玫瑰

花販真有佢地一套，用魚網包住花瓣部份，表面係保護小花，但其實係令花朵看起嚟，還是未開，吸引大家去買。 當我為每朵花拆下魚網時，發現有啲花原來巳經開緊。而且有啲花嘅花瓣仲起皺添。 真係擔心佢地會好快悼謝。 好彩而家，啲花都開得幾燦爛。

媽咪好開心咁叫我為玫瑰花拍照，又叫我每晚放工回家，都要睇下佢地。媽咪話啲花開得咁靚，睇到都會令人心情好啲喎!!

週記

近排工作實在太忙，無暇將每日嘅點滴逐日記下，趁今日有少少私人時間，就寫返個summary啦..

20 Jan 07

二哥緍禮翌日，我如常七點起身，同媽咪一齊食早餐之後就返工。 沉日實在太高興，太忙碌喇，今日精神唔係咁好。 返到公司一開個Lotus Notes，又係一遍紅海。又要花點時間去 archive 同 file 啲 emails。 今日精神真係太差，同埋覺得好攰，集中唔到精神工作，好唔efficient。未到五點就畀自己放工。

今晚第一次到訪朋友R家，心情有少許緊張。晚飯過後，我地去左食甜品。雪糕加蘋果批，yummy ^.^

***********************************************************************************
21 Jan 07

早上六點左右，來自大陸的姑姐叫醒，問我給她那將SD Card嘅價錢... 好快就回到瞓番。直到朋友R來電，才得知巳經係下午一點四十五分喇，朋友R笑我好瞓得。沒法子，呢期工作好繁忙，係需要多點時間去休息。

今晚輪到同事A結婚，係同Team同事，一定要出席恭賀佢小登科之喜。當晚同事A好似有心事般，自發性拿著紅酒不停去朋友面前乾杯。每一席都起碼乾三杯，可能係我多心，我覺得同事件A好似有心事咁，佢咁飲法，真係叫人擔心。

***********************************************************************************
22- 26 Jan 07

每天都要招呼巴黎特派使者X，了解下Project E 嘅requirement 同埋做下testing。使者X好大隻，超高 (有198cm，差唔多兩米高呀)，肥肥地，個樣好似聰明笨伯，幾得意。唯一唔得意嘅係佢好鍾意耍太極，問佢A，佢總唔會直接答你A，一定會講一大埋明知apply 唔到而又好straight forward 嘅thoery先。次次都要追問幾次，同埋經過多番insist 佢，我地要試下個testing enviornment，run 埋EOD。 佢先肯同我地一齊試，不過佢部notebook keyboard 嘅setting 係法文setting，成日要搵番個"A"，"Q"，"M"字，用數字又要加"shift"掣，"5,000.00" 又要打成"5.000,00"，真係唔方便。使者X耍完差唔多兩星期太極，終於要返老家，不過仍然要一大堆outstanding issues... 佢話三月會再返嚟喎.. 到時又周身唔得閒喇。

***********************************************************************************
27 annual dinner

今年公司個Annual ball function outsource 畀出面嘅公司幫手搞，不過反而畀去年遜色。包括攤位遊戲嘅奬品，同埋table gift 都好唔吸引。惟一畀上年優秀的，就係個舞台設計。 今年個theme 係 "back to school"。好無聊，開席前，要大家企立，一同唱所謂嘅校歌，然後聽校長訓話。

上年都有請過氣名歌手表演，但今年只有不知名嘅鬼佬live band ，搞埋晒 disco feel。好嘈好嘈，我好討厭disco feel，佢就偏偏disco 左好耐都唔願停。好難受!

今年冇上年咁好運，只係得到table prize 咋... v_v

19 Jan 07 - 二哥的大日子

18 Jan 07

一早返到公司，就要為Project C 同 Project E忙碌。Update 完 Project C，就要同老闆傾Project E。 Project E 係關於 migration of systems，新野，大家冇information，好多野都係要摸索吓，但老闆成日覺得我地冇乜新嘅findings... 都話明係新野，總要花點時間去study架啦，佢自己都唔知啲野點睇啦。 唉.. 成日話要睇哩樣，睇嗰樣，又話冇野係做唔到嘅，佢講就好容易，但佢我地做起嚟就唔係咁簡單同埋直接做得到，好多野佢都唔知要用好多時間先做得到。好不容易係食晏前趕起其中一part仔，交住功課畀老細先。

放工之後，就去左尖沙咀同太子陪二哥同未來阿嫂攞婚紗，禮服，油畫，晚裝，裙褂同頭飾等.... 全部都係大袋，唔係咁易handle，搞到大家都手忙腳亂。 攞野啲野返屋企後，未來阿嫂先記起佢未買NDS畀佢個姪仔，大家又再出去買，買完再返二哥屋企，大家玩左一陣Wii，又夠鐘出去將軍澳攞襟花同花球。回家洗澡後，我就跟阿嫂入屯門返佢屋企。入到屯門都巳經十一點幾，好快就係吉時上頭。上完頭，執完野，都差唔多一點幾，我同阿嫂就一起做廳長。

************************************************************************************************
19 Jan 07

當我地仲係熟睡當中，聽到吓門聲，我同阿嫂即刻"札"醒去開門，一開燈，係零晨五點咋。唔係我地唔知醒，而係化妝姐姐架車早左到啫。不過都幾唔好意思，佢嚟到時，大家都未瞓醒，全間屋都仲係"黑媽媽"。 化完妝，完埋頭，都巳經太約七點lu.. 我地都未食早餐，二哥已經打電話通知我地佢地而經出發。跟住其他姊妺同埋負責snap shot 嘅攝影師都嚟埋。

再過一陣，我地就巳經見到架花車係樓下，見到佢地拍movie，遲遲都未上嚟。上到嚟，二哥同佢班兄弟係門口吶喊，嚷住要入嚟。由於早上天氣比較寒冷，所以畀佢地入屋先。入到屋，姊妹們當然準備好一系列接新娘遊戲。講真我地啲遊戲好acceptable 同reasonable，不過二哥佢地就唔係好合作，總要我地三催四請先乖乖地去做。我知係佢地嘅策略，目的係拖延時間 ，等吉時到就唔駛玩咁多。 就如佢地所願，我地skip左啲遊戲同懲罰。玩過遊戲，終於可以接新娘。

經過一輪敬茶儀式同埋影相後，便啓程返男家。返到男家之後，又再進行敬茶儀式。儀式過後，係屋企食過午飯，便向尖沙咀文化中心出發。註冊過後，大家只顧拍照，差點將最重要嘅結婚証書遺留下。註完冊，又馬不停蹄地趕去酒樓預備婚宴。二哥佢地朋友/同事多，三十一蓆都爆滿，好熱鬧。好彩所有朋友都好畀面，敬酒時都冇特別為難哩對新人。不過敬酒時，大家講「飲杯!」時，大家太興奮，太大聲，嚇到正在飲奶嘅小可愛(表姐個B仔)，都將奶樽丢下想喊出來咁，不過佢好乖，呵兩下就回覆眼仔碌碌嘅模樣。真係好抵錫。

原來二哥準備左獻唱阿嫂(簡稱"阿Be") 近期最喜愛嘅歌(古巨基嘅「愛得太遲」)，話要憑歌寄意。二哥自己改左歌詞同歌名，叫「娶得靚Be」。我見到阿嫂好感動，好愛心，同埋好sweet 添。

回家洗澡時，我足足花左好幾分鐘去解我個髮髻。我拆左足足五十幾個頂夾，大部份都仲夾得好實，真係好佩服化妝姐姐，一條橡筋都有用過，都可以整個髻整得咁實。勁!!

以下係我嘅角色:
1) 新郎哥嘅妹妺: 幫佢keep住 id card，mobile phone，結婚介子
2) 新娘子嘅伴娘: 負責跟出跟入，幫手換衫扮靚，拎裙尾
3) 解款員: 負責mark 底各親友送贈嘅金飾，加以貼身看管 (個金袋越夜越重，搞到手臂好攰添!!)
4) 臨時演員: 新娘拋下花球，而眾姊妹都不願上前接下，花球著地後，攝影師要新娘同我拎住個花球影相，當係我接下花球

忙碌的週末

今個星期六都係要返工，又係自己一個，又係返朝九晚六。啲野多到做極都做唔完。 原先打算星期六清下Project A嘅工夫，但係星期五晚又話星期一又巴黎特派專員嚟傾下Project E喎。一嚟就嚟一個星期，要我同經理C 去招呼佢，所以變左星期六又要分時間準備Project E。

其實星期六得自己一個返工，我並唔覺得慘，因為橫豎啲野都係得我自己做。不過今個星期六過得唔係咁好，一返到公司就打噴嚏，跟住不停留鼻水，"呻"到個鼻紅晒。v_v

我嘅表妹剛學識水晶花甲，媽咪想阿哥結婚當日靚下，所以今日就去左阿阿姨屋企整水晶甲。我原本冇打算整，不過表妹利用等媽咪啲水晶甲未ready時，就幫我油甲油同埋黐咗花係上面，都幾得意，幾靚架。今日最開心都係可以見到表姐個仔。 小可愛今日剛剛四個月大喇，有16磅，都幾重。佢真係好得意，好鍾意沖涼，一幫佢除衫沖涼，佢就已經笑晒，落到水缸就不停咁腳仔"young"下，真係人見人愛。可惜我病左，所以都唔敢抱佢太耐，怕傳染小可愛。下次好番，我一定抱番佢夠本。

待媽咪整好水晶甲，就同媽咪出左太子meet 二哥同未來阿嫂試晚裝。媽咪一試件晚裝，明顯比上次鬆身，証明減肥有功，所以媽咪特別開心。今次試身行動都好順暢，因為難得啲舖頭冇人，唔駛排長龍。 仲有五日就係二哥嘅大日子喇，真係好想快啲到。不過我好希望當日天氣會暖啲啦!!

Gentlement

今早返工，唔知點解個地鐵特別多人，要等到第三班先上到車。一預備上車，腳板未著地後，就巳經被後面啲人推進車廂內，好不容易先可以企好同理企穩。今日全程都好逼，企定之後，真係郁都唔郁得，因為個地面只係緊緊足夠放平對腳板，再冇多餘嘅空間。

其實個車廂明明己經fully occupied架啦，都唔明點解個個站都仲可以有人逼得入嚟。我覺得有啲人真係好冇禮貌，明明見到個車廂都full晒啦，仲要好粗魯，好用力咁逼入嚟，逼到大家好似骨牌咁，最終又搞到車門要關上五，六次先得 。

每次人逼嘅時候總係容易失平衡，自己明明企定定，但係一有人企唔穩挨過嚟時，自己總係跟住失平衡。由於雙腳又郁唔到，個身就會左搖右擺，連累埋坐隔離嘅人都企唔穩。今日去到佐敦站時，真係畀人逼到，想企直啲都唔得，一啲平衡都冇，我真係好驚，好冇安全感，因為我根本企唔穩，心知車一開我就會做跌。我好擔心咁周圍望，睇下有咩可以畀我借力扶下。不過啲鐵柱離我太遠，我隻手申唔到去扶。但係最近我嗰啲吊落嚟嘅扶手又full晒。正想申高手去搏下扶唔扶到頭頂打橫嗰條鐡柱時，企我對面嘅男士就將佢自己握緊嘅扶手讓左畀我，佢自己就扶打撗嘅鐵柱。 嘩! 真係唔該晒佢，雖然只係一個小小嘅動作，但係真係幫左我好多，所以我好感激哩位gentlement。

Working Saturday

今日如常九點返到office，個office 空空如也。以為得自己一個，應該可以好專心，好快咁清下手頭上嘅jobs，不過我太高估自己嘅能力喇，預計太約lunch time 嘅時候搞掂，結果做到四點幾都仲未做完。個人開始攰同埋覺得灰灰地，決定今日嘅工到此為止，星期一又再早啲返工再做過囉.. 我知，到時一定要好夜先走得，因為嗰日仲有其他reports 要出畀人，但係啲data 又要好晏先有，但經理C又堅持要我即日出畀人。

返屋企途中，路經一個被我遺忘左一排嘅商場，又唸起啲野做極都做唔完，咪唸住入去逛一逛，散下心囉。結果，我好放縱咁shopping，買左唔少衫，又一次將自己嘅壓力轉移到個我間房入面個衣櫃.... 下次心情差都係唔好一個人行街。

老細妙語:「新嘅一年，要多啲OT!!」

今日一返工，經理C知我想在月中請假，就叫我要email 同老細講聲先。 老細話ok，但經理C提醒我: 「今個月會好忙，因為要又有year end reporting，又有intercompany reconciliations，仲有其他projects，所以你要預左會有好多OT，星期六，日都要返工....」

食完晏，老細又叫我同經理C 傾傾 Project Ａ&C ，不過一坐低，老細就同我地講: 「我地傾傾 Project A 嘅 progress，未講之前... 新嘅一年，要多啲OT!! 因為我地有太多projects 係手喇，我想我地完全明白晒每個projects 嘅 progress 同埋problems。 我知我地唔夠時間，去study projects係要時間，所以大家要多啲OT......」 真係好一句「新嘅一年，要多啲OT」，好一件new year gift，自問平時都好勤力，好多時都有三，四個鐘OT，但原來都仲唔夠，一定要做埋星期六，日先至得，真係灰.. 好灰呀。 乜野plan都唔駛lu..


P.S
今日好surprise 收到reception 嘅call，reception 姐姐:「哩度有份courier係你架，送左嚟哩度，佢好趕時間走左，但佢冇講低係邊間公司喎。你嚟reception攞翻啦。」

新的一年，新的開始

話咁快，又到2007 年。新嘅一年，朋友們都紛紛談論來年大計， 當大家都好積極講出自己嘅plan時，我真係有啲唔好意思。 因為我都冇好認真咁去想過。一時間，察覺自己原來咁冇目標，真係有點難受。 都係時候set翻個plan畀自己先。

工作方面，我希望我工作可以more efficient & effective。 因為實在太多projects，個個project我都想handle得好啲，我要學習融會貫通，同時又要再做快啲，希望可以抽多啲時間做好其他daily controls。

Membership 方面，新嘅一年，又要畀錢上HKICPA嘅E-managers 或 e-seminars，今年仲要上最少40 個CPD hours .. 次次想上嗰啲seminars 又成日一早full，仲要係叫人6:30pm去attend。(唉! 平日6:oopm準時放工，都趕唔切去聽啦，更何況要時常OT呢?) 真係有點擔心.. 朋友S話我所謂嘅plan 都係career orientated... 是嗎?真係career orientated 嗎? 我覺得又不算吧，畢竟我唔係一個aggressive 嘅人... 我都係想efficient 啲，想有多啲job security啫。

Personally，我希望新一年開始，可以做到有個balance of life。唔想淨係work hard 而冇得play hard。我唔想再做最夜離開公司的一個。

P.S
今晚睇左「緣份精華遊」(The Holiday)，故事簡單易明，係一套輕鬆嘅小品，都有不少搞笑場面，我都知我笑得太誇張，所以朋友R話我笑得好大聲。真係失禮晒!! 但係我個人就是喜歡這類戲種，因為睇完之後，會令人輕鬆同埋開心啲!!