又係劉德華出場嘅時候喇...

因為著開嗰對鞋畀人踩爛左，又適逢個鞋踭又蝕晒，咪畀個藉口自己去買過對新囉。某日放工，一心走去旺角買鞋。一入去小商舖，老闆娘就好欣勤咁叫我隨便睇睇。

我其實都睇中兩對，老闆娘不繼叫我試吓。咁我有心買架，所以咪叫佢拎對畀我試囉。點知試上腳，又覺得唔好睇。咪再睇下第二對囉，試埋第二對都係覺得嘛嘛地，但老闆娘巳經不停問係咪好靚呢?? 講真，我真係唔覺得靚喎...

我巳經過我再睇下先，老闆娘又推介第三對畀我，話我反正試開，不如試埋佢。見都拎埋嚟，咁咪即管試埋佢。 今次著落又真係幾ok 嘅，不過係白色，仲要係少少高踭，並唔係我心中想買嘅鞋款。點知老闆娘四萬咁口問我買邊對，定買晒佢。 我見佢啲鞋都唔平，又試得唔啱心水，咪同佢講唔該，我再睇吓先囉。嘩!! 佢即刻變臉，兼好大反應: 「小姐，你唔係呀嘛，你試咁多，一對都唔買?」

邊個話試左就要買架?? 我係有心買鞋，但你啲鞋款唔啱我嘛，叫我點買得落啫?! 我都好禮貌咁唔該你，同你講我都仲有好多選擇，我想睇埋其他shop 先下決定。 佢竟然同我講，我對你咁好，畀你試咁多，你點解唔選擇我，要去其他舖到選擇???? (吓?? 都話明我想睇埋其他先下決定，又唔係話一定唔返嚟買) 佢跟住仲好大聲咁 " 車" 左一聲... 聽到哩一聲，我好放心咁走出哩間舖，同埋決定唔會再返轉頭。

老闆娘呀老闆娘，今時今日咁嘅服務態度點得o架?? 你唔"車"我 ，我都仲會考慮幫襯你吖，你"車"左，仲點叫你再去你間舖吖...

辛苦

點解搞成咁嘅局面? 我都唔知道... 明明唔想，又偏偏做了出來。

"為何要落淚，落淚仍要一個面對。" 哩句真係好啱駛... 有時真係好想自己一個住，唔開心嘅時候，可以隨時任意豪哭，唔駛怕畀家人知道你唔開心而擔心。

想喊時，但有顧慮，真係好辛苦... 自己唔開心巳經唔好受，但郤在家人面裝作好好地，常常迴避別人目光，(因為我怕佢地見到我眼紅紅)。我就快頂唔順喇...

奇怪，喊完唔係會攰啲嗎? 唔係好可好瞓啲咩? 點解仲會失眠? 點解做極深呼吸都好似冇乜幫助嘅?

痛

咁大個女都未試過咁頭痛... 真係好鬼痛... 噚日一放工(六點sharp走)，就即刻返屋企瞓，瞓到食飯，食飽飯再瞓過，好可惜，一瞓落床，個頭就好痛，痛到我喊左出嚟，我好少頭痛架，都未試過痛成咁... 好彩今朝瞓醒冇事咋!!

真傻定假傻???

「唔該!唔該! 對唔住! 唔該!」
一個外表比較正常的傻人，一路叫嚷，一路從唔算好逼嘅車卡A穿插到車卡B。
「唔該!」逼下逼下，佢就經過朋友R行到我後面。

行車途中，我突然Feel到有野不停"了"我條裙同埋腳，我當然立即向後望下啦!!! 原來佢除低左佢個背囊搵野，都只不過係背囊啫... 不過佢都成日"了"到我。朋友R見我面有難色，都即刻同我調位，變左我企係朋友R前面。個傻人又立即大大聲講:「對唔住!!」 我以為佢同知道我因為佢"了"我而調位，所以同我道歉。 但朋友R則以為佢要落車，所以好心讓路畀佢出。誰不知，個傻人講佢唔係落車。

唔係落車，我地咪當冇事，繼續企係原位囉。點知，佢又係到嚷住:「唔該!唔該! 對唔住! 唔該!」，向企係我身旁位女仕講:「 對唔住!我要扶哩度 (即係我隔離條扶手)。」 奇怪嘅係，之前佢企我後面時，明明巳經有扶手畀佢扶，我同朋友R對調企後，佢又要扶我隔離嗰條?! 佢好明顯係有問題啦!!!!!

朋友R見狀，唯有同我係下一個站落車，急急腳走到前幾卡，再上過車。隔左好幾卡喎，仲唔定過抬油?? 一心唸住都好安全啦，點知又傳嚟幾聲「唔該!唔該! 對唔住! 唔該!」Oh my god!!! 又畀佢跟到嚟.. 我估可能朋友R生得高，所以我地老遠都畀佢見到... 我地真係冇佢辦法，逼住再落車，然後不停急急腳走，又要睇實佢有冇再跟住我地... 今次真係買佢怕，我地決定等下一班車先再上車。

又識得同人講唔該，講對唔住，又識得搵位企，又有千里眼，仲識得玩追蹤，都唔知佢係真傻定假傻??? 唸起佢都驚!!!

世界真細小

剛剛返新工冇耐，就搭Lift時見番好耐冇見啲AA舊同事Shee Tian... 過左兩星期，又係Orientation 見到另一位AA/PWC舊同事兼大同學 Eva。 再過一，兩星期，就係公司 lift lobby 撞到另一個大同學 Travis ..

上幾個星期，我係公司check緊bloombleg機時，突然有個女同事上前同我自己介紹，問我係咪認識柏柏，原來佢係柏柏嘅大學同學.....

今日隔離department 個靚女走過離問我...
A: 你係咪識得Ada 同 Jasper? 我地係中學同學嚟，好friend架!!我係噚日係Jasper屋企見到你個樣... (講到我好似鬼咁出現~ U_U ~)
J: 我同Ada 係大學同學，同Jasper 係預科同學.. 咦?點解你會係Jasper 屋企見到我個樣????
A: 我見到Ada結婚啲相，入面有你個樣...
J: 啊.. 係呀，當日我係伴娘.. (正想問點解當日唔見佢)
A: 不過嗰日我屋企有事所以冇去到..

嘩，個世界真係好細架... 我忽然唸起水記啲gimmick 野"connected" / "Everything is connected" / "People is connected"。今次又幾有道理咁播!!!