音樂盒

今日同栢栢和阿May一起到珀麗灣探訪Winnie新居。Winnie嘅新居以白色為主，主人房只放了一將床，書房只有一個衣櫃同埋一將書桌。大廳有白色sofa 同埋一個電視櫃，一張餐桌，一盞水晶燈，好簡約同埋好有空間感。不過除左Winnie之外，我地個個都好懷疑，點解一間兩個人住嘅屋企，可以得咁少家具?! 真係好有渡假feel，唔係好似平日住開咁...

P.S.
圖中係Winnie其中一個音樂盒，我覺得佢好靚，好特別。嗰個圓圓地，有幾粒寶石係上面的，拎下佢，就會有音樂。如果你係隔離支長管望落去，就會好以睇緊萬花筒一樣，好靚架!! 我覺得哩個設計好有心思，值得一讚!

一個奇妙的聖誕

香港迪士尼已經開幕約一年多，我一直都未去過，但係身邊的朋友或同事全都起碼去過一次，個個comment都係一個字: 「細!!」。 雖然個個comment都係麻麻地，但係佢地張張相都影得好開心，好enjoy咁。

今次終於到我去迪士尼lu，仲要係係聖誕節去添，覺得好特別，好開心。雖然係聖誕節正日，但係人流冇想像中那麼人山人海。進入樂園入口，走到美國小鎮大街，剛剛遇上花車巡遊，好熱鬧。

睇完花車巡遊，再行不久，就已經行畢美國小鎮大街，進入明日世界。係「明日世界」玩左「Space Mountain」。我地坐第一卡，以為會好刺激，但係冇預期咁刺激，反而只係覺得好戳。之後，跟住去左玩「馳車天地」。沒有駕駛執照嘅可，真係唔係好識控制個軚盤，搞到駕車有啲戳。之後便離開「明日世界」。望下個Map，原來已經行左三分一個樂園喇，開始感受到個樂園有幾細!!!

跟住我地係「幻想世界」入面玩左旋轉木馬同埋旋轉杯，仲有去左「米奇幻想曲」睇左個好得意嘅唐老鴨3D探險旅程。帶住個3D眼鏡，睇到Donald係你面前走嚟走去，同時間你個坐位又會有一陣陣風吹出來配合，有時更有水花噴出來。最得意嘅係，當你見到一碟碟蛋糕係你面前，同一時間你又會聞到一陣陣嘅士多啤梨香味，真係好得意!!

離開「幻想世界」之後，我地又進入「探險世界」。入到嚟，「獅子王」歌舞快開始，但排隊嘅人龍亦不少，唯有skip左佢。一心想遊船河嘅我地，見到隊就排，原來唔排錯左，哩條隊係玩木筏，惟有照排啦，不過都幾無聊，個個企定定，停隻木筏飄去對面岸。既然我地畀人賣豬仔賣到對面岸，就行吓個「泰山樹屋」。(估唔到係樹屋入面見到自己個名，我當然有影低佢啦… ^.^ ) 行完樹屋，我地又坐返隻木筏返對面岸。之後我地坐返我地原來想搭嘅船 (叫Jungle River Cruise)，哩個森林河流之旅都ok，一班人坐係隻船到，艘船會載大家沿著整個「探險世界」歷險。沿途會見到唔同動物，有小型火爆場面，又會有水淺上身，不過最ok都係個船長講野夠生鬼，好搞笑。

跟住，我地去左「幻想世界」坐迪士尼樂園鐵路返美國小鎮大街。落左火車，我地就去位於「明日世界」嘅火箭餐廳食過快餐後，再玩多一次「Space Mountain」。 今次我地坐最後一卡，嘩! 原來坐最後一卡比坐第一卡還好，一來唔會咁戳，二來速度感强啲，比較刺激。

玩完之後，就去左搵米妮同高飛影相。由於米奇太受歡迎，人龍太長喇，所以冇同佢影相。不過我奇怪嘅係.. 明明係聖誕節，但我全日都冇見過穿著聖誕老人服飾嘅卡通人物，覺得有點意外。影完相，睇左「米奇金奬音樂劇」。但音樂劇都可以算係包羅萬有，大部份迪士尼卡通人物都有出現。期中有泰山表演，有啲以馬戲團表演，真係好精彩。而美女與野獸一環，有煙火配合，場面都幾華麗。

入夜時份，美國小鎮大街嘅屋頂都紛紛噴出白色肥皂泡，營造出好似落雪嘅效果，真係好有聖誕氣氛。可惜我仲未好識影夜景，捕捉唔到好似落雪嘅效果。

晚上嘅煙花滙演七彩繽紛，真係好靚，加上迪士尼音樂配襯，令我覺得啲煙花份外精彩。雖然部相機個memory 都full 左，未能將全個煙花滙演錄晒，但係我會將咁靚嘅表演，好好記住。

今年過左一個好有氣氛，好難忘，又好奇妙嘅聖誕，真係好開心，好滿足。

可愛的雞仔餅

一聽到"雞仔餅"，就好自然想起恆香或奇華造的，一塊黃黃地色，入面有白白地色嘅餡的雞仔餅。但係朋友R話係日本制的雞形餅。

因為以前曾經見過積奇係city super買過魚形紅豆餅，所以我以為佢跟那魚形餅一樣。但朋友R又話佢冇餡的，只係雞嘅形狀，所以聽完之後，我都只係聯想到佢地一塊扁扁的，平面嘅雞形餅(好似得意動物餅咁)。誰不知佢係一個個立體的，肥嘟嘟，咁得意，咁可愛的。

開會.. 開會... 再開會

近排工作好頻繁，排山倒海的projects，真係叫人喘不過氣來。 個個projects都話要趕year end之前上。但十二月中又巳經係freeze period。個個project 都唔會好smooth咁上到，總係有好多unexpected outcomes。一有怪野出現，而影响個progress，老細總係急躁咁問我地點解咁麻煩 (唉...我唸都冇人想架，大聲都解唔到個問題架喎)。一方面要出搵原因，另一方面個個project都要整progress list，又要montior 住個UAT，日日催我地去同user 做follow up，然後要update返 Head office，跟住又話要趕上system。

我都明白做project 係咁煩，但係head office 每個project 都有一team專人去跟，但係我地就只有我同經理兩個人去跟晒佢地咁多個projects。其實都巳經夠多野做，平日monthly 要做嘅routine task都巳經唔係好夠時間做，但老細成日話我地做唔夠control，成日逼我地去唸有乜不足。而家我真係好明白乜野叫做「有心無力」。前日放半日假去上堂啫，第日返到公司，個mail box 就巳經爆左，個Lotus Notes出現一遍紅海，有52個unread mails，我真係唔夠時間去睇，好不容易先將啲email archives & file 好，有位畀我覆email時，又要跟經理入老細房傾Project A 嘅progress。個meeting 入面老細總係raise 好多issues 畀我地follow up，開完會又巳經冇左兩個鐘， 坐低後想做佢啲follow up ，個file 都未load完，又要跟經埋再入老細房傾下Project B 個follow up ，一傾又起碼一個鐘，傾完之後又有一堆野等住去follow up。 翻查完好十幾二十個email correspondences之後，好不容易咁將Project A 嘅progress list update 好，老細又追擊Project C 同 D 嘅 progress.... 其實佢應該好清楚我地成朝都係同佢開會，邊度有咁多時間同步做多咁多野架?!

終於忙到星期五，有個周未畀自己去recharge 下。今晚放工之後同朋友R食左一個輕鬆嘅晚飯，因為朋友R較為健談，喜歡share 生活嘅點滴，又善於表達自己嘅想法，同佢食飯都好舒服，唔會有悶場。我地去左Califonia Plazza Kitchen食左意大利雲吞同埋墨西哥雞肉波菜麵，兩個dishes 都好好味。食完晚飯，仲去左食雪糕。個雪糕擺襯到成朵花咁，個賣相同味道都唔錯，幾好幾好。食埋雪糕真係飽晒，好滿足咁返屋企。

My favourite

今日食完晏去左萬寧，又見到哩個 Hello Kitty set (得返一哩個粉紅色咋，好彩!!)，都仲係覺得佢好靚，終於都係買左佢返屋企。

除左有個粉紅色嘅Hello Kitty 環保袋之外，仲有一包棉花糖，一盒草莓味脆心卷，同理一包手指餅。今日做緊聖誕promotion，好抵呀，全set都係HK$19.9。 好開心~~

返到office 第一時間話畀坐我對面嘅經理聽，睇下駛唔駛買畀佢個女，經理話已經有人送左畀佢個女lu，不過係紅色的，經理都話粉紅色靚啲架。 ^.^

數碼港

數碼港哩個地方，聽就聽左好耐，但我以前一直都未去過，只係有印象搭車時，見過去佢嘅路牌，但其實唔係我知佢係邊度。

今日多得朋友R帶我去"環島遊"，去左數碼港睇戲，第一次踏足數碼港，覺得好新鮮。可能因為數碼港嘅地點比較入啦，哩度比我想像中還要清靜，人流真係唔多，好有渡假feel，好 relaxing。開始明白Winnie話嚟哩度睇戲有幾舒服，有幾清幽。

急口令

今日學左兩句急口令:

1) 蜘蛛啲蜘蜘蛛絲黐住啲樹枝。
2) 郵差送信，迅速送出。

手信

今日收到 (抽到)一份好靚嘅手信，望落同摸上手都似係絹嘅質地，又軟又滑，但原來佢係百分百棉質手帕。個淺粉藍色好soft，好靚呀。我唸我都係唔捨得用多架喇，但係唔用又好似有啲嘥，用又驚會污糟，真係矛盾...

今晚明明係補祝Senior G 嘅生日，但結果係我收到手信，真係有點不好意思。係就係遲左少少，但都要係到再祝 Senior G 生日快樂，願望早日成真，成日都咁開心啦!!

Team Dinner

今晚好難得同自己team人一齊食晚飯，每人有三百蚊budget (當係departmental function)。原先同事K提議去食buffet，但係同事E話食buffet 只係各人各自出出入入攞食物，achieve 唔到 gathering 嘅目的，所以同事E就提議去Lama Island 食海鮮。

於是今晩大約六點九，我地成team人一齊走，(從來都未試過一齊放工，今日一齊收工，一齊搭lift，感覺好得意) ，成班人怱怱行去皇后碼頭搭專用船去索罟灣食海鮮。我地大約七點去到碼頭時，巳經有一大班鬼佬等緊船。今日只係星期四，又唔係weekend，但都有咁多人咁好興致山長水遠入去食海鮮，真係奇怪。

我地去左間叫做「天虹海鮮酒家」，今晚好豐富，九個人點左十二碟餸。有白灼海蝦，北菇扒西蘭花，清湯椒鹽瀨尿蝦，蒜蓉蒸元貝，羔蟹糯米飯，清湯浸花蛤，辣椒抄聖子，清抄貴妃蚌，咕嚕肉，清蒸海魚，(唔知係咩魚，係我地個法國同事亂指的)，上湯浸時疏，秘製黑椒蜜糖蝦 (哩個要推介，因為好好味!!) 。

今晚食得好豐富，只可惜沒有影相留念。

你張櫈係咪矮啲?

今日下晝我地成 team 人去飲茶，一坐低，同事K就好疑惑咁望住我張櫈
問: 「唉! 你張櫈係咪唔同啲?係咪矮啲架? 點解你好似咁矮嘅?」
我回答:「唔係呀，我坐喺度時，係會矮啲架。」
同事K奇怪地問:「咁奇怪? 點係坐喺度就會咁嘅?」
同事A問: 「係咪你未坐直呀? 坐直啲啦...」
我回答: 「唔係呀，我巳經坐得好直架喇!!!」
同事A問: 「咁冇理由坐係度會矮左架播....」
經理C忍唔住:「哎! 佢腰短腳長咪會咁囉。」
(其實我都唔係第一次坐同事K隔離，唔明白點係今日佢先察覺我坐喺度係矮過佢?!)

真係好得意，以上嘅提問，巳經唔係第一次出現，對上一次，都係喺酒樓發生。 當時由於唔夠櫈嘅關係，Senior G 同我就企喺度閒聊左一陣，酒樓職員好快就加左兩張櫈畀我地。
一坐低，Senior G二話不說，就望望張櫈，又望望佢自己張櫈，
跟住問: 「喂，你張櫈係咪矮啲?」
我回答: 「唔係呀，我地張櫈一樣架!!」
Senior G唔信，再望望兩張櫈，一臉疑惑:「唔係喎，你張櫈係咪唔同啲架? 你睇係咪爛咗吖? 真係一樣? 你張櫈係咪矮啲架?」
睇完都仲係好疑惑咁，重覆再問: 「你張櫈係咪矮啲架?」

大家同樣係我嘅同事(雖然唔同公司)，都係成日坐我隔離，大家平時又唔發覺，但一坐係酒樓，就會問同一個問題 (第一反應都係懷疑我張椅比較矮)，而且大家唔信嘅表情都係一樣，令我覺得好funny..

BBQ @ 25 Nov 2006

今朝一早起身，個鼻仲塞緊，唉....仲落緊雨添呀，點可以BBQ呀?

好彩天公造美，只係過雲雨，到我地集合嘅時候，巳經停左雨。大家九點鐘係尖沙咀集合，然後坐旅遊巴入天水圍綠田園燒烤場。由於頗耐冇見舊同事Penny嘅關係，幾乎全程車都係傾大家近況同埋睇相，唔經唔覺，就巳經去到目的地，望下個錶，都係早上十點鬆啲，真係好快。不過，行程明明講話個BBQ 係12點先開始架，咁早集合同埋入到目的地，為乜呢??原來大會準備左幾個集體畀大家warm up下。

其中一個遊戲，主持mark 好左三個圈，分別係香港，九龍，同新界，首先主持講出一個香港街道，大家估下佢係位於邊一區，然後就企係嗰個圈度。答錯即out，直到剩抵三位為之優勝者。各友人都話，今朝太早起身喇 (auditor 真係開心，可以晏返工)，唔係好想玩，不如我地自動放棄，可以企埋一邊休息下。 於是，主持講左第一個街道時，我地各各都覺得佢係位於香港區架，所以咪特登走左去九龍區囉。怎料個答案係九龍區!! 第二, 三條題目，我地都唔識，人地走，我地咪企定定囉，點知，都仲係答啱，主持則問我地係咪唔識行，於是第四，五條咪走左去新界區囉，又答啱左!! 到第六條時，為左快啲完，友人各自企，就係咁，Fian 同 Angela 就嬴左哩個game。世事就係咁奇，明明有心去輸的，反而嬴左。

玩完一輪遊戲之後，就係一個鐘嘅自己活動時間。我地首先去左玩水上單車，影左唔少相。因為冇太陽，唔係好晒，反而有一陣陣清風，都幾舒服，幾好玩。惟一美中不足嘅係，佢個軚盤唔係好聽駛，個個都話佢難控制。玩完水上單車後，見時間尚早，我地又去租兩架三人單車 (佢地個個都識踏單車，只有我唔識 >~< ) 。雖然只有半個鐘，我地各人都坐過晒兩架車同埋坐過唔同位置 (係得我未試過控制個駄盤)，不過真係好好玩。

時間真係啱啱好，玩完單車，又有得燒烤喇。我今次好叻呀，燒咗一對好靚嘅雞翼，個個朋友都讚我燒得好靚呀。Yummy~~ 燒咗冇耐，就開始落雨，好彩我地係係有瓦遮頭嘅地方燒烤，而且都係落左一陣，之後又好天喇。雖然我唔燒完烤，一班小朋水就開始撈金魚，個個都玩得好開心，尤其係當阿姐將一籮金魚仔加入魚池嘅時候，個個小朋友即刻尖叫起來。小朋友玩得高興時，各家長也肉緊起來: 「仔/女呀，你後面咪有金魚囉... 呢，哩度哩度... 前面前面..」

撈完金魚，就係分組活動時候，有耕種和風爭製作，由於Angela想耕作，我地一行六人就參加左耕作活動。嘩，個鋤頭都幾重架... 農夫嬸嬸向大家講解耕種四步曲，不過我地唔係好聽得明佢啲口音。大家一心以為係播種落條坑，於是埋頭鋤坑... 點知.. 原來條坑係當通道，用嚟行路咋，錯晒呀大家!! 勞動玩之後，大家對鞋同褲都沾滿泥漿，沖洗完一輪，就去咗隔離餵牛牛同羊咩仔。我地係度都影咗唔少相，同埋餵到唔拾得走。直至領隊話時間差唔多喇，要返上車走喇，我地先肯走。是次活動完畢，晚上，我地幾個仲去左旺角譚魚頭打邊爐，

今日過左一個好充實，好勞動，同埋好開心嘅一個周未，首先要多謝 Fian 邀請我地哩幾個AA Legacy去join 佢新公司搞嘅function，畀左一個機會大家當做mini-gathering。

慶幸有位喜愛胡亂影相嘅朋友，大家先有咁多張相睇翻咋~~
http://good-times.webshots.com/slideshow?ID=556022634&key=NWReIz

打針

上兩星期register左打防流感針，今日終於有註冊護士嚟我地公司喇。噚日我都仲好地地，今日就無端端傷風起嚟，有同事話病左唔可以打針，但我又好想打針，惟有乖乖地係張declaration form 度 indicate 我有輕微傷風。

下晝上左去meeting room打針，護士姐姐有點擔心咁問我點解 tick左話自己有病架? 我話畀佢聽我只係有少少傷風，佢跟住問我除左傷風外，有冇咳嗽，頭痛，發熱或周身骨痛。了解完我個身體狀況之後，護士姐姐首先幫我探熱，好彩我冇發熱，如果唔係，就冇得打針，要等下一輪先可以再打。

探過熱後，護士姐姐仲解釋畀我聽，話我雖然冇發熱，但因為我有少少傷風，表示我身體唔係最佳狀態，好有可能會有少少唔舒服，如輕微發低熱，流鼻水，頭痛咁喎。要記得要飲番多啲暖水。打針之前，護士姐姐問我之前有冇打過哩啲針，我話有時，佢就好放心咁話，好啦，我幫你打針架喇，放鬆啲，好快就打好，話咁快，我就feel到佢支針篤左入肉，不過，護士姐姐好好手勢，好快打完，唔係好痛咋。我覺得今次個護士好有禮貌，好親切，有耐性，解釋詳盡，細心唔求其，我仲好滿意佢嘅手勢，要畀十分佢呀!!!

打完針之後，個傷風真係勁咗少少，希望快啲發晒啲病，早啲好翻啦!

當電話遇上門匙..

今日發現我個電話後面個喇叭網爛咗呀.... 個電話都未用夠一年，我自問都好錫住佢嚟用吖，點解都會咁快爛架? 雖然佢一樣function到，又冇大礙，但係點都有啲唔開心。惟有下次要記住電話要同門匙保持距離。

是第六感還是烏鴉嘴?

今日係公司做做下野時候，心血來潮地唸起天氣開始乾燥，要小心啲... 唉，都未唸完就有paper cut。 真係話都冇咁準! 都係時候買返支hand cream 擺係公司先得。

經典地鐵車票

今日收拾自己間房時，無意間發現哩兩張地鐡車票，係我讀中學時候用的唷，哩兩張車票都起碼有十幾年歷史，夠晒經典。收埋左咁耐都仲咁新淨，真係有點意外。

右手面比較colourful 嘅一張是舊款一點，左手面嗰張係較後期才推出的。

媽媽的小手作

早幾年，媽咪都曾經沉醉於串珠仔，當時作品有球狀鎖匙扣，星形鎖匙扣，不同花紋嘅手鍊同介子。

巳經停左好幾冇串珠仔的媽咪，近排又興翻串野，而且仲係向難度挑戰，串左好似嘅史納莎狗仔同傻豹後，仲串左哩對韓版 Hello Kitty & Dear Daniel。媽咪冇偏心，一共串左兩對，一對畀佢個寶貝女我，另一對就畀佢個未來新抱。

粒粒粟米

哩排鍾意左食麥當當嘅粒粒粟米，你睇你睇，佢地大大粒，脹卜卜，甜甜地，又爽口，好好味! 粟米加埋牛油，真係絶配。

我曾經向我嘅朋友同同事推介粒粒粟米，好可惜，個個都話要on diet，個個嘅第一反應都係:「嘩!唔好喇，啲牛油好肥架。」真係冇癮.. 哩個究竟係乜野世界?個個都話怕肥，哩樣唔食得，嗰樣又唔食得!

瘋狂

我同二哥女朋友都幾投契，一來可我地年紀相若，二來可能我同佢都好鍾意Hello Kitty吧 ... 有日我地約埋一起去行街。我地行左花園街，大家都買左件又靚又抵嘅白色抓毛外套。當日，二哥女友真係大豐收，入過嘅店舖都有收獲。

行完花園街，我地又入左去聯合廣場，之後，我地走左去行瓊華中心。係一樓嗰度有間專賣日本卡通嘅精品店，我曾經係嗰度見過一個好靚好靚嘅Hello Kitty ipod套。今次，我又不禁停低想望多兩眼，不過佢巳經被人買左 lu，冇得睇添。 同二哥女友提及哩個 ipod套時，佢都話見過，覺得佢好靚，好想買左佢返屋企。 佢仲話，見到個 Kitty ipod套時，有唸過為佢而去買部 ipod，佢話真係唔係幾好意思話畀人聽，怕畀人話佢傻... 我立即話畀佢聽，其實我都曾經有同樣嘅想法。雖然，大家最終都冇買到個套，好似好理智咁。但其實，曾經有為左個 Hello Kitty 套而買部 ipod 嘅念頭，實在太瘋狂，太離譜喇 !! 我唸都冇人會傻得過我地....

Yumi

沉日同爸爸媽咪去飲茶時，媽咪講起話想食咖哩蟹，今日爸爸同我都唔駛返工，於是就一起去食。

爸爸同媽咪之前嚟過食幾次，佢地讚口不絕。今日佢地帶我地時，剛好有卡位，唔駛等位。weekdays去食真係好抵食架，食滿一百蚊 (不包括特價午餐)，就可以以特惠價(HK$29.8)食哩一碟咖哩蟹喇... 碟蟹原價係HK$118架!! 真係好抵食架，而且仲係好好味!! 啲咖哩汁最啱用嚟餸飯....

好開心，食左個好豐富嘅lunch，包括菠蘿海鮮抄飯，香芒蟹肉抄飯，泰式抄蜆，同埋馳名咖哩抄蟹，Yumi ^~^

攰

一對新人要keep 住成日笑面迎人，企定定逐一和各賓客影相，人人都明白佢地有幾攰，有幾辛苦。 但我今日發現，其實最新苦的並唔係對新人，唔係伴娘，而係伴郎。

全日伴郎擔當著一個好重要的角色，接新娘時，伴郎負責接管女家親戚所送贈嘅禮物和利是。接完新娘後，坐在司機位隔離的伴郎巳經忙過不停，一邊監督其他花車是否跟得上，另一邊，又要keep住contact 攝影司，好讓佢地跟貼花車，取得有利位置為新人拍照。去到男家，完成所有禮節儀式後，伴郎又要安排眾兄弟姊妹用膳。之後，又要聯絡教會，check 下教堂是否 ready，隨後，便一齊往教堂出發。

行完禮，伴郎又揹著一袋，二袋行裝趕去酒店為新人check-in房間。去到宴會廳，伴郎繼續負責接管親戚所送贈嘅禮物和利是。但由於賓客眾多，利是數量也很多，伴郎要和其中一位兄弟定時將利是帶到3樓新人房間的safe去。，眼見伴郎整晚頻頻撲撲，真係好攰。 而且，伴郎仲要幫手安排坐位畀一啲 unexpected guesses，我好佩服佢一點怨言都冇，仍然樂此不疲。

而充當伴娘的我，相比伴郎，真係小兒科吧:-
1) 設計及執行"玩新郎"遊戲
2)為新娘打紅傘
3)確保化裝師準時到達教堂及酒店
4)跟隨新娘子，為她提起婚妙裙尾
5)代新娘拎花球，整理婚妙
6)定時為新娘子換晚裝及手飾
7)報告新娘媽媽行踪
8)保管新娘子的電話及銀包


P.S.
今日詩班唱了"一首讚美的詩歌" ，面對住一對虔誠的新人，覺得首歌好好聽，好感動。
讓那讚美的聲音 在這空間響遍
讓那敬拜的心聲 永不休止
讓我心中所有意念 此刻都交主的手裏
心中只想獻奉我深心敬拜

人活著 原是要歌頌讚揚
創造我的主 你是配得榮耀
人活著 原是要將榮耀歸你
一首讚美的詩歌 願帶我到寶座前敬拜

姊妹日

一講到金都商埸，大家都會聯想到籌備結婚事宜嘅好地方。哩排我都成日出入，首先係陪朋友去睇晚裝，然後陪哥哥買結婚用品，為自己睇姊妹裙，再陪媽咪睇奶奶衫。每次去親哩個商場都人山人海，同埋個個人都早有準備，手執一張二張list(如男，女家過大禮要用的東西，上頭用品，利是封等....)

今日，我又去金都商場，今次係陪Ada 去攞佢媽媽套褂。之後，我地就去左上環攞婚紗，唔知點解，星期五office hour，中環一帶都咁多車，交通唔係幾暢順。攞完婚紗，我地再返中環攞晚裝。雖然上次巳經陪左Ada嚟fitting，但係其中一件晚裝改得唔足，要即場再改，攪左大約半個鐘，終於fit晒Ada要求。攞擠衫之後，我地仲要去太古城攞篋，原來哩對準新人未有大size嘅篋去渡蜜月。

終於完成今日嘅妹仔任務，我又要立即趕陪友人D去旺角睇戲。今晚睇左死亡魔法 (The Prestige)，幾好睇，多謝柏柏嘅介紹。我事前冇去睇戲情簡介，亦都冇留意影評，但故事都幾新鮮 (對於我嚟講)，結果都幾意想唔到，劇情都幾緊湊，沒有冷場，真係幾好睇!!

睇完戲，我先同友人D 去左食車仔麵，食完麵，仲行左陣街，因為友人D下個月要做姊妹，又要陪佢睇下啲化裝品同埋鞋。今日去左好多地方，除左睇戲之外，所做嘅事件同係同結婚有關的，所以我稱今日為姊妹日。 =P

旗子

原來麥當當都有旗仔賣架?! 仲好大張添架，面積係 8cm x 9cm，幾得意，有幾隻顏色畀你揀，有紫色，有紅色，有綠色的。我今次隨手揀左張紫色。

二哥萬歲!!

我真係好喜歡玩Pheonix Wright Ace Attroney 哩隻Game，上次隻game一到手，就玩到唔停得手，日日都要開過NDS先至安落。 太鍾意玩，好快就玩晒，睇玩ending之後再冇新episode ，果一刻，真係有點失落。(我冇誇大架!!!)

早前，二哥話畀我知，原來日文版係可以揀英文嚟玩架，所以佢今日特登帶左隻Pheonix Wright2 畀我玩。 好開心呀，真的要高呼一聲: 二哥萬歲!!

今次要較慢一點嚟玩先得，唔可以太快玩晒架.... 如果唔係，又唔知要等幾耐先有新Game lu... ^.^

超大的菠籮油

今日二哥同佢女友帶左我同媽咪去左太子一個餐廳 (金華冰廳)。雖然間餐廳唔係好大，環境又一般，但係佢真係人頭湧湧。啲伙計行嚟行去，周身唔得閒。

小小舖位，人流極高，而且好嘈。真係好嘈，好嘈... 因為你落 order後，啲伙計係企係你隔離，用足宗氣向廚房同水吧喧讀你落o既 order...

嘈就係嘈左啲，不過個菠籮油真係大件夾抵食o既.. 你睇下，佢仲大件過麥當當啲漢堡包好多呀，我灘大隻手板，都唔夠佢大架!! 咁大個包都係五蚊，唔怪得會有咁多人嚟食啦!




伙計有趣對話-
伙計甲: 小姐幾多位?
客人甲: 四位
伙計甲: 四位，得! 我畀個卡位你地，你地埋嚟先，你睇，果個 卡位就得架喇，你再畀多30秒就得。 (隨即走埋佢卡位一邊收清理桌面)
客人甲: 得，立即數30秒，1,2,3,......
伙計乙: 唉，30秒係誇張左... 你畀多一分鐘佢地啦，佢地飲埋杯野就得架喇。

伙計甲: 幾多位?
客人乙: 兩位
伙計甲: 兩位，得! 埋嚟埋嚟。一睇就知佢地就嚟走啦，你地就企係哩度等先。

客人丙: 我個蛋撻仲未到呀
伙計甲: 哦，係呀，啲蛋撻賣晒，仲未出爐呀... 你再等下啦，一新鮮出爐，我地就會逐個逐個派畀你地，你地唔使緊張，我保證永不落空。

失望

期待以久o既泰國曼谷之旅真叫人失望。 我真係要back list 這個Travel agent -"Last minutes" 好一個"Last minutes" ，我o念個名就係佢地旅行社o既 vision 同 mission，凡事都要 last minutes 先做。 就好似今次個tour 咁，團費早在六月收了，但直到出發之前一日，都未有正式向大家公布大家o既fight number 同出發時間，只有叫大家要7:30am 之前到機場 counter C 集合。

沒有預早通知大家當地天氣，亦沒有提醒大家當地酒店不會提供牙刷牙膏，攪到好多團友要去酒店supermarket 搶購一番。 最離譜o既係，明明約左大家7:30am係 counter C 集合，但大家等左好耐都唔見有關人物出現... 唔打電問都唔知道原來轉左地點集合。 (I really cannot believe it.. by common sense, there should be someone stay at Counter C to inform people about the change of venue)

今次一行有120位同事及其家眷，公司將我地分成三組，其餘兩組都係搭泰航，而我地就搭國泰。當日國泰航班delay左少少，去到泰國上了旅遊巴，導遊叔叔就話我地遲左，而其他兩組都巳經去了第一個景點，話我地要等埋其他兩組一齊食lunch，所以我地上晝o既行程要取消喎，叫大家返酒店先... 同事們當然唔高興啦，最後我地食lunch 先，之後去番第一個景點。

第二日，大家去左皇宮。領隊叔叔一早就入了去，沒有理會大家仲係對面等過馬路... 全程，領隊叔叔同導遊哥哥都冇為大家介紹任何景點，佢地只係企埋一二角休息。(好勁呀!!) 好彩個皇宫都幾大，又有好多金碧輝煌o既建築物供大家影相留念。行完皇宮，我地坐左成個鐘頭車去野生動物園(Safari World)食lunch 同睇表演。 我地唔想係動物園入面食晏，所以決定離團... 結果，我地又搭左另一個鐘頭的士出返市中心 (大家太蠢 了，一早就應該離團，浪費了寶貴o既時間，慶幸係泰國搭的士唔貴，搭成個鐘都係二百幾泰株)

離團哩半day 係最開心，最充實，同埋最滿足的。我地一心去食海鮮，但去都人地巳經closed，要三點先再開 (我地大約1點去到)。惟有去過第二度食，我地之後就搭BTS，去Siam square附近一間餐廳叫"Nara"，食真真正正o既泰國菜。我班同事係好狼死.. 一坐抵，打開份menu就叫人落order，同事S 和 A正在一輪咀落order之際，同事I 就打開Menu 第一頁，對住個waiter 講"All 6 dishes please"，Waiter 哥哥呆左一呆先再幫我地落單.... 我想佢未遇過o的人客落order落得咁狼吞虎嚥。 食完晏，大家就行shopping centre (不過都係陪同事買野多，我自己一樣都睇唔啱，乜都冇買 ) ，行完街，我地又夠鐘食晩飯。之後，我地就坐的士去做spa & body massage o既地方。曼谷交通真繁忙，成日塞車，每個燈位都要等好耐先轉燈。 哩晚，大家試左個3個鍾o既spa，包body scrub，body massage 同埋 herbal ball，真係好舒服架!!

第三日，基本上沒有為大家安排什麼行程，但係帶左我地去一個好差o既local restaurant食buffet。 三位男同事出去攞左三碟野返嚟，大家都冇乜意欲去食，見到就巳經飽晒。 同事A及同事S 都有嘗試食架，不過都吞唔落去，吐返出嚟，話要"負十分" .. 結果，我地成檯人都有再食過任何野，就連水都冇飲過。 之後，我地利用去機場之前o既 free time 去左係Siam Paragon 入面o既銀都食魚翅。老闆娘剛從巴黎做完exhibition，心情好靚，幫我地o的飯加大，同埋送好好味o既糖水畀我地添。

去到機場，領隊叔叔用左成個半鍾為我地四十多人安排坐位，大家又再last minute 先可以上機，但最後，大家仍然係打散晒，甚至duplicate左添。 真係唔掂呀..

當地tour guide 精景對話:
1. 頭先果餐野食一般，真係麻麻地.... (點解佢好意思講出口架?!)
2. 我地而家去緊果個shopping centre 呢就嚟執架喇，都冇乜野行，好多商舖都搬去大型o的o既shopping mall 度..... (唔係呀... 你明知個centre都冇野行，仲山長水遠咁帶大家去嚟做乜先？？）
3. 大家住o既酒店係 Marriot Resort & SPA ，都係好好o既酒店。 返到酒店，大家可以睇下電視.. 不過酒店電視係要收費架，所以就唔好睇....... 不過，我巳經幫你地 cut 左要收費o既頻道，大家可以睇本地o既電視，哩o的唔收錢。 而家做緊齣戲好出名架，叫 "xxxx" (好似係泰文，我聽唔清楚佢講乜) ，呢... "xxxx" 個中文名係 "James Bond"，有同事一時忍唔住話 "James Bond" 唔係中文嚟架，係英文先o岩。
4. 大家可以抄抵我個電話，去到公共電話亭就可以搵到我。我電話有七個字，係喇，七個字。就係，大家記住喇.. 01... 01....... 01..... 01...... 484... 484... 6483.. 6843.. (起初大家點數都數唔到七個字，原來 01 係泰國Local call 個開頭...)
5. 黎左兩日喇，今日帶大家去食泰國菜，大家知唔知道泰國最出名o既乜? 除左椰汁糕之外，最出名其實係芒果糯米飯。不過呢，因為哩個甜品比較貴，所以我地唔包，大家冇得食架。 ( 事後，我地去左一間媲美Citysuper o既supermarket 入面見到一個芒果都係唔使100泰株，一包糯米又只係250泰株。真係想像唔到有幾貴... 話晒我係三日兩夜豪華團團費係 hk$4xxx )

原本以為可以為今次泰國之旅寫下遊記啦，可惜，今次遭遇實在太差喇，冇乜可以向大家介紹...... 好彩都仲有少少相影低，等大家知道我有去過泰國:
http://good-times.webshots.com/slideshow?ID=555296347&key=ZaVSrV

發炎

今日返左工冇耐，就覺得隻左眼有o的野咁，跟住貶眼時仲有少少痛.. 手多多的我又忍唔住用隻手去捽眼仔... 一捽就出事，個眼皮腫了。本來都冇o念住去睇醫生，但係隻眼真係唔係幾舒服，但係當我決心去睇醫生時，巳經係六點五十三分。記得同事話公司付近有個panel doctor 都幾好，就問佢攞左個電話，立即打去問診診幾點收。打去時姑娘姐姐話佢地收七點，於是我只好立即走去睇，去到診所剛剛係七點正!! 不過就仲有成三個人等緊。

我等左大約十五分鐘先到我，嘩.. 入到去醫生間房好大架，大過我老細間房好多添..(其實我好少去睇醫生，可能但少見多怪) 醫生問我有乜病， 我話畀醫聽我隻眼好似發炎，醫生就好失望咁問我仲有冇其他病... 我話冇之後，醫生就用個電筒照幾照我隻眼，之後話畀我聽可能係細菌感染導致發炎。 同時我又見到佢係我個病歷咭上畫左個眼同埋mark左發炎o既位置。之後，醫生再問我有冇其他病要睇埋.. 哈! 可能佢覺得我個病太小兒科，想再幫多o的忙吧。

睇完醫生，返到公司都巳經七點四十分... 都只係做得少少野，望下個鐘又巳經九點有多喇.. 腫左o既眼皮，令我覺得有點唔舒服同埋攰，所以未做完我想做o既野，我都係返屋企lu.. 希望食過藥，搽過藥膏，會快o的好番啦!!

小可愛

今日係我表姐個B仔滿月之喜，又有機會見下BB仔。 BB仔實在太可愛，個個對佢都愛不釋手... 今次見佢，佢又大個左少少，個樣又更加可愛。 對上一次見佢，就係佢剛剛出世三日大咋...

BB一直都係在睡眠狀態，由於太多親戚掙著抱佢，我成晚只好坐在旁邊望住佢。 直至食完飯，我終於有機會抱抱小可愛喇... 佢剛剛飲完奶，眼仔碌碌，一直望住我，因為好得意，抱左佢唔係好耐之o麻，媽媽就叫我唔好愛不釋手，要我將BB交番畀表姐。>~<

今天的戰利品

聽日係我表姐個仔仔滿月，今日特登去睇o的BB仔店舖... 件件衫都好得意，好細件。 不過大部份都係畀6個月以上o既BB，好難先搵到３至６個月果ｏ的衫仔．．．　　上次買左件９個月ｏ既衫仔畀舊同事個Ｂ仔，就畀另一個舊同事笑我買得太大。所以今次我點都搵一件係畀３至６個月大ｏ既先買，再加一件６至９個月（厚身ｏ的）ｏ既，我唸今次一定啱晒!!!

我的新竉兒

最初買左NDS Lite 時，二哥同佢女朋友係度時，就會一齊玩 "Mario kart" 或者 "Bomberman"。 平時自己就成日玩兒時最愛的 "Super mario brothers"... 日日aim at world 8， 玩完world 8 就轉玩 "Feel the magic"，幾得意，好多mini games，夠玩好耐都唔會厭。玩完normal mode，又完hard mode，以後自己唔使玩其他games 都好滿足之時，又有新game，叫做 "Brain age"， 又係好好玩，考腦筋，考計數，考速度等，每次可以玩daily training 或者brain age checking。

其實我仲未玩厭 Brain age 哩隻Game o架，但二哥又畀左隻幾好玩，幾得意o既 "Mario basketball" 我， 好不容易玩完normal mode.. 得到個secret character，好勝o既我又要玩埋hard mode，不過今次我冇理堅持..玩到最後一排，玩o黎玩去都贏唔到之際，阿哥又帶左哩隻新game畀我玩...

今次隻game 叫"Phoenix Wright Ace Attorney"。嘩! 真係好好玩，我好鍾意哩隻game.. 要做侓師，又要搜隻證據，要為疑犯找出有力證據，還佢清白。 今次真係addicted to it.. 晚晚幾攰都要開部機審一審或查找證據。但係巳經玩左 5 個chapters，我怕玩理冇得再玩，因為二哥話隻game total 出左 4 個series (日文版)，但英文版只係出左 1 隻，真係希望會出理另外3個series 就好喇 !

超越一百大關~

嘩... 終於過一百磅喇 =p... 咁大多個女都係keep住得九十幾磅，人人都話我太瘦，個個都叫我增肥。

記得舊同事B曾經問過我..."你o的骨有冇斷過? 打風o既時候，你有冇被風吹起過?" 同事B係好認真地問，並唔係開玩笑的... 那一次跟舊同事B出完job，要返從client 度返公司。舊同事B堅持要幫我拎電腦，佢話怕我係佢面前斷手喎... 真係冇佢符，不時自己出job落client度，都係自己拎電腦同其他文件o架啦..

以前B仔銀行o既senior又話我太瘦，要肥番o的先好，所以佢成日撩我食野，話要嘈肥我。結果，senior自己肥左唔少，但可惜我唔生性，都係咁瘦。而家我終於超過一百磅喇，要繼續努力先得。


P.S.
但點解淨係肥係塊面度o架.. 我想o的手手腳腳都肥o的呀!

新居

今日同一眾姊妹到Ada o既新居一起商議Ada 新婚當日 o既 rundown。 走過新居大堂，就有一所圖書館，大家都抱住睇樓般心情，嚷著要入內參觀... 可惜一入到圖書館大門，就發現自己入了自修室一樣，好靜，只聽到大家o既腳步聲，翻書也要份外輕力，因為怕嘈親別人.. 雖然真係過份地寧靜，但不失為一個自修o既好地方。

圖書館對面係一個室外泳池，沿著泳池走，便是 Ada 住所o既入口。 一入屋就很喜歡了，兩房一廰，廚房同洗手間都好大。間隔都好實用，仲有個幾別緻o既小露台，景觀頗開洋，而且新屋o既裝修亦好有格調。 主人房主色係紫色，加埋盞黑色燈好有Anna Sui Feel..

經過一大輪參觀和女主人o既講解後，就開始傾下當日o既工作分配同rundown。準新娘巳經預備好流程o既大綱，我地都只係幫手加加減減o的細節。 至於玩新郎一part就有待眾姊妹不日再傾討喇.，由於大部份兄弟姊妹都係教友，大家要o念比較斯文o既遊戲，真係有點難度...

P.S.
嘩!我被委派為新娘打紅傘呀，而家有o的緊張添...

穿耳環

第一次穿耳環係大約小學三，四年級吧... 當時媽咪帶我去了一間金舖，請職員幫我穿耳，然後就有位哥哥叫媽咪同我先坐低。 一坐低，那位哥哥就問我那個月份生日，因為佢地耳環顏色是按月份分排的，例如一月是粉紅色，二月係黃色等.... 我出生o既月份應該係白色的，不過我卻揀左十一月份，因為十一月份用的係我最鍾意o既綠色。

我穿耳o既時候巳經係用射鎗的，好快就穿好，不過話無痛穿耳係騙人的，射鎗打落去耳珠o既時候總有一點點痛的。

好唔好彩，穿耳了不久就開始發炎，我唔可以再戴那對綠色耳環了，於是媽咪就要我戴她的純金耳環。(不過媽媽的金耳環很大的....) 返到學校，老師話我戴金耳環太過"老積"，叫我下次唔好再戴返學。 我惟有照做，因為我沒有其他耳環，所以索性唔戴... 過左一排，發炎o既耳珠好番晒，而且完全瘉合，沒錯，係完完全全的瘉合，連一支針也穿不過去。

直到考完會考，某日同媽咪出街，經過那些掛著"無痛穿耳"o的店舖，媽媽又問我好唔好再穿耳，想了一會的我，最終都再次穿耳。是次穿耳好成功，直到而家無發炎。

你知道今日係什麼大日子嗎?

10月12日究竟係乜大日子呢? 咪就係世界視覺日。 如果你都有哩個奧比斯襟章，記得一齊戴上，關懷全球失明人士喇。 其實有無襟章的你，都可以隨時捐錢畀奧比斯o架!

恭喜晒呀~

還記得當時係我入行第二年，還是跟Polly出job，她常常接到電話，之後.... "嘩!!真o架?!幾時呀?恭喜晒恭喜晒......" 同類型o既電話真係o黎得好密。 有一排Polly自己都話收紅色炸彈收得太多喇，同埋要做姊妹，真係都幾攰。今年我都開始感受到當年Polly o既心情... 不過知道自己的友好找到o岩o既另一半，一起組織一個屬於他們o既家庭，係一件令人高興o既事。

Ada, Anby, Angel, Bonnie, Bessie, Celia, Eva, Eric, Freddie & Tobby, Polly, Winnie恭喜晒呀，祝你們幸福快樂~~

P.S
明年一月真係好好年嗎? 我知道的就巳有三對新人將會分別係明年1月19日, 1月20日同 1月21日結婚了..

瘀

今朝一早食完早餐，準備返工o既時候唔小心被自己個抽屜夾親對腳，瘀左呀.. 仲有少少痛添.. >~<

Hello Kitty

沉日剛收到好友在日本買給我的手信.. 好靚呀.. 友人話知道我唔抗拒Hello Kitty, 應該會喜歡這份手信。

其實我唔係唔抗拒 , 應該係我好鍾意至o岩... 還記得我在小學時候，我對Hello Kitty簡直係狂熱.. 我沒有擁有好多Hello Kitty物品，但我總是用著Hello Kitty鐵筆盒，鉛蕊筆，間尺和橡皮膠。

以前好鍾意到文具鋪逛，看看有什麽新文具 。(其實直至現在都係.. 出左黎做野，跟本唔需要自己買文具，但我仍然喜歡到文具鋪逛的 )

當時o既鐵筆盒算昂貴，但我是一年買一個新的Hello Kitty兩層筆盒。 筆盒裏總是有兩塊橡皮膠，一是普通的 (記得大約兩蚊一塊)，另一塊當然係我最愛o既Hello Kitty啦。 不過因為當時佢賣成六七蚊一塊，買左真係唔捨得用，只好放在筆盒裡欣賞吧了....

小學時代，同學們大多喜歡Snoopy和Little Twins Star，而不大喜歡Hello Kitty。但不知為何，每一個同學仔坐完我隔離，都被我感染了，個個變得熱愛Hello Kitty，真是奇怪!

我為相機而生?

上次陪Fian買相機時,大家異口同聲地話鍾意Pansonic部粉紅色相機。 Fian買時，自己明明話左唔再買相機，因為自己已經有兩部。 其實哩個購買o既心一直冇變... 沉日最終都係忍唔到手...

不過我都有為今次買相機想好了以下supportings:

• 舊o既個monitor太細, 睇得唔清楚, 好多時返到屋企upload時先發現o的相好濛
• 舊相機只有digital zoom
• 新相機有optical zoom, zoom 境唔會變濛
• 新相機個monitor 大o的, 可以睇清楚o的相
• 新相機有防震拍功能
• 粉紅色真係好靚 (不過最終我買左部黑色)
• 我月尾會去旅行，到時新相機可以大派用場....

其實以上有部份都只係藉口，部舊機其實都仲好地地.. 但我紿終買了部新的。