X'Mas holidays - full schedule

今個christmas，節目真係多籮籮.. 比返工仲要忙，所以放完個xmas holiday，個人仲要攰得很呢!!

********************************************************************************

24 Dec

放工後，同Doris同埋布魯士去食dinner，補祝布魯士生日。係中環食完dinner，去左Landmark同IFC影吓相，之後就搭船過尖沙咀。係中環竟然唔係太多人， 嘩!! 一去到海運就人山人海喇，仲要係未行到海運門口，就巳經有鐵馬圍住，又要排一輪隊先影到相，同埋入去海運。入完海運，唸住經廣東道行去舊水警總部影吓相。明明就係對面之嘛，點知又封路，又要兜路走。差唔多行晒條梳土巴利道，先可以去返舊水警總部。一心影吓1818嗰棵聖誕樹，點知影左兩，三張相佢又熄晒燈。我地望吓隻錶先知，原來巳經到左聖誕節正日喇，真係唔覺唔覺就過。 隔左一陣梱樹又再著番燈，我地又影多一輪相，然後食埋糖水返屋企，返到屋企都巳經差唔多兩點lu。

*********************************************************************************************

25 Dec

今日做乖乖女，十點零鐘就帶左老竇同媽咪出銅鑼灣去鼎泰豐食晏，然後就行工展會。 今次係我地第一次去鼎泰豐，都唔知點乜菜好架，所以我都係亂點，叫左我醉雞、蟹粉小籠包、清炒白菜仔同埋水晶肉。媽咪點左酢醬麵，老竇就點左紅燒牛肉麵同紅油抄手。 除左個水晶肉麻麻地之外，其他都好好。 我問老竇好唔好食，老竇就好開心咁話好食。我問阿媽好唔好食，阿媽話都OK啦，不過佢竟然再補充: 「我覺得佢同霸王山莊差唔多，不過哩到就貴啲囉!!!」哈哈，都係傳統父母心態。所以請佢地食野，要記住唔好俾佢地見到幾多錢呀!!

工展會都幾多人，不過好彩未至於人山人海到行唔到路。老竇，媽咪志在行吓街街，唔係想入平貨，所以行左唔係好耐就返屋企lu。 返到家一陣後，我又要出發去wincy屋企打邊爐lu。 主人家準備左好多海鮮美食，除左牛肉同蔬菜之外，其他全部都係海鮮。有蠔、鮮飽魚，魷魚、螺、珊瑚蚌、帶子等等，真係好豐!!!

打完邊爐食到個個都飽晒，我地就開始玩pictionary，玩輸左就罰打二round 邊爐，打完邊爐，仲要食聖誕蛋糕添。不過個蛋糕(天使蛋糕)幾好食架，唔會太濟!! 食完蛋糕，我地又準備玩第二輪pictionary。主人家wincy好勁呀，連贏兩round，犀利!!! 玩完返到屋企都接近三點鐘，俾媽咪話我夜返 u~u...

********************************************************************************

26 Dec

唔知咪係因為噚晚食得太多甲殼類食物，個人唔受得，定係其中有啲海鮮未熟透，一早就巳經因為肚痛而痛醒左。好彩晒到，因為隨即肚疴，疴完又嘔添。不過嘔得唔暢順，唔左少少就嘔唔出，但係自己feel未嘔完，但又嘔唔出，好鬼辛苦。

今日係假期，冇醫生睇喎，見唔舒服，咪唸住食下成藥，瞓番多啲休息吓就會好啦，點知瞓極都係唔舒服。老竇知我唔疴同嘔，所以臨出街前都買左碗白粥俾我。 瞓到三點幾，起身活動吓啦.. 食完碗粥，唸起自己無時間練琴，咪拎個小提出嚟打吓歌仔... 點知拉左一陣咋，就feel到唔對路。立即放好個小提琴，坐番去餐檯到。一坐到就要嘔喇.. 我都再無時間反應，惟有嘔番係個外賣碗到.. 今次真係嘔突囉，個碗唔夠我嘔，不個好彩個碗外有膠袋。

今次明顥係嘔得出，嘔完我又去瞓吓，in a hope that 瞓醒會好番。我巳經瞓到食晚飯，但係我比晏晝更加唔掂。好冇胃口食野，真係食兩粒米都食唔落。 唉..... 聽日仲要去飲做姊妹添... 個人咁唔舒服，又食唔到野，唔得架喎... 所以都係去醫院睇急症打止嘔針先得。 嘩!! 我之前有十六、七個人等緊睇醫生喇，而且大多數人都同我一樣，拎住個嘔吐袋架... 等左個零鐘，終於到我喇，打完針都仲係好唔舒服，惟有早啲瞓啦.. 希望第二日起身無事，可以去做姊妹啦。

********************************************************************************************

27 Dec

好彩今早瞓醒個人好番好多喇... 起碼feel 到肚餓，有胃口食野，食完又無作嘔嘅感覺。 所以立即化妝出發去Daphne娘家做準備。 原來由我家搭的士去青衣都唔駛二十分鐘，都好快喎!!

接新娘當然要玩遊戲啦，班兄弟都好真好夠兄弟喎，個個都好玩得，都幾爽快。最搞笑嘅係，佢地竟然嫌少，唔夠皮，不過吉時快到，我地姊妹們都唔留難咁多，收左開門利是就算。新郎哥好搞鬼，預備左一張好精美嘅支票(歡樂滿東華嘅啲呢) 做支票交收儀式同埋影相。 事後新郎話其實佢地預我地再還價，所以佢再補番一千俾我地做開門利是。唔係錢嘅問題， 但我地對新郎哥嘅心意都好impressed。

雖然噚日先病完，今日又要早起，又由朝做到晚，但係我真係好enjoy，同埋好戥Daphne高興架... 尤其係夜晚婚宴個主題係"懷舊晚會"，都有唔少賓客跟住個dress code 而 dress up，所以都幾得意架!!!

********************************************************************************

28 Dec

老土都係咁話，今日係帶住一個疲累嘅身軀上班... 真係攰到爆炸.. 剛剛放完假，但又巳經好渴望再放假休息吓呀~

向印度出發

噚日做 appraisal 時，老闆話想安排出年我同佢去印度... 因為都有一年多冇去 site visit。 唔知呢，我咁大個女都未試過出trip，本來應該好興奮先係.. 不過今次係去印度，對於我嚟講就唔係太吸引，因為我擔心衞生問題...

不過開心嘅係.. 叫做有得出吓trip，有啲使命感。 同埋今次係同老闆一齊去，應該唔會太差掛... (以前因為同事唔想去台灣，唸住叫我代勞，但後來因為金融海嘯，公司要行cost control，所以出trip嘅事，免得過就免，所以一直都冇出過trip)

不過呢，噚日老闆都仲係話想出年四月初出發，今早又改話想一月底出發lu... 嘩，成件事嚟得都好快呀... 有啲緊張添!!!

<-- 老闆送的X'Mas gift ，係magnet嚟嘅，佢話呢句啱我喎...

嘉道理農場一日遊

嘩... 好日都唔做運動嘅我.. 今日同Amanda去左嘉道理農場... 我地本以為係輕輕鬆鬆嘅遊玩團，點知原來唔係... 搞手阿wing臨出發先同大家講係hiking，仲要係幾辛苦，多斜路同埋多梯級行.. 結果我地就行左成四個鐘lu.. 不過行吓山，呼吸吓新鮮嘅空氣，又出完一身汗，個人真係精神啲喎...

http://www.facebook.com/album.php?aid=143469&id=643747049&l=200fbbe025

聽日又開始上新嘅yoga class，唔知我仲有無力去hold 嗰啲post 呢... 希望唔會太震啦.. =p

不過呢我最擔心唔係聽日堂yoga，而係呢.... 今個星期六上日文堂時老師先同我地講話下個星期有Mid term exam.. 唉! 今個星期仲有密麻麻嘅schedule 添架.. 咁啱日日放工之後都有事幹... 都冇乜時間剩喇，真係練得小提琴又唔夠溫日本... 個心真係好忐忑... 唔知點算好...

Check-up

今早去左做body check.. 詳細報告就要等個零星期先有，不過都有啲初步結果

平時係屋企久唔久都有量下血壓，每次都OK 正常架喎... 但今日係診所到量，個上壓頗高，有成148，都唔知點算好... 視力測驗唔係好好.. 醫生叫我讀出綠色線對上嘅字，我同醫生講話我睇唔清楚，但醫生叫我試吓... 結果... 嘻嘻~~ 我一路講啲乜字，醫生就一路話: "果然係估估吓喎

跟住就係睇一連串驗色盲嘅圖，一直都好快就睇到嘅乜數字，跟住其中有一幅我認唔出有乜數字添，不知點算好嘅時候，醫生就話呢幅睇唔出先係正常

跟住就到聽力測試，我有好多高音（高頻率）都聽唔到，醫生個樣有啲擔心咁... 又問我細個嘅時候係咪係好嘈雜嘅還境長大... 醫生話以我嘅年紀，應該可以聽到較高頻率，但我聽高頻嘅能力近乎四，五十歲嘅能力... 嗚嗚嗚... 不過醫生補充，只係聽高頻嘅能力較弱，我所聽到嘅range 都ok，日常生活係唔成問題嘅。

P.S
iphone 嘅應用真係廣泛，今日醫生都係用佢部 iphone 幫我做視力測試同嘅聽力測試... 真係利害!!

姊妹裙

好友Daphne嘅非一般緍禮將會係月底舉行，主題係懷舊舞會。準新娘唔駛我地姊妹們著什麼姊妹裙，但係呢，就希望我地著得切合主題喎... 今次真係難搞!! 姊妹裙我反而有，懷舊嘅服裝我就欠奉.. 所以要約埋Amanda佢地去買衫。

結果，我地去左女人街嘅二手地攤買衫... 其實開頭見到咁嘅環境，唔係好想去揀.. 因為真係好殘，好舊.. 不過呢，Wincy 好勁，摷到啲好騎呢嘅衫，好嬌艷嘅粉紅色大荷葉邊裙，或者黃底大波點裙加厚shoulder pad o果啲呢，個 look真係好懷舊 ，其實係好老土至啱!! 真係得啖笑，揀唔唔落手囉.... 好彩臨尾摷到件旗袍，雖然好殘舊，佢地個個都話啱我，而且又真係好合身喎。 最重要係個款我接受到嘛..

我呢啲製作認真甘嘛，買完裙，仲買埋個波浪流海添呀... 實行嚟個夜上海look!!

急進

星期一夾到手指之後，雖然改左日子學小提琴，但我日日都有練琴... 因為尾指(四手指)腫左同埋劇痛，我真係用唔到佢去按弦線... 如果係拉平音的話，我就拉空弦代替，如果唔係拉平音，而係拉sharp 或者flat音，我就梗著用第三手指垮遠啲去按個音... 老師當然唔欣賞我嘅款自創嘅按弦手法啦... 今日嘅然上得堂，而且隻尾指又去左腫喇，按弦都唔係太痛，所以都係用番晒所有手指啦... (當然會就住度力去按弦啦)

我好鍾意呢期學緊隻歌仔架，所以就急不及待去練習，練開就唔願停，越拉唔好，就越想快啲拉好佢... 不知不覺間我就無再"就住"度力，成日好用力用尾指按弦喎... 練完琴就真係知味道呀....而家隻手指又好痛喇，又痛到連keyboard都唔打得喇.. 今次弊喇 !!! 都係怪自己太過急進喇... 真係要緊記欲速則不逹哩一個道理 @~@

好瘀

今日好唔少心呀，自己關門時夾到自己嘅手指尾... 真係好痛.. 痛左好耐!!! 今次夾得好傷呀，手甲即時瘀左不特止，連指背都發紫同埋腫左... 嗚嗚嗚.....

本來諗住attend 完個2小時CPD course，返到屋企可以再練吓小提琴甘嘛，而家唔拉得喇... 好彩今日放假，下晝都練過吓琴啫... 如果唔係，我就連續三日冇拉過琴喇... 唉... 仲有好多study 未練，新歌仔又未拉好... 好想練琴呀.. 唔制呀!!

驚喜

上週小提琴老師因公事要到英國出差，所以停課一次... 不過老師係之前一課交低好多練習畀我架... 今個星期終於有堂上喇~ 老師上堂話過會掛住我嘅，我都以為佢講吓啫，點知佢真係好有心呀，有買手信畀我呀.. 我都好意外呀，亦係我咁大個女，第二次收到老師送畀我嘅手信!!

放縱

上一週秘書姐姐因為患感冒，請左一個星期病假，所以我要做埋佢啲admin野。本來好努力咁清緊自己嘅backlog﹐本來稍有進展，但經過左哩個好充實嘅一週，自己都病左，失左兩日聲.... 好彩而家巳經好番晒 lu... 病好之後個人好放縱，成日藉詞買野奬勵自己。其實自己無做過乜特別好事，無野值得去獎勵... 但我就買左唔少野畀自己lu..

最放縱嘅就係.. 睇報紙見到哩個廣告，見到Sumsung Jet 出左紫色，個人就迷左落去。問下Senior G 有冇聽聞哩部電話嘅comment.. 原來佢太太用緊，佢話上網快，影相得，大讚ok 喎... 跟住我就去豐澤試吓部機，一拎上手，手感唔錯(因為佢冇iphone 咁肥，slim 啲，好拎啲)，touch screen 感應都好快，手寫認字都ok喎... 見價錢都係三千頭，所以就扑鎚買機lu... 成個決定買機嘅過程都唔駛半日呀，係咪誇張先!!??

買左部new toy，又花唔少時間去set過晒啲野... 之前都係用開Sony Ericsson，而家要重新適應Samsung 嘅介面同function... 其實我ok geh.. 惟一最唔好嘅就係電話薄嘅資料由Sony Ericsson transfer 去Samsung後，啲人名format 唔同晒，之前係「Apple Chan」，而家變成「Chan; Apple/1」。我真係唔鍾意佢亂碼囉，所以要將接近二百個人名改一次... >~<

咁部新機有wifi 嘛，我梗係要試吓上網啦!! 開頭同屋企個wireline router set 好之後IP Address 同MAC address，接通左，但又上唔到網 喎，去問shop啲人，佢地又一口咬定我冇入password... 但我屋企個router 都冇set password，何來有password 去入呢? 真係求人不如求自己，惟有自己再研究吓啦，好彩最後都畀我研究到... 之前一connect wifi，佢就自動setup個瀏覽器，但佢個setting 係漏晒靜態IP同埋靜態DNS嘅資料.. 亦都冇得畀你入.... 惟有自己setup一個，入齊啲資料後，終於可以上網喇.. yeah~

不過呢兩日忙於玩呢個new toy 而冷落晒我嘅小提琴呀，係時候要練習喇~

真相

一個我從未想過嘅原因，一直沒有去追尋嘅真相.. 一個我一直信以為真嘅理由，原來只不過是給打發嘅藉口..

零碎嘅片段，經過細心嘅思考，分析同串連，證據一一出現，細節一一重組，真相終於揭開.... 曾經是難忘嘅回憶，深刻嘅印象，如今只變為蕪湖嘅交待及虛假嘅理由..

醜陋的真相如今一一揭示，令我一直懷念嘅童話都幻滅了... 原來自己一直相信的，和事實卻各走極端。 失望是有的，個心唔舒服亦在所難免，但慶幸好快我又平伏下來了。要是我是在當年得悉這個真相的話，或者我會好嬲，激動好耐... 但現在巳事隔多年，震撼嘅感覺並唔强烈，好容易就接受到哩個真相... 看清楚真面目後，更令我放下心頭大石...

現在的我，再沒有傷感，也沒有留戀，沒有生氣，亦無任何怨恨嘅感覺.. 只怪當初太過天真，頭腦太簡單，太過唔sensitive吧....

Minuet in G

最近又學埋日文，老師開始教文法句式喇，老師仲會俾小測我地，所以都要花時間去溫習，時間唔係好夠駛咁。不過，我都係鍾意小提琴多啲，同埋而家學嘅歌仔唔再簡單喇，要花時間去練架，所以大部份時間都係練習小提琴 =P

呢首Minuet in G，我都練左好長時間架，終於成形喇，雖然都仲未掌握得好好，又拉得唔夠優美，而中後段又係有多好Staccato (跳躍嘅弓法)，以我嘅水準，跳躍時點到隔離嘅弦線係一啲都唔奇，但係自己都收貨喇...

Nick Vujicic

今日聽左一個佈道會，覺得好震撼，好感動，好感恩

Nick Vujicic ，一個天生沒有雙手，沒有雙腳嘅人，竟然如此樂觀，如此有心，為了令更多人認識主，甘願奔波各地做見証，到處傳福音。

其實Nick 並非天生樂觀，佢亦都有過情緒低落嘅時候，八歲嘅時候也曾一念之差，想過自殺。幸好佢唔捨得愛佢嘅父母傷心，不想他們內疚一輩子，所以放棄左消極嘅尋死之路。後來，Nick 有機會認識主以後，信主後他更認定殘疾是「上天的禮物」，佢認為上帝要藉他來激勵別人，為眾人帶來福祉。所以到處演講，決意將希望帶給大家。

Nick 演講無數，真係有唔少令人感動嘅真言，我無法一一記載，惟有借用朋友V 嘅節錄

1. If you pray for the miracle to happen, you could be that miracle to others
2. If I can save one more soul and that means I have no hand/leg, it is worth it
3.When there is a storm around you, fly above the storm and you know the sun is always shining upon us

以下有兩個關於Nick 嘅演講 vedio clips ，希望大家都可以being motivated!!!

變奏曲

最近學左首變奏曲，一曲分三個Variations。 首歌個譯名叫"優美的變奏曲"，但我就拉極都唔優美。 原曲係首比較慢嘅歌仔，但進入第一個變奏，主要係原曲嘅note與note中間多插兩個notes ，但全首歌嘅節拍就巳經變得急速lu。多插嘅notes 全部都係要係隔離線上拉弓，所以呢個變奏主要練習轉線技巧。

第二個變奏就係原曲加入不規則嘅pattern，其實我幾鍾意哩個pattern。不過有啲地方要一隻手指同時按兩條弦，我手勢仲未係熟練，所以好多時按唔好，導致走音，又或者只顧按好弦，又顧唔到平衡嘅拉弓，所以出現唔少廝殺聲。 至於第三個變奏，我覺得佢其實係第一個變奏嘅延續，主要係原曲嘅note與note中間多插三個notes，拉到最後，個結尾好得意，好有結束停頓feel。

A，I，U，E，O

噚日開始上我人生裡頭嘅第一堂日語班喇... 我地嘅老師係日本人，佢用英文受課，老師個樣好後生，而且佢嘅英文出奇地標準，一啲都唔似日本人講英文架!!! 老師仲好以略懂國語添，真係好impressive 呀!!!

老師一嚟就開始教五十音， 每個音讀幾次後就抽咭仔問番我地係乜... 我即堂只可以記到幾個咋，但啲同學仔好犀利，個個字都記得... 佩服佩服!!!! 第一個學左二十五個讀音，一共五十個字母 (因為每個讀音都分平仮名，同埋片仮名) 。 我開始發覺自己嘅吸收能力好差添，一下子記晒呢五十個字，都幾吃力喎， 人大左先去開一個新Language 真係唔係咁易...

好彩當初積奇蓮拒絕上intensive class 咋，而家上normal class，每堂上兩個半鐘，如果上intensive class，都幾難頂... =p

輕快嘅歌仔

對於我呢啲缺乏節奏感嘅人嚟講，要拉旋律輕快同跳躍嘅歌仔，真係好有難度，好難handle囉.. 音準巳經唔係好好，而家又要顧埋節奏，忡要係跳躍o個隻添，真係向難度挑戰呀。

好在我都算係有恆心嘅人，失敗多次之後都未有放棄或氣餒，不過呢就開始對自己嘅要求降低，因為都唔想俾自己太大壓力...

拉左無數次之後，開始有起息喇... 雖然跳躍嘅弓法仍然欠奉，但節拍巳經盡我所能表現佢嘅輕快架喇。我知道對於老師嚟講，都仲未逹標，但我自己巳經收貨喇... ^.^

Violin Study 2

呢排學嘅歌仔同Study都好鬼難呀... (我個人認為!!!) 首歌仔節拍超輕快及跳躍，我拉極都拉唔到佢嘅神緒。我巳經放棄做跳躍嘅弓法架喇，但係呢.. 真係拉嚟拉去都唔夠輕快囉.. 唔知幾時先拉得好呢首歌仔呢?!!

至於首study，拉左無數次 ，但係次次拉到中間就會斷左... 失敗左都有過百次，今日終於可以一口氣拉完全首study，雖然都係有音準問題同埋間中"甩甩咳咳"，但總叫做漸漸有氣息啦，都有番少少安慰吧。

溫馨提示 - O九新概念

日前秘書姐姐同我分享左一段剪報，我睇後都覺都幾有意思，所以想同大家分享一下，希望大家都好好過日子吧...

O九新概念
一個中心: 一切以康為中心
兩個基本點: 遇事瀟灑一點，看世糊塗一點
三個忘記: 忘記年齡，忘記過去，忘記恩怨
四個擁有: 擁有真正愛你的人，擁有知心朋友，擁有向上的事業，擁有溫暖的住所
五個要: 要唱，要跳，要俏，要笑，要苗條
六個不能: 不能餓了才吃，不能渴了才喝，不能睏了才睡，不能累了才歇，不能病了才檢查，不能老了才後悔

Violin Study

初初學小提琴時，學嘅歌仔比較短，通常都係一，兩行樂譜。所以通常一堂入面，老師都盡量教一個 scale，一首歌仔同埋一個 study，令課堂充實啲。 歌仔係比較有旋律嘅，幽美啲，好聽啲嘅。 而 study呢，係不斷重覆節拍，重覆某個 scale，或者重覆某些指法。

初學時，我比較喜歡拉 study，因為佢比歌仔長啲，感覺完整啲。不過而家學嘅歌仔都同study差唔多長lu，我反而鍾意拉歌仔多啲，因為佢地有旋律啲，好 feel 啲。

上個post 同大家分享左兩首歌仔，以下係一首我較早期學，而我又好喜歡嘅 study。

聽落簡單...

呢首聽落簡簡單單嘅歌仔，知唔係令我好Moody，上緊堂都喊左出嚟嘅歌仔囉... 雖然都係有音準嘅問題，但係節拍巳經近番啲架喇...

而嘅首就係我近期學左最長嘅一首歌仔，亦都係本人較為喜歡嘅一首...

Addicted

唔知係咪心理作用，我覺得飲完咖啡係會精神一點。

呢排成日都好攰，朝朝返到公司都好想瞓，唔係好夠精神，好難concentrate... 尤其係食完晏，飯氣攻心嘅時候，真係好難頂。漸漸地，我開始依賴飲咖啡..

以前並無飲開咖啡嘅習慣，但近排變成每日至少一杯。早上捱到唔飲，食完晏又會好想瞓，所以都係飲番杯提吓神。其實每次去沖咖啡時，都有唸起中醫朋友叫我少啲飲，但係結果都係沖左嚟飲。

好一句溫馨提示"Drink slowly"... 我都係時候節制下，唔好再依賴飲咖啡先得。 我唸我之所以覺得攰，都係因為瞓唔夠啫。 我唸係時候tune番早些少瞓，有足夠嘅睡眠時間，我應該可以精神啲嘅....

Just Salad

中環近排開左兩間Just Salad，其中一間係環球大廈，好近我公司。唔知係真係咁好食，定還是啲人貪新鮮呢，日日lunch time 都大排長龍。我兩位同事食過都大力推介俾老細，老細立即好雀躍咁揀定食邊款salad

我一向都愛食蔬菜，salad我當然都愛食啦。有日食lunch同積奇蓮講開Just Salad，發現原來積奇蓮好抗拒食salad當正餐。 (我之前淨係知佢唔鍾意食sandwiches, burger 當正餐咋.. 哈哈!!) 所以決定等我無lunch appointment 時就自己試吓啦

今日就有機會試吓喇，我買嘅時候巳有小龍尾，所以都等左一陣先買到。點知買完又有一倏更長嘅龍尾出現，好彩咋，唔係就有排等。 唔，佢都係sell 健康同埋多選擇為主嘅，可以買set salad，又可以買custom salad，平均五，六十蚊一款啦。不過佢個碗都算大，食晒一碗都真係好鬼飽架。

器樂事奉嘉年華

好高興可以參加哩個嘉年華，除左可以體驗教會敬拜活動，又可以欣賞到不同種類嘅器樂表演 (包組管樂，手鈴，弦樂，中樂，風琴，豎琴，管弦樂團)，我仲認識到一啲從未接觸過嘅樂器添。可謂一舉三得，真係好enjoy 同埋好滿足呀!!

今次係我第一次接觸手鈐呢種樂器。開頭我以為手鈴同三角鈴差唔多，原來唔係!! 手鈴個樣似聖誕鐘，唔同size 發出唔同音，一個scale 起碼要八個手鈴，所以要一team人演奏架。 我覺得手鈴嘅音色比較清脆，我會聯想起雀烏唱歌嘅聲音。你咪睇佢好似好簡單咁搖搖吓，原來每個人要負責好幾個手鈴，其實係好講求合作性嘅樂器。

<----因為以為唔俾影相，所以無帶相機，只能用手機影完再zoom in咋，所以啲質素好差。但不妨放大張相望望，攞個大槪印象嘛。

風琴演奏又係另一歎為觀止嘅表演 (演奏家並唔係坐定定咁彈奏，而係要手腳並用。雙手handle 三排keyboard，雙腳就顧地上o個一排keyboard 地下o個排keyboard都唔少野架喎 (見右下角小圖)，雙手彈keyboard嘅時候，真係好快，我覺得打字都打唔到咁快，何況係跟住琴譜彈呢? 風琴手速度之快，真係難以想像!! 你唸吓，上面彈得快之餘，仲要用腳彈埋地上排keyboard喎，真係勁!!! 唔講唔知，原來學風琴嘅basic requirement 要具備八級鋼琴資格或以上架 ，所以係超難架!!!

(我覺得風琴音色有電子味道，每一粒音都好重，好莊嚴咁，一聽就聯想到教堂)

豎琴嘅外型一向都好幽雅。 原來一坐豎琴有47條弦線，同埋有好幾個腳踏來調較flat或者sharp... 我覺得豎琴嘅音色好soft，好幽美，好古典，總之就好好聽啦。

另外，今次仲有機會聽吓中提琴嘅音色添，我覺得小提琴嘅音色較尖，較響亮。而中提琴嘅音色比較沉，無小提琴咁響亮，同埋無咁特出。 我還是比較喜歡小提琴呢!!!

Janet & her violin

攝影師久唔久都會問吓我影唔影相嘅，因為佢成日提議去酒店影之餘呢，又ｓｕｇｇｅｓｔ人地要著得ｓｅｘｙ啲喎，嘩！！！要咁樣，我點同你影喎．． 所以我次次話哩種唔係我嘅ｓｔｙｌｅ，次次都叫佢幫其他想咁樣影嘅人影。

再過無耐，攝影師又ｓｕｇｇｅｓｔ　同我個小提琴影相，今次當然無問題啦．．　約好日子去影相，之前又打風，又落雨．．．　好彩到影相之前一日，天氣開始好轉，但天文台嘅預測係有驟雨．．．　　有驟雨喎．．　　咁我個寶貝小提琴咪會濕水ｌｏｒ．．　唔可以架喎！！！　所以我都好擔心會落雨。　　到影相當日早上，睡夢中都聽到驟雨聲，而且都落得好大添呀．．　點知瞓醒佢就出陽光喇，真係好呀！！

嘩，唔落雨係好，不過太陽伯伯都係熱力迫人．．　　我同攝影師都一路影相，一路出汗．．　　真係熱得要命呀．．　　所以好快大家就冇乜心機影相ｌｕ．．．　加上攝影師仲有下一場要趕去影呢．．．　所以今次好快就影完相ｌｕ．．　

　

等左差唔多成個月，終於收番啲相喇... 不過今次影嘅時間短，又因為太熱冇心機影，所以我覺得OK嘅相就唔多喇... 不過都有一，兩相心水嘅，好過冇啦~

http://www.facebook.com/album.php?aid=118340&id=643747049&l=13418c80bf

　

紫色誘惑

今日意外地見到部Hello kitty 扭蛋機，好幾年前我都有"潛"過架，估唔到佢今年又出過。
所以我毫無豫疑就拎出張二十蚊去"潛"番兩個。 第一個潛出嚟嘅，無論款式同顏色都同我幾年前o果個好似架，潛完之後有唸過不如算數，好彩最後都係潛埋咋.... 第二個潛出嚟嘅個款好唔同架，仲要係紫色添，好靚呀!!!

潛完個靚靚Kitty 電話蠅，好滿足之餘，開始肚餓。唸左一陣都唔知食乜好，所以就求其去左麥當當。點知入到去買野食時，又見到有可口可樂玻璃杯換喎... 之前一早售罄，因為反應太過熱烈，所以再次推出，但係好似唔到地舖換唔同顏色。 哈!! 我今日去o果間麥當當有得換紫色呀... 所以我又換埋佢... 不過未有現貨，要九月先有得攞。 Yeah.. 之前唔知有得換，到我想換時都賣晒，今次無端端發現有得換，仲要係我鍾意嘅顏色，真係超開心!!!

上次學完小提琴，心情勁差!! 事後我去左買鞋!! 其實我都想買Open toes 嘅鞋好一陣子，只係我之前忍住唔去睇，唔去買。但當日心情唔好，失去自制嘅能力，一落堂，就入左鞋舖。 一見到心儀嘅 open toes 鞋，又要係心儀嘅顏色，仲要on sale... 所以買左佢lu... 雖然當日買完鞋並無減少我好down 嘅mood，但而家望住對鞋，覺得佢越睇越好靚，我越嚟越鍾意佢，而家見到對鞋反而會令我開心。

Yoga

最近Pure yoga 常常致電邀請我哩啲停玩左一排yoga嘅舊會員番去試新堂。好明顯又係拋磚引玉嘅推銷手法。但係貪心嘅我，見自己都好耐無做過運動，而其實自己都鍾意做yoga (只係之前嫌佢貴而唔再renew 個membership)，所以當佢邀請我上free 嘅workshop 時，我好快就應承上lu...



今日下晏上左個 hot yoga workshop，workshop 同平時上開嘅堂好唔同，除左個duration 會長啲，導師上堂前係會教書，講下理論先。雖然都有兩年多無做過yoga，今日上番，感覺仍然良好。其實我都有啲想做番yoga，不過佢地真係太貴喇... 以前我每個月俾太約七百蚊，可以在指定嘅centre任上yoga班。但係如果而家join番，每個月就要俾差唔多千一，另外仲要俾多一千蚊入會費。真係好鬼貴呀。

今次我好叻女，好堅決，無俾佢地遊說入會。我好直接話俾sales姐姐聽我係因為覺得佢地太貴而唔renew我個memebership。開頭sales姐姐都仲好有禮貌咁sales 佢地有好好嘅裝修，環境有幾舒適，設備有幾完善，又有唔同location可以揀。 但我當我一再强調，我只有一個理由唔renew，就係價錢問題。Sales 姐姐竟然變臉，反問: 「點解你會覺得佢地貴?? 你無理由會覺得我地貴喎.. 你都知我地嘅裝修，location 同老師都好多choice，你係到上yoga 其實係好抵，你嘅commitment越長，價錢會仲抵.......」 我覺得sales姐姐真係無解架，係貴就係貴架啦，我唔會因為你裝修靚，多老師, 多location而覺得你平架喎...

點都好啦，都賺左堂高溫yoga。 做完哩個yoga，出左好多汗，感覺好似健康左... 不過因為之前我係零運動量，一做就學人做高溫嘅yoga，會持別攰，啲手手腳腳同埋背脊一定會痛番一，兩日... >~<

Medications

噚晚太放縱自己情緒，任自己喊左好耐 ，今朝瞓醒，雙眼都腫晒.... 朋友V話我雙眼都腫得好明顯，有如係額頭上鑿住「我哭了」咁樣... 真係失禮...

身為我嘅朋友，counselor, 同埋psychologist，朋友V知我因為噚晚嘅事，再加上受到工作上嘅瑣碎事所困擾，表示會為我"配藥"... 我一心唸住藥方係多啲consultation time .. 點知原來除左consultation之外，仲有食得嘅藥.. 俗語話苦口良藥，但係我嘅良藥一啲都唔苦之餘，仲要係超好味。 唔到你唔信，食左自己喜歡食嘅甜品之後，心情真係好好多架 (當然要多得朋友們嘅安慰同關心啦!!!)

我而家個人鬆晒，再冇唔開心喇... 好感謝大家開解同關心。我會好好堅持架喇，但我唔會再俾太大壓力俾自己架喇!!!

Moody

今晚心情好down...

我從來都知道你付出多少不等如你可以收獲多少嘅道理，但我總以為兩者之間係屬於一個正比例。

近日都算得上係頻頻練琴，因為學左啲新scale，幾首歌仔，同埋一首study... 哩首study 拉左好幾堂喇，因為老師想鍛鍊我拉弓嘅速度，所以要我用唔同嘅弓法去拉首study.. 平日就練下scale ，歌仔同埋study，今個星期日，就專攻首study，練到手指頭又痛又痺添。 我嘅朋友擔心我push自己push 得過份，反而會減低我對violin嘅passion... 當時我仲好有信心唔發生係我身上，因為我好清楚自己有幾鍾意拉小提琴，好肯定自己唔係三分鐘熱度。

因為其中有首歌仔老師只係係上一堂臨尾拉左一次俾我聽咋，嚴格嚟講佢未教晒我架，係我靠自己練習，我都知節拍係我嘅弱項，但係我覺得我都拉得ok 似樣o架喇... 但係呢，一係老師面前拉就會緊張起嚟，平時自己練習時都係嘛嘛地，緊張親就拉得更差。

老師一句"唔係好得喎..." 今晚聽起嚟，特別難入耳.. 唸起自己學左都有十個月多，但仍然有好多不足之處... （拍子又唔啱，音準又未係次次都啱晒，按弦嘅手勢又有待改進，手掌唔夠鬆，握琴太緊，手指擺位硬係怪怪的，分弓又唔夠均勻.. ) 　我拉拉下琴喊左出嚟囉... 搞到老師一時間唔知點好...

我未致於放棄，但心灰係有一點點... 所以好down，返到屋企唸吓唸吓，啲眼淚不其言湧晒出嚟.. 忽然覺得自己缺乏力量，冇以前咁堅强添... 是我太累嗎?


**********************************************************************************************

喊左一大場，個人真係鬆左啲... 惟有再努力啲下苦功吧!!

愛. 比舞

今日同Doris 睇左場dancing performance。個peformance 叫《愛.比舞 》 (英文叫 B-Boyz & Ballerina) ，由一隊來自南韓嘅Gorilla Crew表演。

故事情節比較老土，主要描述一位醉心芭蕾舞嘅少女巧遇上霹靂小子，被他好有勁力嘅舞姿吸引。少女開始試著感受街舞，郤遇到一群有錢嘅hip hop 小子調戲，在場嘅霹靂小子們和hip hop 小子們衝突起來，漸漸變成一場場比舞.. 比舞嘅演出都幾精采，估唔到激烈嘅街頭舞竟然可以同優雅嘅芭蕾舞融合。

個performance 係中場同完場期間，隊crew都好識搞氣氛，所以觀眾們都好投入，反應都好熱烈。故事完結後，隊crew都有請觀眾上台跳舞，之後佢地又施渾身解數，再嚟一場場熱舞同高難度動作，所以個個都拍爛手掌。

其實我答應同Doris 睇哩場show時，我唔知道係街頭舞為主.. 入場見到場刊見知.. 本人最不喜歡hip hop songs，但原來睇街舞我係接受到嘅... 仲有好彩個performance 係有hip hop dance + break dance + 芭蕾舞架。除外芭蕾舞外，其他舞都好重節拍，女子們就勁扭腰，男子們好多倒頭自轉，單手倒立... 全場表演都好有氣氛，反應都幾熱烈，亦有唔少搞笑位，所以，我同Doris 都好enjoy今個performance 。

超感動嘅 House Warming

今日同Amanda 地去左Daphne 新居吃吃喝喝.... 平時見慣主人家爽朗嘅一面，又估唔到佢可以咁賢良淑德架喎....


原來佢都好重視我地今日去佢嘅新居，特登為我地下廚不特止... 不幸嘅係遇正大廈由早上會滯水，主人家為左煲羅宋湯俾我地，零晨四點就起身煲湯喇... 真係非常感動，好impressive呀!!!! 個羅宋湯充滿愛心之餘，真係好好味架!!! 除左愛心湯水，我地仲有一大兜美味嘅"鮮蝦雜果螺絲意粉沙律"... 真係好好味... 我以前唔係咁鐘意食螺絲意粉沙律，但主人家整得真係好好味.. 尤其係啲蝦，主人家有花心思去調味，真係好入味架，絕對唔係急涷蝦咁淡茂茂。 另外仲有愛心去骨雞翼，話明係愛心，又係主人家親自去骨，真係好有心思... 所以大為都食得好開心，不停飲飲食食同埋傾偈。


最後傾到十一點幾，明明話離開架喇，但落到街，主人家又想食埋糖水喎，所以，我地都係食埋糖水先走.... 冇法子啦，四個女仔，一聚埋就雞啄唔斷... 真係行到邊，傾到邊，開開心心過一天 =D

日蝕

今日係中國百年難得一遇嘅日全蝕，香港雖然只係日徧蝕，但今日我有幸今見到日徧蝕嘅過程。

因為逄星期三晚上都要學小提琴，早上為免帶住個琴同人逼地鐵，我都會比平時早四十五分鐘出門搭巴士。今日都唔例外，所以八點右左就返到公司lu.... 返到公司無耐，老細就開始行到我身隔離個窗口望望，話想睇下日蝕... 佢話見到，我開頭都唔信，又跟住佢睇埋一份。不過當時好多雲飄過... 但又好彩有雲幫我地過濾啲陽光，我地可以直接目睹日徧蝕嘅開始.. 之後所有雲都走晒，我地嘗試直望個太陽，但係日光真係太刺眼喇，我地無法再觀嘗日蝕。

過左一陣，多得律師同事，佢地個floor有同事有專睇日蝕嘅濾光膠片，佢有事要搵我老細傾，所以帶埋張膠片上嚟益我地.. 我department 輪住嚟睇，真係好清楚架!! 真係好新閒報導嘅一樣架!! 我隔離個窗口就變左一個境點，其他department 嘅同事都紛紛排隊觀看嘅個天文現象。 我等大家睇完，我都有再睇多兩次... 我見到個月亮點郁架!! 今次親眼睇到日蝕，真係好興奮呀!!!


***********************************************************************************************
以下相片係朋友V嘅朋友特登去杭州影到嘅日全蝕... 好靚之餘，真係好"堅"呀!!!

好味~

細細個，圓碌碌，見到就好想食... 個芝士蛋糕係爸爸，媽咪噚晚買番屋企俾我今日做早餐架... 噚晚見到，我就巳經想食喇...

今朝一開，嘩... 真係好正呀，質地好鬆軟，個芝士味唔係好濃，真係好好味!!!!! 雖然佢好似好細個，但係都好夠食架喇... 因為我都係眼闊肚窄，食剩1/4... =p 但係今朝食完佢，真係有好滿足嘅感覺架!!

一個人

今日又瞓到好晏先起身... 噚晚明明打緊風，今日到我起身嘅時候，巳經乜野風球都無晒lu.... 食完晏就開始練琴，練完琴都巳經六點鐘，見今晚屋企冇人，冇飯食，咪出吓街攞... 去到黃埔嘅時候大約七點鐘，個天都仲係光架，行左一陣吉之島，食埋麥當當，行番去車站都巳經八點半lu... 啱啱走左班車，等下巴土，跟住巴土兜下紅碪，再兜下土瓜灣....，兜成個鐘終於返到屋企.....就係咁無無聊聊自己過左星期日lu...

Tott's

個頭盤係一口荷葉飯，我地再叫左個三文魚當snack.. 主菜叫左龍蝦同羊架，最後叫埋個朱古力cake做甜品....全部都好味道，加上環境好，真係好滿足呀... 最開心嘅係知道朋友嘅一個好消息，非常之戳佢開心呀!!!

不過我今次都係蠢左，有同啲食物影相，但我竟然冇為身外嘅景色影相添... 難得今晚個境好清 (雖然之後掛八號風球.... 講開都算好彩，食完飯一返到屋企，先開始掛八號風球)

*************************************************************************************

間餐廳叫 TTOT'S，我仲以為佢係Top of the Town... 原來係Talk of the Town =P

White Cherry

唔講我真係唔知道有白車厘子... 真係要多謝朋友V share 左哩啲白車厘子俾我帶返屋企。 可以一嘗White cherries，一番到屋企就同家人一人一粒試食，覺得佢比平時紅色o果啲車厘子淡，但係佢地勝在超爽脆。

等到大家食過晚飯，嘆夠電視，我地再一齊食啲車厘子。呀，今次食落又唔係咁淡味喎，食落覺得佢都好甜o架喎.. 又多汁，又爽脆，真係好好食架.. 真係要多謝朋友V share 咁正嘅水果俾我試...

雖然個名就叫White cherry，個並唔係白雪雪，佢係黃黃地，帶少少紅色，好似糖果咁.... 好可惜，由於我太心急試食，食晒先醒起冇同佢地影相添.... =

P.S.
我仲以為佢地係來自日本添，原來佢地係來自美國架... 今日朋友V都有叫秘書姐姐試吓哩佢地，所以我借左兩粒嚟影相。不過哩兩粒都係紅色佔多數，其實有啲車厘子係黃色佔多數架，好特別架!!!

***********************************************************************************************

今日代朋友V將車厘子交俾積奇蓮，見佢啲車厘子淺色嘅多，似"白"車厘子啲，所以又借左嚟影相... 嘻嘻...

痛到痺

今日返工唔小心被大櫃筒夾親手指，好痛... 今次夾得好應，左手除左大拇指，其他四隻手指無一幸免... 真係痛到痺一陣。 但我估唔到，我痛之餘，個腦只係擔心拉唔到小提琴喎... 之後唸番起，先發覺原來自己真係咁鍾意拉小提琴。

南丫島半日遊

之前公司Staff club 出左memo搞哩個暢遊南丫島索罟灣+食海鮮團，見好似好好玩咁，咪Send emails 問Amanda有冇興趣，同埋叫佢問埋阿Wing同Daphne.. 佢地個個都話有興趣，所以就報左名，又好好彩被抽中，好開心咁話晒俾佢地聽有得去啦... 點知臨Weekend嚟打風，一度擔心因為天氣惡劣而被取消行程... 雖然搞手話有八成機會去得成，但係都擔心落大雨嘛...

但係今早一起床竟然係好好天喎，真係意料之外.. 心情大靚啦之餘，我心唸I'm blessed... 由我出門口，到集合我嘅朋友，上船去到索罟灣，個天氣都係好好，雖然未至於陽光普照，多雲得嚟有風，反而好舒服。

我地首先去到"漁民文化村"，主辨單位叫大家自動分成三組作小組參觀。每大約三十人跟一個漁村負責人參觀。我地首先認識下雞泡魚，海胆，海星，魔鬼魚等動物

之後再睇其他海魚，途中忽然落起大雨，不過我地跑雨步就到有Shelter嘅地方避雨兼休息。雨落得大，嚟得快，亦停得快。雨一停，漁村負責人又帶大家到其他地方參觀。我地參觀同了解左一啲關於漁泯捕魚嘅工具同方法，之後我地又參觀過水上人居住嘅漁船，最後仲有機會試吓「無鈎釣魚」方法。不過啲魚太大條喇，我地無人夠力釣上嚟

了解完南丫島漁民嘅文化之後，我地再搭船去食我地豐富嘅海鮮午餐。今個lunch 真係好豐富o架，有白灼蝦，上湯焗龍蝦，清蒸鮑魚，粉絲蒸元貝，大海班，椒鹽焗鮮魷，水煮蜆，咕嚕肉，清炒時菜，炒飯，干燒伊麵，同埋水果盤。全部都好冶味，個個都食到好滿足。

其實我地食lunch 時又落好大雨，但又係係我地食完晒就停雨喇。我又再想起上次去滘西洲一樣咁天公造美.. 上次都係睇完同事打波，出番去西頁碼頭先落雨。 今次雖然中間活動時都有落雨，但係大家都可係有瓦遮頭嘅地方避雨，同埋參觀，都算係唔錯喇。 我深深覺得 I'm blessed =)

其他相放左嘅以下嘅link:

http://www.facebook.com/album.php?aid=105072&id=643747049&l=09c42640b4

是次活動完畢之後，我地再入東涌，去Amanda 屋企參觀同埋傾偈。傾到晚飯時間到都仲未完，不過我同佢地住得太遠，所以都唔可以太夜走，所以未傾完都要去食晚飯先。 是次晚飯都好豐富呀，而且都好好味添呀.. 今日可算係盡興而歸!!!