  結果我地個別人員都發台瘟，係第一，二堂嘅獻奏都稍有出錯..   又再吸收多一次發瘟嘅經驗，希望下次唔好再番發就好喇... 

因為今早表現唔理常，返到屋企瞓覺都發起夢要起身獻奏..   瞓醒後心情都唔係好好，所以搵番啲初期學拉琴，淺啲嘅歌仔出嚟拉下.. 等自己滿足吓...  雖然而都未係拉到好好悅耳，但同以前初學時相比，應該係拉得順耳左嘅   =)

決定左..

今年唔考小提琴試，都係出年先考喇。因為覺得自己未ready去考呀，雖然老師話年底考應該可以的，但我唔想推牛上樹，夾硬谷的話，會有負面影響。

而家跟兩位老師學琴，一個星期上兩次堂，原來都幾吃力。開始唔夠時間練琴，因為顧得掂一個老師俾嘅練習，又顧唔到另一個嘅練習，變左兩邊都係"半桶水"。而且跟兩個老師學習，有時都有conflicts, 好似拉scale咁，點拉個D同E音都有唔同.. A老師要求我上行按四手指，下行先用空弦。但B老師就要我上行用空弦，下行先用四手指。 我惟有採取兩頭蛇態度，上邊個老師堂，就用邊個老師教嘅方法。

但跟唔同老師學琴，會有唔同得著。好以啱啱嗰堂︳我叫B老師拉下我個琴，B老師唔肯，佢以為我潤佢『咁叻，你嚟拉喇』。但其實我真係無哩個意思，我純粹想聽下由B老師操刀之下，我個小提琴應有嘅音色係點啫。 好在叫多幾次，B老師終於肯拉我個小提琴。但佢拉完就好奇怪，好以有難言之忍咁...  唔通我個琴有問題????    老師唸左一陣，終於組織得出佢發現到乜野喇，原來佢覺得我個琴比一般幼細，個碼仔比較矮，弦線比較近紙板，而我支好貴嘅弓又好輕，所以如果用平時嘅力去拉，會影響琴嘅發音喎。跟住我一路拉琴，B老師從旁「執」我嘅姿勢同動作，而我拉出嚟嘅音色真係好左好多呀！可惜只限於老師出手先係咁，當我自己拉又拉唔番咁好嘅音聲。所以我仍要好好摸索一下，希望老師「執」多幾次我嘅姿勢後，我自己可以掌握好個技巧就好喇!!       Janet 呀，你要加油!!!!  如果唔係，出年都知考得試未呀!!!!

加油!

早排天氣潮濕，我問媽咪知唔知幾時會乾啲，因為我相幫啲油畫加油!!  (保上光油保護吓佢地)。 今日放假，只顧住練琴。好在媽咪醒目，見天氣好就提我幫我啲油畫加光油...   所以我"喳喳淋"拆啲畫落嚟，一一幫佢地加油，而且啲油好快都乾啦!! 

忙忙忙

踏入二零一三年，工作一直都好忙碌...  尤其係踏入二月份，成日都有"大件事"發生，花晒啲時間去resolve issues...   個outstanding list 就繼續outstanding 落去，而且item lists有增無減...   成日想清吓個list，但總有其他ad hoc 野要先處理..  心急的我，係好唔鍾意有太多outstanding 野pend住係度...   無奈我真係無辦法..      

工作忙，小提琴嘅學習都唔少...   因為我今年搵多左個老師...  所以一個星期學兩日琴..   原意係想多方面學習，多個老師會有唔同教法，應該會有多啲進步。   不過我開始覺得有小小overload..   因為兩個老師都有唔少野比我練，加埋敎會活動，我唔係好夠時間去練習。

雖然預計嚟緊都好忙..  但見到心怡嘅主日學，我第一時間報左名...   之前考慮報唔報領袖訓練，噚日fellowship同cellmate傾開，大家都有意報，我見有人陪，所以一齊搵埋牧師簽名，交埋表格lu...  我相信神會看顧及供應的!!

我的生日kitty

終於俾我買到喇...  之前知道有得買時，我無第一時間去買...  因為當時我係日本買的生日kitty尚在人間....     但因為有次行完山唔見左佢之後，就醒起sanrio有出生日kitty...  一心唸住買番隻補數，點知間間舖頭都只賣緊其他月份 (七月份或之後的)...  就算有賣四月的，都唔係齊晒30日的..   所以後來我都於棄左再搵佢喇...

今日學完小提琴之後到返崇拜，中間有成兩個鐘空檔...  我就走左去太古城行下..   行到無野好行，"鍾"左入Sanrio "hea"吓啦..   估唔到有意外收穫，所以我第一時間買左佢，然後開開心心咁返崇拜^^

病!!!!!

自四川返港後一直生病...   無論係頸痛定感冒，都纏繞住我...     頸痛試了針灸，可惜針灸後仲多左痛楚，而且引起肌肉發炎..   最終都係要重投西醫嘅懷抱，一共四粒消炎止痛丸就好了好多..   好感恩我條頸終於好番晒，可以活動自如，拉小提琴都無問題喇!!

不過呢...   我個呼吸系統就唔係幾好...   先係喉嚨痕，咳，跟住就鼻塞，塞完又咳...  睇左好多次醫生，食藥食到個人生乾精... 好麻煩...   之先咳得好犀利，真係咳唔停，而家好左好多..  不過都未斷尾..   仲有小小鼻水添...    真係好想快啲好番晒呀...   健康真係好重要架!!!  

不一樣的聖誕假期

我嘅團契導師曾經敎導我們做基督徒的，就要走出自己嘅comfort zone，奉召被差出去為神作工。當時我覺得導師嘅訓勉好有意思，但係好有難度，因為我一向習慣"不變"，好喜歡安穩。但我沒有忘記導師嘅訓勉，在聖靈不斷感動和帶領下，我決定在今年聖誔假期走出我嘅comfort zone。最初，我只打算參加聖誕醫院報佳音/佈道等活動。其後我看到崇拜週刊召募四川聖誕服待隊，無論行程日期和所要求的五次籌備會日期我都得閒，所以我決定參加是次服待隊了。

其實由決定參加，找導師做推薦人，到遞交表格，我並沒有特別考慮到當地嘅環境，氣溫，衞生情況等，但許多知道我參加是次服待嘅朋友反而比我顧慮多。他們個個都送上善意嘅提點，提醒我當地食物會好辣 (我是怕辣的)，天氣寒冷，住宿環境差等等。  有姊妹剛去完雲南服待，深深體會當地嘅環境，得知我沒有作詳細考慮就參加中國服待，冷笑地祝我好運。 她嘅反應確實令有我點擔心，不過這擔心只維持遍刻。因為我對神有信心，我深信神必看顧我們願意付出服待別人的。慶幸我能夠信心嘅擺上，若當時我打退堂鼓的話，可真錯失了這又難忘又珍貴及豐富的經歷和學習了。

這九日行程，每日都是七時起床梳洗，七點四十五分開始集體靈修，分享所領受的，briefing當日活動行程後一起食早餐，出發活動。每天晚飯後又要debriefing，每晚十一，二點先有可以休息。 是次行程比我預期的緊密，預備功夫也比想像中多。雖然行程好密集，但說不上好辛苦。相反，大家都是滿有喜樂的默默付出。

是次服待有好多學習，無論是在早上靈修分享，定是晚上的debriefing，每一個活動預備工作，及活動過程，我都看見隊員的靈命興旺，願意付出，好有承擔，樂意分享。

在籌備活動當中，我也看得見隊員們精心的預備畫劇和用心的排練。 在靈修分享及集體崇拜當中，我深深地感受得到隊員們對中國同胞的負擔，他們的眼光和思考也好令我敬佩!!  在探訪當中，也有讓我機會學習他們怎樣打開話題。 

雖然大家在背後做了好多工夫，花了許多精神設計教學或探訪活動，我敢說大家的努力並不枉然，因為我看見每一位老人家，大朋友，小朋友都好投入我們的活動。 是次活動真是打我的眼界大大打開，好感恩有份參與其中!!

*********************************************************

以下係今次探訪活動小小點滴/ 奇遇:

出發前往四川當日counter大排長龍，上機後，班機滯留唔開...  等左好耐，先至廣播話因為受到廣州機場控流影响，未知幾時先可以起飛。 結果飛機未開，我地巳經有得食飛機餐喇...  仲要食完個飛機餐都未起飛呀!!

因為機飛機delay，我地去到成都嘅酒店放低行李後，又要急忙去同當地教會嘅事工會面，我地趕快食過晚飯，就要參加佢地嘅聖誕崇拜。詩班們好落力，又唱聖詩，又做畫劇，又唱又

跳...  佢地既認真又落力為主作工，真係好值得學習。

翼日，我地所租的大巴遲大到，遲了兩個多小時才到，搞到我地好晚才到另一鄉村教會。原先schedule係我地先食飯，然後做活動。但為免一班老人家等候多時而離開，我地要挨住肚餓，做完我地預備嘅活動先可以食飯。感恩活動很順利完成，而一班老人家又好投入好開心。完了活動，我地走去醫肚。點知一起行就跳電制停電!!!!   我地摸黑行去我地嘅"飯堂"，當地工作人員為我地準備晚飯，又急忙送上爉燭。 雖然停電黑漆漆，我地見到爉燭就興奮起來，因為有燭光晚餐，好浪漫咁~   大家作了謝飯禱告，正準備好浪漫咁享用我地嘅燭光晚餐嘅時候，電力又回復正常喇..   真係好奇妙!!

第三晚落起雨來，大家擔心不巳，因為翼日的中小學活動大部份是在露天操場進行的..   幸好第四日天氣很好，雖然好凍好凍，但我們全日活動期間並沒有落雨。大家同各中小學生們過了一個好愉快的一日。

另外我地有探訪敬老院和另一間幼兒院及中學。

行程嘅最後一日，早上分隊探詐受資助的學生，之後就回酒店拎行李出發去飛機返香港。早上行程好順利，大家都好準時完成探訪返回酒店。 我地為左省時間，只係買了小食係旅遊巴上當午餐。可惜去成都機場嘅公路好塞車，好不容易塞過了一個輕微交通意外，以為可以暢通抵逹。點知接著又塞車，仲要塞左好耐都無前行...   原來前頭又有另一單意外，吊臂橫跨所有行車綫。我地係搭四點機，但是三點幾仲塞緊車...    最後三點四十多分才抵逹成都機場。一行二十多人一起衝機場，去到counter巳經關閉，經解釋後，地勤人員好合作，多開幾個counter幫我地check in 同辦理行李寄機艙手續。我地急忙奔跑去登機..  幸好班機又有輕微delay，等埋我地上機..   真係好驚險!!!

針灸

上次四川係長途巴士瞓覺瞓嚟頸，條頸同個頭都好痛...   返左香港都未痛完，叫媽咪幫我捽吓活絡油。　但媽咪太肉緊，捽到我個膊頭同條頸損晒，仲好大範圍添！！　

但係條頸仲好痛，因為有傷口，唔能再捽油，所以我去試吓針灸...   今次係我人生第一次針灸..   以為唔痛拉，其實好痛架!!　　因為醫師話想我快啲好，所以用粗針同埋最刺激嘅手法去針。

我以為自己好叻，可以受得痛，所以接受醫師嘅提議，坐係度針。醫師一落針就會即刻拔針，跟住再落針。真係好痛架呢...  因為針完醫師又用拔罐，除左個大傷口，我條頸同膊頭仲多左好個紅印。 針完當晚條頸好鬼痛，但瞓醒係好啲，所以我隔日再覆診。

覆診時醫生講我上次太痛，怕我受唔到，所以今次用溫和啲嘅針法..   今次瞓係度針，但都係用粗針..   瞓係度係好少少，但落針嘅時候都係好痛架!!!   針完我去左學小提琴.....   

就係咁出事喇...  學到差唔多完嘅時候，我條頸硬晒，而且勁痛...  以為隔晚瞓晒會好啲啦..  但係夜晚點樣瞓條頸都係好痛...  瞓醒一啲都唔覺好左，反而條頸可以郁動嘅幅度比未去針灸仲有少...   真係好辛苦呀!!　所以我問問醫師，醫師話因為拉小提琴要扭頸，所以佢叫我要停吓唔好拉小提琴住喎。

嗚嗚嗚...   我唔可以停咁耐呀，因為今個星期六同日都要拉呀。希望快啲好番晒，唔好再痛，可以正常郁動，拉番小提琴，做番個正常人呀..

同事的小手作

知道同事早輪參加左皮革班，有次閒聊問吓佢有否新作。佢就話佢無乜新作，但之前有整吓八逹通套送俾人。 同事只係隨口問吓我有無興趣，我老實不客氣咁話有!!! 

同事其實整起左幾個，不過我又衰喎，要求"橄欖綠"色。  同事聽聞就面色一沉...  因為佢唔知咩係"橄欖綠"。佢不斷推介佢整好左嘅紅色同黑色"現成貨"，但我堅持要綠色...  哈哈，事後，同事真係搵到綠色皮，雖然唔係"橄欖綠"，但我覺得都OK丫。 同事接著問我要襯咩色線喎，我話用番綠色咪得囉，唔駛點襯嘅。點知..原來同事咩色線都有，唯獨欠缺綠色線喎...  哈哈..  跟住我開玩笑的要求彩色線，又估唔到同事果然有彩色線喎..   

大家講到興起，我又不客氣咁問同事可否將佢當作聖誔禮物俾我..   不過我12月22號就飛去四川...  如果要當聖誕禮物，就要最遲21號起貨...    嘻嘻，哩點同事係知道嘅..  所以佢一直都話只可以當明年嘅聖誕禮物。 不過，同事好有心嘅，真係趕工起貨，係21 號送左佢俾我呀!!   估唔到塊綠色皮襯起彩色線嚟又幾靚喎!!!

密密織(二)

其實上之係英國我買左兩款十字繡架..   自從上次織完個薰衣草香包，我巳經好急想開埋呢個bookmark喇..  但礙於當時忙於教會六十周年慶典嘅練習，未有時間開始。

當我稍有時間開工時至發現..  佢睇落唔係好複雜，但係比我想像中花時間....  我真係低估左十字繡嘅難度 (又或者係我高估左自己嘅能力)  @~@ 

開左無數晚夜車，終於完成喇..   不過可惜我太大力繡，塊布都俾我扯到斜左..  而且仲有黑左小小添..  嘻嘻...  希望友人唔會嫌棄哩個delayed 嘅手信啦。