新髮型

之前成日心思思想剪下啲劉海(fringe).. 但我知道自己個額太窄，個fringe唔會好睇... 所以一直都係得個"恨"字，無行動。不過我最近把心一橫，決定去搞搞個劉海。


髮型師一剪短我前面一排頭髮，我就開始有點後悔喇... 因為真係唔掂呀... 髮型師話:「我知你而家好想摏自己個頭，不過我未剪完，我會再剪碎啲架.. 」 好彩剪完之都勉強可以.. 但係個人即時變得好細路女囉... 真係唔係好慣呀!!!

返到屋企之後，見到姪仔，佢竟然悍有地係定定地同我影相。 我個頭影相比真人好睇... 不過第二日瞓醒之後，就不受控制... 當姪仔見到我嘅時候，二話不說: 「姑姐，點解個頭髮剪得咁肉酸嘅?」 真係心傷呀... T0T

香港宣道會鑽禧聯合感恩崇拜

今日係宣道會六十週年聯區集體崇拜嘅大日子，大約30,000 人係香港大球場同心感恩崇拜，一同領聖餐，真係好偉大呀!!

今早8:30就同cellmates一齊食早餐，之後一齊行去大球場... 大家都好開心，心情就好似小學生好期待去旅行咁...

去到大球場都只係9:05左右，但都巳經有好多人到左喇(10:00先正式開始)。 收到崇拜周刊，知道係由北宣嘅蕭牧師政道，大家份外高興。我地好感恩被安排到東翼，正正係背向太陽。不然，我地就要被暴晒兩個幾鐘喇....

九龍水塘

今日天氣好好呀... 真係勁啱我地行山呀.. 自年頭同過Joann及Victor行山以後，一直都夾唔到時間，今日我地終於約到一齊再行山喇。 今次我地沿住九龍副水塘，九龍水塘行... 未開始行就已經見到好多馬騮喇... 不過只要你唔係拎住啲食物行，都OK無問題嘅。

沿住水塘走真係好靚，好舒服。不過中間上山嘅路都幾高，同埋好多梯級路.. 我一度行到個心勁跳 (好明顯係因為我個人少做運動啦)，好在停下飲下水就正常番咋。

哩兩個水塘其實都值得一行，只係略嫌佢指示唔係好多... 有時唔知向邊度行先啱囉.. 不過啱唔啱路，佢嘅風景都唔錯架。有山，有水，有樹喎，而且仲有大量清新嘅空氣... 行完山，個人都精神晒呀!!

今次行完山，仲去埋我未去過嘅廸欣湖添呀。傳聞中嘅廸欣湖係係無乜特別，只係得個湖，其實都真有其事。但係如果你有時間，沿住個湖散吓步，都幾舒服吖。

傳統型 (= 唔啱音)

雀曾經提過明明係屋企練得好地地，但一上cello堂時，就拉得唔ok... 其實我都好有同感... 好多時我係屋企練得都尚可以，但一係老師面前拉，就會變得好恐怖...

每次上堂老師都會幫我tune琴，同埋傾吓閒偈。今日同老師講開我會係Christmas eve 去報佳音，老師就問我嘅敎會係咪傳統型。 我同老師講曾經有朋友都問及我:「你間敎會係咪好傳統架? 呢... 即係啲聖詩歌詞唔啱音，同份譜唔夾果啲呀?」

今日當我拉scale (minor C) 嘅時候，真係唔知拉左啲乜出嚟，係屋企明明練到OK順暢，但今日表現真係差強人意呀... 老師話:「太神奇啦... 從來冇聽過一個scale 有minor 又有major喎... 」 當我靜過後冷再拉，雖然minor scale 番晒嚟，但係音準唔ok，所以老師就講笑:「我地係現代型，唔係傳統型，要啱音架!!!」

拉好scale 後，又到拉歌仔同study.. 首study明明練得幾熟架... 但係呢.. 一係老師面前拉，又拉到走晒樣.. 可能近排工作真係有太多啦，放工後實在好難再集中精神，所以成日睇錯琴譜.. 明明拉緊第二行譜，又跳左去拉第三行譜.. 好彩老師心情靚，我拉唔好都冇話我，仲好有心機咁教我添，所以我決定再努力啲練習，要拉好今個星期學嘅野!!!

2nd Painting lesson

終於等到今日喇，又係我同積奇蓮學畫畫嘅日子呀... Time really flies... 唔覺唔覺又畫2.5個鐘喎... 當我畫到啲樹嘅時候，我一度迷茫，但overall 係好開心架.. 雖然老師同積奇蓮都話我幅畫無問題，但係我真係唔係幾滿意我啲樹囉... 真係畫得好醜樣呀.. 幸好幅畫係影完相，係相到睇都尚算可以啦..

Violin Study

哩首Study 真係唔簡單呀... 我重覆又重覆咁練習左好多次... 拉到中段仲係會get lost... 未做到好流暢，但係好都好俾心機去練習喇... 今個星期仲有一首新歌仔要練，而哩首Study亦都有兩種弓法要練... 希望可以handle得再好啲就好喇~

地震

今日食完lunch, 返office做野後，不久大家都feel到震動，好似大貨車經過咁，但比佢更強勁。之後同事們都議論紛紛。當中有同事話feel唔到，但大部份同事都feel到個一剎那嘅震動。

之後，有同事唔知係邊到收到update，話原來係深圳后海灣發生黎克特制2.8級地震。記得以前地埋堂學過香港唔係地震地帶，照理係香港唔會有地震的.. 估唔到今日竟然feel到地震呀!

心情勁靚

其實我今個星期初因為工作上受委屆，一度心情底落，而且係office喊左出嚟...

但今日又因一個回憶令我整日都沾沾自喜而心情大靚喎..

九年前，我係一個oversea training入面認識一位韓國同事，大家都係group photo上面簽名留念。當年韓國同事簽名之餘，仲寫左句韓文俾我.. 同事話佢寫 "I love you"，當年我以為佢只係開玩笑，我一心以為佢係寫nice to meet you 之類.. 因為我唔識韓文，所以無從考究同事實質寫左乜野俾我...

今個星期，我地公司有位韓國同事嚟香港office 學習吓我地monitoring 嘅process.. 我把握機會叫同事幫我做翻譯... 原來佢講真喎... 佢真係寫左 I love you 架... 雖然我明白當年同事都只係隨便寫吓，未必真有其事，但我就因為哩件事沾沾自喜左成日.. 我都知道自己好傻瓜 =p

小夜曲

哩首小夜曲都練左一個星期，老師聽得出我有落過苦功喎.. 唔知係讚我定係安慰我嘅說話呢?!
首歌仔除左要換把位之外，仲有新野玩--笛音，就係尾手指唔駛壓到指板上，只要輕輕地撫摩到絃線拉奏的... 難就難在摩唔啱位又出怪音，摩啱位後又要好快按壓之前一個正常音.. 第一次玩笛音，都尚可以啦 (我自己認為.. =P)

清明上河圖

今早就同爸媽一齊入機場博覽館睇「清明上河圖」... 原來爸媽從來都未搭過機場快綫，亦都未入過機場博覽館。今次因為機鐵有優惠，兩老先肯去搭機鐵咋!! 真係多得世博會同康文署搞呢個展覽呀.. 爸媽可以搭下機鐵，又入吓機場博覽館... 雖然真係有好多好多人，又好逼人，但係爸媽都睇得好開心。我地仲發現行後啲睇，其實比行埋去睇係好啲，因為可以睇得全面啲... 我地都睇足一個鐘，睇完上河圖，我地就出番去銅鑼灣食晏，睇見爸媽咁開心，我都好開心呀~

Painting

之前見魚係facebook到upload佢同班friends學畫畫嘅相，見佢地畫得咁開心，我就講俾積奇蓮聽，估唔到原來積奇蓮都有少少興趣喎..問晒魚畫班嘅資料就去報名lu..

今日終於到我地去學畫畫喇... 真係好鬼興奮同期待架...

不過呢.. 當我畫緊個天空嘅時侯，真係有啲迷茫.. 因為好似好一遍粉藍，無層次感... 後來畫畫吓先好番啲... 但當我畫啲樹葉嗰part，畫到棵樹有小走樣，又向前傾... 老師走到我身邊問: 「你做乜咁沮喪呀?」我答: 「棵樹走左樣，好怪..」 老師又話:「哦, 咁唔係怪.. 你係哩度補幾筆balance番咪得囉..」 跟住老師幫我加幾筆之後，又真係ok番喎... 真係好祌奇呀!!!

我哩啲冇乜創意嘅，就畫埋啲好ordinary 嘅樹.. 但積奇蓮就有心思地畫聖誕樹.. 唔好睇我地幅畫好簡單咁，我地都用左兩個鐘去畫架!!!