演唱會

今日放工途中，突然唸起我睇過嘅演唱會。其實我所睇過嘅演唱會都幾有限，以下就係我有印象的:

2002 年李克勤「情情塔塔」演唱會 -- 我很喜歡，克勤唱功好人人都知，但我當時冇唸過佢會操fit自己同埋都有少少勁舞睇，唔會只係聽好冧嘅慢歌，佢唱快歌加埋跳舞都ok喎，我真係好喜歡哩個演唱會

2003年張學友「音樂之旅—壓軸篇」演唱會 -- 睇哩個演唱會係一個surprise，因為友人一直都冇同我提起哩過，佢只係如常接我放工，帶我去尖東食過晚飯，走過天橋時，他帶我向紅館方向走，走到紅館入口時，他才把門票拿出時入場，當時我才知道的。學友又係好唱得之人，佢唱歌真係一流。我一直都以為學友唔識跳舞，我估唔到佢都排左好多快歌畀大家欣賞。佢一路跳一路唱，都依然係十分好聽，真係同聽CD差唔多。惟一唔同嘅係，唔完一輪快歌加熱舞之後，你會聽到學友嘅呌氣聲。(因為CD唔會聽到的)

2003年陳慧孄「珍」演唱會 -- 一心唸住佢係實力派，應該好好好聽的，反而有一點點失望。可能因為佢年紀大左啦，我覺得佢唔係好夠氣咁，啲歌唱得唔係咁好。聽現場同聽CD係有分別的... U-U

2006年關淑怡「關於我」演唱會 -- 不是我要看的，也是陪友人看的。唔.. 冇乜特別之處，不過不失啦。

2007年光良「07'就是光良唱好音樂會」-- 曾經有一陣子都好喜歡聽光良嘅歌，如第一次，握你的手，童話，約定等等。光良都好合作咁係音樂會唱晒我喜歡聽嘅歌。 佢唱現場都ok的，惟一美中不足的就係成個音樂會比較普通左少少 (企係度齋唱，欠缺左視覺效果)。

2007年衞蘭「My First」演唱會 -- Janice ok 喎，我本人都好鍾意聽佢啲歌。我覺得佢都係唱得之人嚟o架喎，只係佢唱歌時太投入，有時啲面部表情好怪啫。 佢當晚唱嘅歌有九成九我都聽過o架，所以我好喜歡，好enjoy。 我覺得佢唱現場都好好喎，起碼夠忠氣，有感情先啦。


今年只不過係過左短短兩個月都未夠，我巳經睇左兩個演唱會喇

1月28日: 容祖兒「Star Light」演唱會 -- 兩個字，「正!!」同「勁!!」。最重要係佢夠大眾化，Joey唱嘅歌，大部份都係大家耳熟能詳嘅hit 歌， 由佢初出道時至今時今日嘅金曲都有唱出 (全晚只有2首歌我未聽過 -- 因為我太out喇~~)。加上Joey換左新排舞老師，跳左好多好睇嘅舞，加埋煙火效果，真係好好睇。

2月2日 :張學友「光年巡迴演唱會」-- 雖然巳經係第二次睇學友嘅演唱會，仍然都好好睇。 今次畀o3年那次多左好多勁歌熱舞，另外仲加入少少舞台劇嘅成份，視覺效果係比較豐富。真係要讚他唱功依然係fit到痺。惟一唔夠好的 (其實唔係學友嘅問題)，就係學友出過太碟，唱過太多金曲，真係有太多太多好聽嘅歌，短短三個鐘係冇可能將所有喜歡嘅歌都為大家獻唱。 等左成晚，佢都係冇唱到「你的名字，我的姓氏」...

嚟緊過多幾日仲會去睇郭富城舞林正傳演唱會延續篇2008添，唸起都有點點興奮呀!!! 老實講，城城一定唔係賣唱功，我都係想睇佢跳勁舞，同埋其他舞台效果啫!! 不過大哥就話城城年紀都唔細，跳得唔會特別勁喎，但係佢跳開舞，而且又唔係真係好老，點都仲有啲睇頭掛?!