Offer

等左五日，今日終於收到電話喇... 心情慨興奮又緊張。 興奮嘅當然係有offer，有機會轉換新嘅工作環境，嘗試新嘅工作nature。但令我緊張嘅係唔知點同老細講。我想last day 係四月尾，但係五月中會上新system，一定有好多野跟，人手本來巳經好唔夠，四月走埋，又好似好衰女咁，經埋C一定做到一腳踢， 而且我又怕老細面黑...

不過，我都係自私，唔唸得咁多，我好相信機會係要自己把握，錯失左就係錯失左，唔係一定可以追得返。大半年前都曾經有opening，但我當時仲想畀多啲時間而家間公司。有時做到冇心機，都會有小小後悔當時冇把握過。好彩前排當我做到好攰同埋唔係咁開心時，又有機會出現。我同自己講我今次要好好把握，就算唔得，自己都總算有試過，有努力過嘛。

雖然決定星期一正式遞信，但禮貌上都要預先通知經理C。經理C 的反應同內容:
1. 吓??? 你唔好嚇我啦....
2. 我都知你好辛苦... 係咪唔鍾意做? 定係頂唔老細成日聲大大?
3. 係咪嗰邊有加人工畀你? 如果你係因為哩個原因，老細都可以加畀你o架
4. 哦, 你想有個穩定啲嘅工作時間，唔係日日咁夜.. 但係除非你要返學啫，如果唔係你咁早收工做乜啫?? (此言真係差異呀... 當時我真係唔知畀乜反應好)
5. 唉，係喎，我地今年啱啱升你職，你咁快就走，你真係吖
6. 你當我朋友，所以預先話畀我聽，咁我唔話畀老細聽住喇，等佢放假放得開心啲啦

真係有啲驚，但係好期待返新工~~

超好人

近聖誔時曾經想買1G M2 Card，我同朋友D去電腦中心格過價，大部份舖都賣成$400 - $420，最平都要$380。由於當時部電話又新買冇耐，一來覺得佢應該未需要咁大memory size，二來，我凝住當我買左之係，佢就會平番，所以，結果都係冇買到。

日前同Senior G 食飯時，提及我想買將1G M2 Card，之後我地去左先逹睇，都仲賣緊$330 - $350。前日係公司收到Senior G個電話..

G: 喂.. 你想買嗰將M2 Card，我係中環間豐澤見到佢賣$290咋
J: 係咩，咁低?! 你點解會係中環??
G: 我今日放假返阿媽到食飯嘛...
J: 哦.. $290 真係好低咁喎... 你係中環邊間見到? 係咪間間都同價? 豐澤收幾點?
G: 應該間間同價嘅，你係咪要知佢收幾點? 我幫你問下喇.. 喂，佢地收7:30PM
J: 嘩，咁早嘅?!! 我都未放工..
G: 唔駛心急啦，你咪第二日食lunch 時先嚟買囉
J: 都得嘅... 不過，如果有人幫我買埋再送到我公司留下就好喇...
G: 呀.. 哩度收到唔好，我聽唔清楚，拜拜!!
J: 好啦，我遲啲去買啦，拜拜!!

過左一陣，Senior G再打嚟話幫我買，仲會送到我公司留下。我攞左將Card 返到office後，立即話畀同事K聽，我的朋友幫我買左memory stick，仲送埋嚟公司樓下畀我添。同事K第一反應..

K: 嘩，咁好人嘅....
J: 係呀，佢真係好好
K: 男定女呀?
J: 男囉
K: 哎吔... 係咪咩你呀???
J: 梗係唔係啦，我地friend 啫，佢個女朋友我都識架。

我真係畀同事K激死，唸埋一邊。事後，我同積奇蓮食晏時，我又將件事話畀佢聽，積奇蓮都大讚我的Senior G 係一個超好人，難怪你同事有咁嘅想法!! 話時話，我的Senior G 真係好好，我都好興幸認識到咁好嘅朋友。

iPod shuffle

噚晚放工後同左舊同事Senior G食飯，唔知因乜事講起ipod，Senior G 就話畀我知前經理P買左個iPod shuffle。 Senior G 話iPod shuffle 有一個shuffle function，將啲歌random咁播 (我覺得唔係乜野特別function，我部古董mp3 player 都有同樣嘅function)。

G: 部iPod shuffle 有個shuffle function，random咁播歌架
P: 我嗰部好正常架，唔會咁架
G: 唔係喎，真係有咁嘅function喎
P: 冇呀，我入左兩首歌啦，佢係順序咁播架..

Senior G 話前經理P仲好認真咁強調佢部機冇問題架，係順序咁播嗰兩首歌。聽到哩到，我真係覺得經理P 好funny，好好笑。哈，其實得兩首歌，shuffle 與否，個playing order 梗係一樣啦!!!

光良音樂會

都有好一段日子沒有去聽演唱會喇... (其實之前我都只係睇過五，六次咁大把) 因為朋友R有免費門券的關係，我地去左睇光良音樂會。

第一次聽「第一次」巳經好喜歡哩首歌，不過當時只知道一個叫王光良的人唱。我連他係咩樣都唔知，還以為佢係台灣人。第二首喜歡嘅歌就係「握你的手」。直至「天堂」，「童話」大熱時，我先第一次睇到佢嘅MV，先知佢個真面目，亦同期得知佢係馬來西亞人而唔係台灣人。我都係到今晚先知佢有英文名叫Michael。

今晚個音樂會有四個guests，分別係衛詩，江美琪，吳克群，同阿牛。除左衛詩之外，全部我都未見過同埋未聽過.... 不過，光良同江美琪合唱的「對你有感覺」都幾好聽。第一次聽江美琪唱歌，我覺得她係唱得之人，因為佢把聲好聽，同埋有唱功。

反觀衛詩，我就覺得佢麻麻地，因為佢一出場時，巳經畀左我一個唔太好嘅印象

光良: 我頭先唱嗰首歌，你有冇聽過?

Jill: (傻笑及無其他反應)

光良: 頭先我唱首歌，你有冇聽過?

Jill: 我聽唔到你講野... 你把聲太溫柔喇 (又傻笑)

光良: (將個咪放近個咀，大大聲咁對住 Jill ) 我頭先首歌叫XXX，你有冇聽過?

Jill: (繼續傻笑) 都係聽唔到..

光良都冇佢咁好氣，惟有介紹將會同Jill 合唱嘅歌名

衛詩佢表演得咁high (好迷幻咁)，所以我對佢大打折扣。二來可能係因為佢一唱就唱快歌，有時一"輪"咀咁，都唔知佢唱緊乜。不過話時話，當佢唱番舒情歌「寧願你永不知道」時就唱得唔錯嘅。

今晚個音樂整體都唔錯，一來，位置算是前排，二來我喜歡嘅歌，光良都有唱到，真好!!!

P.S
我今見識到乜野係熱情歌迷，佢就坐我前幾排，真係好湧躍，好投入。台上歌作出任何提問或request，佢必作答或照做，就算台上歌手無乜request，佢都會久唔久就企係身大嗌，向台上揮手。佢嘅投入程度就係好高，好funny。

乘機偷懶

明明係近傍晚先入院，但我郤乘機請左full day leave， 其實都唔係好過份啫!! 冇理由咁搏命，朝早返工做到傍晚先收工然後由公司去醫院啫... 哈，雖然聽朝一早就要做operation，但我到而家一啲緊張都冇。 可能今次唔係我第一次做operation 掛。以前小學一年級都巳經做過小手術，住過醫院，跟住出院後返左幾日學又再入院。今次個operation畀以前簡單，仲好快可以出院添。唔緊張都好正常的... 不過雖然我唔擔心，但都希望個傷口可以早點完全癒合就好喇..

BATMAN

每日嘅工作有增無減，日日返到公司就起勢咁做，但就就做極都做唔完。Multi-tasking 真係好multi 囉，同時間run好幾個query去sort data，sort entries，sort 得咁上下就開始做comparison。 做做下comparison 又話要update Project A個progress list 。個list未update 完，又話要去開會傾Project E。 出到嚟又要個Project E 個follow up 同埋要完成Project A 個 porgress list。一心唸住做完個progress list，可以專心個Project E 個follow up 同埋抽時間做埋個comparison.. 往往都只係自己一廂情願嘅想法，因為每日總有起碼數十封由老細同經埋C forward 出嚟emails，又要做左哩啲ad hoc 野先得...

我真係可以講句，我every second 都係做緊野，唔似得其他同事咁得閒，得閒到可以成日上網同埋周圍同人傾偈。話時話，我平時真係好少機會同事傾閒偈，同我講得最多閒偈，反而係做project 時成日要call 嘅 IT 同事Y。

記得當我仲係新人嘅時候，開始跟某project，遇到system 上嘅problem要搵同事Y幫手。當時，同事Y唔係好合作，總係求奇畀個解釋耍走我。好多時收完線，再check 下，就會發現個解釋唔valid。 做耐左，合作多左，同事Y對我嘅態度都轉變晒，幾乎係有求必應。

早幾日發現有個account files 唔夾 ledger balance，調查後得知係program bug，要搵人去update 返個account files。但今次連經理C都唔sure 個manual batch 唔入，所以又叫我同IT arrange 個testing enviornment 去試下，所以我又打電話搵同事Y叫佢arrange 下....

J: 你記唔記得充type a 數個batch code 係咪 xxxxx?
Y: ER.... 應該係，不過唔sure
J: 我地要教branch 充數呀，有冇testing environment 畀我試下?
Y: 我幫你arrange 啦，你用enviornment 3 啦
J: 不過我平時唔入batch，冇access right喎，你可以唔可以grant 個temporary access right 畀我?
Y: 得，無問題，你要access 乜野?
J: 我要 "BATMAN"
Y: 唔好啦，而家唔興Batman 喇
J: 吓? 而家入batch 唔係用BATMAN咩?
Y: 唔係.. 而家唔興 Batman喇，興蜘蛛俠嘛.. 講吓笑啫

同事Y開始多野講左，有時仲會同我訴苦添 (因為有時我老細啲request 又確實係幾麻煩的... ) 相熟左，真係唔同啲，起碼唔會再耍我，有時搵佢，會盡力幫我，而家仲會同你講笑添。