My new painting - WIP

今次幅畫有時間限制.... 因為我好遲先想到送畫俾人... 而人家又就快生日... 油畫一般要好幾個星期先乾透，我一定趕唔切係人家生日出畫起.. 所以我只可以畫比較快乾嘅塑膠彩... 今次我作新嘗試，畫幅粗筆跡嘅畫.. 先用色打左底，之後就用刀去畫details.. 今次大部份area都係用刀去畫，好難上色，真係考起我喇...

唔經唔覺就畫左4.5鐘喇... 好在進度尚算良好... 驟眼望埋去都唔差吖... 真係希望下一次可以完成到佢，同埋希望朋友唔會嫌棄幅畫啦...

新歌仔

首新歌仔好難呀.. 我練左好耐好耐，拉左好多好多好多次，都係得一次可以一TAKE過完成... 不過聽番原來我中間漏左一個BAR... 無計啦，病到暈暈地，睇漏左一個半個bar都情有可原啫.. 我惟有再錄過啦，但係錄左幾次中間都係斷左，點都要take 2先得.. 但係我覺得以我嘅資質，拉到全首歌仔都巳經唔錯架喇 =p

一天光晒

早前享用公司福利，做左身體檢查。做上，下腹腔ultrasound時，聽到醫生叫護士落左好多個marking，我已經有點擔心，懷疑照到我生乜野。照晒所有野，到醫生檢查時，醫生對住我張心電圖，好擔心咁同我解釋我張心電圖唔正常。只有1%嘅人會有咁嘅結果... 所以建議我去照下ultrasound confirm下我係咪正常，不過個echocardiogram檢驗會比較貴，醫生寫左封referral letter俾我，叫我睇下公司個medical plan 可否cover 哩個喎。

返到公司check過有referral，係network化驗所做就會cover到，所以又忙於約時間做檢查。點知問左好幾間network化驗所都無echo 做架，真係唔知點算好.. 好在最後同事幫我問到邊間lab有得做咋... 打去問中環嘅lab，佢又refer我去尖沙咀個心臟科度做個echo。 專科醫生話聽到我個心有雜聲，但又照唔出嚟嘅result又好正常，無大問題喎，詳細報告會send番去GP喎..

今日護士call我話有report，叫我約見醫生.. 等緊見醫生時，我都有少少擔心... 好彩醫生話個report大致正常，包括我個心臟!!! 醫生睇完個report 話confirm我係果1%嘅人。 至於照ultrasound時，我聽到嘅marking，原來大部係關於器官嘅size，唔係啲乜野大findings.. 惟獨有少少野可能遲啲要再照下，monitor吓啫，其他大致正常，真係一天光晒，無咁擔心喇，yeah~


P.S:
等見醫生時，護士姐姐幫我量血壓.. 護士姐姐話俾我知點先為之正常血壓嘅range... 佢話:「好似你咁，後生女，廿零歲啫， 應該係上壓唔超過140, 下壓唔超過90... 」 佢講左幾次「你廿零歲」.. 其實我好想同佢講我唔係.. 不過我最後都係無出聲 =p

不過呢，我個傷風唔斷尾呀.. 食左五日藥，以為好番晒，點知第二日係Office焗一焗，又再病過呀!! 不停打打乞嚏，今日個鼻仲好塞，頭重重添... 放假先嚟病，真係慘呀!! 希望可以快啲好番啦~

暖笠笠嘅聖誕禮物

好開心呀.. 今日竟然收到份聖誕禮物呀... 佢軟林林，好得意呀。其實佢唔係毛公仔咁簡單，而係一個heatpack嚟o架。 用之前要放佢入微波爐"灯"熱，估唔到連heatpack都有得番灯喎。

雖然今朝新聞話今年聖誕比較凍，而家有哩份咁有心思嘅禮物，我可以過一個暖笠笠嘅聖誕lu~

Retreat

Thanks for having such a great retreat!!

早前工作上的不如意，真的令我好唔開心，好無心情。好在朋友願意一起參與退修，一來可以安安静靜的親近神，二來亦可以散下心。從弟兄姊妹的分享中，有所得著和學習。思考問題都令大家有所反思和領受。

雖然黃昏時段嘅分享時間長左，錯過了欣賞日落的美境，但下午安靜嘅時間，我企係露台聽住雀仔聲，望住啲海浪，又被海風吹過後，個心巳經平靜落嚟。加上晚上有我至愛的BBQ環節，大家有講有笑，之後更有腐竹糖水滋潤添，我巳經好滿足喇~

真係好感恩今日有美好的天氣，亦要感謝Mr Lung 同 Christine的接待和引領我思想經文，大家有所得著。另外，我好想多謝朋友一同參與退修，又放棄坐順風車，陪我地搭地鐵。

第一次獻奏

第一堂嘅獻奏真係好ok.. 但第二堂就有啲失色.. 一開始拉聖誕歌都仲好好，一到會眾詩時，詩琴用較快嘅節奏去彈，我唔係好跟到囉.. @~@ 好彩都叫做"hea"過... 真係好開心可以順利完成兩堂嘅獻奏... 人生第一次獻奏，緊張，甩漏係難免的.. 吸收今次嘅經驗後，下次應該可以再好啲.. 期待下次嘅獻奏呀

P.S.
嘩.. 今早起身得十度咋.. 好彩噚日去左uliquo買heattech時，見到有黑色cashmere冷衫，我順手買埋咋。如果唔係，我著得一件白恤衫，一定唔夠暖呀...

特別鳴謝朋友提供以下珍貴短片，好讓我可以好好回味一番..

弦樂練習(二)

今次練習真係好緊張呀.. 主因都係自己嘅節拍較弱，同人夾嘅時候，總有甩拍嘅情況... 甩完又往往唔能即刻入番喎.. 尤其係輕快嘅節奏，再加上要 retake 支弓嘅時候，我落弓總係落得唔夠俐落，令到音色唔好。

講開音色，未開始練習之前，指揮要我地 tune 好自己嘅樂器... 平時一向都係小提琴老師幫我 tune 琴.. 我自己唔識 tune.. 今次無人幫，要自己落手 tune.. G, D, E 都 tune 得好，唯獨 A 弦 tune極都差少少.. 做埋微調都係差的的.. 點都 tune 唔到 perfect A..

正式練習嘅時候，其中有個小朋友(都係負責2nd violin)今日比較"濛查查"，佢成日聽唔明指揮嘅instruction，音準又較弱。所以成日都要repeat 2nd violin嘅部份.. 係只有我2nd violin 拉.. 其他人個個聽住我地拉，所以好驚自己有乜出錯架... 雖然指揮指明係個小朋友唔啱音，但我自己就好驚係自己唔啱音.. (因為我心知條 A 弦 tune 得唔夠perfect)。因為今日小朋友唔在狀態，拉得唔好，所以好多時係都要 repeat 我地o果 part.. 每當指揮話2nd 嘅音唔夾 1st violin 時，我都不其然懷疑係自己唔啱音.. 不過次次指揮改完小朋友嘅手勢，佢就話夾到音喇.. 所以應該只係小朋友嘅音準有問題啫，唔係我個小提琴唔啱音。

今個練習，我睇到自己有好多的不足嘅地方.. 係咁分秒必爭嘅rehersal，對於我呢個新手真係好有壓力呀!! 雖然知道自己能力有限，我仍然好熱愛拉小提琴，我會繼續努力練習的，只不過唔知我幾時先可以有好明顯嘅進步呢?

*********************************************************************
P.S:

今個星期日嘅節目真係好豐富.. 真係一個接一個.. 先係返崇拜，崇拜完左之後就要立即趕去資源中心當值.. 當值完畢，就去食個快lunch，緊接我嘅第二次弦樂練習。 練習完，又趕返屋企放低個小提琴。坐左一陣，又同家人出行食大閘蟹餐。食完大餐，返屋企睇埋個做左一半嘅超級巨星，所以今個sunday可謂過得好滿足呀。

沖繩返港喇~

細個嘅時候，阿爸同媽咪帶過我去大陸去旅行。大個之後，都只有自己同朋友去旅行，今次終於帶吓佢地去出國旅行...

懶得自己plan行程同安排車馬嘅我，好自然就揀跟旅行團啦.. 由於係阿媽出口叫我帶佢兩老去日本.. 原先鎖定去北海道架，不過後來媽咪又改口，話驚爸爸怕凍，所以要改去其他地方。

阿爸同媽咪都唔係shopping愛好者，又唔恨去主題公園，又唔想一絲不掛的浸溫泉.. 所以唔會帶佢地去東京喇.. 人地話沖繩得陽光海灘，多得senior G 提點我沖繩仲有個大型水族館咋... 真係啱晒阿爸同媽咪呀，因為佢地平時一向都愛睇Life，變變變生命力，同埋有關海洋世界節目嘅..

沖繩個水族館真係好大，阿爸同媽咪都好鍾意睇。 除左去水族館，我地仲去左坐玻璃船潛入水底睇珊瑚。只係略嫌太陽光唔夠足夠，水底唔夠清，但係大家都睇得好開心，好滿足。 今個旅行都算優閒，行程唔會好逼好趕。 唯一美中不足嘅係媽咪一心去食長腳蟹，結果唔得食，不過好彩有魚生船同美味嘅和牛補番數咋。

Okinawa Trip album:

http://www.facebook.com/media/set/?set=a.10150382842702050.353367.643747049&type=1&l=a333e169c7

*************************************************************************************
今個旅行之中，我發現...

- 原來阿爸唔係"太好"影相的.. 就算影，都係影吓景物回家再次回味.. 影人物相嘅時候，佢鍾意影全身 (就算個人得番好細粒)，但又唔會數123的..
- 原來阿媽好鍾意影相.. 不過只顧自己影相，去到邊都愛拎住手機影相，唔埋我地.. 又或是花盡時間去switch vedio/camera mode (因為唔係好識用)而miss 晒人地嘅表演
- 阿爸同媽咪唔會停低影合照，次次都要我要叫住，佢地先會停低的..
- 原來我個人無乜耐性，好易勞氣.. 我真係好好控制一吓自己嘅情緒..
- 原來女人嘅鼻寒聲都可以好勁，除左一般嘅鼻寒聲，竟然可以發出直昇機聲咁.. 真係聞所未聞呀!!!! 開頭聽到嘅時候，差點笑出聲，不過當佢持續發出直昇機聲時候，就唔再覺得好笑lu.. (好彩我有帶個mp3 機咋，如果唔係真係好難瞓得著呀)

新歌仔

呢首係一首Jewish style 嘅wedding song.. 由於時間關係，只夠時間練濃縮嘅version.. 有幾到repeat嘅地方我都skip左... 本身首歌仔係再輕快啲架，不過我真係快唔到喇.. =p

心頭好

之前睇左好多閒舖頭都搵唔到合心水嘅iphone case.. 今日終於俾我搵到個我喜歡嘅case喇... 而且係做緊特價.. 所以我不加考慮就買左佢喇..

返到屋企，我仲急不及待用左佢添... 你睇佢幾靚!!!

弦樂練習

今日又係弦樂練習喇.. 其實我等左今日好耐喇.. 一班人一齊練習嘅感覺真係好好o架...

其實我自己係哩個幾禮拜都"係咁依"拉下嘅獻奏曲，不過今日一齊練習嘅時候都常有出錯 @~@ 今日又加多左一首會眾歌，又係俾小小時間大家望下份譜，然後就開始一齊拉... sight reading真係好緊要.. 真係要快而準!! 係睇得快，入得準... 對我哩個新手真係好有難度...

音準同節奏又係一樣重要.. 因為拉錯少少音，拉快拉慢左都會好礙眼.. 就算拉錯左，都要識得入番啱先得.. 經過今日嘅練習... 我嘅take away係..... 要好好下苦功呀!!!

話雖如此，我其實好享受今日嘅練習嘅 =)

我的天鵝湖回家喇~

幅畫都畫完好耐喇.. 不過我遲遲未有時間去拎。 噚晚終於"的"起心肝去攞番幅畫返屋企喇...

我間房太細，再無牆掛幅畫... 可憐嘅係... 連一個罅位都無得俾佢呀... 所以最初都唔知點處理幅畫.. 好在.. 最後成功爭取將佢放係個大廳到... Yeah!!

Lift trapping experience

都幾驚險....

部 lift 由九樓落緊去地下，落落吓佢忽然間有遙動，幾下"隆隆"聲，跟住就有衝落去嘅感覺，再有好劇烈嘅震動同好大聲嘅"Boom Boom"聲.. (好似land crashed咁) 我地一共十六個人，雖然大部份都企唔穩，大家互相扶住，但又未至跌落地...

撞擊完之後，部lift停左唔再行。我地按alarm，alarm work，但按左好耐都無人理我地.. 按左好幾次都係無回應... 所以有人自行打999.. 再過一陣，終於有人回應.. 不過好鬼細聲之餘仲令我地唔comfort...

管埋人員話: 我call左"整lift"嘅人嚟喇...
大家好緊張問: "整lift"嘅人? 幾時先到? 會唔會call消防會快啲??!!
管理人員堅持: 巳經叫左人嚟check
乘客問: 咁有無話幾時會到?
管理人員: 佢地嚟緊，你地停左係邊層?
乘客回應: 根據個display，我應該地去緊一樓

大家惟有繼續等... 過左大約十分鐘，lift 門忽然間開左1寸，有人話: 「都好，可以抖下氣!」點知佢講完無耐，lift門又完全關閉.. 之後部lift啟動向上行.. 上去三樓.. 但係部lift都係好唔穩定咁上.. 上吓又停下.. 跟住再上四樓.. 大家開始緊張.. 唔知會唔會上到好高後再跌過落去... 上完四樓，部lift又落番去三樓... 大家又遙遙下咁..

有人忍唔住，再按alarm... 同管理人員講話部lift又上又落好危險... 管理人員話"整lift"嘅人到左做緊野喇.. 如果佢早啲話俾我地知係佢地control緊部lift，我地唔使咁擔心囉..

經過少少fine adjustment，部lift係三樓開門，我地轉第二部ift落地下... 有乘客仲係好驚，要求行樓梯，唔搭電梯.. 不過佢地無埋佢，只係叫大家過隔離部lift走...

P.S.
雖然被困，但好感恩我個就嚟生得大肚朋友今日無join個seminar.. 平時我地都會約埋一齊上seminar架.. 如果佢今日在場，一定好大鑊呀!!

新歌仔

哩首新歌仔都係輕快型.. 唔算長，不過要做裝飾音.. 但我仲未做得好.. 因為我手指唔聽話唔夠快... 練左兩星期喇，終於拉到似一首歌仔咋.. =P

大哥萬歲!!!!

早幾日睇電視時，見到麥當當個kitty crossover 廣告，隻hello kitty向前行catwalk，好鬼得意... 忍唔住，即時扭阿哥換俾我... 當時阿哥當然唔埋我啦... 不過，幾日後嘅今日，阿哥拎住哩兩隻kitty返屋企俾我呀.. 好開心呀!!!! 大哥，多謝晒呀!!! 哩兩隻kitty真係好靚，好得意呀~

後記

上次audition之後，就立即開始夾琴喇.. 因為我係中途加盟，要即場sight reading，仲要夾一班人，要好講求節拍，真係好有壓力呀.. 話雖如此，但係真係好好玩，我好enjoy有咁嘅機會。

平時學小提琴，一定係拉主音。不過今次係樂團入面做2nd violinist，主要係拉和音或伴奏... 上次練習嘅時候，收到份兩頁紙嘅譜，我試拉完第一個page，都完全唔知自己其實拉緊乜野歌仔喎... 直至拉到第二個page中間先開始有的眉目... 到結尾全世界一齊拉同一個melody時.. 我終於confirm到自己拉緊乜.. 哈哈.. 真係好funny呀!!


************************************************
另外，有一次學小提琴時，同老師講開我當正我個小提琴係我寶貝..
老師: 咁係仔定女先?
我: 咁梗係女啦!
老師: 點知你呀.. 講唔定係你當佢係仔呢..
我: 你睇佢咁優雅，一睇就知係女啦，認唔認同先?
最後，老師都好無奈咁認同左.. 嘻嘻..

Audition

今日係人生嘅第一次audition， 為左保障起見，我揀左拉自己考試歌仔.. 可惜我都係好鬼緊張張... 係屋企練嘅時候明明好好的... audition嘅時候，有一兩個音拉極都錯.. 不過指輝好好人，成日安慰我，讚我個頭開得好好，知我係緊張啫，不過拉得真係好好喎.. 跟住都有個即場sight reading test 嘅.. 我盡力跟啲節拍.. 可以順利完成個sight reading.. 就係咁，我今日個audition成功左呀，可以加入絃樂B組做事奉。已經仲即時開始為聖誕獻奏練習添，心情變得好興奮呀！

同組的大多數是小朋友，雖然年紀少少，但都考左五級，七級喇... 佩服佩服!!! 係絃樂組裏拉琴，同自己拉solo，感覺真係好唔同.. 之前考琴要夾鋼琴，今次我仲有機會夾cello，真係好得意呀!! 好期待下一次練習同埋聖誕獻奏~

折翼天使

多年的交通，關心，支持，真的不容易。一直以來，每次收到對方的回覆，都會好開心。過往，他為著工作壓力，讀書忙碌，畢業後工作的尋找而煩惱，我幾忙都keep住email聯絡。一向唔主動的我，都會自發性鼓勵對方，問候近況，送上祝福。由於好多時對方收到我的問候之餘，都會有好事後隨，漸漸地成為他心中的天使，

當知道對方將自己比喻為天使，覺得我對他的祝福有幫助嘅時候，自己都不禁有飄飄然嘅感覺，所以自己就更落力去鼓勵和關心別人。

早前我提及自己都好down，他問及我唔開心嘅原因.. 當時我真係好down，以為佢可以support吓自己，所以我就好慨括咁將自己嘅故事話俾佢聽.. 但事隔一個月有多，他竟然無任何回應... 我無唸過連一句最基本嘅:「Janet, you will be fine!」都欠奉的。 我都係凡人，唔係天使，我會有感受，也有期望.. 其實只要一句簡單的慰問或支持就巳經足夠.. 今次得到嘅回應令我感到非常失望..

乏力

我覺得近排學親的Study都好難，拉嚟拉去都拉唔好... 支弓又打晒交咁，真係唔知自己拉緊乜!! 開始懷疑係咪巳經到左自己嘅極限添..

雖然老師都話今次首study係好有難度，叫我俾心機練... 練習當然是有的，心機我也有俾出過的.. 不過練到下巴又損左，膞頭又梗晒，都係搞佢唔掂，開始覺得乏力.. 唔知仲要練多幾多個星期先有轉機呢? 真係好希望下一堂老師可以指點下我，等我可以handle到佢啦...

Shall we dance?

今次首歌仔係一首跳舞嘅歌仔.. 老師拉得好好聽架，唔知點解我聽老師拉時，個腦就浮現好華麗嘅舞會.. 我自己就要練好多次先練都個幾個滑音.. 尾段節奏都係差啲啲... 唔知我幾時先拉到個老帥拉出嚟嘅feel呢?

行山遇正一號風球

因為噚日天氣差，所以都預左今日嘅天氣唔會太好，但今早起床，郤是陽光普照，於是滿心歡喜的收拾防晒用品出發行山

去到大埔火車站食過早餐後，再向梧桐寨出發。可惜一抵步，就開始落雨喇.. 起初仲好天真咁以為只是過雲兩。可惜，雨只有keep位落，而且仲掛一號風球添.. 我地全程都要開住把遮嚟行山。今次山路都幾多石級，有啲仲好好斜(其實係直先啱)，落住雨，地又跣，又要拎住遮，好似行鋼線咁，要步步為營!!

我地去梧桐寨係為左睇幾個瀑布嘅.. 不過天雨關係，我地未去到最大嘅瀑布就要折返喇.. 所謂上山容易落山難，真係一啲都無錯架.. 上山行啲好斜嘅石級唔覺得難handle，但一到沿途折返時，要落番哩啲又斜又濕又滑嘅石級就好難搞喇。因為好跣腳，又要拎住遮，其實都幾危險架。結果全程行左唔夠三個鐘，行到周身連背囊都濕晒，好彩都安全離開嘅。 落雨真係唔適宜行山架。

雖然今日無機會睇到大瀑布，好在都有途經過個小瀑布嘅.. 而且另一值得好開心嘅係... 出發之前收到阿Wing 同Wincy係俄羅斯買俾我嘅手信.. 係係敎堂入面買的.. 真係好靚，好多謝佢地嘅心意呀~

Burden

最近FB有人request 做friend。從名字上看，他和我的大學同學同名。不過他的profile picture係幾個人，而且resolution好低，跟本睇唔到啲樣，我無法確識他的身份，所以一直ignore佢嘅request，佢之後都自行remove左個request。

直至近日，我係屋企用notebook上FB，先發現佢原來send過message俾我的.. 以前太依賴iphone，好耐無用電腦上FB... 可能佢唔係我個Friend list，個message唔係inbox，而係other，要正常版FB先見到個message...

開左個message就confirm佢真係我個大學同學.. 原來佢早陣子係教會同我擦身而過。雖然佢個message係一個月之前留的.. 話晒曾經都係同班同學，唔覆人家唔係咁好，所以我都問下佢係近況。

原來佢係外國返工，每兩月只返港一次.. 佢叫我no worry，其實read個message時，我唔明點解我要worry.. 不過跟住佢mention佢想「say sorry for doing silly thing in campus life...」 哈.. 其實都好多好多年嘅事，佢唔提起，我真係唔記得左乜事架..

之後佢叫我唔駛擔心佢會像以前咁disturb我喎.. 我都同佢講:「不用sorry，i have no idea on what silly thing you are referring to...」 從佢嘅回覆「burden in my heart put down」，我feel到佢係由心的道歉，原來他一直都為他所作的耿耿於懷。

見佢咁耿耿於懷，我又開始好奇.. 所以我好盡力去回想... 不過真係唸唔到好多... 我只依稀記得兩件經典icq message.. 以前我見佢online想避佢就轉做invisible mode.. 但佢見到我online的一瞬間，佢留message同我講「我知道你還是online的..」 「你可以唔鍾意我，但你唔可以阻止我鍾意你...」 我想應該仲有更多的事，但我再記唔起lu...

我一向都自覺記性唔差，但都有失憶的時候。原來有啲野遺忘左，就記唔番架，眞係會無晒印象架。時間會淡忘一切的講法，確有其事呀！

Unexpected day-off

多得個八號風球，今日無啦啦唔駛返工，又可以瞓得好晏。食玩晏仲有好多時間練琴添。 今次揀左首輕快啲，開心啲嘅歌仔嚟拉.. 希望可以令自己都開心啲，輕鬆啲。 今日得閒，所以好aggressive咁拉左好多好多次首歌仔.. 不過到錄嘅時候又會失吓手.. 即使最後部份炒炒地，我都收貨喇.. 因為手指頭開始痛喇 >~<

五十步笑一百步

某人常常在FB update status.. 內容每每是提問點解自己無女朋友? 又或是轉載有關宅男嘅文章.. 然後回應:「怪唔知自己仲係單身」真係好奇怪... 每次見到佢嘅status update，不禁覺得厭煩，唔明白他點解要咁寫.. 其實好想留言俾佢，同佢講佢咁做只會嚇怕其他女仔.. 不過始終同佢欠缺交情，咁直接同佢講又好似好odd..

其實我有時都會問自己同樣的問題，唔同嘅只係他比我大膽，有勇氣公開地問.. 自問我真的沒有這膽量。話雖如此，我真係唔認同佢嘅做法，有勇氣還有勇氣.. 唔駛update得咁頻密囉.. 我唸唔止我一個人唔想收到哩啲update的...

Cheer me up

唔知點解，次次係老師面前拉歌仔或study，都一定拉到好差... 我自以為今次首study拉得ok啦，但係今晚上堂拉俾老師聽嘅時候，又總係走晒音，走晒樣... 其實我真係feel到老師塊面"一間間"，好失望咁.. 不過佢又知我之前唔開心，所以唔好意思話我拉得差... 真係苦了老師喇。

拉完study，拉歌仔嘅時候，同樣都係有音準問題，老師好耐心咁幫我一句跟一句咁執。睇嚟我今個星期自己練習嘅時候，真係要好好注意吓自己拉琴嘅音準先得。

雖然今晚上堂嘅表演未如理想，但係有樣野令我高興的... 就係上次考琴張証書終於到手喇~ 老師話我張Cert特別靚，因為適逄ABRSM 係香港六十週年，張Cert花巧啲喎。 不過因為老師幫我報考試，証書上都有老師嘅大名 (所以我mask左先老師嘅芳名先post嘅)

P.S. :
張Cert係寄掛號到老師屋企的.. 而個郵件編號竟然係"8888"，好好意頭呀，所以我連個信封都keep埋呀 =p

新歌仔

苦練左一排，雖然走走地音，但終於似番首歌仔喇... 睇吓聽日老師點樣執吓我啲技巧先.. 我真係好想快啲練到vibrato..　因為做到嘅話，首歌仔嘅感情可以再出一啲，同埋會好聽啲囉。

中秋節快樂!

我無打算今年中秋會玩燈籠.. 但估唔到會收到個咁cutie嘅"燈籠"陪我過中秋... 好搞鬼呀!

天鵝湖

今日終於完成我哩幅天鵝湖喇.. 一共用左十二個小時去畫，俾我預期快 (雖然畫到迷茫嘅時候，就覺得時間好漫長).. 講真，我自己都幾鍾意哩幅畫嘅.. 不過一定要多謝老師神來之手，幫我修改唔少，兩隻天鵝先得咁靚咋!!

寄情音樂

哩首新歌仔個Melody好同我嘅心情好夾呀.. 因為老師俾左一啲較難嘅指法我去拉，所以好難handle，拉極都係拉得唔係好好... 如果我學好vibrato，應該會再夾啲。 錄完哩首歌仔.. 又要練另一首新歌仔lu.. 新歌仔都係帶點傷感嘅melody.. 又係好難嘅指法喎，今日拉左好耐都唔知自己拉緊乜!!! 真係要再下苦功先得...

La Cumparsita

我覺得今次首歌仔好得意架，一聽就鍾意佢喇... 苦練左一個星期， 技巧上當然仲有好多可以進步嘅空間嘅，不過老師竟然話我拉得唔錯喎.. 希望大家都聽得出佢係一首Tango 嘅歌仔啦~

草皮

唔經唔覺，又畫左兩個半鐘喇... 今日嘅進度一般，只係畫多左兩塊草皮，同埋"係咁二"執吓棵大樹咋... 原來啲草皮好難畫.. 畫咗幾次都唔ok，一係畫得太硬，好假!!! 一係又畫得太亂，無層次!! 畫完唔ok，要再油彩油過個底，再係上面畫過啲草.. 如事者畫左兩，三次先叫畫得順眼啲咋... 而家尚叫做畫得七七八八，下一堂再加埋兩隻天鵝就應該可以完成佢喇~

心情不佳

近排工作不大順利.. 做乜都做唔好，又成日受氣.. 明明唔關我事的.. 但又偏偏要我受!! 好心提人地keep好啲record，但又俾人話我的要求是無理及多餘??!! 負面情緒甚高.. 所以我又開始縱容自己shopping 同埋打機..

小提琴雖然學左新歌仔同新study.. 首新歌仔，老師拉俾我聽時明明好好聽，好有型的，一聽就聽得出係tango.. 但一經我演繹 之後，首歌仔一啲feel都無.. 好灰 u_u 呀~

而家學埋樂理.. 老師話我學得快，今堂跳左好多無敎，assume我識晒，又俾左好多個exercise 我做.. 嘩.. 好似太多咁喎.. 我一啲都唔快呀.. 我只不過係聽話，有去備課，做咗啲exercise咋喎.. 唔係真係識晒架，我要好多時閒去消化架喎!!!

上兩堂，老師終於有提下點做vibrato.. 不過我仲未做到.. 老師話係要用好一段時間去"浸"下喎.. 所以而家都係要起動吓啲手指嘅微少關節先.. 等佢地夠柔軟，先可以做到vibrato喎.. 唔知幾時先可以做到vibrato呢?

太過份

今日著咗條靚裙返工，本應心情好好.. 但係地鐵實在太多人，原先我自己企，reach唔到扶手都balance到.. 但係逼係我前面嘅男人，又成日"bell"佢係袋去我度，逼係我後面嘅姐姐，又先日企唔穩，挨晒落我度.. 搞到我最後都企唔穩，逼住要攝位去捉住扶手。

捉到扶手後，又有另一堆人湧住入嚟。大部份湧住入車廂的人都係無禮貌的，不埋車入面有多逼，都只顧用盲力撞入車廂。但今日湧入嚟的，並唔係咁的... 反而車廂入面有個女仔，一粒聲都無出，就用盲力死撞出車廂呀。我覺得佢真係好無禮貌呀!!!! 你唔出聲，人地點知你要出啫???!! 當時太多人逼住我，後面嘅人都無意識要讓路俾佢!!! 最慘嘅係... 當個女仔當正我同四周嘅人係佢仇人咁衝埋嚟嘅時候，我條靚裙又太飄逸，飄左入人堆當中喎，個女仔衝撞其間，我隱約聽到扯爛衫嘅聲。但我望望又唔見自己條裙有事，就如常返工..

係office出出入入，過左成個早上，都相安無事。直到lunch time，同同事行去食lunch途中，街上有位好有心嘅姐姐，輕輕拍我，有善地通知我條裙後面爛左。 唔係呀嘛... 爛左咁大個窿，我department嘅人真係睇唔到??????　成個上晝出出入入自己個位咁多次，都無人同我講我條裙有事.. 我真係好難想像囉.. 原來我今日咁open喎... 唉.. 真係無眼睇呀!!!

其實當我唸番，就知道條裙係俾今早o果個無禮貌嘅女仔整爛.. 我無嬲過個女仔.. 但係我有唔開心.. 因為我本身好鍾意哩條裙，鍾意到唔係好捨得著佢.. 今日難得想著吓佢就爛左，擔心補唔到，所以為此唔開心...

食lunch，返公司就捉住秘書姐姐幫我搞搞條裙.. 秘書借左一個pin俾我，幫我暫時pin左爛左嘅地方.. 其實佢pin得到，我就ok無事幹... 估唔到事後，另一位同事先話俾我聽佢之前見到我條裙有野喎... 我心中頓時有一萬個問號.. 點解見到我有事嘅時候你唔話我知? 等我可以早啲去fix? 反而等我fix 完先同我講你之前見到呢?????　我寧願哩位同事一直都唔話我知囉...


p.s
好彩媽咪幫我整番好條靚靚裙吖.. 而家心情靚番晒 ^^

第一堂樂理

今日如常學小提琴之餘，仲正式開始跟老師學樂理.. 因為total會學成兩個鐘，所以上次老師suggest我買埋外賣先去佢到學琴。老師唔客氣咁話:「如果你能夠買多一份，孝敬老師，我都唔驅架!!」其實老師只不過同我講吓笑，佢唔係真的叫我買埋佢o果份嘅...

但我見反正都要去買，買多一份又有何難呢? 所以我襯搭車途中，打電話俾老師，問定佢想食乜啦。點知佢又飛左線喎.. 打咗幾次都唔通.. 惟有send sms俾佢，叫佢打番俾我。 但等極都唔見佢打番俾我喎.. 惟有再打過俾佢.. 打多幾次終於搵到老師喇... 原來佢落左去街買野食，佢都正想打俾我問我食乜喎.. 結果都係老師幫我買埋晚餐等我學琴!!!

當我去到學琴嘅地方，老師就好happy.. 因為有我陪佢開餐喎!!! 佢仲買左三個puff做飯後甜品添呀。 一邊食，老師就一邊有鬼"煮"意... 唸定之後可以買定水果整沙律喎.. 佢老拍晒心口咁話佢包辦伙食部.. 因我我要拎住部琴，同埋啲琴書.. 唔駛我去買喎.. 老師對我真係好呀!!! 遇到如此friend底嘅老師，真係好感恩，仲好感動添!!

我的油畫 - still WIP

今日用左三個鐘，好專心咁種左幾棵樹，同埋舖左一塊草皮。好在今日畫室唔係好多學生，唔駛成日等老師得閒先有得問

今日進度都尚算良好，不過我略嫌自己雕花雕太耐，好似用多左時間咁。估唔到老師竟然話我下堂應該可以完成，但我覺得係mission impossible 喎!!! 我認為快極都要畫多兩堂先得啦~ 一於睇吓仲要畫多幾個鐘先可以完成佢.. 好期待呀!!!!

白老鼠

早排小提琴老師推介我學埋樂理，佢認為學會樂理後，相信我對樂譜，節奏等掌握會好一點，對我拉小提琴都會有一定嘅好處。老師offer我每星期學完小提琴之後，佢再教埋樂理。考慮左一陣，我都決定學埋樂理，因為我本身對樂理一無所知，都想認識吓，而且我想拉好我嘅小提琴，下次再考試，aural 部分應該可以輕鬆啲。

點知當我confirm 老師嘅offer後，我話以後樂理靠晒老師嘅時候 (我係全心將我的希望交托老師架喎!!)，老師竟然話我係佢嘅白老鼠！！！雖然知佢講吓笑，但佢哩番說話真叫我担心 @~@

鐵塔袋

之前係街上見到人地嘅袋有印左個鐵塔架，當時一見到就好鍾意人地個袋，去shop問過，知道係法國限定版之後，知道無乜機會買到，就無特別"恨"要個袋..

但我估唔到自己好快就忘記左個袋添，所以早陣子有朋友去開歐洲時，我都醒唔起叫朋友幫我買哩個袋...

點知最近Doris又因為有得出business trip，而乘機去法國喎，佢又問有無野幫我買.. 我第一反應都係"無名牌袋要買"... 不過今次我又記得番個鐵塔袋喎，所以叫左Doris如果順路又見到的話，就幫我買個袋。 其實我見事隔咁耐，都未必有得買，所以我預左Doris買唔到架喎.. 吖點知佢又幫我買到喎返嚟喎，真係好喇~

新歌仔~

苦練一排嘅新歌仔終於成形喇... 新歌仔樂譜有成三頁紙，都幾長架.. 又係一把位同三把位走嚟走去，雖然好努力咁拉，但係都未能一氣呵成，拉到第三頁紙嘅時候都會甩甩地.. 點都好拉，而家都聽得出係一首歌仔 ^^

貪得意

見到哩個angel cable holder，覺得好得意就買左佢。我打算用佢"繞"住手提電話嘅earphone =D

My progress today

今日又用左兩個鐘lu.. 進度ok 啦.. 驟眼望好以無乜加野咁.. 其實我巳經將個湖加左第二個layer喇... 個天空同啲雲都係加左第二層架.. 而且最遠嘅地方，我加左樹，樹葉同草架.. 其中兩個島仔都舖左草皮架!! 老師一直都話ok，幾好喎.. 希望繼續畫落去都真係可以ok，幾好咁就好喇...

好番喇~

好彩覆完診，食晒藥，個膝頭好番晒喇... 而家回覆正常，可以上落樓，仲可以返自己房，瞓上格床添呀.. ^~^

fun fun cell time again~

由於今個星期六團契休團，我地嘅團契改為小組gathering.. 但係約下約下，就變左星期五晚搞.. 真係多謝Kent & Hongyee 借出佢地嘅中環半山豪宅俾我地咁多人聚腳.. 而家數吓先知道，原來我地有成21個人呀.. 唔怪得我地咁慒啦..

Kent 個大廳都真係大!!! 可以容納我地咁多人，大家仲有好足夠嘅空間... 開頭見到兩部電視，加一個projector，覺得有啲誇張.. 不過當有咁多人係個廳到，終於發現有兩部電視嘅必要.. 我地一部電視用嚟打遊戲機，一部電視用嚟追劇集... 睇睇吓電視，Kent仲開埋部projector.. 我地好似置身百老滙，豐澤咁.. 俾大電視包圍住...

Kent 準備左好多IQ題娛樂大家，當中多得Yvonne 同阿Ben 好落力咁brain storming，為大家增添唔少歡樂嘅氣氛... 就係咁飲飲食食，說說笑笑，過左一個好happy 嘅星期五晚上 =D

無名腫痛

今早返工時仲好地地，返到公司無耐，但膝頭就無啦啦痛起嚟...


開頭行路只係小小痛，但後來就越來越痛，下晝去睇醫生時，又揀錯路嚟行，行左條要行好多樓梯級嘅路.. 上上落落嘅時侯，真係好痛呀 @~@

放工返屋企時，行平路都好痛添.. 好似越來越嚴重咁播.. 點算好呢?

因為小妹間房只有上格床，今晚真係無可能上到去瞓..
希望食左藥，訓醒覺之後會好番晒啦..

一TAKE過

哩首新歌仔真係好鬼難呀.. 拉過咁多首歌仔之中，最多雙音嘅一首.. 因為好緊張，撳弦撳得好大力，手指頭都快要爛呀... 練左兩，三個星期，終於可謂拉到首歌仔... 雖然音準都係未穩定，啲雙音又唔係處理得好俐落，畢竟我可以一TAKE過拉晒成首歌仔，都覺得好開心呀!!

My 2nd Oil Painting

今日開新畫呀！係小妹第二幅油畫。畫油畫真係free啲，油第一個layer嘅時候可以好＂係咁依",所以可以好快就畫好個底。其實中途都有迷茫嘅時候，唔知點畫架，不過我又見只係個底，畫錯都唔驚卦，就好隨心放胆咁油.. 所以今次都係用左兩個鐘咋，so far so good 啦！不過下一堂要再畫多一個layer, 而且要仔細一點，希望可以handle 好佢啦！

我的手指頭

快要爛了..........

近排學嘅新歌仔真係好難拉呀... 好講求節奏，要輕快跳躍，所以有勁多跳弓斷弓。 而且仲有拉好多雙音同三音(CORD)添呀...

以前嘅歌仔，頂多都係臨尾先出現一，兩個雙音或者CORD.. 好以對上一首concerto咁，巳經算係最多雙音，有一個full bar 係雙音，total十六個音符要同時拉雙弦，當時巳經覺得好勁...

點知... 今次首concerto有好大段要拉雙音呀... 係我前所未有咁大段... 有成25個bar ，total 147 個音符呀!!!!! 拉雙音本身巳經唔易掌握，哩首歌仔仲要係雙音部要用繼弓嘅弓法去拉出跳躍嘅效果.. 真係拉到嗌救命... 老師常提點我，拉雙音唔駛好大力，但我就偏偏放鬆唔到.. 成日好大力撳弦，又用埋啲死力拉支弓... 所以o果段雙音仲未做好... 今堂都唔夠時間執好我嘅手勢同弓法.. 今個禮拜要好好練習part雙音.. 希望下一堂可以學晒首歌仔就好喇~

Tower painting - DONE!

今日終於完成左哩幅鐵塔喇..

起初我以為未畫完嘅時候，老師巳經叫我簽名 ("簽名"係畫完畫最後嘅一個step)。我就用好差異同埋好懷疑嘅口吻問老師: 「吓??!! 簽得名嗱???　個鐵塔好唔得喎....... 我可唔可以再加多幾筆，修改吓先呀??」

老師見我咁為難，又唔願意簽名，都俾我幫幅畫再加工，最後老師都有幫手加幾筆添.. 不過講真呢，幅畫上鏡過實物好多架!!! 實物真係一般咋.. 最主要係油個鐵塔時，用色唔係好準.. 加上又唔夠技術，油得唔好.. 搞垮左幅畫囉.. @~@

喜出望外

雖然剛從印度返嚟，塊面嘅皮膚敏感又出晒嚟.. 本來唔係好有mood... 不過呢.. 當我今日練練吓琴嘅時候，收到老師電話.. 以為老師想改日期上堂 (雖然最後真係有改日期..) ，點知原來老師收到我考琴嘅成績單呀!!!

老師: 你今次考試唔係PASS
J: 唔緊要啦，都預咗肥佬...
老師: 你考唔到PASS 但你DISTINCTION喎..
J: 即係點先???
老師: 咁都聽唔出呀? 你有DISTINCTION呀!! 恭喜恭喜..

真係唔係好相信呀.. DISTINCTION 喎.. 我真係從來都無唸過... 我覺得合格巳經好好...

考試前因為自己覺得scale 應該OK，所以練習嘅時候就忽視左練scale.. 到考試嘅時候，個人變得好緊張，成個人都震晒，震到停唔到.. 考scale時拉錯不特止，仲有自創左唔存在嘅scale出嚟... 但係scale 都有76%呀... 而我一直無把握嘅aural 都有83%呀.. 練左好多個月嘅三首歌仔都分別有93%, 93% , 87%呀.. 全部都out of my expectation呀.. 我聽得出老師都好開心，我自己都真係開心到暈呀!!

老師話有啲考官好手緊喎，唔知我個考官有無俾愛心分數喎.. 我話:「一定有呀!! 如果唔係，我唔會有咁高分..」 所以我而家有小小"like"我個肥佬考官呀!!!

返嚟喇...

今次印度之旅行程真係好趕.. 而且每日都過得好"長"呀...

首先係星期三照常返工，到下晝五點離開公司去機鐵站Check-in後直接去機場.. 到機場一陣就上機.. 因為要就印度同事嘅schedule，要臨時順延一日.. 可惜改得太遲，Cathy巳經fully booked.. 要改搭Jet airway.. 全個business class 除外我同老細之外，全部都係印度人... 連飛機餐都係indian food.. 係全部都係indian style，無其他選擇.. 都未去到印度，就巳經開始我嘅indian 餐喇.. 真係有啲難受..

撘完六個鐘頭機，過埋關，再轉的士返酒店.. 返到酒店巳經係香港時間三點喇... 第二朝一早又返工司.. 老有conference call 同埋好多會要開.. 第一日等佢開conference call，開到兩點 (即香港時間四點半) 先去食lunch.. 同事當然同我地食印度餐.. 可惜我本人真係唔好indian food，所以不是太enjoy.. 慶幸我想食的都夠填飽自己.. 食完lunch，我同老細各有各忙.. 忙到晚上七點幾八點，同事載我地返酒店食dinner.. 經過印度餐廳，同事問我地會否想試吓.. 老細直指上年去過嘅餐廳: 「no, we want this international one, rather than just indian food」

我同老細睇完menu，大家都係揀返上年食過嘅dishes..
老細:「又係食番同一樣野，係咪唔係咁好呀?」
J: 「但係大家都真係想食嘛，唔怕啦..」
老細:「咁又係..」
J: 「一年先一次，當ANNUAL DINNER囉..」
老細即時大笑同埋好agree.. 所以都係叫番上次嘅dishes..

食完dinner 又返上房休息lu..


******************************************************

第二朝一早就做check-out，然後食過早餐就返office.. 今日老細忙於同當地不同department嘅人開會，我就繼續coach 同事執好嘅working papers，等佢地啲working 可以up to standard.. 結果都係做到成兩點幾先去食lunch.. 今次同事帶我地去staff canteen.. 因為我唔想食印度咖哩，所以揀左mexican food (canteen only serve indian/mexican food).. 但係cashier 話我楝嘅Tacos Sold out.. 我惟有揀narcos.. 但當我去攞order 時，哥哥仔offer 我both Tacos and Narcos.. 真係好喇，可以試晒兩款!!!

食完lunch大家又密密做.. 做吓做吓，又巳經八點幾喇.. 同事今次帶我地去食"CHINA FOOD".. 其實我地又唔係好keen食番中國菜，不過同事一早唸好要同我地去食，可謂盛情難卻，一定要去試吓.. 同埋總好過又食咖哩 =p 可惜mumbai嘅交通真係好鬼busy.. 去邊都好塞車.. 我地一來食得晏 (因為serve 得慢)，二來又好塞車.. 我地又好"just in time"返到酒店，趕得切沖涼，然後又怱怱搭的士去機場.. 因為又再大塞車.. 去到機場又巳經"忟水".. 忡有大排長龍入機場嘅main entrance...

過完好充實嘅四十八小時.. 搭埋飛機，唔止我本人返嚟屋企... 就連我塊臉嘅皮膚敏感又返嚟呀.. 又乾又一"dak dak"紅腫喇.. 搽緊上次睇醫生剩下嘅藥膏，希望可以控制到，同埋快啲好番晒就好喇....

乾花

近排小提琴老師除外拉琴之外，又重開始執筆畫畫... 上一期老師愛畫花，買左好多花嚟畫.. 啲花謝咗就吊起晒佢地做乾花...

上次上堂口痕問老師會否將佢地入樽.. 老師話都正有此意.. 今晚上堂嘅時候，見到老師真係入左樽.. 老師有多個樽，問我有無興趣揀啲乾花喎... 老師問到，我又唔客氣呀.. 入起咗佢地都幾靚吖.. 今晚又學小提琴，又有乾花帶返屋企.. 真係開心^^

Still WIP...

今日又畫左兩個鐘，嘻嘻，都仲未能完成哩幅畫.. 老師呃人嘅，一開頭又話六個鐘可以畫起幅畫.. 而家畫左八個鐘都仲未起好個鐵塔。 其實畫幾多個鐘都無所謂，之不過呢，近排佢地生意好左，成日俾人包左個場，搞到我地無得去畫，好多時都要隔個禮拜先可以去畫囉.. 今次畫完，又要等兩星期先有得再畫喇.. 不過下次應該可以完功.. 仲有呀，老師話個塔係用刀去畫喎.. 哎呀，唔知難唔難handle呢?? 點都好啦，真係好期待下一堂呀..

上岸派對'04

AA group4同batch 入firm嘅同事.. 相片攝於2004年8月13日.. 我地稱之為上岸派對.. 因為開始有人離開audit firm，(上岸) 投身commercial.. 留下的人覺得離開嘅人好幸福，所以就貼上開心笑臉俾走左嘅人... 開頭只係貼左幾個.. 跟住陸陸續續不段加多... 就連之前miss左無嚟影相啲都key番佢地係張相到架...

時隔六年多.. 而家只剩下一位未走咋... 我地個個一直都睇好佢，覺得佢會留到做埋partner.. 之後再將哩幅相於係佢間partner房入面架!!

p.s.
不過我唔知邊個畫左個audit tick mark 案係我個身到.. 唔知佢想tie 去邊度呢????

Depressed

我控制唔到唔喊呀.. 對眼喊到腫晒喇...
哩個代禱事項令我心情好沉重...
一心以為別人好幸福，唔駛返工，可以多啲時間陪BB.. 原來唔係咁呀... 人地有病呀.. 我好唔開心呀.. 哩個落差太大，真係好心酸...

再向印度出發

今日先發現原來下星期去印度喇.. 仲以為係再下個星期先去添... 老細今日仲話我地搭七點十五機，佢三點係公司開會，五點應該乜都開完，可以五點半同我一齊離開公司去機場喎...

原先老細話佢可能當日work from home，所以我仲唸住早啲收工，返屋企沖左涼先再出發.. 而家個如意算盤打唔響lu，而且當日變相係一個long long day添呀.. 因為返完full day work，就要直接去機場... 搭六個鐘頭機，預計零晨一點(即當地時間十一點)到達印度，做過埋關檢查，都要起碼二點先去到酒店呀..

抽水

從來只有我去抽BB水.. 今次竟然有BB抽我水呀!!

噚晚去探BB Chris，同佢玩緊嘅時候，BB Chris 無啦啦自發地錫錫我喎.. 真係俾佢"o冧" 死呀!! 無見三個月，BB Chris巳經大個仔好多喇.. 係little boy 喇.. 識行識走，仲要係走得好快添.. 又會有自己意見，指人帶佢去東去西.. 有時又會好肉緊咁哎，真係好鬼得意呀!! 唔知下次同佢玩時，佢仲會唔會錫錫我呢??

睡眠質數

近排嘅睡眠質數麻麻地!! 連續幾晚都發夢，仲要係發埋一啲唔開心，有意外，有人受傷，甚至有人死嘅夢。真係唔知做乜，發埋啲咁嘅夢。 有夢發，同時都代表我瞓得唔好，所以返工都特別攰.. 終於捱到星期五喇.. 今日book左做facial，唸住可以去"嘆"吓啦.. 點知我係嗰短短嘅休息當中，都有發夢呀.. 不過今次我唔記得夢嘅內容，只係知道自己有發夢.. 唔知今晚可唔可以瞓得好啲，無夢發呢?

Progress today..

今日又用左三個鐘喇.. 不過哩三個鐘嘅進度比起上一堂嘅三個鐘，係可以接受嘅.. 望落去都叫做complete 左大部份.. 不過依我目前嘅進度，估計都係要去多兩次畫室先可以完成哩幅畫 =p

另外，我今日終於可以拎我幅油畫返屋企喇.. 不過呢，老師話佢仲未乾晒架，要起碼等半年先至會乾透呀!! 仲要定時幫佢加上油，等佢地"襟"啲，如果唔加油，佢地好快會裂開喎.. 真係要俾啲心機去保養佢呀!! - 「加油呀!!」

新歌仔返嚟喇~

好耐無錄video lu.. 因為之前幾個月都係focus 嗰三首考試歌仔.. 雖然考試表演未如理想，慶幸我都仲好鍾意拉小提琴.. 不過考試之後嘅第一堂，我係明顯無乜心機.. 一嚟考試考得唔好，唔開心點都有啲嘅.. 二嚟，老師教嘅新歌仔同study 都鬼咁難.. 我拉極都拉唔好，所以當日上堂無乜mood 囉...

其實我好快就收拾好心情，只不過首study 真係好難搞，練極都拉得好難聽.. 而首新歌仔又係有啲難度嘅作品.. 過去一個星期，我都好努力練習架喇.. 無奈點都係無法子一take過拉完首歌.. 中間點都有少少甩漏，今日拉哩首歌仔，拉左四個鐘，終於有啲曙光喇.. 雖然都係有take 2，但係都叫做有進步架喇~

珍惜

今晚去左捧場Jackson劇團搞嘅福音畫劇 「記憶。末日」，估唔到係完場前嘅vedio見到自己!! 個vedio係播啲相片 (喻意藉得珍惜嘅美好記憶)，其中有張相係我受浸當晚影嘅相.. 我當時似為自己眼花.. 之後我仲見到Jackson同Ally係英國影嘅結婚相... 開始懷疑自己無眼花.. 之後Jackson 問我有無見到自己，佢仲confirm 我無眼花，佢放哩啲相，係因為佢覺得感恩嘅事係需要珍惜!!! 真係好感動~

P.S.
今日係facebook見到朋友仔 post左佢太太一張用緊iphone嘅相，幅相嘅description係.. "An Apple a day keeps the doctor away" .. 真係interesting!!!

Congratulations!!!

噚日收到Jaerok email，得知佢master 畢業喇... A big congratulation to Jaerok!!! 時間過得真係快，我仲好記得佢reconnect 我嘅email, 當時佢話畀開始重返校園.. 哩封email好似啱啱收到無耐咁，但其實巳經係一年多之前嘅事.. 話咁快又畢業.. 聽人讀書嘅時間，過得真係快.. 真係好戥佢高興呀!! 希望佢可以好快搵到一份理想嘅工作啦~

p.s.
自Penang training之後，我地哩十年都無再見面，但大家都有Email 聯絡.. 中間曾經有一年多失去聯絡，但慶幸最後可以 reconnect with Jaerok..

7th Painting

因為今次幅畫大部份地方都係要好不規則咁畫，對於我哩啲守開規則嘅人，真係好難搞呀.. 我真唔識得好隨意咁畫，變左我每一吓落筆，都係好刻意咁"不規則地"畫.. 用左唔少時間"扮隨意"，所以我今次進度比預期慢.. 用左三個鐘，都係畫左唔係好多咋.. 老師都話我慢左啲喎 =P

希望一如老師所講，今次習慣個畫法，下一堂就可以畫快啲啦..

我的油畫 - Done!!

今日又畫左三個鐘，不過我真係無唸過可以今日完成哩幅畫架.. 成幅畫只係花左四個半鍾咋，真係出乎意料之外。

我覺得用油掃畫的地方較易掌握，但一用刀刮的部份就真係好難處理。幅作品好似好ok咁，不過其實我唔係好滿意架.. 因為我實在太鍾意老師幅作品，所以畫得同老師嘅有出入就唔係咁鍾意囉... 我知我嘅唸法好唔要得，鬼叫我係先入為主喎.. 真係無計 =P

畫完畫，我又去學小提琴lu.. 自上次考試之後，我足足有成個星期無拉過小提琴!! 今日上堂唔係好在狀態，唔知係咪因為畫完畫個人攰呢.. 老師教左一首study 同埋一首歌仔俾我，今個星期我有排練lu..

愛得更真，關係進深

係今年約拿單團生活營嘅主題.. 哩三日兩夜嘅生活營，係一遍歡呼聲當中度過..

真係好多謝Lawrence牧師一朝早，長途跋涉，山長水遠由北角入嚟粉嶺同我地主持我地嘅周日崇拜。 亦都好多謝Catherine 同 Victor 兩位導師陪足我地三日兩夜，當中有好多真摰而又好爆笑嘅分享.. 更興起一股"Like" 潮呀!!!

Cellmate仲預備左一個好靚嘅生日蛋糕， 為三，四，五月生日嘅朋友仔慶祝生日添!! 你地睇個蛋糕係咪好靚先呀?! 睇番啲相，我覺得我地有啲似幼稚園生日會咁呀

震騰騰

可能真係太耐無考過試喇.. 入到考室之後，個人變得好緊張... 緊張到不停咁震.. 係手同腳都震.. 搞到拉都有震音... 唉...

因為實在太緊張喇.. 原來頗有把握嘅scale，竟然失手，拉錯晒... 小錯係在所難免，但係我犯嘅唔係小錯... 而係錯得好離譜嗰隻.. sight reading 反而俾預期可以(不過.. 都唔係好好嗰隻喎...)，aural 就唔肯定.. 三首考試歌就最平穩，不過都係有所失聲，無之前夾琴夾得咁利略.. 不過鋼琴老師話我拍子好左好多，只係錯左一個位喎.. 不過感情就無練習時候咁好... 唉.. 真係好失望.. 無眼睇呀... @~@

雖然表現未如理想，但我要感恩身邊有支持我，祝福我，仲有肯為我祈禱嘅朋友!!! 多謝大家俾我嘅支持同鼓勵。

我的油畫

之前幾幅畫，都係用塑膠彩去畫嘅... 今日第一次真真正正用油彩去畫油畫喇... 唔單止顏料有分別，用嘅畫布都唔同啲，會粗糙啲同埋硬啲.. 而且唔駛起草稿，一開始就上色喇... 今堂都好自己，好隨意去"油".. 我好喜歡老師幅畫，所以想畫... 但老師成日叫我唔好跟足，因為好難畫到一模一樣喎... 所以都冇乜reference佢幅靚畫.. 結果當然唔係好滿意啦.. 不過因為要比時間等佢乾，先可以再加下一個layer.. 所以今日畫左1.5個鐘就要收工lu.. 希望下一次可以油到我想要嘅效果啦~

經典

今日係復活主日，所以church送左隻復活蛋俾大家，等大家記念下主耶穌戰勝死亡而復活....

好可惜我將隻蛋放入手袋之後就無左件事... 結果.. 啲朱古力融左，仲要係融係我個lovely wallet 上面... 而家我個wallet多左個"復活記號"

當我post 以下message 係facebook status...
" Forgot to eat the Easter egg from the church... and it melted and sticked on my lovely wallet @~@ "

換嚟第一個comment係:"Oh no. It's nice orange flavor..." 繼而係有人"like" 我嘅status... 我睇完第一個comment，即時笑左出聲，真係唔該晒呀.. 無得食都知道係咩味... 好明顯人家可惜粒朱古力，多過可惜個銀包... 夠經典!!!! 但我唔明點解有人會"like" 我個status 囉.. 咁嘅遭遇，是值得like 嗎?

小綿羊誔生喇~

係... 之前我有"唸過"想今堂畫完哩幅畫...不過我只係自我妄想吓啫.. 估唔到今日兩個鐘內真係可以完成哩幅畫呀!! 成幅畫用左九個鐘咋，比之前幅帆船少三個鐘.. 真係好呀!!! 今日我仲揀定下一次畫乜添.. 下次將會試用油彩喇... 希望可以handle 到喇... ^^

飄忽

哩三首歌仔，我都拉左好多好多次.. 雖然音色上有少少進步，但係仍然唔夠穩定，音準都係時好時壞，好飄忽。 惟一安慰嘅係，鋼琴老師覺得我拉得有感情，所以都唔係太差掛.. 不過老師嫌我拉輕聲嘅地方唔夠細聲.. 如果大細聲做得明顯啲就會更好喎.. 但我心底裡想的是如果音準可以keep住就好喇... =p

峰迴路轉

噚日我已經將 "出iphone"嘅假希望well digested喇...

今日同同事食lunch嘅時候，同事又同我講起iphone喎... 同事話我知Apple shop 而家又接受網上訂購iphone喎.. 同事自己買完機，就極力聳恿人家買埋一份... 人家用緊個plan得好小data用，同事就聳恿人家買完iphone後，再upgrade 個plan... 不過同事哩個proposal 真係唔適合我喎，因為咁樣做同俾penalty轉台分別唔大...

點知今日下晝嘅時候，我本身用緊嘅台竟然打俾我，又話而家安排到幫我出iphone同upgrade個plan喎(機價全數回贈).. 最後我終於可以成功登記出機...

由滿心歡喜去upgrade iphone plan，到被通知本公司不再提供此項服務，感到失望之後，心情得以平伏之後，又再失以復得... 真係峰迴路轉呀!!!!

夾琴篇

清明節當日，得朋友百忙之中抽時間同我夾琴，我開始對三首考試歌嘅伴奏有所掌握.. 今日再同鋼琴老師練習，老師好似好滿意咁，佢問點解有咁大進步呀!!! 不過第三首歌仔嘅拍子仍然未啱晒，但係就好左好多喎^~^ 可見上次同朋友夾完琴，係有好大好大嘅幫助。 不過今次上堂，又多左另一個音準嘅問題要處理... 真係要努力操吓啲音準先得呀。 至於aural, 我唔識數節拍呀.. 就算真係俾我聽出個重拍，但我又clap唔到囉... 點算好呀??

假希望

早幾日打上台問，個staff 明明同我講有iphone plan.. 我可以upgrade現有嘅plan，重新簽24個月contract就得.. 佢仲問我想出16G定32G.. 又話分別要預繳幾多同回贈幾多... 等我仲好努力咁計吓，度吓，考慮吓咁.. 正當我決定出嘅時候，再打上台問.. 佢地又話無左iphone plan好耐，亦都無再幫客人order iphone好耐... 佢地可以upgrade個plan，但就無iphone喎.. 因為有好漫長嘅contract係身，要提早轉台，就要俾penalty.. 今次佢計出嚟嘅penalty 又俾上次計出嚟嘅多喎.. 變左哩樣又唔係，o果樣又唔係... 等我滿懷希望出新電話，點知又失望而回添.. =(

B-day surprise

我地team 過往都只會一齊食吓生日lunch... 估唔到今年生日，新同事買左個生日蛋糕俾我.. 真係有點意外

今日秘書mark左calendar 為"dept metting"，我真係以為有乜會要開，入到meeting room見老細打開個蛋糕先知咩事.. 亦開始明白點解之前同事W叫新同事記住佢係六月生日lu.. =p

2 hours again~

今日又係畫左兩個鐘就唔想再繼續lu... 兩個鐘只係夠我畫四棵細樹加一棵大樹，同埋幫遍草原打底.. 我估下次應該要畫隻羊咩咩，再加番啲草地，仲有幫四棵細樹加倒影... 唔知下一堂可以可以完成呢?

忙碌嘅生日週

"忙" 並唔係指慶祝活動.. 而係我嘅小提琴考試練習...

星期六 - 老師加堂幫我練sight reading
星期一 - 第二次同鋼琴老師夾琴，再練埋aural
星期二 - 有朋友杖義幫我做伴奏，同我夾琴
星期三 - 如常上堂學小提琴

一星期七日裏面，有四日都要出街學琴或夾琴，都可算係地獄式訓練呀.. 而且我四日都要帶埋部琴出街添.. 雖然好似好誇張.. 但係準備哩家野，多總好過小嘅..

大風吹

每逄生日月，都會收到不同品牌skin care 嘅禮物咭.. 今年其中一個品牌竟然唔係送自家嘅skin care sample，而係送bookmark喎，見佢好似好特別咁，所以我決定要redeem哩份禮物。

今日食完lunch，時間尚早，咪去IFC 攞禮物.. 　今次我係經exchange sqare 個平台去IFC.. 唔知做乜，個平台好鬼大風，吹到我個手袋不停向後反... 上緊梯級嘅時候，真係有被風郁嘅感覺呀.. 我不禁唸起以前出Job 有位senior問我:「你咁瘦，有無試過被風吹走呀? 你啲骨有無被風吹斷過呀?」唸起都好想笑... 呀，原來個bookmark成朵花咁架，好靚喎!! 真係好呀~

夾琴

今日係我第一次夾琴呀... 真係好鬼緊張架... 好彩一如老師所講，個鋼琴老師係好好脾氣嘅靚女。

時間有限，所以一去到就即刻開始夾歌仔。夾第一首考試歌時，鋼琴老師竟然話我嘅音準同節拍都OK喎，並唔係我講得咁有問題。 我就回應:「你聽耐啲就知架喇....」 因為我深信我只係一次半次OK.. 跟住到夾第二首考試歌時，部份節拍OK，但部份唔OK啦.. 不過夾第二次嘅時候，琴老師就話OK喎.. 不過佢提我要得再"綿"啲先好喎.. 因為首歌係要慢慢地，綿綿地，唔好拉得咁清楚先合題。

到夾第三首歌仔嘅時候，琴老師終於感受到我嘅節拍有幾唔得喇.. 凡係三拍以上的，我到拉唔足.. 但我好努力拖長架喇，一心以為足晒拍子，但結果都係rush左成一拍.. 夾左三次都未得.. 但時間又夠喇喎.. 唯有返屋企數好啲拍子，重點練習哩首歌仔.. 嘻嘻，我打算上小提琴堂嘅時候，向老師求救呀.. 要捉住老師同我練好哩首歌先得=p

既緊張又期待

今日收到老師通知，得知小提琴考期係四月二十七號... 仲有大約一個月就要考琴喇，知道係四月考期，又開始緊張起嚟添... 老師介紹左個鋼琴老師俾我.. 因為考試時要有鋼琴陪奏，所以要約一位鋼琴老師夾下歌... 同佢夾琴要成$300 一次，每次45分鐘咋.. 考琴當日要收double添喎.. 因為我節拍唔ok，應該要夾好幾次... 所以都幾貴呀!! 雖然係咁，但個心都好期待同人夾歌嘅.. 好想睇吓係什麼境況... 我個小提琴老師都recommend我早啲夾第一次，睇吓夾成點，等佢可以係我地上堂嘅時候再配合吓，再特別train吓我喎。所以我今日同鋼琴老師約好第一次夾琴時間喇.. 嘻嘻，我老實不客氣咁warn定鋼琴老師我嘅節拍好有問題，但佢好放心咁話唔怕喎，而且佢仲話會教埋我aural喎.. 所以都好期待夾琴呀!!

Progress today

今早返完崇拜，再係資源中心當值，又怱怱去學畫畫lu。可能因為無時間食晏，今日狀態不佳，畫左兩個鐘就唔想再繼續畫喇... 兩個鐘只係夠我畫埋啲雲同埋條河.. 我唔係好滿意今次幅畫添.. 畫極都覺得唔靚咁喎.. 可以點算??

壞機

我部手機好似想壞咁.... 之前試過接唔到電話，因為press極接聽鍵都無反應... 近日部手機仲會hang機，或者長期黑晒畫面，press極unlock 鍵都unlock唔到部機，今日仲會兩度自動reset添.. 其實部機都只係用左一年半左右咋喎，咁快就壞架?!!!

雖然我曾經心癢癢想過出iphone，最後控制到決定唔換機喇，點知部手機又開始扭計喎.. 好似好有理由換機咁，不過都係再睇定啲，睇吓係壞機壞得幾頻密先再算lu..

3 songs with new violin

買左新琴，就梗係要練番考試歌啦.. 不過都仲未好習慣部新琴，未做到將佢發揮得好好，所以都係要繼續努力，星期日要日拉夜拉先得...

5th Painting

今日行程可謂緊密.. 首先去買小提琴，不過去到嘅時候，老闆竟然唔係到!!! (明明約左時間架!!)，唯有同Doris 先食lunch，之後再去過.. 食完lunch，老闆終於出現，買完新琴，我就要去學畫畫喇~

今堂開新畫，其實一早決定要畫哩幅羊咩咩... 因為隻羊肥啫啫好得意，而且background 夠colorful，好開心咁... 我好快就畫好個sketch，老師都話ok，無野改.. 油個天空時都好地地.. 不過一畫啲雲，問題就出喇.. 我畫唔到卡通雲呀.. 唔知點解，畫畫吓就畫到成個三角形咁，起晒角，一啲都唔cute.. 而且啲colorful 嘅雲，用塑膠彩(點描法)係好難handle，畫極都唔靚.. 我見過其他學生彩畫靚好多呀!! 今日畫到灰灰地，不過好彩之前買到部新琴，整體興奮指數好高，所以就算畫得唔係好啱心水都無特別唔開心... =p