行山

都好一段時間冇行山喇.. 難得大家就到時間，我地又原班人馬，舊地重遊.. 再次行吓哩個好多馬騮嘅金山郊野公園。

不過我地今次行第二條route，行衞奕信徑去搵城門水塘。都ok好行，唔係太多梯級，好啱我哩啲少運動嘅人行 =p

行完山，搭車嘅時候就feel到肚餓.. 竟然好想食McDonald喎.. 結果大家都陪左我去食，真係happy~



****************************************************************************************

搵左個阿叔幫我地影合照.. 阿叔有個人堅持，佢唔埋我地想點影，總之佢做決定.. 不過佢動作唔快，但個太陽又晒，我同Joann都矇晒眼都未影到一張相... 唔知點解阿叔影到我"咩"埋一邊嘅??!! 真係好funny!!

4th Painting - DONE!!!

今日又用左三個鐘去畫畫... 之前老師明明講過個海要畫第二個layer，但今日畫完船o果part，佢竟然叫我簽名喇... 佢講因為佢覺得我第一個layer 都巳經夠深色喎.. 睇睇吓都ok，唔駛畫多一個layer.. 所以就係我意料之外完成左幅畫lu..

畫完畫又去左join cellmate 嘅BBQ.. 今晚好感恩呀.. 我地燒完晒所有食物，走嘅時候先開始落雨呀.. 真係好感謝天父讓我地有好天氣BBQ gathering ^^

Funny cell time =)

今晚真係好開心呀... 除左我可以係短時間完成今次嘅查經 (不過要多謝Victor導師幫我係"彼得講道"上作小補充)，可以鬆一口氣之外，今晚仲係我地cell 為一，二月之星慶祝生日。

完左查經，我地一齊去組長屋企開生日會.. 今晚可謂"金句之夜"...

Jocely 嘅 : 「我成功轉team，從一個火坑跳到去另一個屎坑.... 」 「"火坑"會被火燒，有生命危險。屎坑只係污髒，會有執乾淨嘅一日...」

當Jacmila 問 Jocelyn:「咁你有冇junior幫你手架?」 Jocelyn confirm無，係one man bank... Jackson就答咀:「話明係屎坑，就只係得一個人可以坐啦.. 邊到容納到第二個人架?」 我地個個笑到收唔到聲...

跟住Allie 分享到佢同事迷信篤信風水，話佢個師父好準，因為師父話佢新年後有機會轉工，而佢又真係新年後轉工... (但俄地個個都知啲公司都係新年前派bonus，啲人等派完bonus先走，咁新年一定相對多空缺嘅.....) Terence大佬答咀: 「我個師父都好準，一早知道我會爆水管... 不過佢係水喉師父... 」 當我提及同事有手患，大佬又上身:「你都叫你同事搵番個師父... 我識有個師父好準架.... 不過今次係針灸師父呀!!!」 跟住成晚有好多師父出現... 好似裝潢師父同麵包師父等...

最後到Jackson 提及佢同Ally婚期嘅事，講到Ally 工作好忙，而Jackson 自己嘅Time management好差... Jacmila 又問:「咁Ally time management 得唔得架?」 Jackson 答得好妙:「Ally time management ok，但佢無time 去manage... 」 真係好鬼搞笑... 成晚嘅分享，真係笑多過乜... 個個都話笑到個權骨好攰 =p

Today's progress

之前因為農曆新年，Centre休市唔開，等到頸都長，終於有得畫畫喇... 今日又係唔覺唔覺又用左三個鐘呀!! 而家老師都唔係好埋我，俾好少instructions，不過都好嘅，自己落手落腳畫晒，成功感會多啲嘛.. 今日進度良好，個湖完成左第一個layer，期待下一堂上第二個layer，咁幅畫就差唔多完成，不過唔知仲要畫多幾多個鐘先得呢?!

等

今日下晝去BB Chris 生日會，原本打算3點去到同BB玩，點知差唔多成3 點先去到Time Square等的士... 係.. 我去到的士站巳有人龍，十零個人啦... 但我真係估唔到我要等足一個鐘... 上到的士巳經過左4點... 係哩1 個鐘等待嘅時候，我不停安慰自己這是神俾我一個訓練，好好訓練一吓我嘅耐性...

好彩去到BB屋企，BB好快就肯同我玩，仲不時向我微笑... 佢個笑容真係好甜呀!!仲有慶幸BB對我送俾佢嘅玩具感興趣.. 不時玩到笑.. BB Chris，你真係好鬼得意呀... 有你俾我嘅笑容，乜都補番晒呀~

初三團拜

Rainy快要移民lu.. 原來佢帶左我地公司個cell 都大大話話成十幾年喇... 好彩我都有幸係佢未走之先，join左佢地個小組。 適逢農曆新年大假，我地就搞番個團拜兼farewell party...

是日團拜地點係錦繡花園，雖然係遠左啲，不過好彩有得坐同事嘅順風車，如果唔係嘅話，一定要搭好耐車先入到去lu。 我地入到去，就立即參觀吓大屋啦，大家都係三樓露台，一面遠眺深圳嘅遠景，一面傾吓偈。 等齊人，我地又獻詩。 不過因為我地之前無夾過歌，當中有人無睇清楚email，對獻詩一事毫不知情添，所以當然唱得不太好啦.. 我地一心唸住送俾Rainy 的.. 點知Rainy聽完之後，反送(唱)其中一首俾我地添.. Rainy唱得好好聽架，我地真係失禮晒.. =p

唱完歌就開始BBQ 同打邊爐 (mainly煮蔬菜同烏冬)，大家一路BBQ，一路傾想當年，談近況。雖然有一部份嘅人，我都係第一次見面，但係大家都好融洽。係我地BBQ期間，離我地不遠嘅深圳地區仲放煙花助慶添呀.. 所以大家都好滿足，好開心。